སྙན་ངག་པ་རྡོ༼ དངོས་མིང་ལ་མུ་ནེ་སྐྱབས༽ རུ་འབོད་པའི་ན་གཞོན་ཁོ་རང་རྨ་ཆུའི་དངུལ་རྭ་ཞེས་པའི་གཞི་རིམ་གྱི་འབྲོག་སྡེ་ཞིག་ནས་ཚེ་སྲོག་རྙེད་ཅིང་། རིམ་བཞིན་སློབ་ཆུང་ནས་སློབ་འབྲིང་འགྲིམ་ཞིང་ད་སྐབས་ཁོས་ལན་ཀྲུ་ཕྱི་ཡིག་སློབ་གླིང་གློག་ཀླད་སྡེ་ཁག་ཏུ་སློབ་གཉེར་བྱེད་བཞིན་ཡོད།  སློབ་ཆུང་མཐར་ཕྱིན་ཁར༼ གངས་རྒྱན་ན་ཆུང་ཚགས་པར༽སྟེང་ནས་ཞིང་ཆེན་རིམ་པའི་རྩོམ་རིག་བྱ་དགའ་ཐོབ།  རྗེས་ནས་གཙོད་བོད་རིགས་སློབ་འབྲིང་དུ་དམའ་འབྲིང་རྒྱུགས་འཕྲོད་ནས་དེ་གར་སློབ་སྤྱོང་བྱས་མོད། དམའ་གསུམ་མཐར་མ་ཕྱིན་གོང་ཕྱིར་རྨ་ཆུ་རྫོང་བོད་རིགས་སློབ་འབྲིང་དུ་ལོག  དེ་དུས་སློབ་གྲོགས་འགའ་དང་ལྷན་དུ༼ ཉི་གསར༽ ཞེས་པའི་ཚགས་ཤོག་ཅིག་གི་རྩོམ་སྒྲིག་པའི་འགན་འཁུར།  མཐོ་འབྲིང་དུ་ཞུགས་རྗེས་རིམ་བཞིན༼ བརྡ༽ ཚགས་པར་དང་བཅད་རྩོམ་སྙན་ངག་དེབ་༼ གོད་ཆག༽ སོགས་མི་ཡུལ་དུ་བཀྲམ། ད་སྐབས་ཕྱི་ཡིག་སློབ་གླིང་གློག་ཀླད་སྡེ་ཁག་ཏུ་གློག་ཀླད་སློབ་ཀྱིན་ཡོད་མོད། ཁོས་བཤད་ན་༼ བདག་གི་དུས་ཚོད་མང་ཙམ་སྙན་ངག་གི་ཕྱོགས་ལ་ཤོར་ཡོད༽ ཟེར།

    ༡.    གྲོང་ཁྱེར་གྱི་ངོ་གདོང་དང་ང་ཡི་ནམ་མཁའ

སྔོན་ཆད་ཡིན་ན     རྩྭ་ཐང་ནས་ནམ་མཁར་བལྟས་ཏེ
དེའི་ངོས་ཀྱི་སྤྲིན་པ་དང་སྐར་མ་རྩེད་ཆས་བྱེད་ཆོག
གལ་ཏེ     ད་རུང་རང་བྱུང་གི་ཉམས་དེ་རྒུད་མེད་ན
ང་རང་བྱིས་པ་སྣབས་ལུག་རྐང་མགོ་ན་ལྷམ་མེད་པ་དེ་ཡིན་སྲིད
ཡིན་ཡང དུག་རླངས་འཐུལ་བའི་སྒེའུ་ཁུང་གི་ངོས་སུ
མུན་ནག་གི་འཁོར་ཚོགས་འདུས་ཡོད་པ་ལས
ང་ཡི་སེམས་དང་ཡིད་ཀྱི་གཏིང་ན་བཞད་པའི་མེ་ཏོག་དེ་ག་ལ་ཡོད

དེ་རིང་གྲོང་ཁྱེར་གྱི་ངོ་གདོང་ལ་གྱེར་ནས
བརྩེགས་པ་མཐོ་བའི་ཁང་མིག་རེ་རེ་སུ་ཞིག་གི་གཟེབ་དྲ་ཡིན་པ་བསམ་དུས
ང་ནི་རྨས་ཕོག་པའི་བྱེའུ་ཞིག་ཏེ རྡོ་བ་བཏིངས་པའི་ལམ་དཀྱིལ་དུ
གཤོག་པ་འཕྲུལ་ཆས་ལ་བརྡར་མཁན་དེ་ཡིན
ཁྱེད་ཀྱིས་དང་ཐོག་གི་རང་ཉིད་དྲན་ནམ ཡང་ན
མེ་ཏོག་དང་སྤང་ཐང་དང་རི་བོ་དང་ཆུ་ཕྲན
རྒུད་པར་གྱུར་བའི་དུས་ཚོད་ཀྱི་རོ་དང་རྣམ་ཤེས
གཤིན་པོའི་གྲོང་གི་རླངས་པ་སྨུག་པོ་དང་ཕྲེང་ལམ་དོག་མོ
སུ་ཡང་འགྲོ་ས་དང་འདུག་ས་མེད་པའི་ཡུལ་ཁམས་དྲན
གཞན   རུལ་མྱགས་ཀྱི་ཕུང་བོར་འཁོར་བའི་སྦྲང་ནག
འབྱར་བག་ལྡན་པའི་ཆུ་དང་ཆུའི་ནང་དུ་ཤི་བའི་ཉ་མོ
ང་ཡི་རྨི་ལམ་དུའང་འཁོར་མ་མྱོང་བའི་ཀུན་སྤྱོད་ཀྱི་ཉམས་རྒུད
སོ་སོར་བྲལ་ཅིང་ཁ་ཁར་གྱེས་པའི་སྡོང་བོ་དང་དེའི་ཡལ་ག
མིག་གི་དབང་བོའི་ནང་ནས་སྐད་ཅིག་ཏུ་མེད་པར་གྱུར་ཚེ
ང་ཡིས་རང་གི་ནམ་མཁའ་དྲན
ནམ་མཁའི་ངོས་ཀྱི་སྤྲིན་དང་སྐར་མ་ལྷག་ཏུ་དྲན
       
                               2014/04/09ཉིན་བྲིས།
    ༢.          གྲིབ་ནག

སེམས་སུ་སྦས་པའི་རི་མོ་ཞིག་བསུབ་རྗེས
མིག་ལམ་གྱི་གྲིབ་མ་མེ་ལོང་ལས་ཡལ་བར་གྱུར
ཐག་རིང་གི་མཚམས་སུ་རྐང་རྗེས་ཤིག་བཏོད་ཅིང
དེ་ཡི་སྟེང་དུ་ས་རྡུལ་གྱི་ཚོགས་པ་རྩེག
རི་བོ་དེ་ཡང་དལ་གྱིས་མི་མཐོང་བར་སྣང
ང་ཡིས་བར་སྣང་སྟོང་བ་ཞིག་རུམ་ནས
རྨི་ལམ་གྱི་གས་སྲུབས་ལ་ཉི་འོད་གླན

ཅི་ཙམ་འདས་ཀྱང དྲན་གདུང་ལྷག་ཏུ་རྒོད

གྲིབ་མ་ནག་པོའི་ཡོལ་བ་རླུང་གིས་སྒུལ
ཁྱེད་ཀྱང་ལམ་གྱི་གཡོན་ཕྱོགས་སུ་འགྲེང་ནས
རྒྱ་སེ་མེ་ཏོག་གི་འདབ་མར་བལྟས
གལ་ཏེ སུ་ཡང་ཁྱེད་ཀྱི་གམ་ན་མེད་ཚེ
མིག་ལས་རྒྱ་མཚོ་འཁྱིལ་ཞིང་གཡོར་གྲུ་ལྷོ་མཐར་བསྐྲོད

ཡིན་ཡང སྒྱུ་འཕྲུལ་གྱི་ཕོ་བྲང་རྡུལ་དུ་གྱུར་བས
གྱང་ངོས་སུ་བྲིས་པའི་ཡི་གེ་འབུར་མ་དག
ཁ་བ་ལྟར་སབ་སོབ་ཀྱིས་བབས་བྱུང          
                                2014/03/03ཉིན།
   ༣.  དུས་ཚོད་ཀྱི་སྔ་ཕྱི

སྨུག་པའི་ཁྲོད་ནས་རི་བོ་ཞིག་ཕར་ལ་ཡལ
ང་རང་གློ་བུར་དུ་ཐང་སྟོང་ཞིག་ལ་ཐོན་ཞིང
དེ་ཡི་ཉེ་མཐའ་ཀུན་ཏུ་ཆུ་མེད རླུང་མེད སྤང་ཐང་མེད

ཅི་ཡང་མེད་པའི་མེ་ལོང་དེ་ནི་གཤིན་པོའི་ཡུལ
དམྱལ་ཁམས་ཀྱི་གྲོང ལྷ་ཚོགས་ཀྱི་མཁར་ལྟ་བུ་སྟེ
མུ་མཐའ་བྲལ་བ་ཞིག་ཅིས་ཀྱང་མིག་ལ་འཁོར་བས
རྡུལ་དུ་གྱུར་བའི་ཕུང་བོ་སྟོང་ཁམས་གཞན་ལ་འཛེག

ད་ནི་ཅི་གང་མེད་པའི་མཚན་མོ་ཞིག་ཕར་ལ་བསྐྱེལ་དགོས
དེ་ནི་ང་རང་ཟླ་འོད་ལ་དུང་བས་ཡིན  
ང་མུན་ནག་མ་སྐྲག་པས་ཡིན

    ༤.  མིག་མེད་པ

ཅི་ཞིག་གི་གསེང་ནས་མི་མཐོང་བ་དེ་དག
མཚན་མོ་ཞིག་ལ་མུན་ནག་ཏུ་འདྲེས
མེ་ལོང་ངོས་ཀྱི་བརྩེགས་པ་མཐོན་པོ
རྡུལ་གྱི་ཕུང་བོར་བྲིས་པའི་སྙན་ངག་ཅིག་ཏེ
སབ་སོབ་ཏུ་གྱུར་བའི་རྗེས་སུ གང་གི་གང་ལ་འཛེག

དེ་བས སྟོང་བའམ མེད་པའམ ཁེར་རྐྱང་ལྟ་བུའི
སྣང་བ་དབེན་པ་དེ་ནི་དུས་ཚོད་ལ་དབང་ཞིང
རང་དང་བཅས་པའི་མི་རྣམས་ཕྱོགས་སུ་བསྐྲད

                        (མཆོད་མེའི་པར་དབང་གཞན་གྱིས་དགོལ་མི་རུང)