ཀྲུང་གོ་བོད་ཀྱི་དྲ་བའི་འཕྲིན། བོད་ཡིག་བརྡ་འཕྲིན་ལག་རྩལ་དྲ་བས་རྒྱབ་སྐྱོར་དང་སྒྲིག་བཟོ་བྱས་འོག བོད་ཡིག་གི་བརྙན་ཡིག་དྲ་བ་དེ་མི་འགྱངས་བར་ཤར་གཏོང་བྱེད་རྒྱུ་རེད། དེ་ཡང་བོད་ཡིག་བརྙན་ཡིག་དྲ་བ་དེ་ནི་བོད་ཡིག་བརྙན་ཡིག་ཚོགས་པས་གཙོ་སྒྲུབ་ཀྱི་བགྱི་བ་དང་དུ་བླངས་ནས་བསྒྲུབ་པ་ཡིན་ལ། ཚོགས་པ་རང་ལ་དྲྭ་ཚིགས་མེད་པའི་ལོ་ཟླར་བཞི་ཤད་བཞག་ཅིང་། མི་འགྱངས་བའི་བདུན་ཕྲག་གསུམ་གྱི་རྗེས་ནས་བརྙན་ཡིག་དྲྭ་བའི་ཞལ་ངོ་དྲྭ་པ་ལྷན་རྒྱས་ཀྱི་སྤྱན་ལམ་དུ་བསྟར་རྒྱུ་ཡིན་པས། གློག་བརྙན་སྐོར་ལ་དགའ་མོས་ཆེ་བའི་དྲྭ་གྲོགས་དག་གིས་འདིར་དྲ་བར་ཕེབས་པར་དགའ་བསུ་ཞུ།
 

བརྙན་ཡིག་ཚོགས་པ་ནི་འཛམ་བུའི་གླིང་གི་ཆ་འཕྲིན་ལག་རྩལ་དར་བའི་ས་ཆ་སོ་སོར་མ་ཁྱབ་པ་མེད་ཅིང་། སྤྱིར་བཏང་དུ་དྲྭ་རྒྱ་དར་བའི་རྒྱལ་ཁབ་ཀུན་ལ་ཡོད། ད་ཆ་འཛམ་གླིང་གི་བརྙན་ཡིག་ཚོགས་པའི་སྟོབས་ཤུགས་ཆེ་ཤོས་ནི་ཨ་རི་དང་ཧྥ་རན་སི། རྒྱ་ནག་སོགས་ཡིན་ཅིང་། དེའི་ལས། རང་ཅག་དང་ཐག་ཤིན་ཏུ་ཉེ་བའི་རྒྱ་ནང་དུ་དྲྭ་རྒྱ་ས་ཁྱབ་རྡོ་ཁྱབ་ཏུ་སོང་བ་བསྟུན་ནས། དྲྭ་པ་རྣམས་ཀྱིས་ཀྱང་བརྙན་འཕྲིན་ཟློས་གར་རམ་ཁཱ་ཐུང་། གློག་བརྙན་ཕུལ་ཏུ་བྱུང་བ་དག་ཨ་རི་དང་ཡོ་རོབ། ཉི་ཧོང་། ཁོ་རེ་ཡ་ནས་བཟོས་པ་ཐུགས་སུ་ཆུད་ཅིང་། CCTVསོགས་གཞུང་འབྲེལ་ལེ་ཚན་གྱིས་ཕྱི་གླིང་གི་བརྩམས་ཆོས་གྲགས་ཆེ་བ་ནང་འདྲེན་བྱས་ཚད་ཤིན་ཏུ་དལ་བ་ཡང་མཁྱེན། དེའི་འགྲོ་ལུགས་བཀའ་འཁྲོལ་ཡང་རྙོག་དྲ་ཆེན་པོ་ཞིག་ཏུ་མཐོང་། དེའི་ཁར། དྲྭ་པ་རྣམས་ཀྱི་ཕྱི་སྐད་ཀྱི་ས་ལམ་ཡང་དམའ་བའི་དབང་གིས་རྟེན་འབྲེལ་འདི་དག་འགྲིག་པས། བརྙན་ཡིག་ཚོགས་པ་བྱུང་བ་ཡིན། འུ་ཅག་བོད་དུ་ནི་ས་བོན་བཞག་པ་ཙམ་གྱི་ས་ན་གནས་ཤིང་། རྒྱ་མིའི་གློག་བརྙན་འཕྲིན་དང་ཕྱི་རྒྱལ་གྱི་གློག་བརྙན་འགའ་རེ་སྐད་བསྒྱུར་བྱས་པ་ཡོད་མོད། བརྙན་ཡིག་ཚོགས་པའི་མིང་འདི་བྱུང་ནས་ལོ་གཅིག་ཙམ་ལས་འགོར་མེད་ཤས་ཆེའོ། དེར་བརྟེན། དུས་ཐོག་ཏུ་བརྙན་ཡིག་བོད་འགྱུར་བྱས་ཏེ་དྲྭ་རྒྱ་བཞག་ནས་མཉམ་སྤྱོད་བྱ་རྒྱུ་ནི་ངེད་ཚོགས་པའི་དམིགས་ཡུལ་གཅིག་ཀྱང་ཡིན།
   ཚོགས་ཆུང་འདི་ནི་སྤྱི་ལོ2009ལོའི་ཟླ9པར་པེ་ཅིང་དུ་བཙུགས་པ་དང་། ཐོག་མའི་དམིགས་ཡུལ་ནི། རྒྱ་རིགས་སོགས་པའི་མི་རིགས་གཞན་པའི་བྱེད་སྟངས་ལ་དཔེ་བལྟས་ནས། དེང་དུས་གྲགས་ཆེ་བའི་གློག་བརྙན་ཁག་ཅིག་གི་བརྙན་ཡིག་རྣམས་བོད་ཡིག་ལ་བསྒྱུར་ཏེ། རིན་མེད་ཐོག་ཁྱབ་སྤེལ་བྱེད་རྒྱུ་དེ་ཡིན། ཚོགས་ཆུང་འདིའི་ཚོགས་མི་གཙོ་བོ་ནི་རྒྱ་ནང་ན་ཡོད་པའི་བོད་རིགས་སློབ་ཆེན་སློབ་མ་འབའ་ཞིག་ཡིན། འོན་ཏེ་ཚོགས་བཞུགས་བྱེད་པར་དམིགས་བསལ་གྱི་ཆ་རྐྱེན་གང་ཡང་མེད། མ་གཞི་ཡིག་བསྒྱུར་བྱེད་རྒྱུ་དེ་ཚོགས་པ་འདིའི་རྩ་དོན་ཡིན་ཀྱང་། ཚོགས་ཆུང་འདིའི་ལས་ཀའི་ཆ་ཤས་གང་ཐད་ལ་ནུས་པ་འདོན་ཐུབ་པ་དང་། རང་ལ་བློ་མོས་ཡོད་ན་སུ་ཡང་ཚོགས་ཆུང་ནང་ཞུགས་ཆོག་པ་ཞིག་ཡིན།
   ད་བར་ལོ་གཅིག་ལྷག་སོང་རིང་། མ་གཞི་ང་ཚོས་བརྙན་ཡིག་མང་པོ་བསྒྱུར་ཐུབ་མེད་ཀྱང་། ཚོགས་ཆུང་གི་གཙོ་བོའི་ལས་མི་དང་། ཡིག་བསྒྱུར་གྱི་གནད་དོན། དེ་བཞིན་ཁྱབ་སྤེལ་གྱི་བྱེད་ཐབས་སོགས་གལ་ཆེ་བའི་དོན་དག་མང་པོ་ཞིག་ལ་ཐག་བཅད་པ་མ་ཟད། ད་ལོའི་དབྱར་ཁ་ནས་མགོ་བཙུགས་ཏེ། ཚོགས་གཙོ་རྣམས་ཀྱིས་མི་རེས་གློག་བརྙན་རེ་བསྒྱུར་རྒྱུའི་ལས་ཀ་ཡོངས་སུ་ལེགས་གྲུབ་བྱུང་བས། མུ་མཐུད་འབད་བརྩོན་བྱེད་པའི་རེ་བ་དང་ཐབས་ལམ་རྙེད་ཡོད། །

རྩོམ་ཁུངས། ཀྲུང་གོ་བོད་ཀྱི་དྲ་བ།