བོད་ཀྱི་གློག་བརྙན་འཁྲབ་ཁྲིད་པ་དང་རྩོམ་པ་པོ་གྲགས་ཅན་པད་མ་ཚེ་བརྟན་གྱི་པོད་ཕྲན་དུ་བཀོད་པ་ལྟར་ན། དེ་སྔོན་ཟི་ལིང་དུ་གནས་བཅས་པའི་བོད་ཀྱི་རྩོམ་པ་པོ་སྐོར་ཞིག་གིས་ཡིག་ངོས་ནས་དམ་བཅའ་བའི་ཚུལ་གྱིས་༢༠༡༣ལོར་རང་ལ་གསར་རྩོམ་གྱི་འགན་ཁུར་རེ་བཞག་པ་དང་གལ་སྲིད་འགན་ཁུར་དེ་མ་འགྲུབ་ན་དངུལ་ཆད་ཕོག་ཆོག་པ་བྲིས་འདུག
  ད་ལྟའི་དུས་སུ། བོད་རྩོམ་གྱི་དེབ་མང་པོ་པར་དུ་བསྐྲུན་པ་དང་། པོད་ཕྲན་དང་སྐད་འཕྲིན་(Wechat)སོགས་སུ་སྙན་ངག་དང་རྩོམ་ཐུང་འབྲི་མཁན་གྱི་བོད་པ་སྔར་ལས་མང་པོ་ཡོད་ནའང་གཟབ་ནན་གྱིས་བརྩམས་སྒྲུང་འབྲི་མཁན་སྔར་ལས་ཇེ་ཉུང་དུ་སོང་ཡོད་པས་བོད་ཀྱི་དུས་དེབ་ཁག་གཅིག་ཏུ་བཀོད་པའི་བརྩམས་སྒྲུང་གི་རྒྱུ་སྤུས་སྔར་ལས་ཇེ་ཞན་དུ་གྱུར་བ་དང་། ཐ་ན་རྩོམ་སྐུལ་མ་བྱས་ཚེ་འབྲི་མཁན་མེད་པའི་གནས་ཚུལ་ཡང་འབྱུང་བཞིན་ཡོད།
  ཐེངས་འདིར་ཁོང་ཚོས་བྱེད་ཐབས་དེ་འདྲ་བ་སྤྱད་ནས་རྩོམ་འབྲི་བའི་དམ་བཅའ་བཞག་པ་དེར་མང་ཆེ་ཤོས་ཀྱིས་རྒྱབ་སྐྱོར་གྱི་རྣམ་པ་སྟོན་ནའང་། བྱེད་ཐབས་ཡོངས་སུ་ཟད་པ་རེད་དང་། ཐབས་མེད་པའི་ཐབས་རེད་ཟེར་མཁན་ཡང་འདུག

རྩོམ་ཁུངས། ངེད་དྲ་བ།