༡ གལ་སྲིད་འུ་བུ་ཅག་གིས་རང་ཉིད་ཀྱི་མིག་གི་ལོངས་སྤྱོད་དུ་བསྟར་བའི་བོད་ཀྱི་རྩོམ་རིག་དེ་ལ་ནང་བྱན་ཆུད་པའི་ཉམས་ཚོད་རེ་བླངས་ཡོད་ཕྱིར། སྔ་མ་སྔ་མ་བའི་སྙན་ངག་པ་དེ་ཚོ་ནི་མི་དམངས་ཤོག་སྒོར་དང་ཡང་ཁྱད་མེད་པར། རང་གྲོལ་ཉིད་བརྒྱ་ཤོག་དང༌། འཇུ་སྐལ་བཟང་ཉིད་ལྔ་བཅུ་ཤོག་ཅེས་བོད་ཀྱི་སྙན་ངག་གསར་མའི་ཁྲོམ་ར་ན་རྒྱུགས་ཤར་གློད་ཀྱིན་ཡོད་ལ། ཁོ་ཚོ་རང་ངོས་ནས་བཏོན་པའི་སྙན་ངག་གི་བླ་ན་མེད་པའི་ཐོབ་འབྲས་དེ་ཡང་རྒྱུན་སྲོལ་དུ་ཆགས་པ་ནས་གནས་ལུགས་ཤིག་ཏུ་གྲུབ་ཡོད་ལ། གནས་ལུགས་དེ་ལ་དོགས་སློང་བྱེད་པ་ནི་མི་འོས་པའི་དོན་ཏེ། དུས་གང་ཞིག་གི་ཚེ་ནའང་སྲོལ་རྒྱུན་པ་ཚོའི་སྙན་ངག་གི་མཆོད་བརྗོད་དུ་འཇམ་དབྱངས་དང་དབྱངས་ཅན་མ་འཇོག་སྤྲོ་བ་དེ་བཞིན་ཁོ་ཚོ་ཡང་མི་རབས་དེ་གཉིས་ཀྱི་མིང་གིས་འབོད་རྒྱུར་ལོབས་ཡོད་པ།
   ༢ བོད་ཀྱི་ཆེད་མཁས་པ་ཟེར་མཁན་གྱི་མི་སྣ་དེ་དག་ནམ་ཞར་ཡང་ལོ་རབས་བརྒྱད་ཅུའི་སྙན་ངག་བགྲེས་སོང་དག་ལ་གུས་འདུད་ཞུ་མཁན་དག་ཡིན་ཕྱིར། བོད་ཀྱི་སྙན་ངག་གི་དངོམ་སོ་དེ་དུས་ད་ལྟའང་ལོ་རབས་བརྒྱད་ཅུའི་སྨད་ཙམ་གྱི་སྙན་ངག་པ་འགའ་ཞིག་གིས་བཅད་བཟུང་བྱས་ཡོད་པ།
   ༣ སྔོན་གྱི་མི་རབས་ཤིག་ང་ཚོའི་མགོ་ཐོག་ནས་རྡོ་རྒྱང་བ་བཞིན་འཕུར་སྐྱོད་ལ་བྲེལ་གྱིན་ཡོད་ལ། ཁོ་ཚོར་རང་ཚོད་ཀྱི་ཁ་མལ་རེ་ཐོབ་རྗེས་རྒྱ་མིན་བོད་མིན་གྱི་ཕུང་གསུམ་པ་དག་ལས་ད་བར་དུ་ཧ་ལས་དགོས་པའི་སྨྱུག་རྩལ་ཡོད་མ་མྱོང་ཞེས་སྙན་ངག་མཁན་པོར་གྱུར་བ་ནི་སྲིད་པ་རྒན་པོར་གྱུར་བའི་བློ་སྐྱེད་འབྱུང་མཁན་ཡང་མང་པོ་ཞིག་བྱུང་ཡོད་ཕྱིར། ངེས་པ་དོན་གྱི་སྙན་ངག་པ་རྣམས་ལ་ཚད་བརྒལ་གྱི་ཁྱད་གསོད་བྱས་ཡོད་པ་ལ། ཐ་ན་བལྟར་མི་བཟོད་པའི་ལོ་རྒྱུས་ཀྱི་གོད་ཆག་ཅིག་ཀྱང་སློང་སྐྲུན་བྱས་ཡོད་པ།
   ༤ ང་ཚོས་ད་སྔ་ཡན་ཆད་དུ་སྙན་ངག་གི་རོ་བྲོ་ཕུན་སུམ་ཚོགས་པའི་སྙན་ངག་རིང་མོ་<<འཇིག་ཉེན་གྱི་ཚོར་བ་ཐོག་མ>>དང་<<ང་དང་འབྲོང་རྒོད་ཀྱི་རུས་བྲང་ཐོར་བའི་མྱ་ངན་སྐོར>><<སྨད་འཚོང་མ་སངས་རྒྱས་སྒྲོལ་མར་ཕུལ་བ>><<འདོད་ཁམས>>སོགས་མི་རབས་སྔ་མའི་རྩོམ་རྩལ་ལས་རིང་དུ་འགོངས་པའི་བརྩམས་ཆོས་མང་པོ་ཞིག་བརྩམས་གྲུབ་ཐུབ་ཡོད་ཕྱིར། རང་ཉིད་ཀྱི་མེ་ལྕེ་ལྟ་བུའི་ལྷན་སྐྱེས་ཀྱི་ཤེས་རབ་ལ་གདེང་འཇོག་བྱས་ཡོད་པ།
    ༥ ང་ཚོས་མི་རབས་འདིའི་རླབས་རྒྱུན་གྱི་ང་རོས་འཇུ་སྐལ་བཟང་སོགས་ཀྱིས་མཚོན་པའི་མི་ཆེན་དེ་དག་ལ་མཁས་པ་ཞེས་པའི་གོ་མིང་འོས་འཚམ་ཞིག་མཚམས་སྦྱོར་བྱས་ཏེ། རང་ཉིད་སྙན་ངག་གི་སྡེ་ཆེན་པོ་འདི་ན་རྗེས་སུ་ལུས་ཡོད་པ་ངེས་ལེན་བྱེད་དུ་བཅུག་ཡོད་པ་དེའོ། །

རྩོམ་ཁུངས། ངེད་དྲ་བ།