གཤེ་གཤེ་བཏང་བའི་རྒྱུ་མཚན། 

སློབ་ཁང་ནང་དུ།   ང་འདུག་ས་ནི་གྲལ་ཤར་དཀྱིལ་མའི་གྲལ་མགོ་ཡིན་ལ།  ངའི་ལྟག་རྒྱབ་ཏུ་ལྷ་མོ་ཚེ་རིང་དང་རིག་འཛིན་རྡོ་རྗེ་གཉིས་བསྡད་ཡོད།   ཐེངས་ཤིག་ལ་ངས་ལས་བྱ་འབྲི་སྐབས།   རིག་འཛིན་རྡོ་རྗེས་ཅོག་ཙེའི་འོག་ནས་རྐང་བ་བསྲིངས་ཉེས་ཤོར་ཏེ་ངའི་ཨོང་སྟེགས་ལ་ཐོགས་པས།   ང་རང་ཐང་ལ་འགྱེལ་ནས་ཁྲེ་ཙེ་བཅག་པ་མ་ཟད།   རྐང་སྣམ་སྟེང་དུ་སྙུག་ཆུ་ཕོས་པས།   སློབ་གྲོགས་ཚོ་འུར་ཆིལ་ལེར་བགད། 

ང་རང་ངོ་ཚ་དང་ཁོང་ཁྲོ་མཉམ་དུ་ལངས་ཏེ།  བསམ་གཟས་ནས་ལག་གི་ལྕགས་སྨྱུག་གཡུགས་ནས་ཁོའི་འབྲི་དེབ་སྟེང་ལ་སྙུག་ཆུ་ཕོས་པ་མ་ཟད།  ད་དུང་མུ་མཐུད་དུ་སྐད་ཆ་བཤད་རྩིས་བྱེད་སྐབས།  སློབ་ཁྲིད་འཚོགས་པའི་ཅོང་བརྡ་སིང་སིང་དུ་གྲགས་པ་དང་།   དགེ་རྒན་གྱིས་དཔེ་ཆ་དང་ས་སྨྱུག་བཟུང་ནས་སློབ་ཁང་དུ་ཐོན།   སློབ་ཐུན་གང་བོར་ང་ཁོང་ཁྲོ་ལངས་ནས་བསྡད་ཅིང་།   དགེ་རྒན་གྱིས་ཁ་ཡར་འཁོར་གྱིས་སྒོ་སམ་སྟེང་ལ་ཡི་གེ་འབྲི་སྐབས།   ང་རང་མར་འཁོར་ཏེ་སྐྱིན་པ་སྒོག་ལོག་འདྲ་ཞིག་ལེན་ངེས་པའི་བརྡ་རུ།  རིག་འཛིན་རྡོ་རྗེ་ལ་ཁུ་ཚུར་བསྟན་ནས་གཟེང་གཟེང་བྱས་པ་ཡིན།  དེ་དུས།  ཁོའི་ངོ་མདངས་དམར་བོ་ནས་སྐྱ་བོ་དང་མིག་ཆུང་ཟམ་ཟིམ་བྱེད་པར་བལྟས་ན། དེ་ནི་ཕལ་ཆེར།   "ང་འཆུགས་སོང་།   ཐུགས་རྒྱལ་མ་བཞེངས།"ཟེར་བ་དང་འདྲ། 

སློབ་ཁྲིད་གྲོལ་ནས་དགེ་རྒན་ཕྱིར་སོང་མ་ཐག   རིག་འཛིན་རྡོ་རྗེ་ངའི་སྔུན་ལ་བརྒྱུགས་ཡོང་ནས།  "དངོས་གནས་ཐུགས་རྒྱལ་མ་བཞེངས།    ངས་བསམ་གཟས་ནས་བྱས་པ་མིན།  མ་གཞི་ངས་སེམས་ཆུང་མ་བྱས་པས་ཁྱོད་ཀྱི་ཁྲེ་ཙེ་་་  ་་་"ཟེར་ཞོར།  ཁོའི་ལག་གི་ཁྲེ་ཙེ་དེ་ང་ལ་བསྟད་བྱུང་།   ངས་ཁྲེ་ཙེ་ཚུར་བླངས་ནས།  "འོ་ན་ངའི་རྐང་སྣམ་་་  ་་་"ཟེར་ནས་ད་དུང་ཅི་ཞིག་བཤད་རྩིས་བྱེད་སྐབས།   དགེ་རྒན་ཡང་བསྐྱར་སློབ་ཁང་དུ་ཐོན་པས་བཤད་མ་ཐུབ། 

ཕྱི་དྲོར་སློབ་གྲྭ་གྲོལ་ནས་ཡུལ་ལ་ཡོང་རྗེས།   ངས་ཉིན་དེར་བྱུང་བའི་རིག་འཛིན་རྡོ་རྗེ་དང་ངེད་གཉིས་ཀྱི་གནས་ཚུལ་དེ་ཨ་ཕར་བཤད་པ་ཡིན།   མ་བསམས་ས་ནས།  ཨ་ཕ་ཁ་སྤོ་ཁ་ནས་ལངས།  ཞེ་སྤོ་གཏིང་ནས་ལངས་ཏེ།  མིག་གིས་ཕུར་ཚུགས་སུ་བལྟས་ནས།  "ཁྱོད་རང་འདི་འདྲའི་སྤྲོ་ཐུང་ཞིག་ཅི་ལ་ཡིན།   བྱ་བ་ཆུང་ཆུང་ཞིག་ལའང་བཟོད་སྒོམ་བྱེད་མི་ཐུབ་པ་ཅི་རེད།"ཟེར་ནས།   གཤེ་གཤེ་མང་བོ་བཏང་བ་མ་ཟད།   ཨ་མས་བཀག་པ་མིན་ན།   ཁོས་ང་ལ་འགྲམ་ལྕག་གཅིག་ཀྱང་གཞུ་འདོད་པ་འདྲ།  ཐེངས་དེ་ནི།   ཨ་ཕས་ང་ལ་གཤེ་གཤེ་དྲགས་པོ་བཏང་བ་ཐོག་མ་ཡིན་ལ།  ཧ་ལམ་མཐའ་མའང་ཡིན་པ་འདྲ། 

དགོང་མོར་ཉལ་སའི་ནང་ནས།   ཁོང་གིས་ང་ལ་གཤེ་གཤེ་གཏོང་དགོས་པའི་རྒྱུ་མཚན་འདི་ལྟར་བཤད་བྱུང་།   "མི་ཕན་ཚུན་དབར་ལ་བཟོད་སྒོམ་བྱེད་རྒྱུ་དེ་ཧ་ཅང་གལ་ཆེན་ཡིན།   སྒོས་སུ་གཟས་ནས་མ་ཡིན་པར་བྱུང་བའི་དོན་དག་ཕྲན་ཚེགས་ལ་བཟོད་སྒོམ་བྱེད་དགོས་པ་མ་ཟད།   ཡང་སྒོས།  ཕ་རོལ་བས་སེམས་གཏིང་ནས་དགོངས་དག་ཞུ་སྐབས།  ཁྱོད་ཀྱིས་བསམ་ཤེས་མ་བྱས་ན་ག་ལ་འགྲིག   སྤོ་ཐུང་ཐུང་གིས་མྱི་རྫོད།   ལ་ཐུང་ཐུང་གིས་རྟ་རྫོད་ཟེར་བའི་ཁ་དཔེ་ལྟར།   བཟོད་སྒོམ་ཅུང་ཟད་ཀྱང་བྱེད་མི་ཐུབ་པའི་མི་ཡིས་བྱ་བ་ཡག་པོ་མི་འགྲུབ།"ཅེས་དང་།    "ཁྱོད་ཀྱིས་ལྟོས་དང་།   གཅིག་ནས།  རིག་འཛིན་རྡོ་རྗེས་བསམ་གཟས་ནས་བྱས་པ་མ་རེད།   གཉིས་ནས།   ཁྱོད་ལ་དགོངས་དག་ཞུས་པ་རེད།   གསུམ་ནས།   ཁྲེ་ཙེའི་སྐྱིན་པའང་འཇལ་བ་རེད།  གཞན་གྱིས་གཟས་ནས་མ་ཡིན་པའི་ལན་དུ།   ཁྱོད་ཀྱིས་བསམ་གཟས་ནས་རྒོལ་ལན་སློག་སྲོལ་ག་ལ་ཡོད།  སང་ཉིན་ཁྱོད་ཀྱིས་ཁོ་ལ་དགོངས་དག་ཞུ་དགོས།"ཟེར། 

དགོང་མོ་དེར།  ང་ལའང་བློ་འགྱོད་སྐྱེས་བྱུང་།   ངས་ཤེས་བཞིན་དུ་ཁོའི་འབྲི་དེབ་བརླགས་ན་ག་ནས་འགྲིག   དགེ་རྒན་གྱིས་ཀྱང་རྒྱུན་དུ།   སློབ་གྲོགས་ཕན་ཚུན་དབར་ལ་བཟོད་སྒོམ་དང་རོགས་རམ་བྱེད་དགོས་ཟེར་བ་མིན་ནམ།   དགེ་རྒན་གྱིས་ཤེས་ན་ཅི་ལྟར་བྱེད་དམ།  སང་ཉིན་ངས་ཁོ་ལ་ཅི་ལྟར་དགོངས་དག་ཞུས་ན་འགྲིག  

དེ་ལྟར་སེམས་ཞོར།   དགོང་མོར་དེར་ང་རང་རྨི་ལམ་གྱི་ཞིང་ཁམས་འགྲིམས་སོང་།   སང་ནངས་གཉིད་ལས་སད་མ་ཐག   ངས་ཁོ་ལ་ཅི་ལྟར་དགོངས་དག་ཞུ་དགོས་པར་བསམ་བློ་གཏོང་ཞོར་སློབ་གྲྭར་སོང་བ་ཡིན།   སློབ་ཁང་དུ་ཐོན་དུས།  ཁོ་སྔ་མོ་ནས་ཐོན་ཏེ་འདུག་སྟེགས་སུ་བསྡད་འདུག    ང་རང་ངོ་ཚ་ཞོར།  ཁོའི་རྩིབ་ལ་སོང་ནས་ཅི་ཞིག་བཤད་རྩིས་བྱས་པ་ན།   ཁོ་རང་ཡར་ལངས་ཏེ།  "ཁ་སང་གི་དོན་དག་སེམས་ལ་མ་འཛིན།   འུ་གཉིས་སྔར་བཞིན་དུ་གྲོགས་པོ་བཟང་བོ་བཅོས་ན་ཆོག་གམ།"ཟེར་བས།   ངའི་མགྲིན་པ་བརྣངས་ནས།  ཙིག་གེ་ཞིག་ལ།   སྐད་ཆ་ཅི་ཞིག་བཤད་དགོས་པའང་མ་ཤེས་པར་ལུས།   

                             དཔྱད་མཆན་བརྩིས་པ། 

ང་ཚོའི་ལས་བྱ་འབྲི་དེབ་ལ་རིགས་གཉིས་ཡོད།  གཅིག་ནི།  ལས་བྱ་བྲིས་ཚར་རྗེས་འབྲི་དེབ་ཧ་ནི་མཉམ་དུ་དགེ་རྒན་ལ་སྤྲོད་པ་དང་། ཅིག་ཤོས་ནི།  གཙོ་བོ་ནངས་དགོང་གི་ཁྱིམ་གྱི་ལས་བྱ་སྟེ།  དེ་ལ་སྦྱང་དེབ་སྟེང་གི་ལས་བྱ་ཟེར་བ་ཡིན།  དགེ་རྒན་ལ་སྤྲད་པའི་ལས་བྱ་ལ་དགེ་རྒན་གྱིས་དག་བཅོས་དང་ཆད་ལྷག་འཕྲི་སྣོན་བྱེད་པ་མ་ཟད།  ཉིན་རེའི་ལས་བྱའི་གཞུག་ལ་ཟླ་ཚེས་དང་དཔྱད་མཆན་འགོད་པ་ཡིན། 

སྦྱང་དེབ་སྟེང་གི་ལས་བྱ་ལ།  མཚམས་རེར་མ་གཏོགས་དགེ་རྒན་གྱིས་མི་ལྟ་བར་འཛིན་གཙོ་གསང་བདག་གིས་ལྟ་བ་དང་།  ཡང་སྐབས་རེར།  སློབ་གྲོགས་བཞི་རེ་སྐོར་ཁག་གཅིག་ཏུ་བྱས་ནས་ཕན་ཚུན་གྱི་ལས་བྱར་ལྟ་རེས་བྱས་ཏེ་སྐར་མ་རྒྱག་པ་དང་ཆད་པ་གཅོད་པ་སྟེ།  དཔེར་ན།  དོན་ཚན་གཉིས་འཆུགས་ཡོད་པའི་སློབ་མ་ཞིག་ཡིན་ཚེ།  ཁོས་ཁེད་དམ་གབ་ཚིག་གཉིས་རེ་ལ་ལན་ཐོབས་དགོས་པ་དང་།  དོན་ཚན་གསུམ་ནས་བཞི་འཆུགས་ཡོད་པ་ཡིན་ཚེ།  སློབ་མ་གང་དེས།  བོང་བུ་དང་རི་བོང་།  ར་མ་སོགས་ཀྱི་བཟོ་ལྟར་ལད་མོ་བྱས་ནས་དགོད་ཁ་སློང་སྲོལ་ཡོད། 

སློབ་ཁྲིད་མ་བྱས་པའི་སྔོན་ལ།  དགེ་རྒན་ཁ་ཤས་ཀྱིས།  ཐུན་སྔོན་མའི་སློབ་ཁྲིད་ནང་དོན་ལ་ཕྱོགས་བསྡུས་བསྐྱར་སྦྱོང་དང་།  འཆུགས་པའི་ལས་བྱ་ལ་ནན་བཤད།  འགྲིག་ཅིང་གྲལ་དག་ཡིན་པའི་ལས་བྱ་འབྲི་མཁན་གྱི་སློབ་གྲོགས་ལ་བསྟོད་བསྔགས་བྱེད་པ་མ་ཟད།  ཡིག་གཟུགས་རྩོག་པ་དང་ནོར་བ་ཚབས་ཆེན་ཡིན་པའི་སློབ་མ་རྣམས་ལ་གཤེ་གཤེ་གཏོང་ཞིང་།  སློབ་མ་ཁ་ཤས་གྲལ་མགོར་བོས་ནས་ལག་མགོར་འཁྲིད་དབྱུག་གིས་རྒྱག་པ་ཡིན།  ང་རང་ཡང་ཐེངས་འགའ་ལ།  གྲལ་མགོར་སོང་ནས་ལག་པ་བཟེད་མྱོང་བ་དང་།  ལས་བྱའི་དོན་དུ་སེམས་ཁུར་མི་ཉུང་བ་བྱས་མྱོང་། 

ངས་ནམ་རྒྱུན།  རེ་ལྟོས་དང་སེམས་ཁུར་བྱེད་ས་གཞན་ཞིག་ནི།  ཉིན་རེའི་ལས་བྱའི་མཇུག་ཏུ་དགེ་རྒན་གྱིས་དཔྱད་མཆན་ཅི་ཞིག་བྲིས་ཡོད་མེད་དེ་ཡིན།  དགེ་རྒན་མང་ཤོས་ཀྱིས་ལས་བྱའི་མཇུག་ཏུ།  "ཧ་ཅང་བཟང་།   ཤིན་ཏུ་ལེགས།  ངར་བ་རེད།   ངོ་སོ་བསྟོད།  སྲལ་ལེན་བྱོས།"ཞེས་དང་།  "མུ་མཐུད་དུ་འབད་པ་བྱོས་དང་རེ་བ་ཡོད།  你真棒！Good"སོགས་བྲིས་པ་མཐོང་དུས།  ངའི་སེམས་པ་སྤྲོ་སྣང་དང་ཡིད་ཆེས་ཀྱིས་ཁེངས་པ་དང་།  ཡང་དགེ་རྒན་ཉུང་ཤོས་ཀྱིས།  "ལས་བྱ་བྲིས་པ་ཧ་ཅང་བཙོག   ཤིན་ཏུ་ཞན།  རེ་བ་མི་འདུག   བརྗོད་བྱ་ལ་སྙིང་བོ་མི་འདུག   རྗོད་བྱེད་ཚིག་གི་ཡིག་ནོར་ལ་ལྟོས་དང་།"ཞེས་པ་སོགས་བྲིས་འདུག་དུས།   ང་ལ་ཡིད་ཆད་དང་སུན་སྣང་སྐྱེས་པ་མ་ཟད།  སྨྱུག་རིམ་མང་ཞིང་འབྲི་དཀའ་བའི་ཡི་གེ་སྐོར་ཞིག་གི་སྟེང་ལ་ཁོང་ཁྲོའང་ལངས་པ་ཡིན།

བོད་ཡིག་གི་ནང་ནས།  བྲིས་ན་ཆེས་མི་འཁྱོངས་པའི་ཡི་གེ་ནི་"ཝ"ཡིག་དང་"ཨ"ཡིག་ཡིན་པ་དང་།  ངས་དེ་གཉིས་ཇི་ལྟར་གཟབ་ནན་གྱིས་བྲིས་ནའང་།  ཡང་མིན་ན་སྐེད་པ་རྐང་ལག་རོམ་འགྲོ་བ་དང་།  དེ་མིན་ན་འབོ་མཆུ་མགོ་གསུམ་ཕྲ་འགྲོ་བས།  ཡག་པོ་ཞིག་གཏན་ནས་མི་ཡོང་།  དེ་བཞིན་རྒྱ་ཡིག་གི་ནང་ནས།  "藏"དང་"缘"སོགས་ཀྱིས་ཀྱང་ང་ལ་དཀའ་ལས་མི་ཉུང་བར་གཏད་དེ།  ཡི་གེ་དེ་དག་ནི།  ང་ལ་དགེ་རྒན་གྱིས་གཅར་རྡུང་བྱེད་དུ་འཇུག་མཁན་གྱི་གཏེ་བོ་ཡིན་ལ།  དཔྱད་མཆན་བཟང་བོ་མི་འབབ་པའི་རྒྱུ་མཚན་གཙོ་བོ་གཅིག་ཀྱང་ཡིན། 

གང་ལྟར།  དགེ་རྒན་གྱིས་ལས་བྱར་བལྟས་ནས་ཕྱིར་ལ་སྟེར་ཐེངས་རེར།  ངས་ཐོག་དང་པོར་ལྟ་བ་ནི་ལས་བྱའི་མཇུག་གི་དཔྱད་མཆན་ཡིན་ལ།  དཔྱད་མཆན་མི་ལེགས་པ་ཡོད་དུས།  ལྐོག་ནས་བསམ་གཟས་ཏེ་སུབ་པ་དང་སྣོག་པ།  གཤག་པ་སོགས་ཀྱི་ལས་ཀ་བྱས་མྱོང་བ་དང་།  དཔྱད་མཆན་ཡག་པོ་ཡོད་དུས།  འདུག་གྲོགས་ཕན་ཚུན་ལ་བསྟན་ནས་རང་གི་འཇོན་ཐང་ངོམ་པ་ཡིན།   སྒོས་སུ།  ལས་བྱའི་འབྲི་དེབ་སྟེང་གི་དཔྱད་མཆན་ཡག་པོ་བརྩིས་ནས་གྲངས་ཀ་མང་བོ་ལོན་ཚེ།  དེ་དུས་ཀྱི་སྣང་བ་ནི་ཤིན་ཏུ་བསོད་མོ་ཞིག་སྟེ།   དགེ་རྒན་གྱིས་དངོས་སུ་བསྟོད་བསྔགས་བྱས་པ་དང་ཨ་ན་མ་ན་རེད། 

སློབ་སྐབས་གཅིག་གི་མཇུག་ཏུ་སླེབས་དུས།   ཨ་ཕ་དང་ངེད་གཉིས་ཀྱིས་འབྲི་དེབ་སྟེང་གི་དཔྱད་མཆན་ཡག་པོ་རྣམས་ལ་གྲངས་ཀ་ལེན་པ་དང་།  གལ་ཏེ།  དཔྱད་མཆན་གྱི་བསྡོམས་གྲངས་བཞི་བཅུ་ཐམ་པ་ལས་བརྒལ་ཚེ།  ཁོས་ང་རང་ལྷ་སར་ལྟ་སྐོར་དུ་འཁྲིད་པར་ཁས་ལེན་བྱས་ཡོད་མོད།   མང་དུས་དཔྱད་མཆན་ཡག་པོ་སོ་བརྒྱད་སོ་དགུ་ཙམ་དང་། ཉུང་དུས་ཉི་ཤུ་ཡས་མས་མ་གཏོགས་ལེན་མ་ཐུབ་པས།  ང་རང་ལྷ་སར་འགྲོ་འདོད་པའི་རེ་བ་མངོན་གྱུར་མ་བྱུང་ཡང་།  དཔྱད་མཆན་ཡག་པོ་སྐོར་ཞིག་གི་བཀའ་དྲིན་ལ་བརྟེན་ནས།  ཁོས་ང་རང་།  ཟི་ལིང་གྲོང་ཁྱེར་གྱི་བྱིས་པའི་སྤྱི་གླིང་དུ་ཐེངས་འགར་ཁྲིད་མྱོང་།  

རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།