བོད་ཀྱི་རྩོམ་རིག་གི་དེད་དཔོན་ཆེན་མོ་དང་རང་མོས་སྙན་ངག་གི་ཤིང་རྟ་ཆེན་མོ་དཔལ་དོན་གྲུབ་རྒྱལ་མཆོག་སྐུ་གཤེགས་ནས་ལོ་ཉེར་དྲུག་འཁོར་བའི་ཉིན་མོར། མཚོ་སྔོན་དགེ་ཐོན་སློབ་ཆེན་མཚོ་ལྷོ་སློབ་ཁུལ་ནས་ཁོང་ལ་རྗེས་དྲན་ཞུ་བའི་སྙན་ངག་གྱེར་འདོན་འགྲན་ཚོགས“༡༡.༢༩”ཞེས་པ་དེ་འཚོགས། ཟླ་བཅུ་གཅིག་པའི་ཚེས་ཉེར་དགུ་ཉིན་གྱི་ཕྱི་དྲོར་སྤེལ་བའི་འགྲན་ཚོགས་འདིར་ཞུགས་མཁན་དགེ་སློབ་སུམ་བརྒྱ་ལྷག་ཡོད་ཅིང་། འགྲན་ཞུགས་པ་མི་བཅུ་གཅིག་འདུག་པ་ཚང་མས་དཔལ་དོན་གྲུབ་རྒྱལ་གྱི་སྙན་ངག་བརྩམས་ཆོས་དང་། ཁོང་ལ་རྗེས་དྲན་ཞུ་ཆེད་དུ་རང་ཉིད་ཀྱིས་བྲིས་པའི་སྙན་ངག་དབྱངས་ལ་གྱེར་ནས་སེམས་ཁོང་གི་གདུང་བ་བརྗོད་པ་རེད། འགྲན་ཚོགས་ཀྱི་སྐབས་སུ་བོད་ཡིག་དགེ་རྒན་གུར་མགོན་སྐྱབས་ཀྱིས་དཔལ་དོན་གྲུབ་རྒྱལ་སྐུ་གཤེགས་ནས་ལོ་ཉེར་དྲུག་ལོན་པའི་རྗེས་དྲན་ཞུ་ཚིག་ཕུལ་འདུག་པ་དང་། མཇུག་ཏུ་གྲྭ་སྒྲིག་སྡེ་ཁག་གི་འགོ་གཙོ་རྒན་རིན་ཆེན་ནོར་བུས་མཇུག་བསྡུའི་གཏམ་བཤད་སྤེལ་འདུག ཐེངས་འདིའི་འགྲན་ཚོགས་ཀྱི་གཙོ་སྐྱོང་ནི་གྲྭ་སྒྲིག་སྡེ་ཁག་དང་༢༠༡༡ལོའི་བོད་ཡིག་འཛིན་གྲྭ་གཉིས་ཡིན་པ་དང་། འགྲན་ཚོགས་ཀྱི་བཀོད་སྒྲིག་འཐུས་ཚང་བ་དང་། གོ་རིམ་ཡོད་པ། དོན་སྙིང་ལྡན་པ་ཞིག་འཁྱོངས་འདུག་ཅེས་དགེ་སློབ་ཚང་མས་བསྔགས་བརྗོད་བྱེད་ཀྱིན་འདུག་གོ །
 

རྩོམ་ཁུངས། ངེད་དྲ་བ།