སྤྱི་ལོ་༢༠༡༣ ཚེས་༢༡ ཉིན། སོག་པོའི་རྒྱལ་ས་ཨོ་ལན་བྷ་ཐར་དུ་རྒྱལ་སྤྱིའི་བོད་རིག་པའི་ཚོགས་འདུ་ཐེངས་བཅུ་གསུམ་པ་དེ་དབུ་འཛུགས་གནང་ཡོད། ཐེངས་འདི་ཚོགས་ཐོག་ཏུ་བོད་གཙོ་བོར་གྱུར་པའི་ཕྱི་རྒྱལ་ཡུལ་ཁག་བཅས་ནས་ཕེབས་པའི་བོད་རིག་པ་བ་ལྔ་བརྒྱ་ཙམ་འདུ་འཛོམས་ཀྱིས། འབྱུར་འགྱུར་ཉིན་བདུན་རིང་ཚོགས་ཆུང་ཁག་བགོས་ཀྱིས་མཁས་པ་སོ་སོའི་ཆེད་རྩོམ་སྒྲོག་སྦྱང་གནང་རྒྱུ་རེད།  ཐེངས་འདིའི་རྒྱལ་སྤྱིའི་བོད་རིག་པའི་ཚོགས་འདུའི་གོ་སྒྲིག་པ་ནི། སོག་པོའི་ཚན་རིག་ཞིབ་འཇུག་ལྟེ་གནས་ཀྱི་ལོ་རྒྱུས་ཞིབ་འཇུག་ཁང་དང་། རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པ། སོག་པོའི་རྒྱལ་ཡོངས་སློབ་གྲྭ་ཆེན་མོའི་སྤྱི་ཚོགས་ཚན་རིག་སློབ་གླིང་དང་། སོག་པོའི་བོད་རིག་པའི་ཞིབ་འཇུག་ཚོགས་པ་བཅས་མཉམ་འབྲེལ་གྱིས་གནང་འདུག ཚོགས་ཡུལ་ནི། སོག་པའི་རྒྱལ་ས་ཨོ་ལན་བྷ་ཐར་ནང་ཡོད་པའི་སོག་པའི་རང་དབང་ཚོགས་ཁང་དུ་ཡིན་འདུག
   ད་ཐེངས་ཀྱི་ཚོགས་འདུའི་སྐུ་མགྲོན་དུ། སོག་པོའི་རྒྱལ་སར་རྟེན་གཞི་བྱས་པའི་རྒྱ་གར་གྱི་གཞུང་ཚབ་ཆེན་མོ་དང་། སོག་པོའི་ནང་པའི་མཐུན་ཚོགས་ཀྱི་ཚོགས་གཙོ་ཏེ་ལོ་རིན་པོ་ཆེ་སོགས་ཆེད་ཕེབས་དང་། ཚོགས་བཞུགས་པ། བོད་དང་། ཨ་རི་དང་། ཡུ་རོབ། ཉི་ཧོང་། རྒྱ་གར། སོག་ཡུལ་སོགས་རྒྱལ་ཁབ་༣༦  ནས་བོད་རིག་པ་སྨྲ་བ་ལྔ་བརྒྱ་ཙམ་དང་། དེ་ཡང་བོད་ཀྱི་མཁས་པ་ཚེ་རིང་ཐར་དང་། པ་སངས་དབང་འདུས། ཐུབ་བསྟན་ཕུན་ཚོགས། རྒྱལ་མོ་འབྲུག་པ། ཚེ་རིང་ཤཱཀྱ། བཀྲ་ཤིས་ཚེ་རིང་། བློ་བཟང་སྨོན་ལམ་སོགས་དང་། ཕྱི་རྒྱལ་གྱི་བོད་རིག་པ་སྨྲ་བ་Charles Rambleདང་། Hildegard Diemberger, David Germanoསོགས་ལྷན་འཛོམས་གནང་ཡོད།
   ཐེངས་འདིའི་ཚོགས་འདུར་སྙན་ཞུ་འབུལ་མཁན་༧༣༠ ཙམ་བྱུང་ཡོད་པ་ལས། དེ་དག་གི་ནང་ནས་ཆེད་རྩོམ་༦༤༠ ཙམ་ལེགས་འདེམས་ཀྱིས་གདན་ཞུ་གནང་ཡོད། འདི་ཟླའི་ཚེས་༢༡ ནས་༢༧ བར། བདུན་ཕྲག་ཅིག་རིང་བོད་རིག་པའི་མཁས་པ་རྣམ་པའི་ཆེད་རྩོམ་ཁག་དབྱེ་བ་༡༧ ལ་བཀར་ཏེ་ཚོགས་ཆུང་ཁག་༤༧ ཁག་བགོས་ཀྱིས་སྒྲོག་སྦྱང་གནང་རྒྱུ་ཡིན་པ་རེད།

རྩོམ་ཁུངས། མཚོ་སྔོན་པོ་དྲ་བ།