ཁ་སང་ངའི་གྲོགས་པོ་ཞིག་གིས་གྲོག་མཁར་གྱི་པར་རིས་ཤིག་སྐད་འཕྲིན་ཐོག་བཀོད་རྗེས། སྐར་མ་ཁ་ཤས་ནང་མཆན་གྱིས་དྲ་ངོས་བཀང་བྱུང་། སྐབས་དེར་ང་ཡིས། འུ་ཚོས་འབུ་གྲོག་མ་ལ་སློབ་སྦྱོང་བྱ་ས་འདུག དཔེར་ན། འཆར་གཞི་འཐེན་སྟངས་དང་། སྒྲིག་ལམ། འདྲ་མཉམ། ཆིག་སྒྲིལ། བརྩོན་འགྲུས་ཀྱི་ཆ་ཞེས་དེའི་བར་འཚང་ཅི་ཐུབ་ཀྱིས་མཆན་འདེབས་ཁུལ་བྱས། ད་ནངས་ཞོགས་ཀ་གཉིད་སད་མ་ཐག་གོམས་ལོབས་ཀྱིས་ཁ་པར་སྒོ་ཕྱེ་དུས་གྲོགས་པོ་གཞན་ཞིག་གིས་གྲོག་མཁར་ངོ་སྤྲོད་ཅིག་བྲིས་ཞེས་ནན་བསྐུལ་བྱས་པར་བརྟེན། དགེ་ཆོས་ཀྱིས་དེའི་སྐོར་ཇི་འདྲ་བྲིས་ཡོད་པ་དྲན་མ་སོས་སྟབས་བཙལ་བ་ཡིན། གཏམ་རྒྱུད་གསེར་ཐང་ལས། གྲོག་མཁར་གྲགས་ཅན་ནི་གྲོག་མ་དཀར་པོ་རྣམས་ཀྱིས་བརྩིགས། གྲོག་མ་དཀར་པོས་རས་བལ་སོགས་ཟ་བས་འཇིགས་པ་ཆེ། གྲོག་མཁར་དེའི་དབྱིབས་ནི་དབང་པོའི་མཆོད་སྡོང་འདྲ་ལ། ནངས་པར་བལྟས་ན་གྲོག་མའི་ཁ་རླངས་དུ་བ་བཞིན་འཕྱུར་ཚུལ། དེའི་ཐོག་དྲང་སྲོང་གྲོག་མཁར་བའི་མིང་ཐོགས་སྟངས་སྒྲུང་སྙིང་རྗེ་བོ་ཞིག་ཀྱང་བྲིས་འདུག དེ་བཞིན་ས་སྐྱ་ལེགས་བཤད་ལས་གྲོག་མའི་སྐོར་འདི་ལྟར་སྣང་། སྲོག་ཆགས་གྲོག་མའི་ཚོགས་འདུས་པས།།སེངྒེའི་ཕྲུ་གུ་བསད་ཅེས་གྲགས།། ཞེས་དང་། སྲོག་ཆགས་གྲོག་མ་མིག་མེད་ཀྱང་།།མིག་ལྡན་གཞན་ལས་ལྷག་པར་མགྱོགས།།ཞེས་གསལ། འབུ་གྲོག་མའི་སྟོབས་ཤུགས་ནི་ལུས་ཕུང་ཆ་ཚད་ལ་བལྟོས་པའི་སྲོག་ཆགས་ཀུན་ལས་ཨང་དང་པོ་རེད་ཟེར་བའང་ཐོས། ཉམས་ཞིབ་པ་དག་གིས། གྲོག་མཁར་ནི་གྲོག་མའི་ཁྱུ་ཚོགས་ཆེན་པོ་ཞིག་གིས་རིགས་རྒྱུད་སྤེལ་ཞིང་མཉམ་རུབ་ཀྱི་སྒྲིག་འཛུགས་སྒོ་ནས་བཟོས་པའི་གྲོག་ཚང་རེད། གྲོག་མཁར་ཆེ་ཤོས་རེའི་ནང་ཧ་ལམ་གྲོག་མ་དུང་ཕྱུར་གསུམ་ལྷག་ཙམ་ཡོད་པར་བཤད། གྲོག་མཁར་གྱི་རྒྱུ་ཆ་ལ་ས་ཕུང་ངམ། ཡང་ན་བྱེ་མ། ཐང་འབྲུ། འཇིམ་པ་སོགས་རྫས་འདྲ་མིན་བསྡུས་ཏེ་བསྐྲུན་པ་དང་། གྲོག་ཚང་ལྟེ་བ་ནི་ས་འོག་ཏུ་བཟོས་ཤིང་འཇུག་སྒོ་གྲོག་མཁར་གྱི་ཐོག་ཀར་ཡོད། གྲོག་མ་ལས་ཀ་བའི་དཔུང་གིས་རྒྱུན་བསྲིངས་ནས་རྡེའུ་དང་ས་ཐོ་ཆུང་ངུ་རྣམས་གྲོག་མའི་མཆུ་ཡིས་ཕྱིར་འདོན་བཞིན་ཚང་གི་སྒོ་འགྲམ་དུ་བསགས་པ་ཁང་བརྩེགས་གཉིས་ཀྱི་ཚད་ཙམ་དུ་བརྩིགས། ད་དུང་ཁོང་ཚོ་ས་ལེ་དབར་ནས་ལེ་དབར་དུ་འགྲུལ་བཞུད་བྱེད་རབས་འདུག འཛམ་གླིང་གི་ཡུལ་ལུང་ ཨེཊ་ལཱན་ཊིག་དང་། ཡུ་རོབ་ལྷོ་ངོས། ཨོ་སི་ཐྲི་ལི་ཡ། ཉི་ཧོང་སོགས་ན་གྲོག་མཁར་མཐོན་པོ་རེ་མཐོང་རྒྱུ་ཡོད་སྐད། རྒྱ་གར་ལྷོ་ཕྱོགས་འབྲས་ཞིང་གི་རྣང་མ་དག་ཏུ་གྲོག་མཁར་མཐོན་པོ་མི་ལུས་ཀྱི་ཚད་ཙམ་རེ་བརྩིགས་ཡོད་པ་ལོ་ཤས་གོང་ངས་ཀྱང་མཐོང་མྱོང་། གཅིག་བྱས་ན་སྐད་ཆ་འདི་འདྲ་བ་བོད་ནང་གི་མི་ཚོར་བཤད་ན་ཡིད་མི་ཆེས་ནའང་ཐང་ལ། འདི་འདྲ་བ་བྲིས་པར་བྱ་རོག་སོར་རྟོག་གི་བསྟན་བཅོས་ཞེས་ཁྲེལ་དགོད་བྱས་ཀྱང་ཆོག

 (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།