དེང་རབས་བོད་ཀྱི་རྡུང་ལེན་སྒྱུ་རྩལ་རིག་གནས་ཀྱི་ཚབ་མཚོན་མི་སྣ་དང་མི་ཚེ་གང་བོར་བོད་ཡིག་དང་བོད་སྐད་ཁོ་ནའི་བརྒྱུད་ལམ་ནས་བོད་མི་རིགས་ཀྱི་ལས་དབང་གླུ་རུ་ལེན་མཁན་གླུ་བ་བདུད་བྷེ་ལགས།ཁོང་གི་སྐད་ངག་སྙན་ཞིང་འཇེབས་ལ་སྨྲ་བརྗོད་ལ་དག་གསལ་གཙང་གསུམ་ལྡན་ཡོད།ཁོང་གི་གླུ་ངག་ཁྲོད་དུ་བོད་མིའི་ཡ་རབས་བཟང་སྤྱོད་ཀྱི་ལམ་སྟོན།བླ་སྤྲུལ་དགེ་བའི་ བཤེས་གཉེན་གྱི་གདམས་ངག གནས་དང་དགོན་པ་གྲགས་ཆེན་གྱི་བསྟོད་གླུ། མི་རིགས་ཀྱི་ལ་རྒྱ། མི་རིགས་ཀྱི་མཐུན་སྒྲིལ།ཤེས་ཡོན་དང་སློབ་སྦྱོང་གི་སྐུལ་སློང་། སྐད་ཡིག་དང་རིག་གནས་རྒྱུད་འཛིན་གྱི་སྐོར།བོད་ཀྱི་རང་བྱུང་ཁོར་ཡུག་སྲུང་སྐྱོབ་དང་གཅེས་འཛིན་སོགས་ཕལ་ཆེར་བོད་ཀྱི་སྣོད་བཅུད་གཉིས་ན་གླུ་བ་ཁོང་གི་དབྱངས་རྟ་ལ་བརྒྱུས་མ་མྱོང་བའི་གནད་དོན་ཞིག་ཕལ་ཆེར་ལྷག་མེད་ཚོད་ཡིན།
  བོད་ཀྱི་དེང་རབས་རོལ་མོའི་སྒྱུ་རྩལ་བ་རིག་གནས་ཞིབ་འཇུག་མཁན་ཨ་རི་བ་ལྕམ་མས་ཤལ་ཁེ་ཐུ་རེན(Micheal Catherine) ལགས་ཀྱིས་ཨེ་ཤ་ཡའི་རིག་གཞུང་ཞིབ་འཇུག་ཅེས་པའི་དུས་དེབ་ཏུ་བཀོད་དོན “བོད་ཀྱི་དེང་རབས་རོལ་མོ་དང་ལྷག་པར་དུ་བོད་ཤར་ཕྱོགས་ས་ཁུལ་དུ་དར་ཁྱབ་ཧ་ཅང་ཆེ་བའི་བོད་ཀྱི་རྡུང་ལེན་སྒྱུ་རྩལ་རིག་གནས་ནི་གླུ་བ་བདུད་བྷེ་ཞེས་པའི་མཐོ་སྒང་གི་འབྲོང་རྒོད་ལྟ་བུའི་འབྲོག་ཕྲུག མི་ཚེ་རོལ་མོར་བཅོལ་མཁན་ཞིག་བརྒྱུད་ནས་ནགས་ཆེན་པོའི་ཁྲོད་ཀྱི་མེ་ལྕེ་བཞིན་བོད་ས་ཡོངས་སུ་ཁྱབ་འདུག་ལ། དེར་བརྟེན། དེང་རབས་བོད་ཀྱི་གསར་སྐྱེས་གླུ་བ་མང་བོ་ཞིག་གིས་བདུད་བྷེའི་རྡུང་ལེན་རྙིང་བ་དག་རོལ་མོ་ཁ་སྣོན་རེ་བརྒྱབས་ནས་བསྐྱར་བརྡབ་ཡང་བརྡབ་ཀྱིས་གཏོང་བཞིན་འདུག་”ཟེར།
 
  གང་ལྟར། རྡུང་ལེན་སྒྱུ་རྩལ་ལས་རིགས་ཁྲོད་ཀྱི་རྒྱལ་བོ་གངས་ལྗོངས་ཁུ་བྱུག་སྔོན་མོའམ་གླུ་བ་བདུད་བྷེ་ལགས་ད་ལྟ་མཁལ་མའི་ནད་ཀྱིས་མནར་བཞིན་ཟླ་གཉིས་ལྷག་ཟིན་འདུག་ལ། ཕྱི་ལོ་༢༠༡༢ཟླ༠༤ཚེས་༢༩ཉིན་གློ་བུར་དུ་ནད་གཞི་སྡུག་ཏུ་ཕྱིན་པར་བརྟེན་ཉིན་ཤས་གོང་རྒྱ་ནག་ཁྲིན་ཏུ་གྲོང་ཁྱེར་དུ་ཕེབས་དགོས་བྱུང་འདུག གོ་ཐོས་ལ་ཉིན་འདི་འགར་ས་ཕྱོགས་འདྲ་མིན་ནས་བླ་སྤྲུལ་དང་གྲྭ་བཙུན་དགེ་འདུན་པ། རྩོམ་པ་བོ། སློབ་གྲྭ་ཆེན་མོ་བ། སྒྱུ་རྩལ་ཁྱད་ལས་པ། དེ་བཞིན་བོད་རིགས་མི་སེར་དཀྱུས་མ་སོགས་གང་མང་ཁོང་ལ་མཚམས་འདྲི་བྱེད་པར་སྐྱོད་བཞིན་ཡོད་འདུག་ལ། ཁོང་གི་གནས་སྟངས་ལ་སེམས་ཁྲལ་དང་གསོལ་བ་སྨོན་ལམ་འདེབས་མཁན་ཡང་མང་བོ་ཞིག་ཡོད་འདུག་པ་མ་ཟད་བོད་ཀྱི་ཚོང་བ་ཁ་ཤས་ཀྱིས་དྭང་བླངས་སྒོས་ཁོང་མགྱོགས་མྱུར་སྨན་ཁང་ཚད་ལྡན་ཞིག་ཏུ་གནས་སྤོ་བྱེད་པར་གྲ་སྒྲིག་བྱེད་བཞིན་འདུག་ཟེར།
 

རྩོམ་ཁུངས། ངེད་དྲ་བ།