༦༡སྟོད་ཨ་རིག་ལུག་བརྒྱའི་ཁྱུ་ནས།།

ངས་ཚེ་གཅིག་ལྷ་ལུག་བསལ་ཡོད།།

ཡར་རི་སྤྱང་སྔོན་མོ་ངན་རུང་།།

བོའུ་རྭ་རིང་ཕྲག་ནས་ལེན་དགོས་རུང་།།

ལུག་དེ་ཚོ་མི་སྐྱུར་ངོ་མ་ཡིན།།

ཡར་བྱང་ལམ་རྟ་བརྒྱའི་ཁྱུ་ནས།།

ངས་ཚེ་གཅིག་བློ་རྟ་བསལ་ཡོད།།

བྱང་ལམ་ཁའི་ཇག་པ་ངན་རབས་ཟེར།།

བྱང་ལམ་ཁའི་ཇག་པ་ངན་རུང་།།

མཆུ་དཀར་དཔོན་པོར་ཐུག་དགོས་རུང་།།

མདའ་ལི་མ་མཐེབ་ཀྱིས་གནོན་དགོས་རུང་།།

རྟ་དེ་ཚོ་མི་སྐྱུར་ངོ་མ་ཡིན།།

སྡེ་ཆེན་རོགས་བརྒྱའི་ཁྱུ་ནས།།

ཚེ་གཅིག་རྩེ་རོགས་བཙལ་ཡོད།།

ས་སྡེ་ཆེན་མི་ཁ་རྒོད་རབས་ཟེར།།

ས་སྡེ་ཆེན་མི་ཁ་རྒོད་རུང་།།

གྲི་ལེབ་མོ་སྐེད་ནས་ཕྱུང་དགོས་རུང་།།

ཁྲག་དམར་བོའི་རྐ་རེ་འཐེན་དགོས་རུང་།།

རོགས་དེ་ཚོ་མི་སྐྱུར་ངོ་མ་ཡིན།།

༦༢དགུང་འཛམ་གླིང་ཉི་མ་ངེད་གཉི་ག།

སོས་དལ་དུས་གླིང་ལ་འཆར་དགོས།།

སོས་དལ་དུས་གླིང་ལ་མ་ཤར་ན།།

ཡར་རྫ་རིའི་གངས་དཀར་ཇེ་མཐུག་རེད།།

གངས་བུམ་རིའི་ཐེམ་པ་ཇེ་དམའ་རེད།།

འབྲི་ཐུལ་མའི་ཞེ་རྩ་ཇེ་གཉོམ་རེད།།

སྨད་རྨ་ཆུ་དལ་མོ་ངེད་གཉི་ག།

སོས་དལ་དུས་འགྲམ་ལ་བཞུར་དགོས།།

སོས་དལ་དུས་འགྲམ་ལ་མ་བཞུར་ན།།

ཆུ་རྨ་ཆུའི་འགྲམ་དར་ཇེ་མཐུག་རེད།།

རྒྱ་ཆུ་བའི་གྲུ་མགོ་ཇེ་དམའ་རེད།།

ཉ་གསེར་མིག་ཉེ་རྩ་ཇེ་གཉོམ་རེད།།

ཚིག་བཤད་དགའ་ལོ་ངེད་གཉི་ག།

སོས་དལ་དུས་སྡེ་ནས་རྩེ་དགོས།།

སོས་དལ་དུས་སྡེ་ནས་མ་རྩེ་ན།།

གཏམ་ཆེན་མི་ཁ་ཇེ་རྒོད་རེད།།

ཚིག་ཡས་མས་ཁྲི་རྟིང་ཇེ་མཐོ་རེད།།

རོགས་མ་ལོའི་ཞེ་རྩ་ཇེ་གཉོམ་རེད།།

༦༣ངའི་ཙན་དན་ཕྲེང་བའི་ནང་ན།།

བྱུར་དཀར་བྱུར་དམར་གཉིས་ཡོད།།

གཡུ་དྲུག་དཀར་གཅིག་དང་གསུམ་ཡོད།།

གསུམ་ཡོད་པའི་བསམ་པ་ངར་མེད།།

གཡུ་དྲུག་དཀར་ཡིན་ན་གཅིག་གིས་ཆོག།།

ངའི་གོས་ཆེན་གསེར་མའི་སྟེང་ན།།

འབྲུག་དང་བྱ་ཁྱུང་གཉིས་ཡོད།།

དངུལ་མཐེབ་ཁ་གཅིག་དང་གསུམ་ཡོད།།

གསུམ་ཡོད་པའི་བསམ་པ་ང་མེད།།

དངུལ་མཐེབ་ཁ་ཡིན་ན་གཅིག་གིས་ཆོག།

ཚིག་བཤད་དགའ་ལོ་ངེད་གཉི་གར།།

རོགས་ཁ་འགྲོག་ཞེ་འགྲོགས་གཉིས་ཡོད།།

རོགས་ཚེ་འགྲོགས་གཅིག་དང་གསུམ་ཡོད།།

གསུམ་ཡོད་པའི་བསམ་པ་མེད།།

རོགས་ཚེ་འགྲོག་ཡིན་ན་གཅིག་གིས་ཆོག།

༦༤མཐུན་པའི་མཐུན་ལུང་གོང་མ་ན།།

ཉི་ཟླ་ཆ་གཅིག་དགུང་ན་མཐུན།།

ཡང་མཐུན་སྐར་ཆེན་ཁྲ་མོ་རེད།།

མཐུན་པའི་མཐུན་ལུང་བར་མ་ན།།

མེ་ཏོག་སྣ་ཚོགས་སྤང་ན་མཐུན།།

ཡང་མཐུན་མཁན་པ་གསེར་ཏོག་རེད།།

མཐུན་པའི་མཐུན་ལོང་ཞོལ་མ་ན།།

ཞེ་མཐུན་མ་ལོ་རོགས་ལ་མཐུན།།

ཡང་མཐུན་ཚིག་གི་དོན་གཏམ་རེད།།

༦༥རྟ་རྒྱུག་གི་འགྲོ་ན་རྒྱུག་གི་འགྲོ།།

རྟ་རྒྱུག་གི་རྒོད་རྩེ་ཀླད་ལ་འགྲོ།།

ས་རྒོད་རྩེ་ལ་ཐུར་ངན་ས་རེད།།

ཁྱོད་ཀན་ནས་བུད་ན་བུད་ནི་ཡིན།།

རོགས་རྩེ་གི་འགྲོ་ན་རྩེ་གི་འགྲོ།།

རོགས་རྩེ་གི་སྡེ་ཆེན་དཀྱིལ་ལ་འགྲོ།།

ས་སྡེ་ཆེན་ཁ་ཞེང་ཆེ་ས་རེད།།

རོགས་དེ་ནས་འགྲོགས་ན་འགྲོགས་ནི་རེད།།

༦༦སྟོད་དབུས་གཙང་ཡུལ་གྱི་བྱམས་པ།།

ང་སྔོན་ཆད་མཇལ་ནི་མེད་མོད།།

མགོ་ཞྭ་མོའི་དབུ་རྩེ་རིག་ན།།

སྟོད་དབུས་གཙང་དག་པའི་ཞིང་ན།།

ལྷ་མངོན་མཁྱེན་ཅན་ཞིག་ཡོད་པ།།ཀ

ན་མིན་ན་གང་ཡིན་བསམ་གི།

ཞེ་བསམ་པས་དད་པ་སྐྱེ་གི།

ས་སྡེ་ཆེན་གྲོང་གི་ཆུང་ལོ།།

ང་སྔོན་ཆད་རྩེ་ནི་མེད་མོད།།

ཚིག་སྙན་མོའི་ལྷོད་ཤར་ཉན་ན།།

ས་སྡེ་ཆེན་རྩེད་རའི་གྲོང་ན།།

འདང་ཞེ་རྩེ་ཅན་ཞིག་ཡོད་པ།།

ཀན་མིན་ན་གང་ཡིན་བསམ་གི།

ཞེ་བསམ་པས་ཡིད་སྨོན་ཤོར་གི།

༦༧འབྲུག་ལྗང་ལོ་དགུང་སྔོན་གནམ་གྱི་རེད།།

སྤང་མེ་ཏོག་དོག་མོ་ས་ཡི་རེད།།

ཕྱོགས་གཉིས་ནས་ཡིན་པ་སྐྱོན་མེད་གི།

འབྲུག་དགུང་ནས་གྲགས་ནས་ལོབ་ཏུ་འཇུག།

སྨུག་ལང་ལོང་འཐིབས་ནས་མཐུན་དུ་འཇུག།

སྟག་ཤ་ར་ཕྱི་སྡེ་ཡུལ་གྱི་རེད།།

མ་བུ་མོ་དགྲ་ནག་རྩིབ་ཀྱི་རེད།།

ཕྱོགས་གཉིས་ནས་ཡིན་པ་སྐྱོན་མེད་གི།

ཁ་ལ་གཞས་ལེན་ན་ལོབ་ཏུ་འཇུག།

ཚིག་དོན་ཅན་བཤད་ལ་མཐུན་དུ་འཇུག།

༦༨སྟོད་སྤང་དཀར་ཀླད་ཀྱི་མེ་ཏོག།

སེར་གྱི་ལེར་བཀད་ན་སྐྱིད་གི།

དབྱར་དྲུག་པའི་ཚ་བར་སྐྲག་གི།

འདང་བརྒྱབ་ན་དེ་འདྲ་ཅི་སྐྲག་རྒྱུ།།

དགུང་སྤྲིན་གྱིས་བཟུང་ན་ཆར་བ་རེད།།

ས་སྡེ་ཆེན་གྲོང་གི་རོགས་ལོ།།

ཁ་བགད་ནས་རྩེ་ན་དགའ་གི།

གླིང་མི་ཁ་འཁོར་ན་སྐྲག་གི།

འདང་བརྒྱབ་ན་དེ་འདྲ་ཅི་སྐྲག་རྒྱུ།།

འདི་རང་སེམས་མཐུན་པའི་རོགས་ལོ་རེད།།

༦༩ནངས་སྔ་མོ་ཉི་རྩེ་ཤར་དུས་ན།།

ངས་བལྟས་བལྟས་ཁྲ་ཡག་རྫ་ལ་བལྟས།།

རྫ་ཨེ་ཡག་ཨེ་བཤོར་བལྟས་ནི་མིན།།

ཤ་ཡུ་མོ་གར་འགྲོ་མིག་གིས་འཚོས།།

ཤ་གྲོ་ཁྲ་སྒོ་ཟོག་མི་ཉན་རུང་།།

རྭ་ཆ་བརྒྱད་ཡག་གི་འཁྲུལ་སྣང་རེད།།

དགོང་ཕྱི་དྲོའི་ས་རྩ་རུབ་དུས་ན།།

ངས་བལྟས་བལྟས་སྡེ་ཆེན་གྲོང་ལ་བལྟས།།

སྡེ་ཨེ་ཡག་ཨེ་བཤོར་བལྟས་ནི་མིན།།

རོགས་ཆུང་ལོ་གར་འགྲོ་མིག་གིས་འཚོས།།

ཁྱིམ་གཅིག་གི་བཟང་ཚང་མི་ཉན་རུང་།།

ཞེ་སྣང་བ་མཐུན་གི་འཁྲུལ་སྣང་རེད།།

༧༠ཡར་བལྟས་ན་མཚོ་ཞིག་ཞིག་རིག་ནི་བོ།།

མཚོ་མན་ཌལ་གཡུ་མཚོ་སྔོན་མོ་རེད།།

མཚོ་འགོ་པདྨ་གཡུ་ཡི་རྫོང་།།

ཀླུ་དུང་སྐྱོང་དཀར་བོའི་ཕ་ས་རེད།།

མཚོ་སྐེད་མེ་ཏོག་མདུད་པ་རེད།།

ཉ་གཤོག་དྲུག་འབུམ་གྱི་གདན་ས་རེད།།

མཚོ་རྔ་བླ་མའི་མཆོད་ཆུ་རེད།།

མཚོ་གནས་པ་ཅན་ཞིག་ཡིན་ས་ནས།།

བདུད་ཆུ་སྲིན་འཁོར་རུང་སྐྱོན་མེད་གི།

ཕར་བལྟས་ན་སྡེ་ཞིག་རིག་ནི་བོ།།

སྡེ་ཡག་པ་མཚོ་དྲུག་ལྷ་སྡེ་རེད།།

སྡེ་འགོ་ལོ་ལོན་རྒན་པས་བརྒྱན།།

གཏམ་ཁ་ལྕེ་ཅན་པོའི་ཕ་ས་རེད།།

སྡེ་སྐེད་སྟག་ཤར་གསར་བུས་བརྒྱན།།

དཔའ་སྙིང་སྟོབས་ཅན་གྱི་གདན་ས་རེད།།

སྡེ་རྔ་ན་ཆུང་བུ་མོ་རེད།།

རོགས་ཞེ་འདང་ཅན་ཞིག་ཡིན་ས་ནས།།

གླིང་མི་ཁ་འཁོར་རུང་སྐྱོན་མེད་གི།

༧༡དགུང་སྔོན་པོ་ཤེལ་དཀར་ཕྲེང་བ་རེད།།

འདིའི་ཕྲེང་དཔོན་འཛམ་གླིང་ཉི་མ་རེད།།

རྒྱན་ཆ་ཐོ་རངས་སྐར་ཆེན་རེད།།

ཁྲ་ཆེན་མིག་གི་དོ་ཟླ་རེད།།

སྡེ་ཆེན་པོ་བྱུར་དམར་ཕྲེང་བ་རེད།།

འདིའི་ཕྲེང་དཔོན་དྲིན་ཆེན་ཕ་མ་རེད།།

རྒྱན་ཆ་ན་ཟླའི་རོགས་ལོ་རེད།།

དམར་ཆུང་སྲོག་གི་སྐྱ་ཡ་རེད།།

༧༢ཡར་བལྟས་ཀྱི་རྐྱང་ལུང་ཉིན་ནས།།

རྐྱང་འདྲ་བའི་བློ་རྟའི་འཕྲོ་ནས།།

ཁྱོའི་བློ་རྟའི་ཁ་མ་ང་བྱེད།།

སྒ་ཡག་པ་ཡོད་ན་ངར་སྟོད།།

སྲབ་ཡག་པ་ཡོད་ན་ངར་ཞོག།

ཚེ་གང་གི་བློ་རྟ་ང་བྱེད།།

མར་བལྟས་ཀྱི་སྡེ་ཆེན་གྲོང་ནས།།

ལྷ་འདྲ་བའི་རོགས་ལོའི་འཕྲོ་ནས།།

ཁྱོའི་རོགས་ལོའི་ཁ་མ་ང་བྱེད།།

ཚིག་ནང་གཏམ་ཡོད་ན་ངར་ཤོད།།

གོས་ཚ་རུ་ཡོད་ན་ངར་སྐོན།།

ཚེ་གཅིག་གི་རོགས་ལོ་ང་བྱེད།།

༧༣ཡིད་ཆེས་པའི་གཡུ་ལོང་གོང་མ་ན།།

ཡིད་ཆེས་ས་མགོན་པོ་བྲག་རེད།།

བྲག་ཡིན་རུང་ལྟ་ཡག་བྱེད་དགོས།།

འབྲོང་ཆ་རྒྱུས་ཅན་ཞིག་མིན་ན།།

རྡོ་རྦ་མ་རྦབ་ཀྱི་དོ་ཁུགས་ནས།།

འབྲོང་རྦབ་རོར་བཏང་ན་དཀར་མོ་ཡིན།།

ཡིད་ཆེས་པའི་གཡུ་ལོང་ཞོལ་མ་ན།།

ཡིད་ཆེས་ས་ཆུང་འདྲིས་རོགས་ཡིན།།

རོགས་ཡིན་རུང་ཚིག་རྟིང་གནོན་དགོས།།

རོགས་ཆ་རྒྱུས་ཅན་ཞིག་མིན་ན།།

ཚིག་སྔ་བཤད་གཞུག་བཤད་བར་ནས།།

ཁྱོར་འཕྲེད་དུ་རྒྱག་ན་ཐང་གི།

༧༤ཁྱོས་གངས་ཆེན་གངས་རིར་ཆགས་ཞོག།

རྨ་ཆེན་གངས་རིར་དཔེ་ལོངས།།

དཔེ་ལོངས་དང་གངས་རི་ཞུ་མེད་རེད།།

ཞུ་སོང་ན་དབྱར་ཞྭ་ཀླད་མེད་རེད།།

ཁྱོས་སྡེ་ཆེན་གྲོང་ལ་ཆགས་ཞོག།

དྲིན་ཆེན་ཕ་མར་དཔེ་ལོངས།།

དཔེ་ལོངས་ལ་ཕ་མ་འགལ་མེད་རེད།།

འགལ་སོང་ན་སྐྱེ་བ་གཞུག་མ་རེད།།

༧༥ཡར་བལྟས་ཀྱི་གངས་དཀར་ཀླད་ན།།

ངའི་བློ་གཏོད་གངས་རི་ཁྱོད་ཡིན།།

ཁྱོའི་དགྲ་ཡ་དགུང་གི་ཉི་མ་རེད།།

དགུང་ཉི་མར་ཤེས་སུ་མ་བཅུག་ན།།ན

ང་གངས་ཆུ་ཞོད་ལ་མ་བླུགས་ན།།

ངའི་བློ་གཏོང་གངས་རི་འཆུག་མེད་རེད།།

མར་བལྟས་ཀྱི་སྡེ་ཆེན་གྲོང་ན།།

ངའི་བློ་གཏོད་རོགས་ལོ་ཁྱོད་ཡིན།།

ཁྱོའི་དགྲ་ཡ་སྡེ་ཡི་མི་ཁ་རེད།།

སྡེ་མི་ཁ་འཁོར་རུང་མ་འགལ་ན།།
ཡུལ་ཕ་མས་བཀག་ཀྱང་མ་ཁོགས་ན།།
ངའི་བློ་གཏོད་རོགས་ལོ་འཆུག་མེད་རེད།།

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི