གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག
པར་དབང་ཡོད་ཚད་མཆོད་མེ་བོད་ཀྱི་རྩོམ་རིག་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་བརྒྱུད་འགོད་བྱེད་མི་ཆོག Copyright © 2005-2024 tibetcm.com All rights reserved. Powered by: tibetitw.com E-mail:tibetcm@126.com QQ:492779202
༄།། ཁ་སང་དགོང་མོ་ཆུ་ཚོད་བཅུ་དང་སྐར་མ་སུམ་ཅུའི་ཐོག་གངས་ལྗོངས་ཁུ་བྱུག་སྔོན་མོའམ། མིང་དུ་གྲགས་པའི་གླུ་བ་གདུ་བྷེ་ང་ཚོ་དང་གྱེས་ནས་འཇིག་རྟེན་གཞན་པ་ཞིག་ཏུ་བཞུད་སོང་ཟེར། ལོ་ན་མི་མཐོ་ཞིང་མིང་གྲགས་མི་དམན་པའི་གླུ་བ་ཁོང་འདི་ལྟར་ཕེབས་ཤུལ་ན། གླུ་བ་གླུ་མ་ཉེ་དུ་འབྲེལ་ཡོད་མང་པོ་སྐྱོ་གདུངས་དང་བྲེལ་ཚུབས་ཀྱིས་ཁེངས་འདུག སྤྱིར་ན་སྐྱེ་མཐའ་འཆི་ཞིང་འདུས་མཐའ་བྲལ་བ་འཁོར་བའི་ཆོས་ཉིད་ཡིན་གཤིས། དུས་ཚོད་སྐར་མ་འགའ་སྔ་ཕྱི་ཤོར་བ་ཙམ་ལ་ཆེན་པོ་ཞིག་ཧང་སང་དགོས་རིན་མེད་ན་ཡང་། ཕ་སྐད་གཙང་མའི་ལམ་ནས་བོད་པའི་ལས་དབང་ངག་ལ་བསྟར་བའི་གླུ་བ་ཁོང་གིས། ལོ་ངོ་དུ་མའི་རིང་རྒྱུད་དྲུག་པི་ཝང་ལག་ཏུ་བཟུང་ནས་མགྲིན་གླུ་སྙན་མོ་དབྱངས་ལ་གྱེར་བ་དེ་ཚོ། གཞི་བྱེས་རིགས་མཐུན་སྤུན་ཟླ་ཁྲི་སྟོང་མང་པོ་ཞིག་གི་སེམས་ཀྱི་ལོངས་སྤྱོད་དང་རྣ་བའི་བདུད་རྩི་རུ་གྱུར་སྟབས། ཁོང་ཉིད་འདི་ལྟར་ཕེབས་པ་ལ་གདུངས་སེམས་ཚད་མེད་བྱེད་པ་ཡང་གནས་ལུགས་ཤིག་དང་གཟི་བརྗིད་ཅིག་ཅི་ལ་མིན། འོན་ཀྱང་འདས་པའི་ལོ་ཟླ་ཕྱིར་འོང་དང་ཤི་བའི་སྐྱེ་བོ་སླར་གསོན་མེད་པ་མངོན་གསར་ལགས་ན་སྨེང་གཏམ་དང་མཆི་མ་བརྩེག་པས་སུ་ལ་ཅི་ཞིག་ཕན། དགའ་སྐྱོ་གཉིས་ཀྱིས་གྲུབ་པའི་འཇིག་རྟེན་གྱི་ཚེ་སྲོག་གང་ཞིག་ལ་གཏན་དུ་མཁོ་བ་དག་ཞིང་གི་ལོངས་སྤྱོད་ཡིན་ཚོད།སྲས་བཅས་རྒྱལ་བའི་མཛད་རིམས་ཁག་ནང་ཉི་ལྟར་གསར་ཞིང་རི་ལྟར་བརྟན་པས། ང་ཚོ་བོད་པ་ཕྲེང་འཛིན་ཚང་མས་གླུ་བ་ཁོང་དང་ཁོང་ལྟ་བུའི་འདས་པོ་སྙིང་ཉེ་ཚོའི་གཙོས་སེམས་ཅན་ཐམས་ཅད། བདེ་ནས་བདེ་བའི་ལུས་རྟེན་ལེགས་བརྒྱུད་དེ།། མཐར་ཐུགས་སངས་རྒྱས་གོ་འཕང་ཐོབ་ཕྱིར་ཏུ།། རང་གཞན་དུས་གསུམ་བསག་དགེ་ཅི་མཆིས་སྔོ།། བདེ་བའི་སྟེགས་ལ་ངལ་གསོ་རྙེད་གྱུར་ཅིག། བདག་ལ་བཟང་ངན་ལས་ཀྱིས་འབྲེལ་ཐོགས་ཀུན།། གནས་སྐབས་ཀུན་ཏུ་རྒྱལ་བས་རྗེས་བཟུང་སྟེ།། འགྲོ་རྣམས་བླ་མེད་ཐེག་པའི་སྒོར་ཞུགས་ནས།། ཀུན་བཟང་རྒྱལ་སྲིད་ཆེན་པོ་ཐོབ་གྱུར་ཅིག། ༀ་མ་ཎི་པདྨེ་ཧཱུྃ ༀ་མ་ཎི་པདྨེ་ཧཱུྃ ༀ་མ་ཎི་པདྨེ་ཧཱུྃ ༢༠༡༦ ༢ ༢༨ ཉིན།
དངོས་ནས། མི་མང་པོ་ཞིག་ལ་མཚོན་ན་ཁོང་གི་སྙན་ཞིང་འཇེབས་པའི་གླུ་ངག་ལ་ཉམས་སུ་མྱོང་བ་ལས། སླར་ཁོང་ཉིད་ལ་དྲིན་བཟོ་བའི་སྐད་ཆ་ཚིག་གཅིག་ཀྱང་ངག་ནས་ཐོན་མེད། གཅིག་བྱས་ན། རྡུང་ལེན་པ་ཁོང་གིས་ང་ཚོའི་སེམས་སུ་ཁོང་གི་གོ་གནས་ཅི་འདྲ་ཡིན་པ་རྟོགས་མེད་ལ། དེ་རིང་གི་སྐྱོ་གདུང་གི་འབོད་པ་རེ་རེ་ཐོས་ཐབས་བྲལ། ཐ་ན་ཁོང་ཉིད་ཅུང་ཟད་སྐྱོ་སྣང་དང་བཅས་མི་ཡུལ་ལ་གྱེས་ཕྱག་ཞུས་ཡོད་ཀྱང་སྲིད། དེ་ནི་རང་གཞན་སུ་ལ་མཚོན་ཡང་ཕངས་སེམས་ཤིག་ཅི་ལ་མིན། རེད་དེ། བོད་མི་ཕལ་མོ་ཆེ་ནི་གཞུང་དྲང་ཟོལ་མེད་དང་། བརྩེ་སེམས་གཙོ་རུ་འཛིན་མཁན་ཡིན་པ་ཁོང་གིས་མཁྱེན་ཡོད་ངེས། ད་ནི་ལེ་བདའ་དང་འགྱོད་ཚིག་ཅི་ཡང་མི་མཁོ་སྟེ། ང་ཚོས་ཁུ་སིམ་མེར་འདས་པོ་ཁོང་ལ་སྨོན་ལམ་རྣམ་དག་ཅིག་རྒྱག དེ་ནི་བོད་ཆོས་ལྡན་ཞིང་གི་སྐྱེ་བོ་སུ་ལ་མཚོན་ཡང་ཤི་བའི་དུས་ཀྱི་རེ་ས་ཡིན།
༼བར་དོའི་སྣང་བ་ཤར་བར་གྱུར་མ་ཐག།རྒྱལ་སྲས་བརྒྱད་ཀྱིས་མ་ནོར་ལམ་བསྟན་ཏེ།།བདེ་བ་ཅན་དུ་སྐྱེས་ནས་སྤྲུལ་བ་ཡིས།།མ་དག་ཞིང་གི་འགྲོ་རྣམས་འདྲེན་པར་ཤོག།༽