རི་གྲོང་གི་རེག་ཟིག་ཟུར་ཁ་ཅན།
༡
མཁའ་དབྱིངས་ན་རྒྱུ་བའི་སྤྲིན་པ་དེའི་ཁ་དོག་གི་སེམས་པ་ལས། ལྷོད་ཀྱིས་བབས་ཤིང་རྩྭ་ཐང་ན་འཁྱིལ་བའི་ཁུ་བྱུག་ཅིག་གི་རེ་སྨོན་དེས།ངའི་སེམས་ལྗོངས་སུ་སྔོ་ལྗང་དང་རྨ་ཁ་གཉིས་དུས་གཅིག་ཏུ་སྨིན། དུས་ཚོད་ཀྱི་འབོད་སྐུལ་གྱིས།ཁ་བ་དང་ཁུ་བྱུག་གཉིས་ལྷན་དུ་རྒྱུ་བའི་ཁ་སང་གི་དེ་རིང་གི་དུས་འདི་ལ་ཁྱོད་ཀྱི་བརྩེ་བ་ཡི་བར་གསེང་ན། སྤྱང་ཀི་གང་དེའི་རྐང་རྗེས་ལས་རྙེད་པའི་ལོ་རྒྱུས་ཤིག་གི་གོམ་འགྲོས་ལྕི་མོའི་ངུ་སྒྲ སྐར་མ་ལས་ལྷུང་བའི་སྤང་ལྗོངས་སུ་ཧོལ་གྱིས་རྒྱུགས་དུས། དེ་ནི་རེ་སྒུག་གིས་སྒུལ་བའི་མི་ཆེན་གང་དེའི་འབེལ་གཏམ་ཡིན་ནམ་མྱུ་གུ་གང་གི་སྐྱེས་སྟོབས་ཀྱི་དགོས་སྒྲའི་ཁྲོད་ཀྱི་རྨི་ལམ་གྱི་རྐང་པ་ལགས།
༢
རྩྭ་ཐང་དུ་རལ་བའི་མེ་ལྕེའི་འཕུར་སྐྱོད་ཅིག་གི་འབོད་སྒྲས་བཟི་བའི་ཕ་བོང་གང་གི་གས་ཁ་ལས།ཁྱོད་ཀྱི་མདུན་ལྗོངས་བརྙན་འཕྲིན་ཁང་གི་ལྟག་རྒྱབ་ན་ཧུར་གྱིས་འགུལ། ཁྱོད་ཀྱི་མིང་ནས་འབོད་མཁན་དེའང་སེམས་པ་ཞིག་གི་ལོ་ཏོག་གི་སྙེ་མའི་སྦུགས་སུ་འཚང་བའི་མཁའ་དབྱིངས་ལྷག་མ་ཞིག་ལགས།
༣
དུང་ལྟར་གྲགས་པའི་ཁ་བའི་རྐྱང་བྲོ་ཞིག་དང་འགུལ་རིས་བརྙན་ཐུང་ལས། ཐོག་ལྟར་ལྷུང་བའི་རླུང་བུ་ལྡོམ་པོ་ཞིག མིག་ཤེལ་མཐུག་པོ་ཅིག་གི་ལྗི་ཚད་འདེགས་བཞིན་གངས་ཁྲོད་ཀྱི་ཁ་བའི་འགྱུར་ཁུག་ལ་དྲན་པ་གླན་དུས། དེ་ནི་གཟི་བརྗིད་ཀྱིས་བཟི་བའི་སྦི་རག་དམ་བུ་གང་གི་ཁ་ཕོ་ལས་ལྷུག་ལྷུག་གིས་འདར་བའི་སྐལ་བཟང་མེ་ཏོག་ཅིག་དང་གངས་ལྷ་མེ་ཏོག་ཅིག་ལས་མཆེད་པའི་ལོ་རྒྱུས་ཀྱི་གླགས་བམ་ཧྲལ་ཧྲིལ་ཞིག་གི་མཆུ་མས་བརླན་པའི་ཏན་རྟགས་རྣལ་མ་ལགས།
༤
ད་ལྟ་བོང་རྒན་སྐྱ་ལེ་ཞིག་གི་རྣ་རྩར་འཕུར་བའི་སྦྲང་མའི་དགོད་སྒྲ་ལས་བཞུར་བའི་རྐང་པ་དང་རྣ་བ་སོགས། འགྱུར་ཁུགས་ཀྱིས་དབེན་པའི་རི་གྲོང་གི་གདོང་ལ་ཁ་བ་ལྟར་ལྷུང་ན། ཁྭ་ཏ་གང་དེའི་ངོ་གདོང་ལ་མེ་ཏོག་གི་བདེ་སྐྱིད་ཅིག་ཤུགས་ཀྱིས་འཁོར་ཏེ་ང་ཡི་སེམས་ཁོང་བརྒྱུད་གངས་ཁྲོད་ཀྱི་མེ་ཏོག་ཅིག་གི་སྙིང་ཁར་འཐུམ།
༥
རི་གྲོང་དུ་སྐྱེ་པའི་རྩྭ་ཕྲན་ཞིག་གི་རྒྱབ་གཟུགས་ལས།ངས་ཕ་ཡུལ་གྱི་ངོ་གདོང་ལྷག་མ་ཞིག་རྒྱལ་མོ་རྔུལ་ཆུའི་སྒལ་ཚིགས་བརྒྱུད་དེ་དྲན་པའི་གཏིང་རིམ་ཞིག་ཏུ་འགུལ་གྱིན་པ་མཐོང་བྱུང་། མེ་ཐབ་ལས་ལྕིག་ལྕིག་གིས་སྒུལ་བའི་རེ་གཞག་གི་རླུང་རྟ་དེས། འཇའ་ཚོན་གྱི་རྐང་པ་ཡ་གཅིག་ལ་བརྟེན་ནས་རི་སྒང་གི་ཤིང་ཁང་དེའི་རུམ་དུ་ཉམས་ཆུང་གིས་འཚོ། ངས་ཀྱང་ཅི་སྙམ་པར་ལག་ཟུང་གློག་ཀླད་སྒང་ལ་བཞག་སྟེ་སེམས་ཁོང་གི་ཆུ་བོ་དག་དགུ་ཚིགས་ཀྱི་ངོགས་སུ་སོར་མོའི་རྩེ་རུ་བླངས་ཏེ་ཤོག་ངོས་སུ་སྐྱུག་དགོས་བྱུང་།
༢༠༡༢ལོའི་ཟླ༡༢ཚེས་༦ཉིན་བོད་ལྗོངས་ལྷོ་རོང་དུ།
རྩོམ་ཁུངས། ངེད་དྲ་བ།