མཚོ་སྔོན་ཞིང་ཆེན་མི་རིགས་སྐད་ཀྱི་འགུལ་རིས་འཕེལ་རྒྱས་ལྟེ་གནས་སུ་རྒྱུས་ལོན་པ་ལྟར་ན།   མཚོ་སྔོན་གྱི་བོད་རྒྱ་ཤན་སྦྱར་གྱི་འགུལ་རིས་བརྙན་འཕྲིན་དང་པོ་<<བློ་གྲོས་ཀྱི་རྩལ་འཚོལ་བ>>ཞེས་པ་ཕབ་བསྐྲུན་བྱས་ཟིན་པ་དང་། ཟླ1པོའི་ཚེས17ཉིན་ནས་བཟུང་ཟི་ལིང་གི་སྤྱི་སྤྱོད་རླངས་འཁོར350ཡི་བརྙན་འཕྲིན་དང་།  ཐོག་ཁང་ཆེན་མོའི་སྤྱི་གཏོང་བརྙན་འཕྲིན100ལྷག་སོགས་སུ་ཚོད་ལྟ་རང་བཞིན་སྒོས་བཏང་བ་ཡིན་ཞིང་།  དཔྱིད་གསར་དུས་ཆེན་སྐབས་སུ་རྒྱལ་ཡོངས་བརྙན་འཕྲིན་ལེ་ཚན་མང་པོ་ཞིག་ཏུ་དུས་མཉམ་དུ་གཏང་རྒྱུ་ཡིན་པ་རེད།
         
  <<བློ་གྲོས་ཀྱི་རྩལ་འཚོལ་བ>>ཞེས་པ་ལེའུ་ལྔ་ཡོད་ཅིང་ལེའུ་རེ་རེར་དུས་ཡུན་སྐར12ཡིན་པ་དང་།  མཚོ་སྔོན་གྱི་འབྲོག་ཁྱི་དང་དབྱར་རྩྭ་དགུན་འབུའི་འགུལ་རིས་དེ་བརྙན་འཕྲིན་གྱི་བརྗོད་སྙིང་དུ་བྱེད་ཅིང་།  ཁུ་ནུ་རི་བོ་དང་། རྨ་ཆུ། འབྲི་ཆུ། མཚོ་སྔོན་པོ་སོགས་མིང་དུ་གྲགས་པའི་རི་ཆུ་སོགས་གཏམ་རྒྱུད་ཀྱི་རྒྱུ་ཆར་བཀོད་དེ། འབྲོག་ཁྱི་ཆུང་ཆུང་དང་དབྱར་རྩྭ་དགུན་འབུ་ཆུང་ཆུང་གཉིས་ཀྱིས་བློ་གྲོས་ཀྱི་རྩལ་འཚོལ་བའི་གོ་རིམ་ཁྲོད་དཀའ་ངལ་གང་མང་འཕྲད་ཅིང་རང་ཉིད་ཀྱི་བློ་གྲོས་ལ་བརྟེན་ནས་གཞན་ལ་རོགས་རམ་བྱེད་པའི་གཏམ་རྒྱུད་ཅིག་ཡིན།

རྩོམ་ཁུངས། མཚོ་སྔོན་པོའི་དྲ་བ།