༡ དགུང་ཨ་སྔོན་བང་རིམ་གསུམ་རེད།།
བང་གོང་མ་གཡུ་འབྲུག་གྲག་ས།།

བང་བར་མ་གློག་དམར་འཁྱུག་ས།།

བང་ཞོལ་མ་ཆར་རྐང་སྒྲིག་ས།།

བང་རིམ་གསུམ་ཡོད་དོན་དེ་ཡིན།།

ས་བྱང་ལམ་བང་རིམ་གསུམ་རེད།།

བང་གོང་མ་རྟ་བརྒྱ་འདུ་ས།།

བང་བར་མ་གསེར་སྒ་སྟོད་ས།།

བང་ཞོལ་མ་དར་དཀར་ཐོབ་ས།།

བང་རིམ་གསུམ་ཡོད་དོན་དེ་ཡིན།།

བོད་ཚོ་ཆེན་བང་རིམ་གསུམ་རེད།།

བང་གོང་མ་རོགས་བརྒྱ་འདུ་ས།།

བང་བར་མ་ཚིག་གསུམ་བཤད་ས།།

བང་ཞོལ་མ་སྣང་བ་མཐུན་ས།།
བང་རིམ་གསུམ་ཡོད་དོན་དེ་ཡིན།།

༢ང་གཞན་ནས་ཡོང་བའི་ཐང་དཀར་ཡིན།།

ང་གཞན་གྱི་ཕྱོགས་ནས་ཡོང་དོན་ནི།།

ནགས་ཙན་དན་བསམས་ནས་ཡོང་བ་ཡིན།།

འདིའི་ཡན་གྱི་ཡོང་དོན་ང་ལ་མེད།།

ང་གཞན་ནས་ཡོང་བའི་འདོ་བ་ཡིན།།

ང་གཞན་གྱི་ཕྱོགས་ནས་ཡོང་དོན་ནི།།

གོས་དར་དཀར་བསམས་ནས་ཡོང་བ་ཡིན།།

འདིའི་ཡན་གྱི་ཡོང་དོན་ང་ལ་མེད།།

ང་གཞན་ནས་ཡོང་བའི་དགའ་ལོ་ཡིན།།

ང་གཞན་གྱི་ཕྱོགས་ནས་ཡོང་དོན་ནི།།

ཁྱོད་མ་ལོ་བསམས་ནས་ཡོང་བ་ཡིན།།

འདིའི་ཡན་གྱི་ཡོང་དོན་ང་ལ་མེད།།

༢དགུང་ཨ་སྔོན་སྤྲིན་དཀར་ནོར་བུ་རེད།།

རླུང་བསེར་བུས་སྤྲིན་དཀར་མི་གཏོར་མོད།།

རླུང་བསེར་བུས་སྤྲིན་དཀར་གཏོར་བཏང་ན།།

དགུང་སྤྲིན་དཀར་ནོར་བུ་མིན་ནི་ཡིན།།

ང་འདོ་བརྒྱའི་གྱི་ལིང་གཤོག་ཐོགས་ཡིན།།

ཁ་ལ་ཐུར་རིག་ན་མི་ཚོམ་མོད།།

ཁ་ལ་ཐུར་རིག་ན་ཚོམ་བཏང་ན།།

ང་གྱི་ལིང་གཤོག་ཐོགས་མིན་པའི་རྟགས།།

ང་སྟོད་ཀྱི་ཚིག་མཐུན་དགའ་ལོ་ཡིན།།

རོགས་གང་ལ་རྩེ་རུང་མཐུན་པའི་རོགས།།

ཚིག་སྙན་མོས་སེམས་པ་མ་མཐུན་ན།།

ང་ཚིག་མཐུན་དགའ་ལོ་མིན་པའི་རྟགས།།

༣བན་ཆུང་ཆོས་པ་ངེད་གཉིས་ཀ།

སྟོད་དབུས་གཙང་བརྒྱུད་ནས་ཡོང་བ་ཡིན།།

ཆོས་གསུང་གི་བླ་མ་ཨེ་རིག་བསམ།།

ཆོས་གསུང་གི་བླ་མ་མ་རིག་ན།།

ཆོས་དག་འདོན་བྱས་པ་དོན་མེད་རེད།།

གྲོ་རྒྱ་རྟ་དང་ངེད་གཉིས་ཀ།

ས་བྱང་ལམ་བརྒྱུད་ནས་ཡོང་བ་ཡིན།།

དར་དཀར་བོ་ཁིས་ལ་ཨེ་འཐེན་བསམ།།

དར་དཀར་བོ་ཁིས་ལ་མ་འཐེན་ན།།

འགྲོས་གོམ་གསུམ་བརྒྱུགས་པ་དོན་མེད་རེད།།

ཕོ་གསར་སྤུན་དང་ངེད་གཉིས་ཀ།

བོད་ཚོ་ཆེན་བརྒྱུད་ནས་ཡོང་བ་ཡིན།།

ཞེ་མཐུན་པའི་མ་ལོ་ཨེ་རིག་བསམ།།

སེམས་གངས་དཀར་རོགས་ལ་མ་མཐུན་ན།།

ངས་ཚིག་གསུམ་བཤད་ནོ་དོན་མེད་རེད།།

༤ཁུ་བྱུག་བྱ་དང་ངེད་གཉིས་ཀ།

ཤིང་དྲང་མོའི་རྩེ་ལ་ལོས་འབབ།།

ཤིང་རྩེ་བརྒྱ་གོང་མ་མཚོན་རེད།།

ཤིང་རྩེ་བརྒྱ་བར་མ་མདའ་རེད།།

མདའ་མཚོན་གཉིས་ཀྱི་བར་ལ།།

ང་ཁུ་བྱུག་འབབ་རྒྱུ་དཀའ་མོ་རེད།།

འདོ་བ་རྟ་དང་ངེད་གཉིས་ཀ།

ས་བྱང་ལམ་ཐད་ལ་ལོས་རྒྱུག།

ས་ཁིས་ཆེན་གོང་མ་ཁངས་རེད།།

ས་ཁིས་ཆེན་བར་འདམ་རེད།།

འདམ་ཁངས་གཉིས་ཀྱི་བར་ནས།།

ང་འདོ་བ་རྒྱུག་རྒྱུ་དཀའ་མོ་རེད།།

དགའ་ལོ་སྤུན་དང་ངེད་གཉིས་ཀ།

བོད་ཚོ་ཆེན་བརྒྱུད་ནས་ལོས་རྩེ།།

ཁྱོད་ནང་ཚང་བཟའ་བ་སྟག་རེད།།

ཁྱོད་གཏམ་ཆེན་མི་ཁ་དགྲ་རེད།།

དགྲ་སྟག་གཉིས་ཀྱི་བར་ལ།།

ང་དགའ་ལོར་རྩེ་རྒྱུ་དཀའ་མོ་རེད།།

༥ཤིང་ཡག་པའི་ནང་ན་ཡག་པ་སྣང་།།

སྟོད་ལྷ་ཁང་ཀ་བ་ཉན་ཏེ་སྣང་།།

སྟོད་ལྷ་ཁང་ཀ་བ་མ་ཉན་ན།།

མགོ་གཉིས་རེ་གཞོགས་ལ་མེ་ཡོག་བྱོས།།

རྡོ་ཡག་པའི་ནང་ན་ཡག་པ་སྣང་།།

སྟོད་ལྷ་ཁང་ཀ་རྡོ་ཉན་ཏེ་སྣང་།།

སྟོད་ལྷ་ཁང་ཀ་རྡོ་མ་ཉན་ན།།

དཀྱིལ་མིག་ལོང་ཕུགས་ལ་ཕང་ལོ་བྱོས།།

རོགས་ཡག་པའི་ནང་ན་ཡག་པ་སྣང་།།

ཚེ་གཅིག་གི་རྩེ་རོགས་ཉན་ཏེ་སྣང་།།

ཚེ་གཅིག་གི་རྩེ་རོགས་མ་ཉན་ན།།

མགོ་སྐྲ་ལོ་ཞོར་ལ་ཇོ་མོ་བྱོས།།

༦རི་ཨུཏྤལ་འདྲ་བའི་ཡར་ནང་ནས།།

ཆུ་ཤེལ་དཀར་འདྲ་བའི་རོགས་ལོས་ཉོན།།

ཆུ་དྭངས་སྙིགས་མེད་ལ་བཞུར་ཟེར་ན།།

ངས་བདེན་པས་ཐོམ་གསུམ་བཅུ་རྒྱུ་ཡིན།།

ཁིས་མདའ་ལྟོང་འདྲ་བའི་ཕར་རྒྱབ་ནས།།

མདའ་གསེར་ལྟོང་འདྲ་བའི་རོགས་ཀྱིས་ཉོན།།

མདའ་ཡོ་གཟུར་མེད་ལ་འཕེན་ཟེར་ན།།

ངས་བདེན་པས་གླག་སྒྲ་སྟོད་རྒྱུ་ཡིན།།

ཞེ་མཐུན་པའི་ཚོ་ཆེན་མར་ནང་ནས།།

ཚིག་བཤད་པའི་མ་ལོ་རོགས་ཀྱིས་ཉོན།།

ཚིག་རྐྱེན་སྐྱོན་མེད་ལ་རྩེ་ཟེར་ན།།

ངས་ཡིད་ཀྱི་སེམས་གཏམ་བཤད་རྒྱུ་ཡིན།།

༧ཚིག་དང་པོ་ལྷ་རིའི་རྩེ་ནས་བཤད།།

ལྷར་གཡས་སྐོར་འགྲུབ་ན་དགེ་བའི་དོན།།

ཚིག་གཉིས་པ་རྒྱ་མཚོའི་འགྲམ་ནས་བཤད།།

ཆུ་ཡེར་མོ་འགྲུབ་ན་རྨ་བྱའི་དོན།།

ཚིག་གསུམ་པ་ཚོ་ཆེན་སྡེ་ནས་བཤད།།

ཁ་ཚིག་གསུམ་བཤད་ན་རོགས་ཀྱི་དོན།།

༨ང་སྟོད་ལ་སོང་ན་མཛོ་དགོས།།

མཛོ་གཅིག་གིས་མི་ཆོག་གཉིས་དགོས།།

མཛོ་གཉིས་དགོས་དོན་བཤད་དགོས་ན།།

མཛོ་གཅིག་གི་རྭ་ཚུགས་ཤོམ་དགོས།།

མཛོ་གཅིག་གི་སྲོལ་ལམ་དྲང་དགོས།།

མཛོ་གཉིས་དགོས་དོན་དེ་ཡིན།།

ང་སྨད་ལ་སོང་ན་རྟ་དགོས།།

རྟ་གཅིག་གིས་མི་ཆོག་གཉིས་དགོས།།

རྟ་གཉིས་དགོས་དོན་བཤད་དགོས་ན།།

རྟ་གཅིག་གི་སྤུ་ག་ཡག་དགོས།།

རྟ་གཅིག་གི་བློ་རྟ་ཉན་དགོས།།

རྟ་གཉིས་དགོས་དོན་དེ་ཡིན།།

ང་སྡེ་ལ་སོང་ན་རོགས་དགོས།།

རོགས་གཅིག་གིས་མི་ཆོག་གཉིས་དགོས།།

རོགས་གཉིས་དགོས་དོན་བཤད་དགོས་ན།།

རོགས་གཅིག་གི་སྣང་བ་མཐུན་དགོས།།

རོགས་གཅིག་རྩེད་རོགས་ཉན་དགོས།།

རོགས་གཉིས་དགོས་དོན་དེ་ཡིན།།

༩ང་ས་བཟང་ས་ནས་ཡོང་ནི་ཡིན།།

ས་འདི་ཚོ་ཙན་དན་ལོ་མ་རེད།།

ས་འདི་ནས་ལོ་གསུམ་བསྡད་ན་འདོད།།

ཁྱོད་ས་བདག་དཔོན་གྱིས་ཅི་ཟེར་རམ།།

ང་ཆུ་བཟང་ཆུ་ནས་ཡོང་ནི་ཡིན།།

ཆུ་འདི་ཚོ་རྫ་ཆུ་དྭངས་མོ་རེད།།

ཆུ་འདི་ཚོ་ཐོམ་གསུམ་བཅུ་ན་འདོད།།

ཁྱོད་ཆུ་ལྷའི་རྒྱལ་བོས་ཅི་ཟེར་རམ།།

ང་སྡེ་བཟང་སྡེ་ནས་ཡོང་ནི་ཡིན།།

མ་ཁྱོད་ཚོ་ཚིག་མོད་སྙན་བཟང་རེད།།

རོགས་ཁྱོད་ཚོར་ལོ་གསུམ་རྩེ་ན་འདོད།།

ཁྱོད་རྩེ་དཔོན་ནང་མས་ཅི་ཟེར་རམ།།

༡༠ང་ཡོང་བ་ཁ་ཆེ་ཡུལ་ནས་ཡོང་།།

ངའི་ལག་ན་ཁ་ཆེའི་གུར་ཀུམ་ཡོད།།

ངས་གང་ཡིན་བླ་མར་མི་འབུལ།།

སྟོད་དབུས་གཙང་བླ་མར་འབུལ་རྒྱུ་ཡིན།།

ང་ཡོང་བ་ཤེལ་དཀར་ཡུལ་ནས་ཡོང་།།

ངའི་ལག་ན་ཤེལ་དཀར་ཕྲེང་བ་ཡོད།།

ངས་གང་ཡིན་ཕ་མར་མི་འབུལ།།

ངས་དྲིན་ཆེན་ཕ་མར་འབུལ་རྒྱུ་ཡིན།།

ང་ཡོང་བ་ཚོ་ཆེན་སྡེ་ནས་ཡོང་།།

ངའི་ཡིད་ན་སེམས་གཏམ་དྲང་མོ་ཡོད།།

ངས་གང་ཡིན་རོགས་ལ་མི་བཤད།།

རོགས་ཞེ་མཐུན་ཁྱོད་ལ་བཤད་རྒྱུ་ཡིན།།

༡༡ལམ་དཀར་བོར་འགྲོ་ན་སླ་གི།

རྡོ་གོར་མོ་བསལ་རྒྱུ་དཀའ་གི།

རྟ་རྟེའུ་ཆུང་ཞོན་རྒྱུ་སླ་གི།

སྒ་བེ་སང་བསྒྲིག་རྒྱུ་དཀའ་གི།

རོགས་ན་ཟླར་རྩེ་རྒྱུ་སླ་གི།

ཁ་ཚིག་གསུམ་བཤད་རྒྱུ་དཀའ་གི།

༡༢གསེར་རྡུང་མགར་བ་ཁྱོད་གཉིས་ཀས།།

གསེར་སེར་བོ་ལག་ན་ཡོད་དུས་ན།།

དབུས་ཇོ་བོ་ལག་ན་ཡོད་དུས་ན།།

དབུས་ཇོ་བོའི་མདུན་ལ་ཞལ་གསེར་ཕུལ།།

གསེར་སེར་བོ་རྫ་ཁའི་ཟིལ་བ་འདྲ།།

རྫ་ཟིལ་བ་ནམ་ཡལ་མི་ཤེས་གི།

རྟ་བདག་དཔོན་དང་ཁྱེད་གཉིས་ཀས།།

རྟ་འདོ་བ་ལྷས་ན་ཡོད་དུས་ན།།

ས་བྱང་ལམ་རྒྱུད་དུ་གོམ་གསུམ་རྒྱུགས།།

རྟ་འདོ་བ་རྫ་སྐེད་མེ་ཏོག་འདྲ།།

རྫ་མེ་ཏོག་ནམ་ཡལ་མི་ཤེས་གི།

མ་ལོ་རོགས་དང་ཁྱེད་གཉིས་ཀས།།

ཁ་ཚིག་གསུམ་ཡིད་ན་ཡོད་དུས་ན།།

བོད་ཚོ་ཆེན་རྒྱུད་དུ་ཚིག་གསུམ་ཤོད།།

རོགས་མ་ལོ་ཏ་ལའི་ལོ་མ་འདྲ།།

ཤོང་ལོ་མ་ནམ་ལྷུང་མི་ཤེས་གི།

༡༣ངང་བ་སེར་བོ་དབུས་ཀྱི་བྱ།།

དབུས་མ་ཡུམ་ཆོས་སྡེ་གླིང་གི་བྱ།།

ང་མཚོ་སྔོན་བརྒྱུད་ནད་ཡོང་དོན་ནི།།

བྱ་རྨ་བྱའི་སྒྲོ་མདོངས་རིག་འདོད་ཡིན།།

རྟ་ཆུང་ཁམ་པ་གཙང་གི་རྟ།།

གཙང་ཕ་རུ་དཀར་ཡག་ཐང་གི་རྟ།།

ང་བྱང་ལམ་བརྒྱུད་ནས་ཡོང་དོན་ནི།།

རྟ་འདོ་བའི་གོམ་ལག་རིག་འདོད་ཡིན།།

ང་སྟོང་གསུམ་དགའ་ལོ་ཁམས་ཀྱི་རོགས།།

ཁམས་འཁོར་བ་སྲིད་སྡེ་གྲོང་གི་རོགས།།

ང་སྡེ་ཆེན་བརྒྱུད་ནས་ཡོང་དོན་ནི།།

རོགས་མ་ལོའི་ཚིག་ལ་ཉན་འདོད་ཡིན།།

༡༤རྟ་མེད་ལ་རྟ་ཞིག་ཉོ་རྒྱུ་ཡིན།།

ཁ་ཚུར་འཁོར་མགོ་སྣ་ཡག་དགོས།།

དེས་མི་ཆོག་གོམ་ལག་བདེ་དགོས།།

འདི་གཉིས་ཀ་འཛོམས་པའི་རྟ་ཡིན་ན།།

གསེར་སྲང་ལ་ཚད་རུང་འགྱོད་པ་མེད།།

གོས་མེད་ལ་གོས་ཤིག་ཉོ་རྒྱུ་ཡིན།།

སྟེང་འབྲུག་ཆུང་རི་མོ་ཡོད་དགོས།།

དེས་མི་ཆོག་འཁོབས་རྒྱ་ཡངས་དགོས།།

འདི་གཉིས་ཀ་འཛོམས་པའི་གོས་ཡིན་ན།།

དངུལ་སྲང་ལ་ཚད་རུང་འགྱོད་པ་མེད།།

རོགས་མེད་ལ་རོགས་ཤིག་བཙལ་རྒྱུ་ཡིན།།

སེམས་འོ་ཆུ་བཞིན་དུ་མཐུན་དགོས།།

དེས་མི་ཆོག་སྐྱེ་གཟུགས་ཡག་དགོས།།

འདི་གཉིས་ཀ་འཛོམས་པའི་རོགས་ཡིན་ན།།

གཏམ་མི་ཁ་འཁོར་རུང་འགྱོད་པ་མེད།།

༡༥གཡུ་སྡོང་སྔོན་མོ་ངེད་གཉིས་ཀར།།

ཁུ་བྱུག་སྔོན་མོ་ཁྱོད་གཉིས་ཀ།

ཡུན་རིང་བོར་འབབ་སེམས་ཨེ་ཡོད།།

ཡུན་རིང་ལ་འབབ་སེམས་ཡོད་ན།།

ལོ་སྟོང་ལ་ལོ་མ་མི་ལྷུང་།།

རྨ་ཆུ་དལ་མོ་ངེད་གཉིས་ཀར།།

གསེར་མིག་ཉ་དང་ཁྱེད་གཉིས་ཀ།

ཡུན་རིང་བོར་འཁྱིལ་སེམས་ཨེ་ཡོད།།

ཡུན་རིང་བོར་འཁྱིལ་སེམས་ཡོད་ན།།

ལོ་སྟོང་ལ་འགྲམ་དར་མི་ཆགས།།

དགའ་ལོ་རོགས་དང་ངེད་གཉིས་ཀར།།

མ་ལོ་རོགས་དང་ཁྱེད་གཉིས་ཀ།།

ཡུན་རིང་བོར་རྩེ་སེམས་ཨེ་ཡོད།།

ཡུན་རིང་བོར་རྩེ་སེམས་ཡོད་ན།།

ལོ་སྟོང་ལ་སྡེ་ཁ་མི་ཆད།།

རྩོམ་ཁུངས། མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན་པའི