ཞལ་འདེབས་དང་སྐྱིན་ཚབ།

འཇིག་རྟེན་བོད་མིའི་བཤད་སྲོལ་ལ།  ལས་བསམ་སར་མི་འགྲོ་གསེག་སར་འགྲོ། སྡུག་མགོ་ཐོག་ནམ་ཡོང་ཆ་མེད་ཡིན།  ཟེར་བ་ལྟར།  ཉིན་ཞིག་གི་སྔ་དྲོའི་སློབ་གསེང་གི་སྐབས་སུ།  ང་དང་སློབ་གྲོགས་པ་སངས་གཉིས་སློབ་ཁང་ནས་གཞའ་རེས་ཡིབ་རེས་ཀྱིས་རྩེད་མོ་རྩེ་སྐབས།   ངས་ལག་པ་གཡུགས་ཉེས་ཤོར་ཏེ།  སྒོ་འགྲམ་གྱི་སྒེའུ་ཁུང་གཅིག་གི་ཤེལ་སྒོ་ཏིང་སེ་བཅག་སོང་།   སྐབས་དེར།  ང་རྩེད་མོ་བརྩེས་པ་ལ་བློ་འགྱོད་དམ།  དགེ་རྒན་ལ་སྐྲག་སྣང་སྐྱེས་པ་གང་ཡིན་ཆ་མ་འཚལ་མོད།  གློ་བུར་དུ་མགྲིན་པ་བརྣངས་ནས་མིག་ཆུ་ཐ་ར་ར་བཞུར་བྱུང་། 

སློབ་གྲོགས་མང་བོ་ངའི་མཐའ་ཁོར་དུ་རུབ་ནས།  ལ་ལས་སེམས་གསོ་དང་ལ་ལས་དགེ་རྒན་ལ་གཏུག་གི་འགྲོ་ཟེར་ནས་ཟང་ཟིང་ལང་ལོང་བྱེད་པའི་སྐབས་སུ།  སློབ་ཐུན་གསུམ་པ་འཚོགས་པའི་ཅོང་བརྡ་སིང་སིང་དུ་གྲག་པས།  སློབ་གྲོགས་ཚོ་བྱི་བ་ཁུང་ལ་འཛུལ་བ་དང་མཆིལ་བ་ཁྲ་ལ་གཞའ་བ་བཞིན།  རང་རང་གི་འདུག་སྟེགས་སུ་བསྡད་ནས་སློབ་ཚན་འདོན་འགོ་བརྩམས།

ཚན་རྩལ་དགེ་རྒན་འཆད་སྟེགས་སུ་ཡོང་ནས།  ཐུན་སྔོན་མའི་ནང་དོན་ལ་བསྐྱར་སྦྱོང་རགས་ཙམ་བྱས་རྗེས།  སློབ་ཁྲིད་གསར་བ་བྱས་བྱུང་།  ཁོས་སློབ་ཁྲིད་བྱེད་ཞོར་སྒེའུ་ཁུང་གི་ཕྱོགས་སུ་ཐེངས་འགར་བལྟས་ཀྱང་།  སྒེའུ་ཁུང་གི་ཤེལ་སྒོ་དེ་སུས་བཅག་གང་བྱུང་གི་གཏམ་གང་ཡང་མི་འདྲི་བར་མ་ཟད།   གདོང་ལ་འཛུལ་མདངས་ཕྱུང་ཞོར་དང་ལག་པས་ཕྱག་རྒྱ་བྱེད་ཞོར།  སློབ་ཚན་གྱི་ནང་དོན་ཆུ་བཞུར་བཞུར་གྱིས་བཤད།  ཨ་ཙི།   ཁོས་ཤེལ་སྒོ་བཅག་ཡོད་པ་དངོས་གནས་མ་མཐོང་བ་ཡིན་ནམ།   ང་ལ་སྐྱོན་རྗོད་དང་གཅར་རྡུང་མི་བྱེད་དོན་ཅི་ཡིན་ནམ།   ང་སྐྲག་ནས།  སྒྱིད་པ་དར་ལྕོག་གཡུག་གཡུག་དང་སྙིང་ཆུང་ལུ་གུ་ལྡིང་ལྡིང་བྱས། 

འོ།   མ་གཞི།   ཁོས་སྒེའུ་ཁུང་གི་ཤེལ་སྒོ་བཅག་པ་སྔ་མོ་ནས་ཤེས་ཡོད་ཀྱང་།   གཅིག་ནས་སྐྱོན་རྗོད་བྱས་ནས་སློབ་ཁྲིད་ཀྱི་དུས་ཚོད་ཆུད་ཟོས་སུ་གཏོང་མ་འདོད་པ་དང་།  གཉིས་ནས་ངའི་གཞུང་དྲང་གི་སྙིང་སྟོབས་ལ་ཚོད་བགམ་བྱེད་བསམས་པས་ཡིན་འདུག

སློབ་ཁྲིད་གྲོལ་རྗེས།  ཁོས་བཤད་རྒྱུར།  "ཡ་སློབ་གྲོགས་ཚོ།  ཅུང་ཙམ་ཁ་རོགས་སྡོད་དང་།  ཉིན་འདི་འགར་ཁྱོད་ཚོའི་འཛིན་བདག་གིས་ནད་གནང་ཞུས་ནས་སློབ་གྲྭར་ཡོང་མེད།   ང་ཁྱོད་ཚོའི་འཛིན་བདག་ཚབ་མ་ཡིན།  འཛིན་བདག་མེད་ཀྱང་། ང་ཚོས་སྔར་བཞིན་སློབ་སྦྱོང་ལ་འབད་པ་དང་སྒྲིག་ལམ་བརྩི་སྲུང་བྱེད་དགོས།"ཞེས་དང་།   ཡང་ང་ཚོའི་སློབ་མ་རེ་རེར་གཟབ་ནན་གྱིས་ཐེངས་གཅིག་བལྟས་རྗེས།  མུ་མཐུད་དུ།  "སྒྲིག་ལམ་བརྩི་སྲུང་ཞེས་པ་ནི།  རང་གི་བྱས་ཉེས་ལ་རང་འགུལ་གྱིས་ངོས་ལེན་དང་།  གང་ལ་གང་མཐུན་གྱིས་ཁ་གསབ་དང་ཡོ་བསྲང་བྱེད་པའང་ཡིན།   དེ་རིང་ཁྱོད་ཚོས་ཤེལ་སྒོ་བཅག་ཡོད་པ་ངས་སྔ་མོ་ནས་མཐོང་།  འོན་ཀྱང་།  ངས་དུས་ཚོད་བརླགས་ནས་སྐྱོན་རྗོད་དང་གཅར་རྡུང་མི་བྱེད་པ་ནི།   དེ་ལ་སྐྱིན་ཚབ་འཇལ་མི་དགོས་པས་མ་ཡིན་པར།  གཙོ་བོ་ཁྱོད་ཚོ་སུ་ལའང་།  གཞུང་དྲང་གིས་རང་སྐྱོན་ངོས་ལེན་བྱེད་པའི་སྙིང་སྟོབས་མཁོ་བ་དེ་རེད་སྙམ།"ཞེས་སོགས་བཤད་བྱུང་། 

དགེ་རྒན་གྱིས་བསམ་ཤེས་གནང་བ་ནི།  སློབ་མ་ཞིག་ལ་མཚོན་ན།  གོང་མ་ལྷ་ཡིས་བདུད་རྩི་བསྩལ་བ་དང་།  རྒྱ་མཚོའི་གཏིང་གི་ནོར་བུ་ལོན་པ་དང་ཨ་ན་མ་ན་རེད།   དེ་ལས་ཀྱང་ཉམས་དགའ་བ་གཞན་ཞིག་ནི།   རེབ་ཐེངས་དེར།   འཛིན་གྲྭའི་ནང་གི་སློབ་གྲོགས་མང་པོས་རང་འགུལ་གྱིས་ཞལ་འདེབས་བརྒྱབ་ནས།  ངས་ཤེལ་སྒོའི་སྐྱིན་ཚབ་འཇལ་བར་རོགས་རམ་བྱས་པ་དེ་ཡིན།  

                            ལུས་པོ་བདེ་ཐང་གི་སྔོན་འགྲོ་ཅི་ཞིག་རེད།  

"ཉི་མ་གནམ་ལ་དུ་ཤར་ལ།  གཙང་དག་དང་གཙང་དག་བྱས་ནས་ཅི་བྱེད་དམ།  འུ་ཚོའི་སློབ་གྲྭ་ལ་ཨ་ལགས་ཤིག་ཕེབས་རྒྱུ་ཡིན་ནམ།" ཞེས་དང་།   "འོ་ལེ།   གནའ་དང་མ་ངེད་ཚང་ལ་ཨ་ལགས་ཕེབས་དུས་ཀྱང་།  འདི་འདྲའི་གཙང་དག་ཅིག་བྱས་མ་མྱོང་།"ཞེས་དང་།  "འུ་ཚོའི་སློབ་གྲྭས་གཙང་དག་བྱེད་པ་དེ།   ལུག་གི་གྲོད་པུ་འཁྲུད་འཁྲུད་དང་ཨ་ཁུས་རྐོང་བུ་འབྱིད་འབྱིད་བྱེད།  ངོ་མ་སུན་སྤྱད་ཅིག་རེད།"

གོང་གི་སྐད་ཆ་དེ་དག་ནི།  ང་ཚོས་སློབ་གྲྭའི་ཁོར་ཡུག་དང་སློབ་ཁང་།  ཉལ་ཁང་དང་སྤྱོད་ཁང་སོགས་ལ་གཙང་སྦྲ་བྱེད་དགོས་པའི་སྐབས་སུ།  ལེ་ལོ་ཅན་གྱི་སློབ་མ་སྐོར་ཞིག་གིས་བཤད་པའི་འཁང་རའི་སྐད་ཆ་རེད།  ཁོ་ཚོས་ཁ་ནས་དེ་ལྟར་བཤད་ཅིང་།  དངོས་སུ་གཙང་དག་བྱེད་སྐབས་ཀྱང་།  རང་ལས་གཞན་འགེལ་དང་དང་རང་མགོ་སྐོར་ཐབས་བྱེད་པར་ཧ་ཅང་དགའ། 

སྤྱིར་ན།   སློབ་གྲྭའི་འགོ་ཁྲིད་དང་དགེ་རྒན།  ཇ་མ།  ལས་བཟོ་བ།  སློབ་མ་སོགས་སུ་ཡིན་རུང་ཚང་མ་མི་ཡིན་པའི་ཆ་ནས།  སོ་སོའི་སྟེང་དུ་བཟང་ངན་དགེ་སྐྱོན་ཟུང་འབྲེལ་དུ་ཡོད་ཅིང་།  ང་ཚོ་སུ་ཡིན་ཡང་ཕན་ཚུན་ལ་གུས་བཀུར་དང་བཟོད་སྒོམ་བྱེད་པ་དང་མཉམ་དུ།  མཚམས་ལ་རེར།  ནད་ལ་རིམ་གྲོ་དང་མཚང་ལ་སྐྱོན་རྗོད་ཟེར་བ་ལྟར།   ཕན་ཚུན་ལ་སྐྱོན་རྗོད་དང་འཁང་ར་འབྱུང་བའི་དུས་ཀྱང་ལོས་ཡོད་མོད།   འོན་ཀྱང་།   གཙང་དག་གི་ཐད་ནས།  འདི་འདྲའི་འཁང་ར་དང་རང་འགན་ཡ་ཡོ་བྱེད་པ་ནི།  གཞན་གྱི་བཀོད་སྒྲིག་བྱས་པ་མ་འགྲིག་པ་མ་ཡིན་པར།  རང་ཉིད་ལས་ཀ་ལ་མ་དགའ་བར་བྱུང་བའི་རྣམ་འགྱུར་ཞིག་རེད། 

ཁ་དཔེ་ཞིག་ལ།  ལས་ནས་ཤི་བ་མེད།། བསྡད་ནས་རུལ་བ་མང་།།  ཟེར་བ་ལྟར།  ང་ཚོས་སློབ་སྦྱོང་བྱེད་པ་དང་སྦྲགས་འོས་འཚམ་གྱི་ལས་ཀ་ལས་རྒྱུའང་ཤིན་ཏུ་དགོས་ངེས་ཤིག་རེད།  ལས་ཀ་ལས་ནས་ལུས་པོ་འགུལ་སྐྱོད་བྱེད་པ་ནི་ང་ཚོ་མིའི་རིགས་ཀྱི་སྲོལ་རྒྱུན་བཟང་བོ་ཞིག་ཡིན་ལ།  དེ་ལ་བརྟེན་ནས།  གནའ་སྔ་མོར་ལུས་པོར་སྨན་བཅོས་དང་བརྟག་ཐབས་བཟང་བོ་མེད་པའི་དུས་སུའང་།  མི་རྣམས་ཀྱི་ལུས་པོ་བདེ་ཐང་དང་ཚེ་རིང་ནད་མེད་བྱུང་མྱོང་བ་རེད། 

སྒོས་སུ།  མི་མང་མཉམ་འདུས་ཀྱི་ས་ཆར།  ཁོར་ཡུག་གཙང་མ་དང་ཁ་དབུགས་དྭངས་མ་ཡོང་རྒྱུ་ནི།  ལུས་པོ་བདེ་སྲུང་གི་སྨན་མཆོག་ཨ་རིའི་རྒྱལ་བོ་དང་།  འགོས་ནད་སྔོན་འགོག་གི་སྦྲུམ་འགོག་ཨ་ལོང་ལྟ་བུ་ཞིག་རེད་སྙམ།  ལུས་པོ་བདེ་ཐང་མེད་དུས།  ང་ཚོས་སློབ་སྦྱོང་བཟང་བོ་བྱེད་འདོད་པ་དང་མ་འོངས་པར་ཕུགས་བསམ་འཆིང་བ་ནི།  ར་མ་འཕགས་ནས་ར་ཁང་བཤིག་འདོད་པ་དང་།  ཙི་གུ་བརྒྱུགས་ནས་བྱང་ལམ་གཅོད་འདོད་པ་དང་གཅིག་པ་གཅིག་རྐྱང་རེད།

ངས་དྲ་སྟེང་ནས་རིག་པ་ལྟར་ན།  གཙང་སྦྲ་ལ་མི་དགའ་བའི་མི་རིགས་དང་ས་ཁུལ་དུ་ནག་ཡམས་བྱུང་བ་ཧ་ཅང་མང་ཞིང་།  ལྷག་པར་དུ།  ནད་རིགས་སྣ་ཚོགས་འགོས་སླ་བ་ནི།  རྩྭ་སྐྱ་ལ་མེ་དཔུང་མཆེད་པ་དང་འདྲ་བར།  གཙང་དག་མི་བྱེད་པའི་མི་བརྒྱ་ཆའི་བདུན་ཅུ་ནས་བརྒྱད་ཅུ་ལྷག་ཙམ།  དེ་འདྲས་ནད་ཡམས་ཀྱིས་ཤི་ཡིན་ཡོད་ཟེར།

སྨན་པ་མཁས་པ་སྐོར་ཞིག་གིས་བརྗོད་པ་ལྟར་ན།   བཅོས་དཀའ་བའི་ཨ་ཙིའི་ནད་དུག་དེའང་།  ཐོག་མར་མ་བྱུང་བའི་སྔོན་ལ། གཙང་སྦྲ་ལ་དོ་སྣང་དང་སྔོན་འགོག་ལ་དོ་ཁུར་བྱས་པ་ཡིན་ན།  འགོས་སླ་བའི་ནད་རིགས་གཞན་པ་འགའ་ཤོས་དང་མི་འདྲ་བར།  དེ་འདྲའི་འགོས་སླ་བ་ཞིག་མ་མིན་པར་གསུངས་ཤིང་།  ཡང་དེང་རབས་ཀྱི་སྤྱི་ཚོགས་རིག་པ་བ་སྐོར་ཞིག་གིས་བཤད་པ་ལྟར་ན།  མ་འོངས་པར།  འཛམ་གླིང་གི་ཆེས་ཆེ་བའི་ཉེན་ཁ་ནི་རྒྱལ་ཁབ་དང་ས་ཁུལ་དབར་གྱི་དམག་འཁྲུག་གི་འཇིགས་པ་མ་ཡིན་པར།  ལུས་ཕུང་གི་གཙང་སྦྲ་དང་ཟས་རིགས་ལ་དོ་སྣང་མ་བྱས་པ་ལས་བྱུང་བའི་ནད་རིགས་ཡིན་ཞེས་གསུངས། 

དེའི་རྐྱེན་གྱིས།  སློབ་གྲྭ་ཞིག་གི་ཁོར་ཡུག་དང་ཁ་དབུགས་གཙང་མ་ཡོང་རྒྱུ་ནི།  ཨ་ལགས་ག་གེ་མོ་ཞིག་ཕེབས་པ་ལས་ཀྱང་ཧ་ཅང་གལ་ཆེན་རེད་ལ།  མཆོད་རྐོང་གཙང་མ་བྱེད་པ་ལས་ཀྱང་།  རང་རང་གི་དཀར་ཡོལ་ཐུར་མ་དང་མགོ་རྐང་སྐེ་གསུམ།  ཕྱི་ལྭ་ནང་ལྭ།  སློབ་ཁང་ཉལ་ཁང་སོགས་གཙང་མ་བྱེད་རྒྱུ་ནི་ཤིན་ཏུ་འགངས་ཆེན་རེད་སྙམ། 

རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།