དཔེ་ཚོགས་རྩོམ་སྒྲིག་པ། རྒྱ་གྲོལ། གངས་འཚོ།
    བློ་འདོན་པ། བཙན་སྲས།  གངས་འཚོ།
    རྩོམ་སྒྲིག་པ། འབྲོང་ཕྲུག  ཨ་མདོ་ཀླུ་སྒྲུབ།
    ཇུས་འགོད་པ། ཀླུ་ཚང་སྨྱུག་གསར།
    རི་མོ་བ། ཀླུ་བསམ་བློ་བ།
     
     དེ་ཡང༌།  ཉིས་སྟོང་བཅུ་ལོའི་ཉི་ཟེར་ཐོག་མ་འཛམ་གླིང་གོ་ལའི་ཁྱོན་ལ་ཕྱོགས་རིས་མེད་པར་འཆར་ལ་ཉེ་བའི་སྐལ་བཟང་གི་དུས་འདིར།  ང་ཚོའི་ཤེས་རིག་གི་ཞིང་ཁམས་སུ་མ་བཀླགས་ཚད་མེད་ཀྱི་དཔེ་དེབ་རབས་དང་རིམ་པར་ཆར་ཤུལ་གྱི་ཤ་མོ་བཞིན་བརྡོལ་དང་བརྡོལ་མུས་སུ་ཡོད་པ་ནི་ཅི་འདྲ་དགའ་འོས་པ་ཞིག་རེད་ཨང༌།
      བར་སྐབས་འདིར། ཕྲན་གྱིས་འུ་ཅག་ཤེས་ལྡན་པ་ཀུན་གྱི་སྤྱན་སྔར་འགྲེམ་འདོད་པའི་དཔེ་དེབ་གང་དེ་ནི་ཀླུ་ཚང་སྨྱུག་གསར་གྱིས་ལོ་ངོ་དུ་མའི་རིང་བ་བྲིས་ནས་ལེགས་འགྲུབ་བྱུང་བའི་དེབ་ལྔ་ཡི་བདག་ཉིད་ཅན་གྱི་དཔེ་ཚོགས་ཡིན་ཏེ།  དེ་དག་ནི་རང་མོས་སྙན་ངག་དེབ《ཨ་མའི་ནུ་རིན》དང《ང་འཆི་རུ་ཆུགས། 》 སྲོལ་རྒྱུན་སྙན་ངག་དེབ《ཞི་བདེ་བདག་གི་ཚེ་གྲོགས།》 ལྷུག་རྩོམ་དེབ《ཀླུ་ཚང་ཕོ་ཉ།》  བོད་རྒྱའི་ཐ་སྙད་མཛོད《སྲོག་ཤིང》བཅས་པ་ཡིན།
      དེབ་དང་པོ་ནི། 《ཨ་མའི་ནུ་རིན》ཏེ་རྩོམ་པ་པོའི་མཆན་འགྲེལ་དུ་བདག་གི་བསམ་བློ་དང་རང་མོས་སྙན་ངག་ཅེས་བཀོད་པ་ཡོད་པ་དང༌།  དེ་ནི་རྩོམ་པ་པོས་མི་ཚེ་འདིའི་སྐྱིད་སྡུག་ལེགས་ཉེས་ཚང་མ་སྙན་ངག་གམ་སྨྱུག་ཐོགས་པའི་འཚོ་བར་འབུལ་རྒྱུའི་དམ་བཅའི་རྒྱུན་བསྲིངས་པའི་འབྲས་བུ་རྡོག་རྡོག་དེ་རེད།
     དེབ་གཉིས་པ་ནི།  《ཞི་བདེ་བདག་གི་ཚེ་གྲོགས》ཏེ་རྩོམ་པ་པོའི་མཆན་འགྲེལ་དུ་བདག་གི་མིག་ཆུ་དང་སྲོལ་རྒྱུན་སྙན་ངག་ཅེས་བཀོད་ཡོད་པ་དང༌། དེ་ནི་རྩོམ་པ་པོས་ཨ་མའི་ནུ་རིན་འཕྲོད་རྗེས་འཆར་གཞི་གཞན་ཞིག་ལ་དབུ་ཁྱུད་བྲིས་པ་དེ་ཡིན་ལ།  འདིའི་ནང་དུ《དཔའ་རྒོད་རྗེས་སུ་དྲན་པ》དང《ཇག་པ་ཆུང་ཆུང》ལ་སོགས་བོད་ཁུལ་གྱི་དུས་དེབ་གྲགས་ཅན《སྦྲང་ཆར》དང《གངས་རྒྱན་མེ་ཏོག》སོགས་སུ་བཀོད་མྱོང་བའི་སྲོལ་རྒྱུན་སྙན་ངག་བསྡུས་ཡོད།
     དེབ་གསུམ་པ་ནི།  《ཀླུ་ཚང་ཕོ་ཉ》སྟེ་རྩོམ་པ་པོའི་མཆན་འགྲེལ་དུ་བདག་གི་དྲན་གདུང་དང་འཕྲིན་པ་ཁ་ཤས་ཅེས་བཀོད་ཡོད་པ་དང༌།  འདིའི་ནང་དུ་གཙོ་བོ་རྩོམ་པ་པོས་ཐག་ཉེ་རིང་གི་གྲོགས་པོ་དང་ཀློག་མཁན།  ཉེ་མི་ཀུན་ལ་བསམ་བློ་བརྗེ་རེས་ཀྱི་ཟོལ་གྱིས་སྤྲིངས་པའི་འཕྲིན་ཡིག་དང་འབོལ་རྩོམ།  སེམས་གཏམ་བསྡུས་ཡོད་པར་མ་ཟད།  ད་དུང་རྩོམ་གྲོགས་དག་གིས་ཁོའི་སྙན་ངག་ལ་གདེང་འཇོག་བྱས་པའི་སྙན་ངག་གི་ལྟ་བ་དང་མི་ཚེའི་འདོད་ཚུལ། རིན་ཐང་ལྟ་ཚུལ་སོགས་བཀོད་ཡོད་པས།  སྣ་འཛོམས་རང་བཞིན་གྱི་རྩོམ་དེབ་ཅིག་ཏུ་ངོས་འཛིན་བྱས་ཆོག    
     དེབ་བཞི་བ་ནི།  《ང་འཆི་རུ་ཆུགས》ཏེ་རྩོམ་པ་པོའི་མཆན་འགྲེལ་དུ་བདག་གི་ན་ཟུག་དང་དུངས་སྣང་ཟ་ཟི་ཞེས་བཀོད་འདུག  དེ་ནི་རྩོམ་པ་པོའི་རང་མོས་སྙན་དེབ་ཐོག་མ་ཨ་མའི་ནུ་རིན་གྱི་རྗེས་སུ་བྱུང་བའི་རང་མོས་སྙན་དེབ་གཉིས་པ་དེ་ཡིན་པ་དང༌།  བདེན་པའི་ཨུ་ཚུགས་དང་དབྱངས་ཅན་མའི་ལེ་ཚན་གཉིས་ཀྱིས་གྲུབ་ཡོད་ལ།  དེབ་སྔོན་མ་དང་བསྡུར་ན་བརྗོད་བྱ་དང་རྗོད་བྱེད་གང་གི་ཆ་ནས་ཐོལ་བརྒལ་ཆེན་པོ་བྱུང་ཡོད་པས།  རྒྱ་ཆེའི་ཤེས་ལྡན་པ་དག་གིས་ལྟ་རིན་ཡོད་པ་དང་ཀློག་རིན་ཡོད་པ་ཞིག་རེད། 
     དེབ་ལྔ་བ་ནི།  《སྲོག་ཤིང》སྟེ་རྩོམ་པ་པོའི་མཆན་འགྲེལ་དུ་བདག་གི་ལྷག་བསམ་དང་ཕ་སྐད་གཙང་མ་ཞེས་བཀོད་ཡོད།  འདི་ནི་མིང་རྐྱང་གི་ཉམས་དམས་དང་ཨང་གྲངས་ཀྱི་ཉམས་དམས། བྱ་ཚིག་གི་ཉམས་དམས། བརྡ་སྤྲོད་ཀྱིས་ཉམས་དམས་བཞི་ཡི་གནས་བབ་ལ་གཞིགས་ནས་བསྡུ་བསྒྲིགས་བྱས་པ་ཞིག་ཡིན་ལ།  ཁྱོན་བསྡོམས་སྡེ་ཚན་ཉེར་བརྒྱད་ཀྱིས་གྲུབ་པའི་བོད་རྒྱའི་མིང་མཛོད་ཆེན་པོ་ཞིག་རེད་ཅེས་བཤད་ཀྱང་མི་ཆོག་པ་མི་འདུག 

རྩོམ་ཁུངས། ངེད་དྲ་བ།