ང་ནི་ལུས་བོངས་ཆེ་ཞིང་།རྭ་རྩེ་རྣོ་ལ། རྒྱབ་ན་ཁུ་རྩིད་ཀྱི་རྔམས་འཐུག་པའི་ཁལ་གཡག་ཅིག་ཡིན།
  བདག་པོ་གཞན་ཞིག་གིས་ང་རང་ཆུང་དུས་ནས་ཨ་མ་དང་ཁ་བཀར་ནས་གནས་འདིར་ཁྲིད་དེ་ཡོང་བ་ཡིན་ལ། དེ་དུས་ང་ལ་ཨ་མ་མེད་པའི་སྐྱོ་གདུང་དང་འོ་མ་དྲན་པའི་སྡུག་བསྔལ་བཟོད་གླགས་མེད་པ་སྐྱེས་ཀྱང་། སུ་ལ་ཡང་བཤད་ས་མེད་ལ་སུས་ཀྱང་ཉན་མི་སྲིད་པས། རང་ཉིད་གཅིག་པུ་སྟོང་ལྷང་ལྷང་གི་རྩྭ་ར་ཆུང་ཆུང་དེ་རུ་ངུ་ཤུམ་བྱེད་བཞིན་བསྡད་པ་ཡིན།
  ངས་དྲན་ཚོད་ལ་ངའི་བདག་པོ་ངོ་མ་དེ་ནི་བྱམས་དང་སྙིང་རྗེ་ཆེ་ཞིང་། དད་སེམས་དང་གཏོང་ཕོད་ཆེ་བ་ཞིག་ཡིན་པས་སྐབས་དེའི་ངེད་མ་སྨད་གཉིས་ཀྱི་འཚོ་བ་ཧ་ཅང་སྐྱིད། ཁོས་ཉིན་རྒྱུན་ངེད་གཉིས་ལ་རྩྭ་ཆུ་གང་འཛོམས་དང་ལྷས་ར་གང་བཟང་བཀོད་སྒྲིག་བྱེད་པར་མ་ཟད། ངེད་གཉིས་རི་ལ་འཁྱམས་དུས་སྤྱང་ཀི་སོགས་གཅན་གཟན་སྡིག་ཅན་རྣམས་ཀྱིས་ངེད་གཉིས་ཀྱི་ཚེ་སྲོག་ལ་འཚེ་བ་མི་བྱེད་པའི་ཕྱིར་དུ་ནམ་རྒྱུན་རྗེས་སུ་སྲུང་ལྟ་བྱེད། དེ་དུས་ཀྱི་ང་ནི་བེའུ་ཞིག་ཡིན་ཡང་། ཁོ་ནི་བདག་པོ་སེམས་བཟང་ཞིག་ཡིན་པ་ཤེས་ཡོད། དེ་ནས་གནས་ཚུལ་ཅི་ཞིག་བྱུང་བ་ཡིན་པ་མ་ཤེས་མོད། གློ་བུར་དུ་བདག་པོ་གཞན་ཞིག་གིས་ང་རང་གནས་འདིར་ཁྲིད་དེ་ཡོང་། བདག་པོ་གསར་བ་དེ་ཝ་མོ་ལས་གཡོ་སྒྱུ་ཆེ་ཞིང་། སྤྱང་ཀི་ལས་གཏུམ་སྤྱོད་ཆེ་བ་ཞིག་རེད་པས། དུས་དེ་ནས་བཟུང་ང་ལ་བློ་བདེ་བག་ཕེབས་ཀྱིས་འཚོ་བ་སྐྱེལ་བའི་སྐལ་བ་ཞིག་ཕལ་ཆེར་ཡོད་མ་མྱོང་། ཁོ་ཚང་གི་འབྱོར་འཁོས་ནི་དེ་འདྲའི་ཞན་པོ་མེད་ལ། རྩྭ་ར་ཡངས་ཤིང་རྒྱ་ཆེ་བ་དང་། གནག་ཕྱུགས་ཀྱང་རྩྭ་རའི་ཚད་དང་བསྟུན་པ་ཞིག་ཡོད། ངའི་བསམ་པར་ང་རང་ཡང་གནག་ཕྱུགས་གཞན་པ་རྣམས་དང་འདྲ་བར་རྩྭ་ར་ཆེན་པོ་དེའི་ནང་དུ་འཚོ་བ་སྐྱེལ་དགོས་རྒྱུ་རེད་བསམ་ཀྱང་། བསམ་ཡུལ་ལས་འདས་པ་ཞིག་ནི། བདག་པོས་ཆེད་དུ་རྩྭ་ར་ལག་མཐིལ་ཙམ་ཞིག་ལྕགས་རས་བསྐོར་ནས་ང་དེ་རུ་བཅུག་པ་དང་། སྒོ་ལ་ཟྭ་ཆེན་ཞིག་བརྒྱབ་ནས་ཕྱི་རོལ་དུ་འགྲོ་མི་བཏུབ་པ་ཞིག་བཟོས། རྩྭ་ར་དེ་ནི་སྐྱ་ཐང་ངེ་ཞིག་ཡོད་པའི་ཁར་ཆུ་ཡང་འཛོམས་པོ་མེད་པ་དང་།དགུང་མོར་སླེབས་དུས་ཀྱང་ང་གཅིག་པུར་གནས་དེར་སྡོད་དགོས་པས། ང་ལ་རྣམ་ཀུན་སྤྱང་ཀི་སོགས་གཅན་གཟན་གང་རུང་ཞིག་གིས་རྒོལ་ཨེ་ཡོང་བསམ་པའི་སྐྲག་སྣང་བར་མེད་དུ་སྐྱེས་པས།རྟག་པར་གནག་ཕྱུགས་གཞན་པ་རྣམས་དང་མཉམ་དུ་འཚོ་བ་བསྐྱལ་ན་ཅི་མ་རུང་བསམ་པ་ཞིག་སྐྱེས།འོན་ཏེ་ང་ལ་རང་དབང་དེ་འདྲ་ཞིག་ག་ལ་ཡོད། ཁོ་ཚོ་ནམ་རྒྱུན་རྩྭ་ཆུ་འཛོམ་པའི་གནས་ཀུན་ཏུ་གང་འདོད་ཀྱིས་རྒྱུ་ཆོག་མོད་། ང་ནི་གཟེབ་ཏུ་བཅུག་པའི་བྱིའུ་ཆུང་ནང་བཞིན་རང་དབང་ཟེར་བ་ཞིག་ཡེ་ནས་མེད་པས། སེམས་ལ་སྐྱོ་བ་ཞིག་གཏིང་ནས་སྐྱེས་ཏེ། བདག་པོ་དང་ཨ་མ་དྲན་པའི་མིག་ཆུ་བར་མེད་དུ་ཤོར།འདི་ལྟར་སྐྱ་ཆད་སྔོ་སྡུག་གི་འཚོ་བ་བསྐྱལ་ནས་ལོ་ཟླ་གྲངས་མེད་ཅིག་ཕྱིན་པས། ང་ལ་ན་མཉམ་གཞན་དང་འདྲ་བའི་ཤ་ཤེད་ཅིག་རྒྱས་མ་ཐུབ།
  ཉིན་ཞིག་ལ་བདག་པོས་ལྕགས་ཐུར་ཞིག་གིས་ངའི་སྣ་ཁུང་ལ་བུ་ག་ཕྲ་མོ་ཞིག་བརྟོལ་བ་དང་། དེའི་ནང་དུ་སྣ་གཅུ་ཞེས་པའི་ཤིང་ལུང་གུག་པོ་ཞིག་བཙན་གྱིས་བརྒྱབ། དེ་དུས་ཀྱི་ན་བ་ནི་ཧ་ཅང་བཟོད་གླགས་བྲལ་བ་ཞིག་རེད། ན་ཚོད་རྒས་པའི་གཡག་རྒན་རྣམས་ཀྱིས་བཤད་ན་དེ་ནི་ཁྱེད་རང་ཁལ་གཡག་ཏུ་གྱུར་བའི་རྟགས་རེད་ཟེར། དུས་དེ་ནས་བཟུང་ང་ནི་དབྱར་དགུན་གྱི་དབྱེ་བ་མེད་པར་ཁོ་ཚང་གི་ཅ་ལག་ལྗིད་མོ་ཅི་རིགས་སྐྱེལ་མཁན་གྱི་གཡོག་པོ་ལྟ་བུར་གྱུར། ངེད་ཀྱི་བདག་པོ་དེ་གཏུམ་སྤྱོད་ཅན་ཞིག་ཡིན་པས་དངོས་པོ་སྐྱེལ་བ་དེ་ང་ལ་མཚོན་ན་ཆེས་སྒྲུབ་མི་འདོད་པ་དང་ཆེས་སྡུག་ལྕི་བའི་བྱ་བ་ཞིག་རེད། སྐབས་འགར་ཁལ་སྐྱེལ་དུས་ང་ལ་རྩྭ་ཟ་དབང་ཡང་མེད་པས་ཕོ་བ་ལྟོགས་ནས་ཁལ་མ་ཐེག་པར་ངལ་གསོ་ཅུང་ཙམ་བྱེད་བསམ་ནས་བསྡད་ཀྱང་་། བདག་པོས་ཞེ་སྡང་གིས་རྒྱུན་བུ་དང་ལྕགས་རིགས་སོགས་ལག་ཏུ་གང་ཐོག་གིས་ཤེད་ཅི་ཡོད་བྱས་ཏེ་ངའི་ལུས་ལ་བྲབ་པས། ན་ཟུག་བཟོད་གླགས་མེད་པ་མྱངས་པར་མ་ཟད། ཁོས་ད་དུང་ཁ་ནས་"འདྲེ་ཟོག གདོན་ཟོག ཁྱོད་ཤན་པའི་ལག་ཏུ་འཇོག་དགོས་སམ"ཞེས་རྒྱུན་པར་སྡུག་དམོད་བྱས་པས།ང་ལ་ཞེད་སྣང་དང་སྐྱོ་སྣང་བརྗོད་དཀའ་བ་སྐྱེས་མྱོང་། དེ་ལྟར་ངའི་ཚེ་འདིར་ཨ་མར་བྲལ་བའི་སྡུག་བསྔལ་དང་། བདག་པོས་གཙེས་བའི་སྡུག་བསྔལ། འཚོ་བ་སྐྱོ་བའི་སྡུག་བསྔལ་སོགས་སྡུག་བསྔལ་མང་པོ་སྔ་རྗེས་སུ་བྱུང་མྱོང་ལ། ཆེས་མཛེས་སྡུག་གི་ལང་ཚོའི་དུས་སྐབས་དག་ཀྱང་སྐྱོ་བ་ཁོ་ནས་བསྐྱལ། ད་ནི་ང་རང་ལོ་ན་བགྲེས་པའི་གཡག་རྒན་ཞིག་ཏུ་གྱུར་འདུག སྐབས་འདིར་ཕྱིར་འདང་ཞིག་བརྒྱབ་ན། ངས་ཆེས་བརྗེད་མི་ཐུབ་པ་དང་ཆེས་དྲན་པ་དེ་ནི་ཨ་མ་རེད།
  ཨ་མ་དང་བྲལ་བའི་ཉིན་དེ་ནས་བཟུང་ང་ལ་ཁོ་མོར་ཐེངས་གཅིག་འཇལ་བའི་སྐལ་བའང་ཐོབ་མ་མྱོང་བས་། ང་ངོ་མ་གཡག་ལས་ངན་ཞིག་རེད།
  བདག་པོ་འདི་འདྲ་ཞིག་གི་ཁལ་གཡག་ཏུ་གྱུར་ནས་ངའི་ཆུང་དུས་ཀྱི་ལང་ཚོ་སྡུག་བསྔལ་ཁོ་ནས་འཁྱོལ་ཐབས་བྱས་པས། ང་ངོ་མ་གཡག་ལས་ངན་ཞིག་རེད།
  རེ་བ་ཞིག་ལ་སྐྱེ་བ་རྗེས་མར་ང་རང་བདག་པོ་བཟང་བོ་ཞིག་གི་སྒོ་ཟོག་ཏུ་སྐྱེ་བར་སྨོན།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།