ཟླ་བཅུ་བའི་ཚེས་བཅུ་དགུ་ཉིན་གྱི་དགོང་མོར།ནུབ་བྱང་མི་རིགས་སློབ་ཆེན་མཛེས་རྩལ་སློབ་གླིང་གིས་གཙོ་སྒྲུབ་བྱས་ཤིང་བོད་རིགས་སློབ་མས་འཁྲབ་ཁྲིད་བྱས་པའི་«ལམ»་ཞེས་པའི་གློག་བརྙན་དེ་རྒྱ་ཆེ་བའི་དགེ་སློབ་དག་གི་གཟིགས་མོར་དངོས་སུ་ཕུལ་བའི་མཛད་སྒོ་བསྡུས། མཛད་སྒོའི་སྟེང་གློག་བརྙན་འདིའི་མགོ་མཇུག་བར་གསུམ་ལ་རྒྱབ་སྐྱོར་ཚད་མེད་གནང་མཁན་གྱི་དགེ་རྒན་སྟག་ལྷ་ཚེ་བརྟན་སོགས་རྒྱ་བོད་སོག་གསུམ་གྱི་སློབ་མ་ཧ་ཅང་མང་པོ་ཞུགས་ཡོད་པ་མ་ཟད་འཁྲབ་ཁྲིད་པ་བསྟན་འཛིན་ཉི་མ་སོགས་ཀྱིས་གློག་བརྙན་འདི་ཕབ་སྐྲུན་སྐབས་ཀྱི་གནས་ཚུལ་ངོ་སྤྲོད་གནང་ལ།མཇུག་མཐར་སྐར་མ་ཉི་ཤུ་ལྷག་ཅན་གྱི་གློག་བརྙན་དེ་རྒྱ་ཆེ་བའི་དགེ་སློབ་དག་གི་གཟིགས་མོར་དངོས་སུ་ཕུལ།གློག་བརྙན་དེ་ནི་ནུབ་བྱང་མི་རིགས་སློབ་གྲྭ་ཆེན་མོ་ཚུགས་ནས་ལོ་འཁོར་དྲུག་ཅུ་ལོན་པའི་ལེགས་སྐྱེས་སུ་ཕུལ་བ་ཡིན་ལ།  གློག་བརྙན་འདིའི་ནང་དུ་ཕ་མ་གཉིས་འདས་གྲོངས་སུ་གྱུར་བའི་བོད་རིགས་བུ་མོ་ཞིག་གིས་མཚོ་སྔོན་པོར་ཕྱག་བསྐོར་བྱེད་པའི་ལམ་བར་དུ་བོད་རིགས་སློབ་ཆེན་པ་ཞིག་དང་འཕྲད་དེ་ཁོ་གཉིས་བར་དུ་བྱུང་བའི་ཡིད་དབང་འགུག་པའི་གཏམ་རྒྱུད་ཅིག་བརྙན་རིས་སུ་ཕབས་ཡོད།གཞན་ཡང་ཤེས་པའི་གནས་ཚུལ་ལྟར་ན་གློག་བརྙན་དེ་རྒྱལ་ཡོངས་སློབ་གྲྭ་ཆེན་མོའི་གློག་བརྙན་དུས་ཆེན་སྟེང་ཞུགས་རྒྱུ་རེད།

རྩོམ་ཁུངས། ངེད་དྲ་བ།