ཕན་ཚུན་མཛའ་ཞིང་སྙིང་ཉེ་བའི་མི་དེ་གཉིས།
ཁ་རོག་གེར་འཐམས་ནས་བསྡད།
བརྩེ་དུངས་ནི་ནམ་ཡང་བརྩེ་བའི་སྐད་ཆ་དེ་དག་ལས།
ཆུང་ཡོད་ཀྱང་སྲིད་ལ། 
ཡང་ན་ཆེ་སྲིད་ངེས་པས།
ཕན་ཚུན་མཛའ་ཞིང་སྙིང་ཉེ་བའི་མི་དེ་གཉིས།
ཞེ་བསམ་པའི་གཏིང་ནས་འདྲིས་ཏེ།
ཕན་ཚུན་དགའ་བའི་ཕྱིར་དུ།
ཁུ་སིམ་མེར་འཐམ་ནས་བསྡད།
ཁུ་སིམ་པོར་བསྡད་ཚེ།
སྔོ་བསངས་ནམ་མཁའ་གྲོགས་སུ་སྦྲན་ཆོག
རྡོ་བ་ཆུང་ཆུང་ཡང་གྲོགས་སུ་བསྡེབ་ཆོག
རྐང་པ་རྗེན་པའི་ཞབས་སུ་འབྱར་བའི།
ཁང་བའི་ནང་གི་ས་རྡུལ་དེས།
རས་གདན་བཙོག་པས་བསླད།

སྨག་རུམ་གྱིས་ག་ལེར།
ཐམས་ཅད་ཀྱི་མིང་མེད་པར་བཏང་ནས་བུད་སོང་།
ནམ་མཁར་མིང་མེད།
ཁང་བར་མིང་མེད།
འཇིག་རྟེན་ལ་མིང་མེད།
ཙོག་གེར་བསྡད་པའི་མི་གཉིས་ལ་མིང་མེད།
ཡོད་ཚད་ནི་མིང་མེད་དུ་གནས་པའི་ཕུ་ནུ་ཡིན།
ཡིན་ཡང་ལྷ་གཅིག་པུར།
ཆེས་ཐོག་མའི་མིང་ལྗིད་པོ་དེ་ཡོད་པས།
ཤག་སྒྲ་དང་བཅས།
རྩངས་པ་ནང་བཞིན།
མི་གཉིས་ཀྱི་དཀྱིལ་ལ་ལྷུང་འགྲོ །

             འཇིག་རྟེན་གྱི་ཁ་དན།

མཆི་མའི་གཏིང་རིམ་ན་འཁྱོམ་པའི་འཛུམ་ཆུང་གང་དེ།
གདོད་མ་ནས་འཇིག་རྟེན་ལ་བཞག་པའི་ཁ་དན་ཡིན།

ད་ལྟ་གཅིག་པུ་རང་ཡིན་ཀྱང་མི་གཉིས་ཀྱི་ཁ་སང་ལས།
དང་ཐོག་འཕྲད་པའི་ཉིན་དེ་ལྟར།
དེ་རིང་མཛེས་སྡུག་གིས་བལྟམ་ཡོང་།

ཕྱིར་དྲན་གྱི་ཁུག་སོ་རུ་ཁྱེད་རང་མཐོང་རྒྱུ་མི་འདུག
ཁྱེད་ནི་རླུང་བསེར་བུར་སྤྲུལ་ཏེ་གདོང་པར་རེག་བཞིན་བསླེབ་ཡོང་།

ཉི་འོད་ནགས་གསེབ་ནས་ཟགས་པའི་ཕྱི་དྲོ་དེར་ཁ་བྲལ་རྗེས་སུའང་།
གཏན་ནས་རྫོགས་རྒྱུ་མེད་པའི་འཇིག་རྟེན་གྱི་ཁ་དན་དེ་བཞག་ཡོད།

ད་ལྟ་མི་གཅིག་པུ་ཡིན་ཀྱང་སང་ཉིན་ལ་འཛད་མཐའ་མེད།
ཁྱེད་ཀྱིས་བཤད་པའི་མཚན་མོའི་ཁྲོད་ཞི་འཇམ་ཡིབ་ཡོད་འདུག

ཕྱིར་དྲན་གྱི་ཁུག་སོ་རུ་ཁྱེད་རང་མཐོང་རྒྱུ་མི་འདུག
གྲོག་ཆུའི་གཞས་ཆུང་གི་སྒྲ་དང་ནམ་མཁའི་མདངས།
མེ་ཏོག་གི་དྲི་ངད་ཁྲོད་དུ་ཁྱེད་རང་ནམ་ཡང་འཚོ་ཞིང་གཞེས་ཡོད།

བུམ་པ་རྒྱལ་གྱིས་ཉི་ཡིག་ནས་བསྒྱུར།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།