ཤ།

ཤ་མང་པོ་བྱང་ཐང་འབྲོང་ལ་ཡོང་།།

མི་མང་པོར་བགོས་ན་ཐོབ་སྐལ་ཆུང་།།

ཤ་གྲང་མོ་དགའ་སྟེ་ཇག་པར་མི་རག།

ཇ་ཚ་པོ་དགའ་སྟེ་འཚེམ་བུ་བར་མི་རག།

ཤ་སོགས་པ་གཅིག་ལ་ཟ་རེས་དང་།།

ཆང་དམ་བི་གང་ལ་འཐུང་རེས།།

ཤ་འཁྱགས་བཙོས་ན་བཟའ་ཚང་གྲོས་བྱེད།།

ཤ་རྡོག་སྒང་ལ་མར་རྡོག།

གོས་ཆེན་སྒང་ལ་ཕར་ཕྱིན།།

ཤ་ནས་ཤ་ཁུ་དང་མར་ནས་མར་ཁུ།།

ཤ་བུ་མོ་གཉིས་ཀྱིས་ཕུགས་མི་འཕེར།།

ཤ་ཞིམ་པོ་རུས་པའི་གསེབ་ལ་ཡོད།།

དེ་དཔོན་ལ་མ་རག་གཡོགས་ལ་རག།

ཤ་ལོ་དཀར་པོ་རུས་པའི་གཏིང་ནས་མེད་ན།།

དྲེག་པ་ནག་པོ་ཕྱིས་ཀྱང་མི་འགྲོ།།

ཤ་ལུག་མགོ་ཟ་བར།།

མིག་རིལ་གྱི་ལྟོགས་སླ།།

ཤ་ཡིས་མར་དགོས་མ་ཆོད།།

ཤ་ཁྱི་རྐང་པ་ཚ་རོགས་དང་།།

ཇོ་ལགས་སྐུ་ཐང་མཉེལ་རོགས།།

ཤ་གཟན་གྱི་ཨ་ཕོ་སྤྱང་ཀི་དེ་རི་ལ་བཏང་།།

ཆུ་འཐུང་གི་ཨ་ཅེ་ཝ་མོ་དེ་རྒྱ་ལ་བཟུང་།།

ཤ་ཡོད་ན་ལྤགས་པ་ཡོད་པ།།

ཤ་མི་ཟ་ཟེར་མི་བླ་མ་རེད།།

ཤ་བྲང་ཤ་དགོས་མི་བླ་མ་རེད།།

ཤ་ཞིམ་པོ་ཨ་ཕོ་སྤྱང་ཀིས་བཟས།།

ཁག་ངན་པ་ཨ་ལྕེ་ཝ་མོར་བཞག།

ཤ་ཁང་མུན་པ་ནག་ཀྱང་།།

ཤ་ལ་ཤ་གྲངས་བརྒྱབས་ཡོད།།

ཤ་ཤི་ཤར་མ་གཟིགས་ཀྱང་།།

སྡེར་མ་གསེར་སྡེར་ལ་དགོངས་པ་བཞེས།།

ཤ་འཚོ་ཞན་མེད་པ་འདྲེས་དགོས།།

གྲི་ཡག་ཉེས་མེད་པ་རྣོ་དགོས།།

ཤ་གར་སོང་མེད་པར།།

རིན་འཇོག་ལ་རྩོད་པ།།

ཤ་ཚ་བའི་གཏམ་གྱིས་རྣ་ཚ།།

ནད་མཁྲིས་པའི་སྨན་གྱིས་ལྕེ་ཏིག།

ཤ་རྡོག་གཅིག་ལ་འཚོས་རྒྱུ་མེད།།

མི་རྡོ་གཅིག་ལ་སྐྱིད་རྒྱུ་མེད།།

ཤིང་རྡོག་གཅིག་ལ་འབར་རྒྱུ་མེད།།

ཤ་ལུག་མགོ་ཟ་བར་མིག་ཚིལ་གྱི་རེ་བ།།

ཤ་ཆེ་ན་ཤེད་ལ་མི་ཕན།།

གོས་ཆེ་ན་ལུས་ལ་མི་སྐྱིད།།

ཤ་ཟད་འདོད་ན་མེ་ལ་སྲེགས།།

རྒྱུ་ཟད་འདོད་ན་ཁ་མཆུ་རྒྱོབས།།

ཤ་མ་བཟས་ཀྱང་ཤ་ཁུར་མཛུབ་མོ་བཙུགས་པས་ལན།།

ཤ་མ་འཚོས་པ་མ་ཤེས་པར།།

གྲི་མ་རྣོ་བའི་མགོ་ལ་བསྐྱལ།།

ཤ་ལ་འཚོས་ལོང་དང་།།

ཤ་ཁུར་གྲང་ལོང་ཡོད་དགོས།།

ཤ་ཁོག་ཕར་སྤྲད།།

ཏིག་ཁ་ཚུར་སྒུག།

ཤ་མཉམ་དུ་བཙོས་ཀྱང་།།

ཤ་དང་ཤ་ཁུ་ཁག་ཁག།

ཤ་ཟ་བདེ་བ་དང་།།

རུས་པ་བསྐྱུར་བདེ་བ།།

ཤ་ཤོར་གྱི་ཤ་ལན་དང་།།

རྒྱུ་ཤོར་གྱི་ར་མདའ།།

ཤའི་རིན་འབབ་ཚི་ལུས་ཐེག་དགོས།།

ཤ་ཁག་ཁག་གྲི་སོ་སོ།།

ཤ་གཅིག་ནས་བྲེགས་པའི་ཏིག་ཁ་དང་།།

ཀོ་བ་གཅིག་ནས་བྲེགས་པའི་རྒྱུན་བུ།།

ཤ་ལ་ཟ་ལོང་དང་།།

ལ་རྫས་ལ་གསོལ་ལོང་།།

ཤ་ལ་རྒྱག་དུས་རུས་ལ་གནོད།།

བཤད་པའི་ཚིག་ནག་སྙིང་ལ་ཟུག།

ཤ་གསར་ཨ་མ་ཨ་སྒྲོན།།

ལྟོ་ནད་མ་གཏོགས་གཏམ་ནད་མེད།།

ཤ་ཚའི་ཁ་ནས་གཏམ་སྙན་མི་ཐོན།།

ཤ་ལོ་དཀར་པོ་རུས་པའི་གཏིང་ནས་མེད་པར།།

སུག་པ་བུལ་ཏོག་བརྒྱབས་ཀྱང་ཨང་ལས་འོ།།

ཤྭ་རྐྱང་ཕར་འགྲོ་ཚུར་འགྲོ།།

ལ་རྫས་ཐལ་རྡུལ་གཏོང་ས།།

ཤྭ་བ་རྭ་ཅོ་རིང་ཡང་།།

གནམ་གྱི་སྐས་ཀ་མི་ཉན།།

ཤྭ་འདྲོག་རྐྱང་འདྲོགས་དགོ་བ་འདྲོག།

འདྲོག་རྒྱུ་མི་རྙེད་རི་བོང་འདྲོག།

ཤྭ་ཕོ་ལ་སྒང་འགྲོ་བ་ལ།།

ཕྱི་བལྟས་ལན་གསུམ་ལྟ་དགོས།།

ཤྭ་སྡུག་ཁྱི་སྡུག་རྔོན་པ་སྡུག།

རྫ་ཁྲ་ཡག་དཀྱིལ་དུ་གསུམ་ག་སྡུག།

ཤྭ་དང་ཤ་ཁྱི་ཐུག་ན།།

ཁྱི་ར་མགོན་པོ་རྡོ་རྗེ།།

ཤྭ་བ་རི་ནས་རྒྱག།

ཁ་མཆུ་འདུམ་ན་ཁེ།།

ཤྭ་བ་འཛིན་རྒྱུ་མེད་པས།།

ལུང་གཞུང་ཁྱི་སྒྲས་བརྒྱངས།།

ཤྭ་ཆད་ཐང་ལ་འབབས་དུས།།

ཤ་ཁྱི་གླ་ཁྱིས་བསྐོར།།

ཤྭ་ཕོ་དང་རྭ་ཅན་ལ་འགྲོ་ལུགས་བཅོ་བརྒྱད་ཡོད་ན།།

རྔོན་པ་སྨ་ར་ཅན་ལ་སྒུག་ལུགས་ཉི་ཤུ།།

ཤྭ་བ་ཡུལ་གྲུ་གང་དུ་བསྐོར་ཀྱང་།།

ཐ་མ་ལོག་ས་རང་གི་ཕ་ཡུལ།།

ཤྭ་ཕོའི་ཤེད་དང་།།

དགོ་ཕོའི་བང་།།

ཤྭ་བ་ཕོ་ཆེན་གྱི་མགོ་བོ་ཡང་མགོ།

བྱེའུ་ཆུང་ཛི་བི་ཡི་མགོ་བོ་ཡང་མགོ།

ཤྭ་བ་ཨ་མའི་སྔོན་ལ་ཤྭ་ཕྲུག།

ཤྭ་བ་གསོད་པའི་མི་དང་།།

ཤྭ་མཇུག་ནོན་པའི་ཁྱི།།

ཤྰཀྱ་ཐུབ་པའི་མདུན་དུ།།

ཤ་རིའི་བུ་ཡིས་སྒམ་སྒམ།།

ཤྰཀྱ་ཐུབ་པས་བཀག་ཀྱང་མི་ཁོགས་པ་དང་།།

འཇམ་དཔལ་དབྱངས་ཀྱིས་བཙལ་ཀྱང་མི་རྙེད་པ།།

ཤྰཀྱ་ཐུབ་པ་ཕེབས་དུས་མགོ་སྒུར་མ་དགོས་པ།།

གླང་ཆེན་སྨྱོན་པ་ཡོང་དུས་ལམ་གཟུར་མ་དགོས་པ།།

ཤག་པོས་མནའ་མི་ཟ།།

ཤགས་བརྒྱབ་ན་ཕ་བཟང་གི་བུ་ལ་རྒྱོབས།།

རྔོན་བརྒྱབ་ན་བྱང་ཐང་གི་འབྲོང་ལ་རྒྱོབས།།

ཤང་ཤང་རྒྱུག་ཆུར་རུལ་རྒྱུ་མེད།།

ཡ་རབས་ཚིག་ལ་འགྱུར་རྒྱུ་མེད།།

ཤངས་ནས་ཤངས་ལ་ཉིན་ལམ་གཅིག།

ཤངས་པས་ཤངས་པ་ངོ་མི་ཤེས།།

ཤངས་ལུང་པ་རྩྭ་སྣ་འཛོམས་ལེ་རེད།།

འཛོམས་མ་འཛོམས་གཡང་དཀར་ལུག་ལ་དྲིས།།

ཤན་པ་ལ་ཁ་ནས་གྲིབ་བརྡར།།

རྒས་མོ་ཐང་ཐེར་ནས་ངུ་ཤོད།།

ཤར་རྒྱ་གར་གྱི་རྨ་བྱ་ལ།།

ཚེ་འདི་ལ་ངོམ་རྒྱུ་སྒྲོ་མདོངས་རེད།།

ཤར་སྐྱ་རེངས་བཏང་ཡང་ནམ་མ་ལངས།།

ལྷོ་སྒེའུ་ཁུང་ཕྱེ་དང་མ་ཕྱེ་མེད།།

ཤི་མ་མྱོང་དམྱལ་བའི་ལོ་རྒྱུས།།

རྒས་མ་མྱོང་ཕ་ཚེ་བུ་རབས།།

ཤི་བ་བརྗེད་སླ།།

རྒས་པ་ངོ་ཆུང་།།

ཤི་ན་ཆོས་མེད་གྲྭ་སའི་གྲྭ་པ།།

བཤས་ན་ཤ་མེད་ཡུལ་པའི་རྨོན་ཁལ།།

ཤི་དམྱལ་བའི་ཡུལ་གྱི་ཆ་བསྐུར་དེ།།

གསོན་བྲང་ངེ་ཁམས་ལ་ཐེངས་པ་དགོས།།

ཤི་ས་ཡག་སྟེ་པོ་ཏ་ལ།།

ཤི་ལུགས་ངན་གདའ་སྒེའུ་ཁུང་ནང་།།

ཤིག་དང་འཇི་བ་སྲོ་མ་གསུམ།།

ཚེ་སྲོག་དོར་ས་སོར་མོའི་སྟེང་།།

ཤིག་གི་ཞོར་དུ་མཐེ་བོང་མེས་ཚིག།

ཤིག་གསོད་པར་སྟ་རེ་འཕྱར་མི་དགོས།།

ཤིག་མང་ན་རོགས་ཀྱིས་སྡང་།།

རྒྱུ་མེད་ན་གཉེན་གྱིས་སྡང་།།

ཤིག་ཟོས་ནས་གྲོད་པ་མི་རྒྱགས་ཀྱང་།།

ཚགས་ཟེར་ནས་སྣང་བ་སྐྱིད་སྐྱིད་རེད།།

ཤིག་གི་རྒྱུས་པ་བཏོན།།

སྲོ་མའི་ཀླད་པ་བལྡགས།།

ཤིག་འགྲོ་ས་མཐོང་བ་ལས།།

མཛོ་འགྲོ་ས་མི་མཐོང་བ།།

ཤིག་ལ་བརྒྱབ་ཀྱང་གོང་བའི་ཕྱི།།

ཐོག་ཁ་རྒྱ་ཆེ་ཡང་འགྲོ་ས་ཝ་མཆུ།།

ཤིག་སྡོད་མ་ཚུགས་ན།།

སེན་མོའི་བར་ལ་ཚུད་ཡོང་།།

ཤིང་བཟང་ལོ་འདབ་རྒྱས་ན།།

རི་ཀླུང་ཚང་མའི་རྒྱན་རེད།།

ཤིང་ལོ་འདབ་རྒྱས་ན་བསིལ་གྲིབ་བཟང་།།

ཆུ་རྐ་འགོར་ཡོད་ན་རྐ་མཇུག་བཟང་།།

ཤིང་ཆུང་ཆུང་གིས་གནམ་རྒྱ་རལ་དོགས་མེད།།

ཆུ་ཆུང་ཆུང་གི་ཟམ་པ་འཁྱེར་དོགས་མེད།།

ཤིང་སྔོན་པོའི་རྩེ་མོ་མཐོ་ན་ཡང་།།

རྣོ་སྟ་གྲིས་ཕར་བཅད་ཚུར་བཅད་རེད།།

ཤིང་རྩ་བ་མ་རུལ་ན་ལོ་མ་མི་སྐམ།།

ཤིང་ཀྱང་ཀྱོག་ལ་འཛེགས་སླ།།

མི་དབུལ་ཕོངས་ལ་ཤོད་སླ།།

ཤིང་རྒས་ན་རྩ་བ་མང་།།

མི་རྒས་ན་སྐད་ཆ་མང་།།

ཤིང་རྐང་གཅིག་གིས་ཇ་མི་འཁོལ།།

མི་ཧྲེང་གཅིག་གིས་ཐབ་མི་འཛིན།།

ཤིང་གདུང་མ་ཉན་པ་དགོས་ན་ཆུང་ན་བཟོ།།

མི་འཇོན་ཐང་ཡོད་པ་དགོས་ན་ཆུང་ནས་གསོ།།

ཤིང་གི་སོག་ལེ་ཤིང་ལ་མི་འགྲོ།།

ཤིང་ལ་ལྤགས་པ་དང་།།

མི་ལ་རྒྱུ་དག་དགོས།།

ཤིང་འཛེར་པའི་སྒང་ལ་སྟ་རེ་མ་གཞུ།།

མི་བདག་ཡོད་སྒང་ལ་བསམ་བློ་མ་གཏོང་།།

ཤིང་བཟང་ལྤགས་པའི་འོག་ཏུ་རུལ།།

མི་བཟང་ངོ་ཚའི་འོག་ཏུ་རུལ།།

ཤིང་ལ་ལྤགས་པ་དང་།།

མི་ལ་ངོ་ཚ་ཡོད།།

ཤིང་ཚེར་མ་ལ།།

བདག་པོ་ཀླུ་བཙན་ཡོད།།

ཤིང་སྡོང་ཐོག་ཏུ་འཛེགས་ནས།།

ཉ་མོ་ཐོབ་རེ་བྱེད་པ།།

ཤིང་སྡོང་གཅིག་གིས་ནགས་ཚལ་མི་ཆགས།།

རྩིད་རྐང་གཅིག་གིས་ཐག་པ་མི་ཡོང་།།

ཤིང་འཁྱོག་མེད་ནགས་ན་མེད།།

མི་སྐྱོན་མེད་གང་སར་མེད།།

ཤིང་ཐུར་གཅིག་གིས་གུར་མི་ཕུབ།།

ཨོང་རིལ་གཅིག་གིས་ཇ་མི་འཁོལ།།

ཤིང་གཟེར་ཤིང་ལ་མི་འགྲོ།།

མར་སྐོགས་མར་གྱིས་མི་དུལ།།

ཤིང་སྣ་འཛོམས་སར་བྱ་རིགས་མང་།།

དྲང་སེམས་ཅན་ལ་གྲོགས་པོ་མང་།།

ཤིང་གས་པ་སྤྱིན་གྱིས་སྦྱར་ལེ་ཡིན།།

གོས་རལ་པ་སྐུད་པས་འཚེམ་ལེ་ཡིན།།

ཤིང་གས་པའི་བར་གྱི་སྤྱིན་མ་བྱུང་ཡང་།།

རྡོ་གས་པའི་བར་ལ་བྱེ་མ་བྱེད་རྒྱུ་མེད།།

ཤེས་སུ་ཆེ་དང་།།

ཁ་སུ་བདེ་རེད།།

ཤེད་ཡོད་བཤན་པ་རྒྱལ་པོ་ལ།།

ཤེད་དེ་ཡོད་ཀྱང་དབང་དེ་མེད།།

ཤེད་མེད་ནུ་དཀར་རྒྱལ་པོ་ལ།།

དབང་དེ་ཡོད་ཀྱང་ཤེད་དེ་མེད།།

ཤེད་ཆེ་ནས་འབྲོང་ལ་མ་འཐམས་ཏེ།།

འུ་ཐུག་ནས་མི་འཐམ་ཀ་མེད་རེད།།

ཤེད་རྒྱལ་པོར་ཡོད་ཀྱང་བསྡུར་མཁན་མེད།།

བློ་སྤྲང་པོར་ཡོད་ཀྱང་དྲིས་མཁན་མེད།།

ཤེད་བཟང་དྲེའུའི་ཁལ་ཆེན་དེ།།

ཤེད་མེད་ཁ་དཀར་རྐྱང་ལ་བཀལ།།

ཤེད་ངོམ་ནས་རྟགས་ཚན་ཐོན་པ་དགོས།།

དེ་མེད་ན་སྟོང་གཏམ་འཆལ་བཤད་ཟེར།།

ཤེལ་སྒོའི་ནང་གི་མོག་མོག།

མིག་ལ་མཛེས་ཀྱང་ཟ་དབང་མེད།།

ཤེས་རྒྱུ་ལ་ཁབ་ལས་མེད་ཀྱང་།།

སྡོད་སྟངས་ལ་མགར་ཆེན་སྡོད་སྟངས།།

ཤེས་བྱ་བྱེ་ཐང་ཆུ་དང་འདྲ།།

གཏིང་དུ་བརྐོས་ན་དྭངས་ཤིང་བསལ།།

ཤེས་པ་ཁ་ནས་མ་ལབ་ན།།

བློ་གྲོས་ཁོག་པ་ནང་དུ་རུལ།།

ཤེས་ཡོན་མང་ཡང་རྫོགས་མཐའ་མེད།།

རྒྱུ་ནོར་མང་ཡང་རྫོགས་མཐའ་ཡོད།།

ཤེས་བྱ་མེད་པའི་འཚོ་བ་དེ།།

མེ་ཏོག་དྲི་མ་མེད་དང་མཚུངས།།

ཤེས་ཡོན་ནི་མདངས་ཆེའི་གསེར་ཏོག་དང་།།

རྒྱུ་ནོར་ནི་འདོད་པའི་ལྕགས་སྒྲོག་ཡིན།།

ཤོ་ཁེ་སར་རྒྱག།

རྒྱན་ལོན་སར་བཙུགས།།

ཤོག་ཟེར་ཉ་བསྒོང་ཟེ་གཟེངས་དང་།།

སྤྲོད་ཟེར་ཞ་ཆུ་ཁྲུམ་ཁྲུམ།།

ཤོད་མཁས་པས་སྒྲིབ་པ་མི་དག།

ངུ་མཁས་པས་མྱ་ངན་མི་སེལ།།

ཤོད་མ་དགོས་ཇོ་བོའི་དབུ་སྐྲ་དང་།།

ཕྱིས་མ་དགོས་དངུལ་དཀར་མེ་ལོང་།།

ཤོད་རྒྱུ་མེད་ནས་བཤད་ནད་ལངས།།

ཟེར་རྒྱུ་མེད་ནས་ཟེར་ནད་ལངས།།

ཤོད་རང་མཁས་ཀྱང་།།

སྤྱོད་མི་མཁས།།

གཤིབ་མ་དགོས་པའི་སྙིང་རྗེ་པོ།།

གསོ་མ་དགོས་པའི་གྲོད་པ་ཆུང་ཆུང་།།

གཤོག་སྒྲོ་དར་སྐུད་ཀྱིས་བསྡམས་ན།།

རྒོད་པོ་ནམ་འཕང་གཅོད་ཐབས་མེད།།

གཤོག་རྩལ་ཡོད་ན།།

ནམ་འཕང་སྤྱོད་དུས་ཤར།།

རྩོམ་ཁུངས། བོད་ལྗོངས་མི་དམངས་དཔེ་སྐྲུན་ཁང་གིས་པར་དུ་བསྐྲུན་པའི