རྫ་སྐྱེས་ཕུར་བ། མིང་གཞན་མེ་རི་དང་། ཐང་ནག་སོགས་བཀོལ་མྱོང་། ལོ་རབས་བརྒྱད་བཅུ་པའི་ནང་རྫ་ཆུ་ཁར་སྐྱེས། 《རྫ་ཆུའི་རླབས་སྒྲ》དུས་དེབ་ཀྱི་རྩོམ་སྒྲིག་པ་བྱས་མྱོང་། བར་ལམ་རེབ་གོང་རོང་བོ་དགོན་ཆེན་དང་། ལྷ་སའི་སེ་ར་དགོན་པ། བྱེས་ཀྱི་སེ་ར་དགོན་བཅས་ནས་རིམ་བཞིན་སློབ་གཉེར་བྱས། ཞོར་ཏུ་《གངས་རྒྱན་མེ་ཏོག》དང་། 《སྦྲང་ཆར》  《ཟླ་ཟེར》སོགས་གཞུང་སྒེར་དུས་དེབ་མང་པོར་སྙན་ངག་བྲིས། ༢༠༡༤ལོར་སྙན་ངག་གི་དེབ་ཐོག་མ《ཟིལ་བ》ཞེས་པ་ཀན་སུའུ་མི་རིགས་དཔེ་སྐྲུན་ཁང་ནས་དཔར་བསྐྲུན་བྱས། ད་སྐབས་སྔར་ལྟར་སྙན་ངག་འབྲི་བའི་ལས་སུ་འབད་ཀྱིན་ཡོད།

              ཁམ་སྡོང་སྟེང་གི་ཉི་འོད།

                          —ཨ་མ་ལགས་ལ་དྲན་རྟེན་དུ་བྱས་པ།

སྐྲ་ཡི་ཉག་མ་ཙམ་ཞིག་གི།
བུ་ལ་དྲན་པའི་རྟེན་བསྐུར་བའི།།
ཙོང་ཁ་སྲས་ཀྱི་མ་ལགས་ནི།།
སྐྱིད་ཡུམ་དཔེ་མེད་ལོས་ཡིན་ཏེ།།
རང་ལུས་བསྐྱེད་པའི་དྲིན་ཆེན་མ།།
སུ་ཡི་བགྲན་དུ་མི་མངའ་བ་འི།།
ང་ལ་མཚོན་ལ་སངས་རྒྱས་དང་།།
བྱམས་བརྩེ་སྟོན་པའི་སློབ་དཔོན་ཉིད།།
དངོས་གཟུགས་ཁྲོད་དུ་བཙལ་བ་ན།།
ཁམ་སྡོང་རྩེ་ཡི་ཉི་འོད་ཀྱིས།།
ཁྱོད་ཀྱི་དཔེ་དབྱིབས་མིག་ལ་བསྩལ།།
འདི་ཀོ་སྲིད་ཁམས་གང་དུ་ན།།
རྙེད་མེད་དཔེ་རུ་མཐོང་སོང་ལགས།།
ནམ་མཁས་གང་ཁྱབ་མར་གྱུར་ཞེས།།
སེམས་བསྐྱེད་དེ་འདྲ་བདག་ལ་མེད།།
བས་མཐའི་དབྱིངས་ནས་ངང་སེར་ཁྱུ།།
ལྡང་ཞིང་རྒྱུ་བའི་ཟོལ་མཐོང་ཚེ།།
ངས་ནི་བས་མཐའི་རི་ཁུད་ན།།
སྨྲེང་བའི་རྒྱང་གླུ་བསྐུར་ཞིང་མཆིས།།
                 2015/5/10/

               སྐར་མ་ཁྲི་སྟོང་ལྡང་བ།

ཁྱོད་ཀྱི་ཁྲ་ཆུང་མིག་མཐའ་ནས།།
སྐར་མ་ཁྲི་སྟོང་ལྡང་བ་དེ།།
ཡིད་འགྱུ་སྐད་ཅིག་ཙམ་ཞིག་གིས།།
འཁྲུལ་བའི་གདོང་ལ་རེག་པའི་འོད།།
རྒྱུ་སྐར་དག་ནི་ཉམ་ང་བའི།།
དུས་མཐའི་དབྱིངས་ཀྱི་རླུང་བུར་གྱུར།།
ང་ཡིས་ཡིད་ཙམ་བསེར་བུའི་དཔུང་།།
གློག་དམར་འཁྱུག་པའི་མདངས་ལ་བྲིས།།
དེ་ཡང་ཆལ་ཆིལ་གཡོ་བ་ན།།
འདི་སྣང་སྤྲིན་ཕུང་དལ་འགྲོ་མ།།
ལག་པའི་མཐིལ་ན་རྒས་པ་མཐོང་།།
                  2015/8/28/



              འདས་མོ་རིག་གསལ་དབང་མོ་དྲན་པ།

རྩྭ་ཟིལ་སྟེང་གི་ནེམ་ཐིག་ཡོམ་པའི།།
གླུ་ངག་ཁྱེར་ནས་གང་ལ་བུད་སོང་།།
དམངས་གླུ་བསེར་མ་ལྡེམ་པའི་འགྲོས་དེ།།
ཞེ་མདངས་དཀར་པོས་ཅི་ཙམ་བངས་ཡོད།།
དབྱངས་ཀྱི་སྐར་མ་བྱེ་བ་སྟོང་ཕྲག།
མཚན་ནུབ་བསིལ་ཆར་འོག་གི་ཟླ་བ།།
དྲན་པའི་དགུ་ཚིགས་གཡོར་བའི་ཉི་མ།།
ཁྱོད་ཀྱི་ངག་ན་ལྡང་བའི་སྤྲིན་དཀར།།

རི་སྐེད་སྨུག་ལ་འདྲེས་ཏེ་ཡོང་བའི།།
ནུབ་ཁའི་རླུང་བུ་ཞོན་ཏེ་སོང་བའི།།
རི་མཚམས་གང་ནས་ཕྱིར་མིག་ལྟ་བའི།།
དབང་མོ་ཁྱོད་རང་བཞུད་ཚུལ་འདི་ཨང་།།
སྐྱེ་འཆིའི་ཁ་མཐའ་མིག་གིས་མི་ཟིན།།
ཤར་རླུང་ལྡང་བའི་ཚུལ་དེ་འདྲ་འོ།།

མུན་པའི་ཕྱར་བ་གྱོན་ནས་གར་ཡོད།།
སྙིང་གི་དྲིད་ཐིག་མཉེས་ས་གར་ཡོད།།
ད་ཆ་བརྩེ་བའི་བར་སྣང་ཅི་ཡོད།།
སྡུག་གི་ལག་ཆུང་བཟེད་ས་སུ་ཡོད།།
ཚེ་སྲོག་བདེན་པའི་ཁྱོད་རང་གར་ཡོད།།
དབྱངས་ཀྱི་ཨ་ཅག་ཁྱེད་རང་གར་ཡོད།།

རུས་པ་དཀར་པོ་འཐོར་བའི་ས་དེ།།
རྒྱ་ལྕང་ལན་བུ་འཁུར་བའི་རླུང་དེ།།
དུང་སོ་སུམ་ཅུ་བྲབ་པའི་སྤང་དེ།།
ད་ཆ་གར་ཡོད་འདྲི་སྙིང་འདོད་དོ།།
སྙིང་ནས་དབང་མོ་འདྲི་སྙིང་འདོད་དོ།།

སྤྲིན་ཐོག་ལ་མོ་བརྒྱབ་སྟེ་འོང་ན།།
འཇའ་ཚོན་ལྭ་བ་སྐེམ་གྱིན་བསྒུག་ན།།
ལུག་ཁྱུ་དཀར་བོང་འཚོ་བའི་གཞིས་ཀ།
འུར་ཆུང་ཁྲ་མོ་བསྐོར་བའི་ན་སྤང་།།
སྤྱན་ལམ་གང་ན་འཁོར་ཞིང་ཨེ་འདུག།
སྣང་བའི་ཟོམ་ན་གསལ་ཞིང་ཨེ་འདུག།
ང་ཡི་འབྲོག་མོ་དབྱངས་མཁན་དབང་མོ།།

དྲོད་ཀྱི་རང་ཁྱིམ་འདི་ན་འཛོམས་དེ།།
ལས་སྐལ་སྡོང་པོ་འདི་ན་ཡོད་དེ།།
རི་ཐང་ཀུན་ཏུ་ང་རས་བོས་ཏེ།།
རྒྱང་ཉེ་གང་ནས་གསན་བཞེས་མེད་པར།།
གཅིག་པུར་བཞུད་འདི་ཨ་ཁ་ཅི་ཨང་།།

སྣང་བའི་མེ་ལོང་ངག་ལ་འཁྱིལ་བའི།།
ཚེ་ཡི་དབྱངས་རྟ་རི་ནས་འགུག་པའི།།
༼དམངས་གླུ་ཡི་མུག་དྲུག་འགྱུར༽ལེན་པའི།།
ཁྱོད་རང་བརྗེད་པ་ཅི་བས་དཀའ་འོ།།

འཆི་གསོན་ཟེར་ཡ་དར་གྱི་ཡོལ་བ།།
ཡོལ་བའི་ཕར་ནང་དེ་ན་ཅི་ཞིག།
དགའ་སྡུག་སྤྲིན་ཕུང་གཡོ་བའི་འདབ་མ།།
རླུང་བུའི་ངག་ན་འཁོར་ཞིང་ཨེ་ཡོད།།
ཚེ་རབས་དགེ་སྨོན་གསེར་གྱི་ཡི་གེ།
བསགས་སྦྱང་ལས་ལ་ང་རང་འཇུག་ན།།
གེ་སར་བྱེ་བའི་མཛེས་སྡུག་དབུས་སུ།།
རྒྱང་མཇལ་བྱོན་པར་འཚལ་ལོ་དབང་མོ།།
                          2015/5/3/

             སྟོང་བའི་སྨུག་པ།

སྨུག་པ་མང་པོས་ང་རང་བྲིས།།
དེ་བྱད་གཟུགས་ཅི་ཡང་བསྙད།།
ངས་ནི་འདམ་གྱི་སྤྱིལ་བུའི་ནང་།།
འཁོར་བའི་འོད་ཀྱི་མིག་དག་བཙལ།།
ཕར་སྣང་དེ་ནས་ཅི་ཞིག་གིས།།
ང་ལ་སྟོང་བའི་དབང་པོ་སྤྲད།།
སྒེ་ཡོལ་རླུང་གིས་རལ་བའི་ཚུལ།།
སྐབས་རེེར་སྟོང་བའི་གླུ་དབྱངས་འདྲ།།
སྒྱུ་མའི་ཤན་བུ་གྱོན་པ་ཡི།།
དབྱངས་ཅན་མ་ནི་བཟི་ཉམས་ཀྱིས།།
མིག་གི་རླུང་བུ་ཚབ་ཚུབ་ངང་།།
སྟོང་བའི་སྔས་ལ་གཟིགས་པར་མཐོང་།།
རྩིག་ངོར་ཕོག་པའི་མིག་འོད་དག།
ཡིད་ངོར་བསྒྲུགས་པའི་སྐད་གཅིག་མར།།
སྟོང་བའི་ངང་ལ་སྨུག་པ་ལངས།།
            ༢༠༡༥/༣/༢༠/

             མེ་ལོང་ཕྱིས་པ།

                         ____ཨ་མར་བྲིས་པའི་སྙན་ངག

དྲན་ཤེས་སྲུང་འཛིན་གྱི་ཐིག་ལེ་བརྩེ་བས་བངས་ན།།
སྤྱན་མིག་ཡེར་ཡེར་གྱི་མཐའ་ནས་སྨུག་པ་ལངས་ན།།
ཕྱག་གིས་གཡུག་གཡུག་རེ་མ་གནང་ཨ་མ་དྲིན་ཆེ།།
ལས་མཐའ་དྲན་སྣང་གིས་ཟད་པའི་བུ་དེ་སྐྱོ་འོ།།

མི་ཚེའི་ལམ་སྟེགས་ནས་མཆོད་པའི་ངག་རིག་སྙིམ་གང་།།
དབུས་ཀྱི་གྲྭ་ཤག་ནས་མ་ཤོང་གཙང་པོར་འདྲེས་ཉིན།།
མ་སྐྱེས་ཨ་མ་དེ་ཚེ་རབས་ཡིག་འབྲི་སྔོན་པོ།།
ཞེ་འདང་གསེར་ཡིག་གི་མདངས་ལ་འོད་ཀྱིས་བརྐོས་ཡོད།།

དབུ་ལྕང་སྔོ་དཀར་གྱི་ལན་བུ་བསེར་བུས་བལྡབས་ཤིང་།།
ཚེ་མཇུག་དགེ་སྨོན་གྱི་རྒྱང་སོ་རི་ནས་བཙུགས་ཏེ།
དྲན་པའི་བྱེའུ་ཆུང་གིས་རི་ཟོམ་བརྟོལ་ནས་འཕུར་ན།།
ནང་སེམས་སྐྱོ་དབྱངས་ལ་མ་བྲེལ་ཨ་མ་ཞལ་དྲོ།།

དམ་ཚིག་རས་གཟན་གྱིིས་འཁོར་བའི་སྒྲིབ་ཤིང་མ་ཁོགས།།
སྣང་བའི་ཕ་རོལ་ནས་དིང་གླིང་དཀྲོལ་བར་རྔམ་ཚེ།།
རྨི་ལམ་དཀར་ངོགས་ནས་ཁྱོད་ཀྱིས་ལན་གཅིག་བོས་པ།།
གཟུགས་འདས་མཁའ་དབྱིངས་ན་སྐར་ཆེན་བཞིན་དུ་འཚེར་ཡོད།།

ལས་སྨད་སྐྱོ་ཤས་ཀྱི་གླིང་བུ་ཐེངས་རེར་བུས་ཤིང་།།
གཟུང་འཛིན་དར་ཐག་གིས་མེ་ལོང་ལན་རེར་ཕྱིས་ཏེ།།
ཚེ་ཡི་རྒས་གཉེར་གྱིས་གཅུད་པའི་ཨ་མ་ལོ་བརྒྱ།།
དྲན་པའི་དབུ་ཁྱུད་ཀྱི་ཐོག་མ་ཁྱོད་རང་བྲིས་ཡོད།།
                        2014/3/8/

              འབྲོག་མོ་ཞིག་ལ་ལབ་པ།

སྤྲིན་ཐོག་ཁང་སོ་མཛེས་པ་ཅི་རེད།།
འཇའ་ཚོན་རླུང་བུ་གཡུག་པ་ཅི་རེད།།
ང་ཡི་མཐོང་སྣང་ཁྱོད་ནི་དབྱར་གྱི།།
འདབ་མ་བཞད་པའི་ལྗང་བུ་ཡིན་བཞག།
རི་ཁུད་འགྲོ་འདུག་བདེ་བོ་རང་མིན།།
རྨི་ལམ་ཁྲུས་རྫིང་གསལ་ཡང་མི་གསལ།།
ཕར་ནང་མི་མཐོང་ང་ཡི་མིག་ལ།།
འཇའ་ཚོན་བཞིན་དུ་སྡེབ་པ་ཁྱོད་ཡིན།།

ལམ་སྡོང་རྩེ་རུ་བྱི་འུ་བབས་ཤིང་།།
འཚུབ་མ་འཁོར་བའི་དཔྱིད་ཀར་ཉན་སྐབས།།
ཕྱིར་མིག་ཁ་བས་ཡང་ཡང་བརླན་པའི།།
ལམ་མདོ་དེ་ན་གྱེར་རེར་ལྟ་བའི།།
དྲན་ཤིང་ཡིན་ནོ་ཁྱོད་ཀྱི་འགྲམ་ཆང་།།
ལས་སྐལ་ཕར་ན་དཀོན་པའི་ནགས་དེ།།
ལག་པས་འཇུ་ས་མ་རྙེད་རླུང་དེ།།
འུ་གཉིས་མདུན་གྱི་ལམ་ཕྲན་འདྲའོ།།
ལམ་ཕྲན་དེ་ན་མཚར་གྱིས་བལྟས་ཡོད།།

དཔྱིད་ཀར་ནགས་སུ་ཁུ་བྱུག་བབས་དུས།།
གསུང་དབྱངས་སྙན་པས་ང་རང་སྨྲེང་ཡོད།།
སྨྲེང་བའི་བསེར་མ་རི་ནས་བསྐུར་བས།།
ཚེ་འདི་སྐྱིད་སྐྱིད་འདྲ་བ་ཚོར་བྱུང་།།
ཁྱོད་ཀྱིས་ནགས་ཁྲིད་མེ་ཏོག་བསྒུམ་ཚེ།།
སེར་ཆེན་སྐལ་ཏུ་འཇོག་རོགས་ཞུས་ཡོད།།
དཔྱིད་ཀྱི་ལྗང་བུས་རི་ལུང་གབ་ཚེ།།
ཁྱོད་ཀྱི་རྒྱང་གླུ་རླུང་བུས་བསྐྱར་ཡོང་།།
གསན་བསམ་ཁྲོད་ནས་ངེད་རང་བདེ་ཡོད།།
           2015/5/12/

               སྤྲུལ་བའི་གཟིག

ཁྱོད་ཀྱི་སྟོང་བའི་མིག་ལྡེབས་ལས།།
ཆུ་བུར་ལན་བརྒྱར་ཚུར་དྲངས་ཏེ།།
ང་ཡི་མིག་དང་སྐྲ་གསེབ་དང་།།
སྒྱུ་མའི་ལུས་དང་ཡིད་བརླན་ཞིང་།།
འདོད་པའི་ཤ་འོད་མེར་མེར་བའི།།
སྤྲུལ་བའི་གཟིག་ལ་ལྟ་བཞིན་དུ།།
སྲེད་པའི་ཆུ་བུར་མིག་ནང་ལ།།
འདོད་པའི་ཁམས་ཀྱི་བྱིན་ཆགས་པ།།
ཁྱོད་ཀྱི་སྐྱེ་མཆེད་སླར་ཡང་སྒོམ།།

               རྨི་ལམ་ནང་ལྷུང་བ།

མི་ཞིག་རང་གི་རྨི་ལམ་ནང་།།
ཡུན་རིང་ལྷུང་སྟེ་ངལ་བ་དང་།།
དེ་ཡི་རྒྱ་སེ་དཀར་པོ་ཡང་།།
སྐར་མའི་འགྲོས་ལྟར་སྨིན་པར་བྲེལ།།
རག་གི་ལག་གཉེས་དེར་ཕྱོགས་ཏེ།།
ཅི་ཞིག་པང་གིས་ལེན་པར་བརྩོན།།
ད་ནི་སྐྱོ་སུན་གླིང་བུ་ཡི།།
གདངས་སུ་འདྲེས་ཏེ་ལོབས་པར་གྱུར།།

             ཡིད་འོང་།

མིག་ཁའི་ཆུ་ཡི་ཟིལ་བ་ཡིས།།
ཡིད་འོང་གང་ཞིག་བརླན་པར་བྱས།།
ཡིད་འོང་དེ་ནི་སྤྲོས་པ་ལས།།
ཡིད་དུ་འོང་བའི་རྨི་ལམ་དང་།།
དབང་བོའི་ལྗོངས་དག་ཡིད་འོང་གྱུར།།
མཚན་མའི་རྡུལ་དང་རྔུལ་བའི་རླན།།
ལུས་ཀྱིས་གང་ཁྱབ་ཡིད་འོང་པས།།
དགོང་ཁའི་ཁྱོད་ཀྱི་གྲིབ་བརྙན་ཡང་།།
ཡིད་དུ་འོང་པས་ཡིད་འོང་ངོ་།།
        2015/10/2/

(མཆོད་མེའི་པར་དབང་གཞན་གྱིས་དགོལ་མི་རུང)
 

རྩོམ་ཁུངས། ངེད་དྲ་བ།