སྐུ་ཞབས་ལགས།  ང་ཚོས་"མ་འོངས་པའི་ལོ་རྒྱུས"ཟེར་བའི་དེབ་ཅིག་འབྲི་བཞིན་ཡོད།  ཁྱེད་ཀྱི་མཐོང་སྣང་ལྟར་ན་སའི་གོ་ལ་འདི་དང་འགྲོ་བ་མིའི་རིགས་རྒྱུད་འདི་ཉིད་ཧ་ཅང་གི་ཁྱད་ཆོས་ངེས་ཅན་ལྡན་པ་ཞིག་ཡིན་པས། འགྲོ་བ་མིའི་རིགས་ལ་མ་འོངས་པར་ཅི་ཞིག་འབྱུང་བ་དང་འགྲོ་བ་མི་ཡིས་མ་འོངས་པར་ཇི་ལྟར་བྱེད་དགོས་པའི་ཐད་ལ་ང་ཚོས་ཁྱེད་ལ་བཀའ་འདྲི་ཞིག་གནང་འདོད་སྤྲོ།
  ཐོག་མར་གནད་དོན་ཞིག་ཡིད་ལ་བཅང་དགོས་པ་ནི་ངའི་མ་འོངས་པའི་སྐོར་ལ་བསམ་བློ་གཏོང་སྟངས་ནི་འདི་འདྲ་ཞིག་ཡིན་ཏེ།  ལུང་བསྟན་ཡོད་ཚད་ནི་ཚོད་དཔག་རང་ལུགས་ཡིན་པས།  མ་འོངས་པ་ནི་སུས་ཀྱང་དོ་ཁུར་གནང་མ་མྱོང་པའི་ཆ་རྒྱུས་མེད་པའི་ཁ་ཕྱོགས་ཤིག་དང༌།  དུས་རྒྱུན་ཤེས་མེད་ངང་ལྷག་བསྡད་པ་དེ་ཡིན་ནོ།  །
  དེར་མ་ཟད།  ངའི་མི་ཚེ་ལ་འཇུག་པའི་སྒོ་ནི་མ་འོངས་པ་དང་འདས་པར་སེམས་ཁྲལ་མི་བྱེད་པ་དེ་ཡིན།  འདས་པ་ནི་གང་ཡང་ལྷག་མེད་པ་དང༌།  མ་འོངས་པ་ནི་ད་དུང་གང་ཡང་འབྱུང་མེད་པ་དེ་ཡིན་པས།  ང་ཚོའི་ལག་ཏུ་ཡོད་ཚད་རེག་ཡོད་པ་ནི་ད་ལྟའི་སྐད་ཅིག་མ་འདི་རེད།  འདས་པ་ནི་ཤི་རོ་དང་མ་འོངས་པ་ནི་མ་བཙས་པ་ལྟ་བུ་ཡིན་ནོ།།
  སྡོམ་ཚིག་འདི་སེམས་ལ་ཟུངས་དང༌། ངས་ཚིག་ཁ་ཤས་ཅིག་བརྗོད་འདོད་སྤྲོ་སྟེ། ཐོག་མར་མི་ཚེ་ལ་ཇི་ལྟར་སེམས་ཁྲལ་བྱས་ན་དེ་ལྟར་མ་འོངས་པ་ཞིག་མེད་པར་འབྱུང་སྲིད་དེ།  ང་ཚོ་རང་ཉིད་ཀྱི་དུར་ཁྲོད་དང་ཐག་ཉེ་སར་འབྱོར་བཞིན་ཡོད་པ་རེད། འདི་འདྲའི་དངོས་ཡོད་ཀྱི་བདེན་པ་ར་འཕྲོད་པར་ཐབས་སྐྱོ་བོ་ཞིག་རེད་མོད། འོན་ཀྱང༌། དེ་ར་འཕྲོད་པར་ཕན་ཐོག་ཆེན་པོ་འདུག  རྒྱུ་མཚན་གང་ཡིན་ཞེ་ན། འདིར་ཐབས་ཤེས་འདྲ་མིན་འཁྱེར་ཡོང་སྲིད་པ་རེད། དེང་སང་ཕྱིའི་དངོས་པོ་རྣམས་འགྱུར་ལྡོག་འགྲོ་བཞིན་ཡོད་པས། རྒྱུ་མཚན་དང་ལྡན་པའི་སྡོམ་ཚིག་འདི་ཡིས་གོ་ལ་ཡོངས་རྫོགས་འཇིག་ལ་ཉེ་བར་བསྟན་པ་རྟོགས་དགོས།
  འདིར་རྒྱུ་མཚན་ལྟར་སྣང་གི་རྗེས་སུ་མི་སྙེག་པར་རེ་བ་ཉག་གཅིག་ཡོད། གལ་ཏེ། རེ་བ་དེ་ནི་འཁྲུལ་བྲལ་དང་རྒྱུ་མཚན་ལྡན་པ་ཡིན་ཚེ། ཁྱེད་རང་གོ་ལ་འདིའི་སྒང་དུ་ལོ་ངོ་ཉི་ཤུ་ལས་མང་བར་སྡོད་མི་ཐུབ་པའི་དཀའ་ངལ་ལྔ་ཡོད་དེ།
  དཀའ་ངལ་དང་པོ་ནི། རྡུལ་ཕྲན་མཚོན་ཆ་ཉིན་རེར་བཟོ་བསྐྲུན་དང་ཕུང་གསོག་རྒྱག་བཞིན་ཡོད་པས། ང་ཚོར་གོ་ལ་ཧྲིལ་བོ་འདི་ཐེངས་བདུན་གཏོར་བཤིག་གཏོང་ཐུབ་པའི་རྡུལ་ཕྲན་ནུས་ཤུགས་ལྡན་པ་དང༌།  རྡུལ་ཕྲན་མཚོན་ཆ་མང་པོ་བཟོ་བསྐྲུན་དང་ཕུང་གསོག་གི་གནད་དོན་ཅི་ཞིག་ཡིན་ནམ།  འདི་ཡིས་འགྲོ་བ་མིའི་སྨྱོ་འབོག་གི་སྤྱོད་པ་དེ་ཕྱི་ལ་ངོམ་པ་རེད།
  དཀའ་ངལ་གཉིས་པ་ནི། མི་འབོར་འཕེལ་རྒྱས་ནི་ཚད་གཞི་ལས་བརྒལ་བ་དེ་རེད། དུས་རབས་འདིའི་མཇུག་ཏུ་གོ་ལ་འདིའི་སྒང་དུ་མི་འབོར་ཐེར་འབུམ་བདུན་ལ་སླེབས་ངེས་དང༌། གོ་ལ་འདིས་འདི་འདྲའི་མི་འབོར་ཕོན་ཆེན་ལ་རམ་འདེགས་བྱེད་མི་ནུས་པ་ནི་གོ་ལ་འདི་བཀོལ་སྤྱོད་ཤུགས་ཆེན་བྱེད་བཞིན་ཡོད་པ་རེད། མི་འབོར་གྱི་བརྒྱ་ཆ་ལྔ་བཅུར་མུ་གེ་ཐེབས་ངེས་ལ། མི་འབོར་འཕེལ་རྒྱས་ཀྱི་སྔོན་འགོག་ལ་ཆབ་སྲིད་པ་རྣམས་ཀྱིས་འབད་བརྩོན་གང་ཡང་བྱེད་བཞིན་མེད་དོ།།
  དཀའ་ངལ་གསུམ་པ་ནི། མི་མེད་ལུང་སྟོང་ནང་གི་མེ་ལྕེ་བཞིན་གང་སར་ཁྱབ་པའི་ཨེ་ཙི་ན་ཚ་དེ་རེད། འབྱུང་འགྱུར་གྱི་མི་ལོ་ཉི་ཤུའི་ནང་དུ་ན་ཚ་འདི་ལ་སྨན་བཅོས་བྱེད་པའི་ཐབས་ལམ་ཞིག་མེད་པར་སྙམ། ཚན་རིག་པ་རྣམས་ཀྱིས་ཀྱང་ན་ཚ་དེ་ལ་སྨན་བཅོས་བྱེད་ཐབས་བྲལ་བར་གསུངས།
  རྒྱལ་ཁབ་གང་གིས་ཀྱང་ཚངས་པར་སྤྱོད་པར་ནག་ཉེས་སུ་མི་རྩི་ལ། ཚངས་སྤྱོད་ནི་ཨེ་ཙི་ན་ཚ་འདིའི་རྒྱུ་རྐྱེན་དེ་རེད། འདི་ནི་བུད་མེད་དང་ལོགས་སུ་དབྱེ་བའི་གྲྭ་བ་དང་སློབ་མ། དམག་མི་རྣམས་ཀྱིས་མཚན་མཐུན་ཆགས་སྤྱོད་དང་བསྟུན་ནས་ན་ཚ་འདི་བྱུང་བ་རེད། འོན་ཀྱང༌། མཚན་མཐུན་ཆགས་སྤྱོད་ནི་ན་ཚ་འདིའི་སྔ་ལྟས་ཁོ་ན་དང་དཀའ་ངལ་ངོ་མ་དེ་རེད། ཆོས་པ་རྣམས་ཆགས་སྤྱོད་ཀྱིས་སྡུག་བསྔལ་མྱོང་བཞིན་ཡོད། རྒྱུ་མཚན་གང་ཡིན་ཞེ་ན། ཆོས་ལུགས་ཡོད་ཚད་ཀྱིས་ཆགས་སྤྱོད་བཀག་འགོག་བྱེད་པ་དང༌། ཆོས་ལུགས་གང་གིས་ཀྱང་ཆགས་སྤྱོད་བྱེད་པར་ངོས་ལེན་མི་བྱེད་དོ།།
  དཀའ་ངལ་བཞི་བ་ནི། འགྲོ་བ་མིའི་རིགས་ལ་འབྱུང་འགྱུར་གྱི་མི་ལོ་ཉི་ཤུའི་ཁྲོད་དུ་འཕྲད་ངེས་པའི་སྣོད་བཅུད་ཀྱི་ཆགས་འཇིག་དེ་རེད། ང་ཚོས་བྱེད་སྟངས་འདྲ་མིན་བརྒྱུད་ནས་རང་ཉིད་ཀྱི་ཚེ་སྲོག་གི་འབྱུང་ཁུངས་ལ་གཏོར་བཤིག་གཏོང་བཞིན་ཡོད། ཚེ་སྲོག་ལ་ཆ་སྙོམ་པའི་སྣོད་བཅུད་དགོས། སྣོད་བཅུད་འདི་བྱེད་སྟངས་གཅིག་བརྒྱུད་ནས་གཏོར་བཤིག་གཏོང་བཞིན་མེད་ལ། དེ་ཡང་བྱེད་སྟངས་འདྲ་མིན་བརྒྱུད་ནས་གཏོར་བཤིག་གཏོང་བཞིན་ཡོད། དཔེར་ན། ནག་རྫས་འབར་རླུང་གསོག་འཇོག་དང་མིས་བཟོས་རྫས་སྦྱོར་གྱི་རྐྱེན་གྱིས་རེད།  སྔོན་ཆད་བྱུང་མྱོང་མེད་པའི་གནམ་གཤིས་ཀྱི་ཚ་དྲོད་དེ་ཇེ་མཐོ་རུ་སོང་བ་དང་བསྟུན། བྱང་སྣེ་དང་ལྷོ་སྣེ་གཉིས་ཀྱི་འཁྱགས་རོམ་རྣམས་བཞུ་མགོ་བརྩམས། སྔོན་ཆད་དེ་འདྲ་ནམ་ཡང་བཞུས་མྱོང་མེད། གལ་ཏེ། གནམ་གཤིས་ཀྱི་ཚ་དྲོད་དེ་ཅུང་མཐོ་རུ་ཕྱིན་ཚེ། ཧི་མ་ལ་ཡའི་འཁྱགས་རོམ་བཞུ་མགོ་རྩོམ་ངེས་དང༌། གྲོང་ཁྱེར་ཡོད་ཚད་ཆུར་ནུབ་ངེས། རྒྱུ་མཚན་གང་ཡིན་ཞེ་ན།  ཁྱེད་ཚོ་རྒྱ་མཚོ་དང་ཧ་ཅང་ཐག་ཉེ་བོ་རེད།
  ཆེས་ཉེན་ཁ་ཅན་གྱི་དཀའ་ངལ་ལྔ་བ་ནི།  མི་རིགས་དཀར་པོ་དང་མི་རིགས་ནག་པོ་བར་ལ་དབྱེ་བ་འབྱེད་པ་དང༌།  ཤར་ནུབ་བར་དང་ལྷོ་བྱང་བར་དུ་ཐོལ་གྱིས་བྱུང་བའི་དབྱེ་འབྱེད་དེ་རེད།  དེ་ནི་མིའི་རིགས་རང་ཉིད་ཀྱིས་བཟོས་པ་ཡིན་ནོ། །འགྲོ་བ་མིའི་རིགས་ནི་རིགས་རྒྱུད་དང་ཁ་མདོག  རྒྱལ་ཁབ།  ཆོས་ལུགས་རྣམས་ཀྱིས་ཁ་བྲལ་གཏོང་བ་དང༌། དེ་དག་གིས་མིའི་རིགས་ཕན་ཚུན་གྱི་སྐེ་རྩ་བསྒགས་ནས་འཆི་ལམ་དུ་བརྫངས་པ་རེད། སྒྱུ་འཕྲུལ་རེ་འབྱུང་ན་མ་གཏོགས་འགྲོ་བ་མིའི་རིགས་ལ་ནམ་ཡང་འཕྲད་མྱོང་མེད་པའི་ཛ་དྲག་གི་དོན་ཚན་ལྔ་བོ་ལ་གཡོལ་གཟུར་བྱེད་པར་ཕལ་ཆེར་མི་སྲིད་པར་སྙམ། འོན་ཀྱང༌།  སྒྱུ་འཕྲུལ་ནི་བརྩམས་སྒྲུང་ནང་དུ་འབྱུང་བ་མ་གཏོགས་དངོས་ཡོད་ཀྱི་འཚོ་བའི་ནང་དུ་འབྱུང་མི་སྲིད།
  ཟིང་འཁྲུག་གི་དོན་རྐྱེན་སློང་བ་ནི་གོ་ལའི་སྒང་གི་ཡར་ཐོན་ཤེས་ལྡན་གྲལ་རིམ་དང་སྲིད་དོན་པ། ལྟ་གྲུབ་པ་རྣམས་ཀྱིས་དོན་རྐྱེན་འདི་རྣམས་སྣང་མེད་དུ་སྐྱུར་བཞིན་འདུག ཛ་དྲག་གི་དོན་རྐྱེན་རྣམས་མདུན་དུ་སླེབས་སྐབས། མི་མང་པོ་ཞིག་གླེན་རྟགས་ཅན་གྱི་དོན་རྐྱེན་ལ་འབྲེལ་བ་ཡོད་པ་རེད། ངའི་རེ་འདུན་ནི་འགྲོ་བ་མིའི་རིགས་ལ་བློ་བདེ་བག་ཕེབས་ཤིག་ཡོང་བ་དང་ཚེ་སྲོག་སྐྱོབ་ཐུབ་རྒྱུ་དེ་ཡིན། འོན་ཀྱང༌། ང་ཚོས་དོན་རྐྱེན་འདི་ལྔ་བོ་རྣམས་ལ་ཁ་གཏད་གཅོག་སྐབས་ཧ་ཅང་གཟབ་གཟབ་བྱེད་དགོས།
  འཛམ་གླིང་འདིར་སྲིད་གཞུང་གཅིག་ངེས་པར་དུ་ཡོད་དགོས། འདིར་སྲིད་གཞུང་གཅིག་ལས་དེ་ལས་མང་བ་གང་ཡང་མི་དགོས། སྲིད་གཞུང་གཅིག་ཡོད་ཚེ་ང་ཚོས་དམག་འཁྲུག་གི་སྔ་ལྟས་གང་མང་བཟློག་ཐུབ། དེ་བཞིན་འཛམ་གླིང་འདིར་ཆོས་ཀྱི་སྡེ་ཁག་གཅིག་ཁོ་ན་སྤྱོད་དགོས། ཆོས་ལུགས་གཅིག་མ་རེད། ཆོས་ཀྱི་སྡེ་ཁག་གཅིག་རང་གཅིག་སྤྱོད་དགོས། དེ་ཡང་སྒོམ་གྱི་རྟོགས་པ་དང༌། བྱམས་པ་དང་སྙིང་རྗེ་ལྡན་པ། འཚོ་སྡོད་ལ་བསམ་ཤེས་བྱེད་པ་ཤིག་ཡིན་དགོས།  འོན་ཀྱང༌།   ཆོས་ལུགས་ཆེ་ཁག་རྣམས་ཀྱི་ཆ་ཤས་ཆེས་མེད་དུ་མི་རུང་བ་རྣམས་སྲུང་སྐྱོབ་བྱེད་དགོས། དེ་རྣམས་ནི་ཡི་ཤུ་ཆོས་ལུགས། ཧིན་རྡུ་ཆོས་ལུགས། ནང་བསྟན་ཆོས་ལུགས། གཅེར་བུ་ཆོས་ལུགས། ཁ་ཆེའི་ཆོས་ལུགས་རྣམས་ཡིན་ལ། དེ་མིན་ཆོས་ལུགས་ཆུང་ངུ་ཡོད་ཚད་གོ་ལ་འདི་ནས་མཐོང་ཆོས་སུ་མི་འགྱུར་བར་བྱེད་དགོས། ཆོས་ལུགས་གཞན་པ་རྣམས་དེ་འདྲའི་དགོས་མཁོ་ཅན་ཞིག་མ་རེད། དེ་རྣམས་ཀྱིས་གནོད་འཚེ་མི་ཉུང་བ་ཞིག་བྱས་ཡོད། འོན་ཀྱང༌། ད་ལྟ་གནོད་འཚེ་དེ་ཧ་ཅང་གནོན་ཤུགས་ཆེ་བས་ང་ཚོས་བཟོད་སྒོམ་བྱེད་ཐུབ་བྲལ་བ་རེད།
  རྒྱལ་ཁབ་མང་པོ་ག་རེ་བྱས་ནས་མཁོ་བ་རེད་དམ། འཛམ་པོ་གླིང་འདི་གཅིག་རེད། གལ་ཏེ།  འཛམ་གླིང་འདིར་འོས་ཤོག་གི་སྟོབས་ཤུགས་མེད་པར་དགེ་ཕན་གྱི་ཐག་གིས་ཆོད་པའི་སྲིད་གཞུང་གཅིག་ཁོ་ན་ལྡན་ཚེ། དཀའ་ངལ་ཡོད་ཚད་བདེ་བླག་ངང་ནས་ལས་སེལ་ཐུབ་ངེས། སུ་དང་གང་ལ་དཀའ་ངལ་འཕྲད་ཚེ་རྒྱུ་མཚན་དང་ལྡན་པའི་སྒོ་ནས་དེ་དག་སེལ་ཐུབ་མཁན་ཞིག་དང༌། ཡང་ན་ཐབས་རྩལ་སྣ་ཚོགས་ལྡན་པ་དང་འཇོན་ཐང་ལྡན་པ་ཞིག་གིས་སྟངས་འཛིན་བྱེད་དགོས་པ་ལས། འོས་ཤོག་མང་ཉུང་གིས་ཐག་གཅོད་མི་རུང༌།
  ཆོས་ལུགས་ཡོད་ཚད་ཀྱིས་ཚངས་སྤྱོད་ཀྱི་འཚོ་བའི་སྐོར་གླེང་བཞིན་ཡོད་མོད། འོན་ཀྱང༌། ཚངས་སྤྱོད་ཀྱི་འཚོ་བ་ནི་ལྷན་སྐྱེས་ཡིན་ནམ་ཞེས་པའི་དྲི་ཚིག་དེ་སུས་ཀྱང་གླེང་སློང་བྱས་མྱོང་མེད། འགྲོ་བ་མིའི་རང་གཤིས་ལ་ཚངས་སྤྱོད་དང་བྲལ་བར་གནས་སྲིད་དམ། ཚན་རིག་པ་དང༌། སྨན་གྱི་ཆེད་ལས་མཁས་པ། ཡང་ན། སེམས་ཁམས་རིག་པ་སུས་ཞིག་གིས་ཚངས་སྤྱོད་བསམ་བློ་ལ་རྒྱབ་སྐྱོར་བྱེད་ཐུབ་བམ། སུ་དང་གང་གིས་ཀྱང་དེའི་ཁ་གཏད་ཕྱོགས་སུ་ཚིག་གཅིག་ཀྱང་བཤད་མེད་དོ། །རྒྱུ་རྐྱེན་འདི་ཡིས་འགྲོ་བ་མིའི་རིགས་ཁྲོད་དུ་འཁྲིག་སྤྱོད་ཀྱི་ལོག་བཤད་སྣ་ཚོགས་སྐྱེལ་བཞིན་ཡོད་ལ། གཅིག་བྱས་ན་ཨེ་ཙི་ན་ཚ་ཁོ་ན་སྐྱེལ་འོང་བ་མ་ཟད། ཐ་ན་དེ་ལས་ཀྱང་ཉེན་ཁ་ཅན་གྱི་ན་ཚ་མང་པོ་འབྱུང་སྲིད་པ་རེད།
  ཐེངས་སྔོན་མ་ཞིག་ལ་ངས་འགྲོ་བ་མིའི་རིགས་ཀྱི་སྐོར་ལ་ཞོར་འཕྲོས་གླེང་མྱོང༌། འགྲོ་བ་མིའི་རིགས་ནི་མི་ཐོག་གཅིག་མ་རེད། འགྲོ་བ་མིའི་རིགས་ནི་འདས་ཟིན་པའི་ལོ་རྒྱུས་ཁྲོད་དུ་ལོ་ངོ་སྟོང་ཕྲག་གནས་ཡོད། དེ་མིན་གཞན་པ་ཡོད་ཚད་འཕོ་འགྱུར་བྱུང་ཡོད། གདོད་མའི་འགྲོ་བ་མིའི་རིགས་ཀྱིས་རྡོའི་མཚོན་ཆ་བེད་སྤྱད་ནས་འཁྲུག་རྩོད་བྱེད་པ་དང་དེང་གི་མིའི་རིགས་ཀྱི་འཁྲུག་རྩོད་བྱེད་པའི་བག་ཆགས་ནི་སྔར་ལྟར་གཅིག་པ་རེད། འགྲོ་བ་མིའི་རིགས་ཀྱི་ཁོང་ཁྲོ་ནི་གདོད་མ་ནས་ད་ལྟ་བར་དུ་ངོ་བོ་དབྱེར་མེད་པས། སྔོན་ཆད་མིའི་རིགས་ཀྱིས་རྡོའི་མཚོན་ཆ་བེད་སྤྱད་པ་ནང་བཞིན་དེང་འདིར་མིའི་རིགས་ཀྱིས་རྡུལ་ཕྲན་མཚོན་ཆ་བེད་སྤྱོད་བྱེད་བཞིན་ཡོད། འགྲོ་བ་མིའི་རིགས་ལ་འཕོ་འགྱུར་བྱུང་མེད་དེ། འགྲོ་བ་མིའི་རིགས་ལ་བཟོ་ལས་རིག་རྩལ་ཇི་ལྟར་འཕེལ་རྒྱས་ཕྱིན་ན་དེ་ལྟར་གཏོར་བཤིག་གི་ནུས་པ་ཆེ་རུ་འགྲོ་བ་རེད།
  གལ་ཏེ། འཛམ་གླིང་འདིེར་དམག་ཆེན་ཞིག་བསླང་ན།  དེ་ནི་དམག་འཁྲུག་གི་”མཐེབ་གནོན”་བཀོད་སྤྱོད་ཙམ་གྱིས་གོ་ལ་ཧྲིལ་བོ་འདི་ཉིད་འཆི་བདག་གི་ཁ་ནང་དུ་ལྷུང་ངེས། སྐབས་དེར།སུ་གང་ལའང་རྒྱལ་ཁ་མི་ཐོབ་པ་མ་ཟད་ཕམ་དུ་ཡང་མི་འཇུག   དེ་བས་འདི་ནི་”མ་འོངས་པའི་ལོ་རྒྱུས”འབྲི་བའི་དུས་ཚོད་ཏག་ཏག་དེ་རེད། རྒྱུ་མཚན་གང་ཡིན་ཞེ་ན། ལོ་ངོ་ཉི་ཤུ་རྗེས་སུ་འདི་འདྲའི་ལོ་རྒྱུས་འབྲི་མཁན་སུ་ཡང་ཡོད་པ་མ་རེད། འདི་འདྲའི་ལོ་རྒྱུས་ཀྱི་དེབ་ཐེར་ཞིག་སུས་ཀྱང་དཔར་བསྐྲུན་མི་བྱེད་ལ་ཀློག་མཁན་ཡང་ཡོད་པ་མ་རེད།
  ངས་ཁྱེད་ལ་བཤད་མྱོང་སྟེ། འདིར་འགྲོ་བ་མིའི་རིགས་གཏོར་བཤིག་གཏོང་བའི་དཀའ་ངལ་ལྔ་ཡོད་ལ། དཀའ་ངལ་དེ་དག་སེལ་ཐབས་ནི་ཧ་ཅང་གི་ལས་སླ་བོ་ཡིན་མོད། འོན་ཀྱང༌། དཀའ་ངལ་དེ་དག་སེལ་བར་སུས་ཀྱང་གོ་རྟོགས་སྤེལ་མེད་པས་འཛམ་གླིང་འདི་ཉིད་’’སྨྱོན་པ་གསོ་བཅོལ་ཁང’’་ཞིག་ཏུ་གྱུར་བ་རེད། དེ་བས་རྡུལ་ཕྲན་མཚོན་ཆ་ཡོད་ཚད་ཞི་བདེ་རྒྱ་མཚོ་རུ་གཡུག་དང༌།  དེ་མིན་ང་ཚོས་ཨེ་ཙི་ན་ཚ་མེད་པར་བཟོ་མི་ཐུབ་པས་ན་ཚ་དེ་ག་ས་གང་དུ་ཁྱབ་བཞིན་ཡོད།
  གོ་ལ་འདི་བགོ་བཤའ་རྒྱབ་མེད་པ་དངོས་ཡོད་བདེན་པ་རེད། རྒྱལ་ཁབ་རྣམས་ཀྱིས་མི་མང་པོའི་བདག་འཛིན་གྱིས་དགོས་དོན་སྒྲུབ་པ་མ་གཏོགས་རྒྱལ་ཁབ་མང་པོ་དགོས་དོན་ཅི་ཞིག་རེད།  འདིར་དགོས་མཁོ་གཞན་པ་མི་འདུག  མི་འབོར་ཚད་ལས་བརྒལ་བའི་རྐྱེན་གྱིས་གོ་ལ་འདིར་གཏོར་བཤིག་བཏང་བ་རེད།  སྐབས་འདིར།   འཇར་མམ་རྒྱལ་ཁབ་ཀྱིས་གནས་ཡུལ་སྤོ་མཁན་ཚོར་ཞེད་སྣང་བསྐུལ་བ་དང་ཕྲུ་གུ་མང་པོར་སྐྱེས་པར་སྐུལ་སློང་བྱེད་དོན་ཅི་ཞིག་ཡིན་ནམ། གལ་ཏེ། གོ་ལ་འདིར་འཛམ་གླིང་གི་སྲིད་གཞུང་གཅིག་ལྡན་ཚེ། ང་ཚོས་མི་འབོར་མང་པོ་རྣམས་ས་ཆ་གཅིག་ནས་གཞན་ལ་གནས་སྤོ་ཐུབ་ངེས། གང་དུ་མི་འབོར་ཉུང་དུ་འགྲོ་བའི་ས་ཆ་རུ་རྒྱལ་ཁབ་གཞན་དུ་མི་འབོར་མང་པོ་རྣམས་དེ་རུ་གནས་སྤོ་བྱས་ན་ཆོག
  གལ་ཏེ། ཆོས་ལུགས་རྣམས་འཇིག་རྟེན་འདི་ནས་མི་སྣང་བར་འགྱུར་ཚེ། གླེན་རྟགས་ཅན་གྱི་བྱ་སྤྱོད་རྣམས་དེ་དང་ལྷན་དུ་མི་སྣང་བར་འགྱུར་ངེས། གླེན་རྟགས་ཅན་རྣམས་ཀྱིས་སྐྱེ་སྒོ་འགོག་ཐབས་སུ་ལྡོག་ཕྱོགས་སུ་ལངས་པ་དང༌། ཕྲུ་གུ་མང་པོ་སྐྱེ་བར་འཇུག་པ། རྒྱུ་མཚན་གང་ཡིན་ཞེ་ན། ཕྲུ་གུ་ཇི་ལྟར་མང་ན་ནུས་ཤུགས་དེ་ལྟར་ཆེ་བ་རེད། ནུས་ཤུགས་དེ་ཡང་ལམ་ཁ་གཉིས་ནང་དུ་ལྡན་ཏེ། གཅིག་ནི་འོས་ཤོག་མང་པོ་འཕེན་པར་རོགས་བྱེད་པ། གཞན་ཞིག་ནི་དམག་འཁྲུག་ཁྲོད་དུ་མེ་སྒྱོགས་སྤྲོད་པར་རམ་འདེགས་བྱེད་པ་རེད།
  ལོ་ངོ་བཅུ་གཉིས་ནས་བཅུ་གསུམ་ནང་དུ། ཕྱོགས་ཡོངས་ནས་སྐྱེ་སྒོ་འགོག་ཐབས་སུ་ངེས་པར་དུ་ལག་ལེན་བསྟར་དགོས། དེ་ནི་མང་གཙོ་རང་ལུགས་པའི་དྲི་ཚིག་ཅིག་མ་རེད། རྒྱུ་མཚན་གང་ཡིན་ཞེ་ན། དེ་ནི་འཆི་གསོན་བར་གྱི་གདམས་ཀ་ཞིག་རེད། གལ་ཏེ། གོ་ལ་ཧྲིལ་བོ་འདི་འཇིག་ཚེ། ཁྱེད་རྣམས་ཀྱི་མང་གཙོ་རང་ལུགས་དང་ལྷན་དུ་ཅི་ཞིག་བྱེད།
  ཆོས་ལུགས་རྣམས་ཀྱིས་འཇིག་རྟེན་འདིར་མིའི་རིགས་གསར་པ་ཞིག་བསྐྲུན་སྲིད་པའི་ཁྱེད་ཀྱི་འཆར་སྣང་དང༌། རྨོངས་དད་ཀྱི་རིགས་སྣ་ཚོགས་ཁྱེད་ཀྱི་རིག་སྟོབས་ཀྱིས་སྦས་སྐོང་བྱས་ཡོད་པ་རྣམས་མཐར་སྐྱེལ་གཏོང་དགོས། འགྲོ་བ་མིའི་རིགས་རྒན་པ་རྣམས་འཆི་ངེས་ཡིན་པ་གཏན་དུ་འཁེལ་བ་རེད། གལ་ཏེ། ང་ཚོས་འཇིག་རྟེན་འདིའི་སྒང་གི་མི་མང་པོར་གོ་རྟོགས་ཤིག་སྤེལ་ཐུབ་ཚེ། མིའི་རིགས་གསར་པ་ཞིག་འཚོ་སྡོད་ཐུབ་ངེས།
  རྒྱལ་ཁབ་མེད་པའི་འཛམ་གླིང་གི་མི་སེར་བྱེད་པའི་མི་རིགས་ཤིག་དང༌། ཆོས་སྒྲུབ་པ་མ་གཏོགས་ཆོས་ལུགས་མི་བྱེད་པའི་མི་རིགས་ཤིག  ཚན་རིག་དང་མཐུན་པའི་བྱེད་སྒོ་ཞིག་སྒྲུབ་པ་མ་གཏོགས་གཏོར་བཤིག་བྱེད་མཁན་ཞིག་མིན་པར་ཚན་རིག་གི་ཁྱབ་ཁོངས་ཡོངས་སུ་གསར་བསྐྲུན་ལ་མཐུན་འགྱུར་བྱེད་མཁན་གྱི་མིའི་རིགས་ཤིག་དགོས།
  འདས་ཟིན་པའི་རྡོག་ཁྲེས་གང་རུང་དང་བྲལ་བའི་མིའི་རིགས་གསར་པ་ཞིག་བསྐྲུན་པ་ལ། ཕྱིའི་དངོས་པོའི་དཔལ་ཡོན་སྒང་དུ་དུས་ཚོད་འཕྲོ་བརླག་མི་གཏོང་བར་ནང་སེམས་ལ་བརྩེ་བ་དང༌། ཞི་དུལ་བག་ཕེབས་ཀྱི་སྤྱོད་ཚུལ། སྒོམ་གྱི་བློ་སྦྱོང་བྱེད་པའི་མིའི་རིགས་ཤིག་འཇིག་རྟེན་འདིར་སྐྱེད་སྲིང་གང་མང་བྱེད་དགོས། ད་དུང་མིའི་རིགས་ཀྱི་ཁྲོད་དུ་ཤེས་རིག་དང་ལྡན་པ་གང་མང་བསྐྲུན་པར་མཐུན་རྐྱེན་སྦྱོར་དགོས། ཕྱིའི་དངོས་པོ་རྣམས་ཚན་རིག་དང་མཐུན་པར་བསམ་གཞིག་བྱེད་དགོས་པ་ལས། རྨོངས་དད་ཀྱི་ལམ་ཁའི་ཁྲོད་དུ་སྒྲུབ་མི་རུང༌། ཚན་རིག་དང་མཐུན་པར་ལག་བསྟར་བྱས་ན་འགྲོ་བ་མིའི་རིགས་ལ་མ་འོངས་པའི་ལོ་རྒྱུས་ཤིག་འབྱུང་སྲིད།
  གལ་ཏེ། འགྲོ་བ་མིའི་རིགས་ལ་འཕྲད་བཞིན་པའི་གོང་གི་ཛ་དྲག་གི་དོན་ཚན་ལྔ་བོ་དེ་ང་ཚོས་གདོང་ལེན་བྱས་ནས་འཕྲལ་དུ་སེལ་ཐུབ་ཚེ། འདིར་ལུས་སེམས་བདེ་ཐང་དང་མི་གཤིས་ཡ་རབས་ཅན། མཆོག་ཏུ་གྱུར་བའི་འགྲོ་བ་མིའི་རིགས་ཤིག་གནས་སྲིད་པ་རེད། ད་དུང་མ་འོངས་པར་འཛམ་གླིང་སྟེང་དུ་རྒྱལ་ཁབ་ཀྱི་ས་མཚམས་མེད་པ། རྒྱལ་ཁབ་ལ་ཕྱོགས་རིས་མེད་པ། དྲང་བདེན་ལ་བརྩི་འཇོག་བྱེད་པ། ཞི་བདེ་དང་སྙིང་རྗེ་ལྡན་པ། དམག་འཁྲུག་སོགས་གང་ཡང་མེད་པར་ཆོས་སེམས་ཅན་གྱི་མི་རིགས་ཤིག་དགའ་སྤྲོ་ངང་གནས་སྲིད། གལ་ཏེ། དཀའ་ངལ་ལྔ་བོ་རྣམས་འཕྲལ་དུ་མ་སེལ་ཚེ། འདིར་མ་འོངས་པ་ཞིག་འབྱུང་མི་སྲིད། །དེ་བས་ཁྱེད་ཀྱིས་མ་འོངས་པའི་ལོ་རྒྱུས་ཟེར་བའི་རང་ཉིད་ཀྱི་བརྩམས་ཆོས་དེ་གང་མགྱོགས་ཀྱིས་རྩོམ་པར་མགོ་འཛིན་དགོས། ཕལ་ཆེར། འདིར་མ་འོངས་པ་ཞིག་གང་ཡང་མི་ལྷག་པར་འགྱུར་བའི་ཉེན་ཁ་ཆེ།
               ༼ཁྲི་ཆུ་བཟང་རྒྱ་མཚོས་བསྒྱུར༽

རྩོམ་ཁུངས། ངེད་དྲ་བ།