____དེང་རབས་རྒྱ་རིགས་ན་གཞོན་རྩོམ་པ་པོ་ཧན་ཧན་གྱིས་ཞ་མོན་སློབ་ཆེན་དུ་སྤེལ་བའི་གཏམ་བཤད།
             ཚང་མ་བདེ་མོ་ཡིན་ན། འདི་ནི་ང་རང་ཞ་མོན་ལ་ཡོང་ཐེངས་གཉིས་པ་ཡིན་ལ། དེ་ནས་་་་་་འདི་ཕྱོགས་ཀྱི་མཁའ་དབུགས་ཧ་ཅང་གཙང་བར་འདུག་པས། མི་ཚང་མ་འཆམ་འཆམ་དུ་འགྲོ་རྒྱུར་དགའ་བར་ཁག་མི་འདུག ད་ཅི་རྒན་ཏིན་ལགས་ཀྱིས་རྒྱལ་གཅེས་རིང་ལུགས་དང་འབྲེལ་བ་ཡོད་པའི་ཕྱོགས་འགའ་ཞིག་གསུངས་པ་ཐོས་རྗེས། ངས་སྐད་ཆ་ཚིག་གཉིས་དྲན་བྱུང་སྟེ། དེ་ནི་སྔོན་ཆད་གཞན་གྱིས་བཤད་ཟིན་པ་རང་གིས་མཐོང་བ་མ་གཏོགས་ང་རང་གིས་བཤད་པ་མིན། སྐད་ཆ་དང་པོ་ནི། རྒྱལ་གཅེས་རིང་ལུགས་ནི་འཁྱམས་པོ་ཚོའི་ཆེས་མཐར་མཇུག་གི་ཚང་མལ་རེད་ཅེས་པ་དེ་དང་། སྐད་ཆ་གཉིས་པ་ནི། རྒྱལ་གཅེས་རིང་ལུགས་དངོས་མ་ནི་རྒྱལ་ཁབ་འདིར་སྲིད་གཞུང་གིས་གནོད་འཚེ་མི་ཕོག་པར་སྲུང་སྐྱོབ་བྱ་དགོས་ཞེས་པ་དེའོ།། དེ་ནས་་་་་་་་ངས་ཀྱང་དེ་རིང་བཤད་རྒྱུའི་ནང་དོན་ཞིག་གྲ་སྒྲིག་བྱས་ཡོད་པར་མ་ཟད།  ཆེད་དུ་མ་ཡིག་ཅིག་ཀྱང་འཁྱེར་ཡོང་ཡོད།  འདི་ནི་ངས་རང་ཉིད་ལ་ཚོད་འཛིན་བྱ་བའི་ཆེད་དུ་ཡིན་ལ། བཤད་རྒྱུ་མང་དྲགས་ནས་རྣམ་པ་ཚོར་བར་ཆད་རེ་བྱུང་མི་འགྲོ་དོགས་པས་ཀྱང་ཡིན། གང་ལྟར། ད་མགོ་རྩོམས།
            འགོ་ཁྲིད་རྣམ་པ། དགེ་རྒན་རྣམ་པ། སློབ་གྲོགས་རྣམ་པ་ཁྱེད་ཚོ་བདེ་མོ་ཡིན་ན། རྣམ་པ་ཚོས་ཀྲུང་གོ་ཅིའི་ཕྱིར་རིག་གནས་ཀྱི་རྒྱལ་ཁབ་ཆེན་མོ་ཞིག་ཏུ་འགྱུར་མ་ཐུབ་པ་ཤེས་སམ། དེ་ནི་ང་ཚོས་གཏམ་བཤད་མང་ཆེ་ཤས་ཀྱི་སྐབས་སུ་འགོ་ཁྲིད་རྣམ་པ་ཆེས་འགོ་མར་བཞག་ཡོད་ལ། ཡིན་ཡང་ཆེས་འགོ་མར་བཞག་པའི་འགོ་ཁྲིད་རྣམ་པ་ཚོ་ཏག་ཏག་རིག་གནས་མེད་མཁན་འབའ་ཞིག་ཡིན་པས་རེད།  དེར་མ་ཟད།   ཁོ་ཚོ་ནི་རིག་གནས་ལ་སྐྲག་མཁན་དང་། རིག་གནས་ལ་ཞིབ་བཤེར་གནང་མཁན་ཡིན་ལ།  ཁོ་ཚོས་རིག་གནས་ལ་ཚོད་འཛིན་ཀྱང་བྱ་ཐུབ་ཀྱི་ཡོད། དེ་བས།  རྒྱལ་ཁབ་འདི་ཇི་ལྟར་རིག་གནས་ཀྱི་རྒྱལ་ཁབ་ཆེན་མོ་ཞིག་ཏུ་འགྱུར་ཐུབ་ཨང་།  ཆེས་འགོ་མར་འགྱིང་བའི་འགོ་ཁྲིད་པ་རྣམ་པ། ཁྱོད་ཚོས་གསུངས་དང་། 
           སྤྱིར་ཡིན་ན།  ཀྲུང་གོར་རིག་གནས་ཀྱི་རྒྱལ་ཁབ་ཆེན་མོ་ཞིག་ཏུ་འགྱུར་བའི་སྟོབས་ཤུགས་ཅིས་ཀྱང་ཡོད་ངེས་ཏེ།  ངས་ཁྱེད་ཚོར་གཏམ་རྒྱུད་ཅིག་བཤད།  ངས་དུས་དེབ་ཅིག་གཙོ་སྒྲིག་བྱ་སྙིང་ཡོད་མོད། འོན་ཀྱང་།  ད་བར་དུ་པར་སྐྲུན་བྱེད་མ་ཐུབ།  དེ་ནས་་་་་་ སྤྱི་དམངས་རེ་ལ་པར་བསྐྲུན་གྱི་རང་དབང་ཡོད་ལུགས་རྩ་ཁྲིམས་སུ་གཏན་འཁེལ་བྱས་ཡོད་ལ། དེ་བཞིན་འགོ་ཁྲིད་ལ་ཁྱེད་ལ་པར་བསྐྲུན་བྱེད་དུ་མི་འཇུག་པའི་རང་དབང་ཡོད་པར་ཡང་གཏན་འཁེལ་བྱས་ཡོད།  དུས་དེབ་འདི་ས་གནས་གང་མང་ཞིག་ཏུ་ཞིབ་བཤེར་གྱི་ཕྱོགས་ནས་གནད་དོན་སྣ་མང་ཞིག་ལ་འཕྲད་བྱུང་སྟེ།  དུས་དེབ་ཏུ་ཁ་མཚར་རི་མོ་ཞིག་ཡོད། མི་སྣ་གཙོ་བོ་ནི་སྐྱེས་པ་ཞིག་ཡིན་ལ། ཁོས་ལྭ་བ་གྱོན་མེད།  དེ་བས་འདིའང་ཁྲིམས་འགལ་ཡིན་པ་སྨྲ་ཅི་དགོས། རྒྱུ་མཚན་འབྲེལ་ཡོད་ཁྲིམས་ལུགས་སུ་མཚན་མ་གཅེར་བར་བསྟན་ནས་པར་བསྐྲུན་བྱ་མི་ཆོག་པའི་གཏན་འཁེལ་བྱས་ཡོད་པ་རེད། ཡིན་ཡང་འདི་ཙམ་ལ་སྐྱོན་མེད་པར་བསམས་ནས་ང་རང་ཡིད་འཐད་བྱུང་བ་ཡིན། དེ་བས། ངས་དུས་དེབ་དེའི་ཆེས་ཆེ་བའི་logo(ཚོང་རྫས་དང་དཔེ་དེབ་སོགས་ཀྱི་རྟགས་མཚན་གྱི་དོན།)ཞིག་གིས་ཁྲིམས་འགལ་གྱི་གནས་དེ་བསྒྲིབས་པ་ཡིན། འོན་ཏེ།  རྗེས་ནས་པར་བསྐྲུན་ཁང་འདི་ཚོའི་ཞིབ་བཤེར་མཁན་གྱིས་ཨེ་་་་འདི་མི་ཉན། ཁྱོད་ཀྱིས་མི་འདིའི་ལུས་པོའི་ལྟེ་བ་བསྒྲིབས་འདུག་པས། དེའི་ཤུགས་ནས་ཏང་ཀྲུང་དབྱང་མཚོན་གྱི་འདུག་ཅེས་བཤད་བྱུང་།
           སྐབས་དེར།  ངའི་དྲན་ཚུལ་ཡང་རྣམ་པ་ཚོ་དང་གཅིག་མཚུངས་ཡིན་ཏེ།  གྲོགས་པོ་ལགས།  གལ་སྲིད་ཁྱོད་ཀྱིས་བསམ་ཡུལ་ལས་འདས་པའི་འཆར་ཡན་འདི་འདྲ་རྩོམ་རིག་ཞིབ་བཤེར་དུ་མ་བཀོལ་བར་རྩོམ་རིག་གསར་རྩོམ་གྱི་ཕྱོགས་སུ་བཀོལ་བ་ཡིན་ན་ཅི་མ་རུང་ཞེས་པ་དེའོ།། གཏམ་རྒྱུད་འདི་ལས་ངས་རྣམ་པ་ཚོར་བཤད་འདོད་པ་ནི། དོན་དངོས་ཐོག་ང་ཚོ་སུར་ཡང་འཆར་ཡན་གྱི་འཇོན་ནུས་ཡོད་ཤ་སྟག་ཡིན་མོད། འོན་ཀྱང་།  དོན་དག་གང་མང་ཞིག་ང་ཚོས་དྲན་ཆོག་པ་ལས་བསྒྲུབ་མི་ཉན་ལ་བྲི་ཡང་མི་རུང་། ཁྱད་པར་དུ་གནས་ཡུལ་ག་གེ་མོ་ནས་བཤད་ཉན་ནི་མ་རེད།  ང་ཚོའི་བཀག་རྒྱ་དམ་དྲགས་སོང་བ་རེད། འདི་ནི་བཀག་རྒྱས་བཅངས་པའི་རྒྱལ་ཁབ་ཅིག་རེད་ལ།  བཀག་རྒྱས་བཅངས་པའི་རྒྱལ་ཁབ་ཅིག་ཏུ་ཇི་ལྟར་ཕུན་སུམ་ཚོགས་པའི་རིག་གནས་ཤིག་འབྱུང་ཐུབ་ཨང་།  ང་ནི་གཞི་ནས་རང་གཅུན་གྱི་ནུས་པ་ཆེས་ཆུང་བའི་བློ་མཐུན་ཞིག་ཏུ་གྱུར་ཡོད།  ཡིན་ཡང་།  ངས་སྨྱུག་རྩེ་འབྲི་ཤོག་ལ་གཏད་པའི་སྐད་ཅིག་མར་རྣམ་ཀུན་གནས་བབ་ཅིག་ལ་འདང་རྒྱག་མི་བྱེད་ཀ་མེད་རེད་དེ།  ང་ཚོས་ཉེན་རྟོག་པ་འབྲི་མི་ཉན་ལ་འགོ་ཁྲིད་པའང་འབྲི་མི་ཉན།   སྲིད་ཇུས་འབྲི་མི་ཉན་ལ་ལམ་ལུགས་ཀྱང་འབྲི་མི་ཉན། ཁྲིམས་ལུགས་འབྲི་མི་ཉན་ལ་ལོ་རྒྱུས་ཀྱང་འབྲི་མི་ཉན།  བོད་ལྗོངས་འབྲི་མི་ཉན་ལ་ཞིན་ཅང་ཡང་འབྲི་མི་ཉན། འདུ་ཚོགས་འབྲི་མི་ཉན་ལ་ཁྲོམ་སྐོར་ཡང་འབྲི་མི་ཉན། འདོད་པར་སྤྱོད་པ་འབྲི་མི་ཉན་ལ་བཀག་སྡོམ་བྱེད་པའང་འབྲི་མི་ཉན།  ད་དུང་སྒྱུ་རྩལ་ཡང་འབྲི་མི་ཉན། འོན་ཏེ།  ཚངས་སྤྱོད་ཚུལ་མཐུན་གྱི་རྩོམ་ནི་ངས་ཀྱང་འབྲི་མི་འབྲི་ཤེས། ངས་ངོ་མ་ཚངས་སྤྱོད་ཚུལ་མཐུན་ཞེས་པའི་རྩོམ་ཡིག་ཅིག་ལག་ནས་འཁྱོངས་ཐབས་མི་འདུག  ངའང་ཡུའུ་ཆིའུ་ཡུའུ་མ་རེད་ཨ།
             དྲ་ཐོག་ཏུ་བཀོད་པའི་རྩོམ་ཡིག་ལ་ལར་བཀག་རྒྱའི་ཚད་ཐིག་ཅུང་མཐོ་བར་སྣང་། འཁྲབ་གཞུང་འབྲི་བཞིན་པའི་གྲོགས་པོ་མང་བོ་ཞིག་སྟེ།  དཔེར་ན་ཉིན་ཚའེ་ཧྲིན་ལྟ་བུ་གཏམ་བརྗོད་ཟློས་གར་གྱི་འཁྲབ་གཞུང་འབྲི་མཁན་དང་། ད་དུང་གློག་བརྙན་འཁྲབ་གཞུང་འབྲི་མཁན་སོགས་ཁོ་ཚོ་ཚང་མར་སྡུག་བསྔལ་ཇི་འདྲ་ཆེ་ཨང་།  འདི་ལྟའི་རིག་གནས་ཀྱི་ཁོར་ཡུག་ཅིག་ཏུ། རིག་གནས་ཀྱི་རྒྱལ་ཁབ་ཆེན་མོ་ཞིག་ཏུ་འགྱུར་དགོས་ཚེ། ངས་བསམས་ན་འཛམ་བུའི་གླིང་འདིར་ཏག་ཏག་ཀྲུང་གོ་དང་། ཁོ་རེ་ཡ་བྱང་མ། ད་དུང་ཨ་ཧྥུ་ཀན་ནི་སི་ཐན་ལྟ་བུ་ལུས་སོང་ན་ད་གཟོད་རེ་བ་ཡོད་ཀྱི་རེད། ཚང་མས་ཤེས་གསལ་ལྟར། ཁོ་རེ་ཡ་བྱང་མ་ནི་རིག་གནས་བཀག་སྡོམ་ས་ཁུལ་རེད། དེ་ནས་ཨ་ཧྥུ་ཀན་ནི་སི་ཐན་ནི་རྒྱལ་ནང་གི་གནས་བབ་རྙོག་འཛིང་ཆེ་བས་རིག་གནས་ཀྱི་ཕྱོགས་ལ་ཁ་ཡ་བྱེད་ཁོམ་མེད་པ་མིན་ན་རིག་གནས་སྤེལ་དཀའ་རྒྱུ་རེད།  དེ་ལྟ་མོད་ཀྱང་།  ཁོ་ཚོའི་ཁྲོད་ན<<ཤོག་བྱ་སྙེག་མཁན>>ལྟ་བུ་འབྲི་མཁན་ཡང་བྱུང་ཡོད་འདུག ཡིན་ཡང་འདིར་ཡིད་ཕངས་དགོས་པ་ཞིག་ནི་བརྩམས་ཆོས་དེའང་ཨ་ཧྥུ་ཀན་ནི་སི་ཐན་ནས་པར་བསྐྲུན་བྱས་པ་མིན་པ་དེ་རེད། ངས་འདང་བརྒྱབ་ན།  གལ་སྲིད་ཨ་ཧྥུ་ཀན་ནི་སི་ཐན་གྱིས་རྒྱལ་ནང་གི་གནས་བབ་གཙང་སེལ་བྱ་ཐུབ་ཚེ།  ཀྲུང་གོ་ལས་བརྒལ་མི་སྲིད་པའི་ངེས་པ་ཅིས་ཀྱང་མི་འདུག་གོ།
            རྒྱལ་གཅེས་འབྲེལ་འདྲིས་ཟེར་བ་དེ་རུ་ང་ཚོས་ཏག་ཏག་གསུང་རྩོམ་རྣམ་བཞི་དང་ཁུང་མུན་རིང་ལུགས་ཀྱི་ཆེ་བ་བརྗོད་ན་ག་ལ་འགྲིག་སྟེ། དེ་ནི་གཉེན་སྒྲིག་གི་སྐབས་སུ་གཉེན་ཚང་གིས་ཁྱོད་ལ་རྒྱུ་ཡོད་མེད་འདྲི་དུས་ཁྱོས་རང་ཉིད་ཀྱི་ཕ་མེས་ཡང་མེས་ནི་ཕྱུག་པོ་གཏེར་བདག་ཅིག་ཡིན་ཚུལ་ལབ་པ་ལྟ་བུ་ཡིན་པས།  ཕན་ཐོགས་ནི་མ་རེད། མཇུག་འབྲས་འདི་འདྲ་སྨིན་རྐྱེན་ནི་རྣམ་པ་ཚོར་ལན་པ་ག་ལ་ཡིན། ཁོ་རེ་ཡའི་རྗེས་སུ་འགྲོ་ཉེན་པའི་ལམ་བུ་འདི་ང་ཚོ་ཁ་རོག་ཏུ་འདུག་མཁན་རེ་རེས་བཏོད་པར་བཤད་ཀྱང་། ཕྱོགས་གཞན་ཞིག་ནས་ང་ཚོ་ཁོ་རེ་ཡ་ལས་ལྡབ་འགྱུར་གྱིས་ངར་བ་བཤད་མི་དགོས། རྒྱུ་མཚན་ཁོ་རེ་ཡ་རྒྱལ་ཁབ་ཇི་ལྟ་བུ་ཞིག་ཡིན་པ་སུས་ཀྱང་ཤེས་གསལ་ལྟར་རེད། ཡང་གཅིག་བཤད་ན། འདིར་བཞུགས་ཀྱི་ལྷན་རྒྱས་ཀུན་དོན་དམ་པར་ཁ་རོག་ཏུ་འདུག་མཁན་ཏག་ཏག་མིན་པར་ང་ལ་ཡིད་ཆེས་ཡོད། འོན་ཀྱང་ང་ཚོ་ཁ་རོག་ཏུ་འདུག་པར་དགའ་བ་ནི་ཏག་ཏག་འཆམ་མཐུན་བྱས་སོང་བས་རེད།
             ཀྲུང་གོའི་སེར་པོ་(འཁྲིག་སྤྱོད་ཀྱི་ནང་དོན་བཀོད་པའི་དུས་དེབ་དང་དྲ་ཚིགས། གློག་བརྙན་སོགས་མཚོན་ཕྱིར་སྤྱོད་པའི་ཁ་དོག་ཅིག་ཡིན་པ་དེང་དུས་ང་ཚོའི་ཁྲོད་དུའང་རྒྱུན་བཀོལ་དུ་སོང་ཡོད་པས་སོར་བཞག་བྱས་པ་ཡིན།)གཙང་སེལ་གྱི་ལོ་རྒྱུས་ཁྲོད། སློབ་གྲོགས་མང་བོ་ཞིག་ལ་གསལ་ཆ་ཡོད་ཀྱི་རེད། ཅི་བཤད་ཀྱང་ཚང་མ་སློབ་ཆེན་སློབ་མ་རེད།ད་ལྟའི་སློབ་དེབ་འགའ་ཞིག་ཏུ་ནང་དོན་དེའི་སྐོར་མེད་པར་སྲིད་ཀྱང་། ཏིན་ལེ་ཅོན་(邓丽君)དང་ལིའུ་ཝུན་ཀྲིན（刘正文）་སོགས་ནི་འདོད་པ་གླང་སྤྱོད་དང་སྤྱོད་པ་ཁྱི་སྤྱོད་སོགས་ལོག་གཡེམ། ཐ་ཤལ། འཆལ་པོ་སོགས་སུ་བརྩིས་ཡོད་པ་སུས་ཀྱང་ཤེས་གསལ་རེད། འོན་ཏེ། མི་མང་པོ་ཞིག་ཁོ་ཚོའི་བརྩམས་ཆོས་ལ་ལྟ་སྤྲོ་བ་དང་མྱོང་དགའ་བའི་ཤུགས་ཀྱིས་མཐའ་མར་ཁོ་ཚོ་ཡང་ཚངས་སྤྱོད་ཅན་དང་ཡ་རབས་ཚུལ་མཐུན་དུ་ངོས་བཟུང་སོང་ལ།  ཐ་ན་རྒྱལ་ཡོངས་མི་དམངས་ཐམས་ཅད་ཀྱིས་རོལ་ཅིང་མྱོང་བར་གྱུར་སྟབས་ཁོ་ཚོ་ཡང་སེར་པོ་མིན་པ་དང་ཐ་ཤལ་མིན་པ་ཞིག་ཏུ་གྱུར་སོང་བ་རེད། གལ་སྲིད་ང་ཚོས་མཉམ་དུ་རིག་གནས་ཀྱི་ཞིབ་བཤེར་ལ་ངོ་རྒོལ་བྱེད་ཐུབ་པ་ཡིན་ན། ང་ཚོའི་མིང་བརྡའི་བཙོན་རར（རྒྱའི་屏蔽词库ཞེས་པ་སྟེ། དེ་ནི་ཉེས་ཅན་ཁྲིམས་མུན་དུ་བཅུག་པ་ལྟར་རྒྱུན་ལྡན་དུ་སྤྱད་མི་ཆོག་པའི་མིང་བརྡ་སྐོར་ཞིག་ཕྱོགས་སྡོམ་བྱས་ཡོད་པའི་ཚིག་མཛོད་ཅིག་གོ། ）་ཡང་མིའི་རིགས་ལ་ངོ་རྒོལ་བྱེད་པའི་མིང་བརྡ་སྐོར་ཞིག་ཡོད་པ་མ་གཏོགས་གཞན་དག་ཡོད་སྲིད་ཀྱི་མ་རེད། སྐབས་དེར་ང་ཚོས་ད་གཟོད་རིག་གནས་ཀྱི་རྒྱལ་ཁབ་ཆེན་མོ་ཞིག་གསར་བསྐྲུན་བྱ་ཐུབ་ངེས་ཡིན། གོ་རིམ་དེའི་ཁྲོད་དུ། ང་དང་ཁྱོད་ཀྱི་མིང་ཡང་མིང་བརྡའི་བཙོན་ར་དེར་ཚུད་འགྲོའང་སྲིད། འོན་ཏེ། ངས་ཀྱང་བཙོན་ར་དེིའི་ཤོང་ཚད་ལ་ཚད་ཅིག་ཡོད་པར་ཡིད་ཆེས་བྱེད་ཀྱི་ཡོད། དེ་བས། གསར་འཇུག་བྱས་པའི་མིང་བརྡ་རེས་དོན་དམ་པར་བཙོན་ར་དེ་གཞོམ་གཞིག་གཏོང་བཞིན་པ་ཉིད་དོ།།
                 ངས་ང་ཚོའི་གསར་འགྱུར་ལས་གཉེར་པ་དང་། སློབ་གྲོགས་ཚོ། དགེ་རྒན་ཚོ། རིག་གནས་ལ་འཇུག་མཁན། དགའ་མཁན། དུས་དེབ་གཙོ་སྒྲིག་པ་སོགས་ཚང་མས་འབད་འབུངས་ལྷུར་ལེན་བྱས་ནས་མིང་བརྡའི་བཙོན་ར་ཤུལ་མེད་དུ་གཞིག་རྒྱུ་དང་། རིག་གནས་ཞིབ་བཤེར་རྩ་མེད་དུ་གཏོང་བར་རེ་བའི་མེ་ལྕེ་སྦར་བཞིན་ཡོད་ལ། ང་ཚོའི་འགོ་ཁྲིད་དང་སྲིད་གཞུང་ལ་རིག་གནས་རང་དབང་བྱ་རྒྱུར་གདང་ཚོད་བརྟན་པོ་ཞིག་ཡོད་ནའང་བསམ་གྱི་ཡོད། ང་ཚོའི་འགོ་ཁྲིད་འུ་ཅག་གི་རིག་གནས་ཕྱིར་གཏོང་བྱ་རྒྱུར་དགའ་བ་ངས་ཤེས་ཡོད་ལ། དེ་ནི་རྒྱལ་ཁབ་སྟོབས་ཅན་ཞིག་གི་དན་རྟགས་ཡིན་པའང་ཤེས་ཡོད། འོན་ཏེ་ད་ལྟའི་ང་ཚོའི་རིག་གནས་འདི་ཅིས་ཀྱང་ཕྱིར་གཏོང་བྱ་ཐབས་མེད་པ་སྟེ། ང་ཚོས་རྩོམ་རིག་བརྩམས་ཆོས་ཤིག་གསར་དུ་རྩོམ་དུས། རྩོམ་པ་པོ་རེ་རེ་དང་ལས་གཉེར་བ་རེ་རེས་སྐད་ཅིག་ཙམ་ལའང་རང་གིས་རང་ལ་འདྲི་གཅོད་བྱེད་བཞིན་མཆིས། འདི་ལྟའི་རིག་གནས་ཀྱི་ཁོར་ཡུག་ཅིག་ཏུ། ང་ཚོས་ཇི་ལྟར་རིག་གནས་བརྩམས་ཆོས་གྲལ་དག་ཅིག་འཁྱོངས་ནུས་ཨང་། འཛམ་གླིང་ཧྲིལ་བོའི་ཁྱབ་ཁོངས་སུ། ཁྱོད་ཀྱིས་རིག་གནས་བརྩམས་ཆོས་དག་གསར་འགྱུར་མཉམ་སྒྲོག་ཏུ་བཅོས་ནས་ཕྱི་རྒྱལ་བར་བལྟ་རུ་གཞུག་བསམས་སམ། ཁྱོས་ཕྱི་རྒྱལ་བ་གོ་ལ་གཞན་པའི་མི་རུ་བརྩིས་ཡོད་དམ། ངས་བསམས་ན། ཀྲུང་གོ་དཔལ་འབྱོར་སྟེང་ཡང་སྙིང་འཕེལ་རྒྱས་བྱུང་ཡོད་མེད་དེ་གཞིས་ཀའི་ཐོན་ལས་མ་བརྡིབས་བར་དུ་བཤད་དཀའ་བ་ཞིག་རེད། ཡིན་ཡང་། གལ་ཏེ་རྒྱལ་ཁབ་ཅིག་རིག་གནས་སྟེང་དངོས་གནས་འཕེལ་རྒྱས་བྱུང་བ་ཡིན་ན། དེ་ནི་ད་གཟོད་རྒྱལ་ཁབ་སྟོབས་ཆེན་ཞིག་ཏུ་བརྩི་ཆོག་པར་སྙམ། དེར་མ་ཟད། ངས་བལྟས་ན་འདི་འདྲའི་འཕེལ་རྒྱས་ནམ་ཡང་ཉམས་རྒུད་ཀྱི་ཉེན་ཁ་ཆུང་བར་སྣང་།
            མཇུག་མཐར།  ང་ཚོ་ཡང་བསྐྱར་མིང་བརྡའི་བཙོན་ར་འདི་གླེང་། མིང་བརྡའི་བཙོན་ར་ཞིག་གི་མིང་བརྡ་ཇི་ལྟར་ཇེ་མང་དུ་སོང་ན། རྒྱལ་ཁབ་དེའི་རིག་གནས་ལ་དེ་ལྟར་བཀག་རྒྱ་ཐེབས་བཞིན་ཡོད། ཡིན་ཡང་། སྲིད་གཞུང་གིས་ཁྱེད་ལ་གནས་ལུགས་དགུ་བརྩེགས་ཤིག་འདྲེན་པ་དཔེ་རེད། ཁོ་ཚོས་ཁྱེད་ལ་འདི་ལྟར་བྱེད་དོན་ནི་ན་གཞོན་ཚོར་སྲུང་སྐྱོབ་བྱ་སླད་ཡིན་ཟེར་བའམ།  ཡང་ན།  སྤྱི་ཚོགས་ཀྱི་བརྟན་འཇགས་བསྲུང་ཆེད་ཡིན་ལབ་པའང་སྲིད་མོད། འོན་ཏེ།  རིག་གནས་ནི་རང་དབང་ཡིན་གཤིས།  ཁོ་ཚོར་ན་གཞོན་དང་སྤྱི་ཚོགས་ལ་གནོད་འགྲོ་བའི་རིག་གནས་ཅི་ཡོད་ཚང་མ་མིང་བརྡའི་བཙོན་དུ་འཇུག་པའི་དབང་ཆ་ཡོད་པ་རེད། གལ་སྲིད་ཁྱེད་རང་དེ་ལ་ཡིད་འཐད་བྱུང་བ་ཡིན་ན། ནམ་ཞིག་ཁྱེད་རང་ཉིད་ཀྱང་མིང་བརྡའི་བཙོན་ར་འདིར་གཞུག་ཉེན་ཡོད་དེ། ཉེས་པ་ནི་སྤྱི་ཚོགས་དང་ན་གཞོན་ཚོར་གནོད་འཚེ་ཐེབས་སོང་བ་དེའོ།། དེ་ལྟར་ཆེས་མཐའ་མར།  དབང་བསྒྱུར་གྲལ་རིམ་དང་ཁོ་ཚོའི་ཁེ་ཕན་ལ་གནོད་འགྲོ་བ་ཞིག་ཡིན་ཕྱིན། ཡོད་ཚད་སྤྱི་ཚོགས་ཀྱི་བརྟན་འཇགས་ལ་གཏོར་བརླག་དང་ན་གཞོན་ཚོར་གནོད་འཚེ་བཏང་བའི་ཉེས་པ་གསག་སྲིད་པ་རེད། གལ་སྲིད་ང་ཚོས་འདི་དག་ལ་བཟོད་སྒོམ་བྱ་རྒྱུ་མང་དྲགས་ན། ཁྱི་ཁ་བསྐྱིལ་ན་ངོར་འཛིན་པའི་ཉེན་ཁ་ཡོད་སྲིད་པས།  སློབ་གྲོགས་རྣམ་པ།  དེ་བས་ང་ཚོས་ཉི་མ་དེ་སླེབས་པར་འཇུག་ག་ལ་རུང་། དེ་མིན་ཚེ།  ཕྱིས་སུ་ཁྱོད་ཚོའི་བུ་ཚ་དག་གིས་སྲུང་སྐར་བརྒྱུད་ནས་གློག་རྡུལ་བསླབ་དེབ་ཏུ་དྲངས་བའི་ལོ་རྒྱུས་སུ། ང་ཚོ་ཚང་མ་བཞད་གད་ཀྱི་གནས་སུ་འགྱུར་ཉེན་ཆེ། དེ་བས་་་་་་་་་རྣམ་པ་ཚོར་བཀའ་དྲིན་ཆེ། 
                                                                   (གློག་ཞགས་ཀྱིས་བསྒྱུར)

རྩོམ་ཁུངས། ངེད་དྲ་བ།