གླུ་བ་ཕུན་ལོའི་གླུ་ལེན་དགུང་ཚོགས་དེ་ཟླ་༤བའི་ཚེས་༢༠ཉིན་གྱི་དགུང་མོ་དུས་ཚོད་བདུན་གྱི་སྟེང་ཁོའི་རང་གི་མ་ཡུམ་སློབ་གྲྭ་སྟེ་མཚོ་སྔོན་དགེ་ཐོན་སློབ་ཆེན་ནས་གཟབ་རྒྱས་ངང་བསྡུས།
    ཁོས་བཤད་རྒྱུར་རང་ཉིད་ཀྱི་གླུ་ལེན་ཆེད་ཚོགས་༼སློབ་གྲོགས༽ཞེས་པ་བསྡུས་ནས་རྒྱ་ཆེའི་དགེ་སློབ་རྣམ་པའི་སྤྱན་སྔར་ཕུལ་བའི་མོས་འདུན་སྐྱེས་མོད།རང་ཉིད་ལ་མཚོན་ན་གླུ་ལེན་སྒྱུ་རྩལ་ལ་གོམ་པ་དང་པོ་སྤོ་མཁན་གྱི་སློབ་མ་དཀྱུས་མ་ཞིག་ཡིན་པའི་ཆ་ནས་མི་སྒེར་གྱི་གླུ་ལེན་ཆེད་ཚོགས་བསྡུ་བའི་མ་དངུལ་དང་ཉམས་མྱོང་སོགས་ཀྱི་ནུས་པ་ཞན་ལ།རེ་བའི་རྨི་ལམ་ཞིག་མངོན་འགྱུར་བྱེད་རྒྱུ་ནི་ཤིན་ཏུ་ནས་ཁག་པོ་འདུག་སྙམ།ཡིན་ནའང་ངའི་བྱམས་ལྡན་གྱི་ཕ་མ་གཉིས་གཙོ་བྱས་སློབ་གྲྭའི་འགོ་ཁྲིད་དང་དགེ་སློབ་རྣམས་ཀྱིས་ང་ལ་རྒྱབ་སྐྱོར་དང་རོགས་རམ་ཆེན་པོ་བྱས་པས།སྤྱི་ལོ་༢༠༡༡ལོའི་ཟླ༤པའི་ཚེས་༢༠ཉིན་གྱི་དགོང་མོར་རང་ཉིད་ཀྱི་གླུ་ལེན་ཆེད་ཚོགས་༼སློབ་གྲོགས༽ཞེས་པ་དངོས་སུ་ལེགས་གྲུབ་བྱུང་བ་དང།རྒྱ་ཆེའི་དགེ་སློབ་དང་སྤུན་ཟླ་ཡོངས་ཀྱིས་བཅོས་མིན་སྙིང་གི་གདེངས་འཇོག་མི་དམན་པ་བྱས་བྱུང་བས། གླུ་གར་སྒྱུ་རྩལ་ནི་ངའི་འཚོ་བའི་གྲུབ་ཆ་གལ་ཆེན་ཞིག་ཏུ་གྱུར།   
ད་ཐེངས་ཀྱི་གླུ་ལེན་ཆེད་ཚོགས་འདི་ལས་རང་ཉིད་ལ་ཉམས་མྱོང་མང་པོ་ཐོབ་པར་མ་ཟད།གླུ་གར་ལ་བཅངས་པའི་ཕུགས་བསམ་རྣལ་མ་དེའང་ལྡབ་འགྱུར་གྱིས་ཇེ་དྲག་ཏུ་གྱུར་པ་དང་། མ་འོངས་པར་མཚོན་ནའང་ངས་སློབ་སྦྱོང་གཙོས་གླུ་དབྱངས་ལ་བཅངས་པའི་དགའ་ཕྱོགས་དེ་དུས་གཏན་དུ་འདོར་མི་སྲིད་ལ་ནམ་ཞིག་རང་ཉིད་བོད་ཀྱི་ཕུལ་བྱུང་གཞས་པ་ཞིག་ཏུ་འགྱུར་བའི་ཆོད་སེམས་བརྟན་པོ་བཅངས་ཡོད་ཅེས་བཤད།དགོང་ཚོགས་འདིའི་ནང་དུ་༼མཐུན་སྒྲིལ་གྱི་རང་སྒྲ༽༼ཤེས་ལ་ཁམས་པ༽༼བུ་མོ་ཁྱེད་ལ་གླུ་ཞིག་ལེན༽རང་ཉིད་ཀྱི་མཚོན་བྱེད་གླུ་དབྱངས་འམ་བརྗོད་དོན་གླུ་དབྱངས་༼སློབ་གྲོགས༽ད་དུང་རང་ཉིད་ཀྱི་གླུ་དབྱངས་གསར་བ་༼བོད་མིའི་རྒྱན༽༼མཇལ་དུ་འགྲོ ༽སོགས་གླུ་གཞས་བཅུ་ལྷག་བསྟུད་མར་ཉན་མཁན་རྣམ་པའི་སྙན་ལམ་དུ་སྦྱར་བ་ལ་ཀུན་གྱིས་དགའ་བསུ་ཆེན་པོ་ཐོབ།
  ཐེངས་འདིའི་དགོང་ཚོགས་སྟེང་མེ་ཏོག་ཆུན་པོ་སྒྲོལ་མ་མཚོ་སོགས་གླུ་བ་གླུ་མ་འགའ་ཕེབས་ནས་འཁྲབ་སྟོན་བྱས་པ་དང་མིང་དུ་གྲགས་པའི་བོད་ཀྱི་སྒྱུ་རྩལ་པ་ཞི་བདེ་ཉི་མ་སོགས་ཕེབས་ནས་མཛུབ་སྟོན་དང་རྟེན་འབྲེལ་ཞུས།
    དགོང་ཚོགས་དེ་མི་འགྱངས་པར་བརྙན་འཁོར་དུ་ཕབས་ནས་འགྲེམ་སྤེལ་བྱེད་རྒྱུ་ཡིན་རྒྱུ་པས་རྣམ་ཚོས་རྒྱབ་སྐྱོར་དང་ཐུགས་ཁུར་བྱེད་པར་མཁྱེན།
 

རྩོམ་ཁུངས། ངེད་དྲ་བ།