ཁོ་གཉིས་ནི་སྤྱི་བའི་ཐོག་ཁང་གི་སྐས་བར་ནས་ཕྲད་པ་ཡིན་ལ། སོ་སོའི་ལག་ཏུ་གད་སྙིགས་ཀྱི་ཁུག་མ་རེ་བཟུང་འདུག འདི་ནི་ཁོ་གཉིས་ཀྱི་ཐོག་མའི་ཁ་བརྡ་རེད།

“ཞོགས་པ་བདེ་ལེགས།”
“ཞོགས་པ་བདེ་ལེགས།”
“ལྕམ་མོ་ཁྱེད་སྒོ་རྟགས་༦༡༠ཅན་དུ་བསྡད་ཡོད་དམ།”
“སྐུ་ཞབས་ཁྱེད་སྒོ་རྟགས་༦༡༣ཅན་དུ་བཞུགས་ལགས་སམ།”
“ཡིན་ལགས།”
“ངས་ད་དུང་ཁྱེད་རང་ངོ་གསལ་བོ་ཤེས་ཀྱིན་མེད་ལགས།”
“རེད་ལགས།”
“ངའི་ལས་སྲོལ་ལ་གུ་ཡངས་གནང་རོགས། ངས་ཁྱེད་ཀྱི་གད་སྙིགས་བསློགས་མྱོང་།”
“ངའི་ཅི་ཞིག་ཟེར་རམ།”
“ཁྱེད་ཀྱི་གད་སྙིགས།”
“ཨོ་་་་་་”
“ངས་ཁྱེད་ལ་ནམ་ཡིན་ནའང་གད་སྙིགས་མང་བོ་མི་འདུག་པ་མཐོང་། ཁྱེད་ཚང་ལ་ཁྱིམ་མི་ཤིན་ཏུ་ཉུང་ཐག་ཆོད་རེད།”
“དོན་དམ་དུ། ང་རང་གཅིག་པུ་ཡིན།”
“ཨུམ། ངས་མཉམ་བཞག་པ་ལྟར་ན་སྐུ་ཞབས་ཀྱིས་རྒྱུན་པར་ལྕགས་ཀྲིན་ཟས་རིགས་ཟ་བཞིན་མི་འདུག་གམ།”
“ཡིན་ལགས། ངས་རང་གི་ལག་འགུལ་ནས་ཟ་མ་བཟོ་དགོས། ཡིན་ནའང་བཟོ་མི་ཤེས་པར་འདུག”
“དེ་ངས་ཧ་གོ་ཡི་འདུག”
“ལྕམ་མོ་ཁྱེད་ཀྱང་་་་་”
“ཉིད་ཀྱིས'ཁྱོད'ཅེས་པ་འདི་སྤྱོད་རོགས།”
“ཁྱོད་ཀྱིས་ཀྱང་བདག་གི་ལས་སྲོལ་ལ་གུ་ཡངས་གནང་རོགས། ངས་ཀྱང་ཁྱོད་ཀྱི་གད་སྙིགས་ནང་རྒྱུན་པར་ཟ་འཕྲོ་བྱས་པའི་ཟས་རིགས་མང་ཙམ་ཡོད་པ་མཐོང་། དཔེར་ན་ཤ་མོ་ལྟ་བུ།”
“ང་ནི་སྲེག་སྦྱོར་བྱས་པའི་ཟས་ལ་ཤིན་ཏུ་དགའ་བོ་ཡོད། ཚལ་རིགས་སྣ་ཚོགས་བཟོས་པ་ཡིན། ཡིན་མོད་ང་རང་གཅིག་པུ་ཡིན་པས་ནམ་རྒྱུན་ཟས་འཕྲོ་ལྷག་ཡོང་གི་འདུག”
“ལྕམ་ཁྱེད་ལ། མ་རེད། ཁྱོད་་་་ཁྱོད་ལ་ཡུལ་མེད་དམ།”
“ཡོད་ནི་ཡོད་ཀྱང་། འདི་རུ་མེད།”
“ཨེ་ཟི་བྷི་ལིས་ཐོ•ཧྲིན་ཐོ་ན་ཡོད་དམ།”
“ཁྱོད་ཀྱིས་ཇི་ལྟར་ཤེས་པ་ཡིན།”
“ཁྱོད་ཀྱི་གད་སྙིགས་ནང་ཡིག་ཤུབས་རེ་མཐོང་རྒྱུ་འདུག་ཅིང་། ཨེ་ཟི་བྷི་ལིས་ཐོ•ཧྲིན་ཐོ་ནས་བསྐུར་ཡོང་བ་རེད།”
“བདེན། ཨ་མས་གཟའ་འཁོར་རེ་རེ་བཞིན་ང་ལ་འཕྲིན་གཏོང་བར་བྱེད།”
“མོ་དགེ་རྒན་ཡིན་ནམ།”
“ཡ་མཚན། ཁྱོད་ཀྱིས་ཇི་ལྟར་ཚོད་དཔག་བྱས་པ་ཡིན།”
“ཡིག་ཤུབས་སྟེང་གི་ཡིག་གཟུགས་ལས་ཤེས་པ་ཡིན། དགེ་རྒན་གྱི་ཡིག་གཟུགས་དང་འདྲ་བོ་འདུག”

“ཁྱོད་ལ་འཕྲིན་མང་བོ་མི་འདུག དེ་ཁྱོད་ཀྱིས་གད་སྙིགས་ལས་ཤེས་ཐུབ།”
“བདེན།”
“ཉིན་ཞིག ཁྱོད་ཀྱིས་ལྟེབས་ཆགས་སུ་སོང་བའི་གློག་འཕྲིན་ཞིག་གཡུགས་འདུག”
“བདེན།”
“བཀྲ་མི་ཤིས་པའི་དོན་ཞིག་ཡིན་ནམ།”
“ངའི་ཕ་ལགས་འདས་སོང་འདུག”
“ང་ཡང་སྐྱོ་བོ་བྱུང་།”
“ཁོ་ལོ་ན་ཧ་ཅང་མཐོ། ལྷོ་ཕྱོགས་སུ་ཡོད། ངེད་ཅག་དུས་ཚོད་ཤིན་ཏུ་རིང་བོ་ཞིག་ལ་མཇལ་མྱོང་མེད།”
“དེའི་ཕྱིར་སྐབས་དེ་ནས་བཟུང་ཡང་བསྐྱར་དུ་བ་འཐེན་པ་ཡིན་ནམ།”
“ཁྱོད་ཀྱིས་ཇི་ལྟར་ཤེས་པ་ཡིན།”
“ཉེ་ལམ་ཁྱོད་ཀྱི་གད་སྙིགས་ནང་དུ་རྒྱུན་པར་དུད་སྒམ་རྙིང་བ་རེ་མཐོང་རྒྱུ་འདུག”
“ངོ་མ་ཡིན། འོན་ཀྱང་ངས་ཡང་བསྐྱར་བཅད་ཟིན།”
“འཇིག་རྟེན་བྱེད་པོས་མཁྱེན། ངས་ནི་དུ་བ་རྩ་བ་ནས་འཐེན་མྱོང་མེད།”
“དེ་ངས་ཤེས་གི འོན་ཀྱང་ཁྱོད་ཀྱི་གད་སྙིགས་ནང་དུ་སྨན་སྣོད་སྟོང་བ་རེ་རྒྱུན་པར་ཡོད་པ་དེ་་་་”
“གཉིད་སྨན་རེད། སྐབས་དེ་ཤེད་ཅིག་ལ་གཉིད་ཁམས་བདེ་བོ་མི་འདུག ད་ནི་སྐྱོན་མི་འདུག”
“ཁྱོད་དང་མཛའ་བོ་མ་འགྲིག་པ་རེད་དམ། ཨེ་རེད།”
“འདི་ཡང་གད་སྙིགས་ལས་ཤེས་པ་མིན་འགྲོ།”
“ཁྱོད་ཀྱིས་སྔོན་ལ་མེ་ཏོག་ཆུན་པོ་ཞིག་དང་མིང་བྱང་ཞིག་གཡུགས་འདུག དེའི་འཕྲོར་ཤོག་བུའི་ལག་ཕྱིས་འགའ་ཡང་དོར་འདུག”
“ཡིན་ཡ། དེ་དུས་ང་ཤུགས་ཆེན་པོས་ངུས་ཤིང་སེམས་ཤིན་ཏུ་སྐྱོ་བོ་བྱུང་། ད་ནི་འདས་ཟིན་པ་རེད།”
“འོན་ཀྱང་དེ་རིང་ཡང་ཤོག་བུའི་ལག་ཕྱིས་ཤིག་འདུག”
“ང་ལ་ཆམ་པ་བྱུང་འདུག”
“ཨོ།”
“ཁྱོད་ཀྱི་གད་སྙིགས་ནང་དུ་རྒྱུན་པར་ཡིག་བསྒྲིགས་རོལ་རྩེད་ཀྱི་དུས་དེབ་རེ་མཐོང་རྒྱུ་འདུག”
“བདེན། ཅུང་ཙམ་ཡང་ནོར་མི་འདུག ང་ཁྱིམ་དུ་འཛུལ་ནས་འདུག་རྒྱུར་དགའ་ཞིང་། ཕྱིར་ཉུལ་བར་དགའ་བོ་མེད། རྒྱུ་རྐྱེན་ཅིའི་ཕྱིར་ཡིན་པ་ཤེས་སམ།”
“མཛའ་མོའི་ཕྱིར་དུ་ཡིན་ནམ།”
“མིན།”
“འོན་ཀྱང་ཉིན་འགའི་སྔོན་ལ། ཁྱོད་ཀྱི་གད་སྙིགས་ནང་བུད་མེད་ཅིག་གི་འདྲ་པར་ཞིག་འདུག སྐྱེ་གཟུགས་ཀྱང་ཧ་ཅང་མཚར་བོ་ཞིག་རེད།”
“དེ་ནི་འཐེན་སྒམ་གཙང་དག་བྱེད་དུས་ལག་སོན་བྱུང་བ་ཡིན། འདས་དོན་ཙམ་མོ།།”
“འདྲ་པར་གཤགས་མི་འདུག དེས་ཁྱོད་ཀྱི་སེམས་ནས་ཁོ་མོ་ཕྱིར་ཡོང་བར་རེ་སྒུག་བྱས་ཡོད་པ་མཚོན་ཐུབ།”
“ཁྱོད་ཀྱིས་ངའི་གད་སྙིགས་ལ་ཕྱོགས་ཡོངས་ནས་དབྱེ་ཞིབ་བྱས་འདུག”
“ཁྱོད་ཀྱིས་གད་སྙིགས་ཀྱིས་དངོས་གནས་ངའི་མོས་པ་དྲངས་མྱོང་། དེ་མ་དྲངས་མི་ཟེར།”
“སྐྱིད་པོ་འདུག ཐེངས་ཤིག་ཁྱོད་ཀྱི་གད་སྙིགས་བསློགས་ཚར་དུས། ངས་ངེས་པར་དུ་ཁྱོད་རང་ངོ་ཤེས་པར་བྱས་ན་སྙམ། དེ་ནི་ཕལ་ཆེར་ཁྱོད་ཀྱི་སྙན་ངག་བཀླགས་པས་ཡིན་རྒྱུ་རེད།”
“ཅི། ཁྱོད་ཀྱིས་ངའི་སྙན་ངག་མཐོང་སོང་ངམ།”
“མཐོང་མྱོང་བས་མི་ཚད་ཞེ་དྲགས་དགའ་བོ་ཡོད།”
“བྲིས་པ་ཤིན་ཏུ་ཞན།”
“གལ་སྲིད་ཁྱོད་ཀྱིས་སེམས་གཏིང་ནས་མི་ལེགས་པར་འདོད་ན། ཤོག་བུ་དེ་གཤགས་རལ་དུ་གཏོང་ངེས་མོད། ཁྱོད་ཀྱིས་ལེགས་པར་ལྟེབས་འདུག”
“གལ་ཏེ་ཁྱོད་ཀྱིས་མཐོང་འགྲོ་བ་ཤེས་ཚེ་་་་”
“ངས་ཁྱོད་ཀྱི་སྙན་ངག་དག་བསྡུ་ཉར་བྱས་མེད། ངའི་བསམ་པར་དེ་རྐུ་ལ་གཏོགས་པར་སྙམ། ང་རང་གིས་ཀྱང་གཞན་གྱི་གད་སྙིགས་དེ་སྒེར་གྱི་རྒྱུ་ནོར་དུ་གཏོགས་མིན་མི་ཤེས་ནའང་།”
“ངས་བལྟས་ན་གཏོགས་རྒྱུ་མ་རེད། གད་སྙིགས་ནི་སྤྱི་བའི་རེད།”
“བདེན་པ་རེད། གད་སྙིགས་ཀྱིས་གསང་བ་གསལ་བར་བྱེད་ཅིང་། ང་ཚོ་སྒེར་གྱི་འཚོ་བའི་ནང་གི་ལྷག་མར་གྱུར་བ་དང་གཞན་ཚོའི་སྒེར་གྱི་འཚོ་བའི་ནང་གི་ལྷག་མར་གྱུར་བ་དག་གཅིག་ཏུ་སྦྱོར་བར་བྱེད། དེ་ནི་མི་དང་མི་ཕན་ཚུན་རྒྱུས་ལོན་དང་མཛའ་བརྩེ་འཐོབ་པར་བྱེད་པའི་འབྲེལ་ཟམ་ལྟ་བུ་རེད་ལ། ང་ཚོའི་འཚོ་བའི་ཁྲོད་སྤྱི་ཚོགས་ཀྱི་རང་བཞིན་ཤུགས་ཆེར་ལྡན་པའི་ཆ་དེ་རེད། ཨེ་རེད།”
“རེད་ཡ། ཁྱོད་ཀྱིས་གད་སྙིགས་ལ་དབྱེ་ཞིབ་ཤིན་ཏུ་ཟབ་མོ་བྱས་འདུག ངས་བལྟས་ན་་་་”

“ཁ་སང་། ཁྱོད་ཀྱི་གད་སྙིགས་ནང་དུ་་་་་”
“ཅི་ཞིག་འདུག”
“ངས་མཐོང་བ་ནོར་མེད་ན། ཆུ་འབུ་གློ་ཉལ་གྱི་ཤུན་པ་འདུག”
“ཁྱོད་ཀྱིས་བཤད་པ་བདེན། ངས་ཆུ་འབུ་གློ་ཉལ་འགའ་ཉོས་ཤིང་། ཤུན་པགས་བཤུས་པ་ཡིན།”
“ང་དེ་བཟའ་བར་ཤིན་ཏུ་དགའ།”
“ངས་ཤུན་པ་བཤུས་ནས་བཟའ་རྐྱང་བྱས་ཡོད། མཉམ་དུ་ཟོས་ན་ཆོག་གམ།”
“མཉམ་དུ་ཟས་ལ་རོལ་ཟེར་བ་ཡིན་ནམ།”
“དེ་ཡིན་ལགས།”
“ཁྱོད་ལ་དཀའ་ལས་བཟོ་རྒྱུ་རེད།”
“དེ་ལ་དཀའ་ལས་ཤིག་གང་ན་ཡོད།”
“ཁྱོད་ཀྱི་ཐབ་ཚང་ནང་ལ་རྫོབ་སྐྱེལ་ན་ཐང་།”
“སྐྱོན་མེད། གད་བདར་ལེགས་པོ་བྱས་རྗེས། གད་སྙིགས་རྣམས་དོར་བཞག་ན་དེ་རེད།”
“དེ་དུས། ངའི་གད་སྙིགས་རེད་དམ། ཁྱོད་ཀྱི་གད་སྙིགས་རེད།” 

                     འཆིང་གྲོལ་གྱིས་བསྒྱུར།

                 (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།