ཨན་གྱིས་ཁ་བས་གཞུས་པའི་སྐོར།
                          ཁི་ལེ་མཱང་མ་རོ་ཡིས་བརྩམས།
ཨན་གྱིས་ཀུ་རེ་བརྩེས་ནས་ང་ལ་ནི།
གྲང་རེག་ལྡན་འོས་ཁ་བ་རྡོག་པོས་གཞུས།
ཡིན་ཡང་ང་ནི་གློ་བུར་མེ་འབར་ནས།
ཁ་བ་ལ་ཡང་དྲོད་ཀྱི་འདུ་ཤེས་རྙེད།
མེ་ནི་གསང་བས་ཁ་བར་ཞུགས་པས་ན།
ང་ནི་མི་འབར་གནས་ས་རྙེད་འགྱུར་རམ།
ཨན་ལགས་ཁྱོད་ཀྱི་མཉེས་གཤིན་ཁོ་ན་ཡིས།
ང་ལ་འབར་བའི་ཚ་གདུང་བཅིལ་ནུས་ཏེ།
ཐབས་ནི་ཆུ་དང་གངས་དང་ཆབ་རོམ་མིན།
ང་ཡི་མེ་དང་རིགས་མཚུངས་དེ་ཡིས་སོ།
   སྒྱུར་མཁན་གྱི་མཆན།
༡ ཨན་ཟེར་པ་ནི་བུ་མོ་ཞིག་གི་མིང་ངོ༌།།
༢ རྩོམ་པ་པོ་ཁི་མེ་མཱང་མ་རོ(1496—1544)ནི་སྐབས་ཤིག་གི་ཧྥ་རན་སེའི་རྒྱལ་པོ་ཧྥ་རན་སོ་ཝ་ཟི་དང་པོ(Francois Premier)ཞེས་
བྱ་བའི་སྐུ་འཁོར་བ་ཞིག་ཡིན་ལ། ཕྱིས་སུ་རྒྱལ་བློན་སྐུ་དྲག་ཚོས་ཁོང་ཡེ་ཤུའི་ཆོས་ལུགས་ཀྱི་བསྒྱུར་བཅོས་ལས་འགུལ་ལ་ཞུགས་གནང་པར་
དོགས་པ་ཟོས་རྐྱེན། དབྱི་ཏ་ལིའི་རྒྱལ་ཁབ་ཏུ་སྐྱབས་བཅོལ་གནང་ནས་བཞུགས་ཤིང་སྐུ་རྐྱང་ངང་ཡུལ་དེར་དགོངས་པ་རྫོགས་པ་རེད།
ཁོང་གི་བརྩམས་ཆོས་ནི། ཁ་གསལ་ཞིང་གསར་གཏོད་ཀྱི་ཁྱད་ཆོས་ལྡན་པ་ཞིག་ཡིན་པས། ཧྥ་རན་སེའི་སྙན་ངག་པ་གྲགས་ཅན་རྣམས་
ཀྱིས་བསྟོད་བསྔགས་བཏང་དང་གཏོང་གིན་པ་ཞིག་ཡིན་འདུག
     (ཆོས་ཉིད་དབང་མོས་ཧྥ་རན་སེའི་ཡི་གེ་ནས་བསྒྱུར་པ་དང༌། ལྗང་བུས་བོད་ཡིག་གི་འགྱུར་ལ་བཟོ་བཅོས་ཕྲན་བུ་བྱས)
 
          ༼ མཚན་མོར་བཀག་རྒྱ་བསྡམས་པ།༽
               པོལ་ཨེ་ལུས་ཨར་གྱིས་བརྩམས།
སྒོ་ལ་སྒོ་སྲུང་བཞག་བཞག          ཐབས་ཤེས་ཡོད་རེད་པས།
སྒོ་ལ་སྒོ་ལྕགས་བརྒྱབ་བཞག        ཐབས་ཤེས་ཡོད་རེད་པས།
ཁྲོམ་དང་ལམ་ག་བཀག་བཞག      ཐབས་ཤེས་ཡོད་རེད་པས།
གྲོང་ཁྱེར་བཙན་བཟུང་བྱས་བཞག  ཐབས་ཤེས་ཡོད་རེད་པས།
གྲོང་ཁྱེར་ལྟོགས་ཀྱིས་མནར་བཞག  ཐབས་ཤེས་ཡོད་རེད་པས།
ང་ཚོའི་མཚོན་ཆ་ཤོར་བཞག        ཐབས་ཤེས་ཡོད་རེད་པས།
མཚན་གྱི་ཡོལ་བ་བརྒྱབ་བཞག      ཐབས་ཤེས་ཡོད་རེད་པས།
ང་གཉིས་ལུས་འབྲེལ་བྱུང་སོང༌།     ཐབས་ཤེས་ཡོད་རེད་པས།
    སྒྱུར་མཁན་གྱི་མཆན།
  ༡ སྙན་ངག་འདི་དབུས་སྐད་དང་བསྟུན་ནས་བསྒྱུར་ཡོད་ལ། འདི་ལ་ཐབས་ཤེས་ཡོད་རེད་པས་ཞེས་པ་ནི་ཧྥ་རན་སེའི་སྐད་ལ"Que
 voulez－vous？"ཞེས་པ་དེ་ཡིན་པར། དེའི་ཚིག་རིས་ཀྱི་དོན་ནི"ཁྱེད་རང་ལ་ག་རེ་དགོས་ཀྱིན་ཡོད"ཅེས་པའི་དོན་ཡིན་མོད། བོད་སྐད་
ནང་ལ"ཐབས་ཤེས་ག་རེ་འདུག"ཅེས་དང༌།"ཐབས་ཤེས་འདུག་གས།""ཐབས་ཤེས་མི་འདུག"སོགས་འཇུག་ཚུལ་དུ་མ་ཡོད་འདུག
  ༢ སྙན་ངག་འདི་ནི་འཛམ་གླིང་འཁྲུག་ཆེན་གཉིས་པ་ལངས་ནས་འཇར་མན་དམག་མིས་ཧྥ་རན་སེའི་ཡུལ་ལུང་ལ་བཙན་འཛུལ་
བྱས་པའི་དུས་ཀྱི་གནས་ཚུལ་དང་སེམས་ཁམས་བྲིས་ཡོད་པ་ཞིག་ཡིན་པར། ཀློག་པ་པོ་ལྷན་རྒྱས་ནས་ཀྱང་ཁོར་ཡུག་དེ་ལ་མཉམ་
བཞག་གིས་གཟིགས་ཀློག་མཛད་ན་གོ་བ་ཆེ་རུ་བསྐྱེད་ཐུབ་སྙམ།
        (ཆོས་ཉིད་དབང་མོ་དང་ལྗང་བུས་ཧྥ་རན་སེའི་ཡི་གེ་ནས་བསྒྱུར)

              རྗོར་རྗིས་ཡ།
                       ཧྥི་ལེབ་སུ་པོ་ཡིས་བརྩམས།
ང་ཡི་གཉིད་ཀྱི་བདེ་བ་བཅོམ་སོང༌།                            རྗོར་རྗིས་ཡ།
ང་ཡིས་མཚན་མོའི་ཁྲོད་ལ་མདའ་མོ་འཕེན་གྱིན་ཡོད།       རྗོར་རྗིས་ཡ།
ངས་རིང་ནས་བསྒུག་བསྡད་ཡོད།                               རྗོར་རྗིས་ཡ།
ངས་བསམ་བློ་གཏོང་གིས་ཡོད།                                 རྗོར་རྗིས་ཡ།
མེ་ནི་ཁ་བ་རང་རེད།                                            རྗོར་རྗིས་ཡ།
མཚན་མོ་ནི་ངའི་ཁྱིམ་མཚེས་མ་དེ་རེད།                      རྗོར་རྗིས་ཡ།
ངས་སྟོང་གསུམ་གྱི་སྒྲ་ལ་ཉན་གྱིན་ཡོད།                      རྗོར་རྗིས་ཡ།
དུ་བ་གྱེན་དུ་འགྲོ་བཞིན་པ་མཐོང་གི                         རྗོར་རྗིས་ཡ།
མུ་ནག་ཁྲོད་ང་རང་འཇབ་ཀྱིན་འགྲོ་བཞིན་ཡོད།           རྗོར་རྗིས་ཡ།
ང་རང་རྒྱུག་གིན་རྒྱུག་གིན་སྲང་ལམ་ལ་བསླེབས་སོང༌།   
གྲོང་ཁྱེར་འདབས་རོལ་ལ་བསླེབས་སོང༌།                     རྗོར་རྗིས་ཡ།
གྲོང་ཁྱེར་དེ་སྔོན་མ་ནང་བཞིན་རེད་དེ།                 
ཡིན་ན་ཡང༌།  ང་ལ་ཆ་རྒྱུས་ཡེ་ནས་མེད།                   རྗོར་རྗིས་ཡ།
ངས་གོམ་ཁ་མགྱོགས་བཏང་བར།    
ལྷགས་པ་རྒྱག་གིན་འདུག                                    རྗོར་རྗིས་ཡ།
ང་ཡིས་དབེན་སིམ་གྱི་གྲང་ངར་ཚོར་ཞིང༌།
ང་ལ་འཇིགས་སྣང་གིས་འབོད་བརྡ་གཏོང་གིན་འདུག    རྗོར་རྗིས་ཡ།
ང་འགྲོ་བཞིན་ཡོད།                                           རྗོར་རྗིས་ཡ།
ང་རྒྱུག་གིན་ཡོད།                                             རྗོར་རྗིས་ཡ།
སྤྲིན་པ་དམའ་མོ་དེ་གས་གཏོར་བྱུང་ནས་
མར་ལྷུང་གྲབས་འདུག                                       རྗོར་རྗིས་ཡ།
ངས་ལག་པ་བརྐྱངས་ཀྱིན་ཡོད།                             རྗོར་རྗིས་ཡ།
མིག་ཟུང་མ་བཙུམས་པའི་ངང་་་་                           རྗོར་རྗིས་ཡ།
འབོད་བརྡ་གཏོང་གིན་གཏོང་གིན་་་་་                     རྗོར་རྗིས་ཡ།
ངས་ཁྱེད་ཀྱི་མིང་དེ་འབོད་ཀྱིན་འབོད་ཀྱིན་་་་་་་          རྗོར་རྗིས་ཡ།
ཁྱེད་རང་ཕེབས་ཀྱི་ཡིན་ནམ།                                རྗོར་རྗིས་ཡ།
མགྱོགས་པོར་གྱིས།                                            རྗོར་རྗིས་ཡ།
རྗོར་རྗིས་ཡ།        རྗོར་རྗིས་ཡ།                             རྗོར་རྗིས་ཡ།
ང་ཡི་གཉིད་ཀྱི་བདེ་བ་བཅོམ་སོང༌།                         རྗོར་རྗིས་ཡ།
ངས་ཁྱེད་ལ་བསྒུག་བསྡད་ཡོད།                              རྗོར་རྗིས་ཡ།
    སྒྱུར་མཁན་གྱི་མཆན།
   ༡རྗོར་རྗིས་ཡ(Geogia)ནི་དབྱི་ཏ་ལི་དང༌། ཕོར་ཐུ་རྒལ། སི་པན་སོགས་ཡུལ་ལུང་གི་བུད་མེད་ཀྱི་མིང་ཞིག་ཡིན། 
                        (ཆོས་ཉིད་དབང་མོ་དང་ལྗང་བུས་ཧྥ་རན་སེའི་ཡི་གེ་ནས་བསྒྱུར)

རྩོམ་ཁུངས།