སྒྲེན་པོའི་སྙན་ངག་བདམས་བཀོད།
སྒྲེན་པོ། དངོས་མིང་ལ་བན་དེ་སྐྱབས་ཟེར། རེབ་གོང་བཙན་མོ་སྟག་ཡན་ཞེས་པའི་རོང་མ་འབྲོག་གི་རུ་སྡེ་ཆུང་ངུ་ཞིག་ནས་སྐྱེས། 2015ལོར་བོད་ཀྱི་རྩོམ་རིག་གི་གཟིགས་གཟོས་མཐོ་ཤོས་ཀྱི་གྲས༼སྦྲང་ཆར་རྩོམ་རིག་བྱ་དགའ༽ཐོབ། 2017ལོར《ཐེ་ཀོར་གྱི་སྙན་ངག་གཅེས་བསྡུས་བོད་འགྱུར་མ》ཞེས་པ་ཀན་སུའུ་མི་རིགས་དཔེ་སྐྲུན་ཁང་ནས་པར་དུ་བསྐྲུན། 2019ལོར་སྙན་དེབ་ཐོག་མ《ཚིག་གི་ལྡ་ལྡི》ཞེས་པ་མཚོ་སྔོན་མི་རིགས་དཔེ་སྐྲུན་ཁང་ནས་པར་དུ་བསྐྲུན། ད་ལྟ་མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དུ་གསར་འགྱུར་ལོ་ཙཱ་དང་། གསར་འགྱུར་རྩོམ་སྒྲིག གསར་འགོད་པ་བཅས་ཀྱི་ལས་ཀ་གཉེར་མུས་ཡིན།
གཏམ་རྒྱུད་ཅིག་གི་འཆད་འཕྲོ།
གཏམ་རྒྱུད་ལེགས་པོ་ཞིག་འཆད་རྒྱུ་ནི་དཀའ་མོ་ཞིག་ཡིན་ནའང
འཆད་པའི་གཏམ་རྒྱུད་ལ
མི་རྣམས་ཡིད་ཆེས་སུ་འཇུག་རྒྱུ་ནི་དེ་བས་ཀྱང་དཀའ
གཏམ་རྒྱུད་འཆད་ཤེས་པ་ནས་བཟུང
ང་ཚོ་གཏམ་རྒྱུད་ཅིག་གི་བརྗོད་དོན་དུ་གྱུར
ང་ཚོ་གཏམ་རྒྱུད་ཅིག་ནས་སྐྱེས་པ་འདྲ་ལ
ཡོད་ཚད་གཏམ་རྒྱུད་ཅིག་ནས་འགོ་བརྩམས་པ་འདྲ
ཡང་ན་གཏམ་རྒྱུད་ཅིག་ལས་རྒྱུན་མཐུད་དེ
ད་ལྟ་ལ་ཐུག་གི་བར་དུ་གནས་ཡོང་བའང་འདྲ
གང་ལྟར
གཏམ་རྒྱུད་རྟོག་བཟོ་དང་འདྲེས་པ་ནས་བཟུང
ང་ཚོ་གཏན་དུ་གཏམ་རྒྱུད་དེའི་མཚར་སྡུག་ལས་ཕྱིར་འབུད་མ་ཐུབ
2019/5/24
དཔེ་འཇོག་གི་དགོས་པ།
མི་རྣམས་ཀྱིས་ཡིད་འོང་གི་བུ་མོར་མེ་ཏོག་ཅེས་འབོད་ཀྱིན་འདུག
དོན་དམ་མེ་ཏོག་དང་བུ་མོའི་བར་ལ་མཚུངས་ཆོས་ག་ཙམ་ཡོད་དམ
ངས་མི་ཤེས
ངས་འདང་རྒྱག་ས་ཉག་གཅིག་པུ་ནི
དཔེ་འཇོག་ཅིག་གིས་སྙན་ངག་ཡག་པོ་ཞིག་བསྐྱེད་ཐུབ་མིན་དེའོ
2019/5/25
ཨ་མ།
མོ་སློབ་ཆུང་ལོ་རིམ་གསུམ་པ་མ་གཏོགས་འགྲིམས་མ་མྱོང
ང་ལོ་བརྒྱད་ལ་བུད་པའི་ལོ་དེར
ཨ་མས་ང་ལག་མགོར་ཁྲིད་ནས་ཕ་ཡུལ་གྱི་སློབ་ཆུང་ནང་དུ་བསྐྱལ
ཨ་མས་ང་དགེ་རྒན་ལ་བཅོལ་གདམས་བྱས་ནས་བཤད་རྒྱུར
བུ་འདིའི་མིག་མ་བཅར་ན་གང་ལ་གཅར་ཀྱང་ཆོག་ཟེར
ད་ལྟ་ཨ་མ་རྒ་བས་ནོན་ནས་མིག་ཟུང་གི་རྣོ་ངར་ཉམས་ནའང
ཁོ་མོའི་སེམས་ཁུར་བྱེད་ས་ཉག་གཅིག་པུ་ནི
བུ་ངའི་ཡ་ཐོད་ཀྱི་མིག་ཟུང་འདི་རེད
2019/5/29
གྱེས་ཁ་མའི་གླུ
གླུ་ཚིག་དེས་ཆར་རྗེས་ཀྱི་སྒེའུ་ཁུང་སྲུབས་མེད་བརྒྱནངས་མཐོང་སྣེ་དེ་གར་རྒྱང་རིང་གི་རི་བོའི་ཟབ་ཚད་འཇལ
ཤེལ་སྒོའི་སྟེང་ཧ་ཡིད་ཚིམ་པ་བཏབ་རྗེས
མཛུབ་མོས་རྒྱང་དུ་འཐེན་པའི་ལམ་ཕྲན་གྱ་གྱུ་དང
ལམ་ཕྲན་མུ་མཐའི་རྒྱབ་གཟུགས་མངོན་ཙམ་བྲིས་ཚར་མ་ཐག
མེ་ཏོག་ཅིག་དྲག་ཆར་གྱིས་བརྫིས་ནས
ཡུལ་ལྗོངས་དང་གཏན་དུ་གྱེས
མེ་ལོང་།
རྨི་ལམ་དེའི་ནང་ནས་ངས་རང་ཉིད་མེ་ལོང་ཞིག་ཏུ་གྱུར་ཡོད་པ་རྨིས
མེ་ལོང་ཕྱི་གཙང་ནང་མཐོང་དེའི་ནང་དུ
ཅི་ཡང་ཤོང་ལ་ཅི་ཡང་མེད
སྟོང་སང་སང་གི་ནམ་མཁའི་ངོས་སུ
འཇའ་ཚོན་གྱི་རི་མོ་འབྲི་ལ་བྲེལ་བའི་ལྷ་མོ་ཞིག་གིས
མཚོ་མོ་མེ་ལོང་བྱེད་བསམས་ནས་མར་བལྟས་པ་ན
མཚོ་མོའི་གཏིང་ཟབ་ས་རུ
ནམ་མཁའ་རྗེན་འཆར་བྱེད་སའི་མེ་ལོང་ཞིག་གིས
ལྡོག་འོད་ལམ་ལམ་སྤྲོ་བཞིན་པ་མཐོང
དེ་འཕྲལ་ཁོ་མོས
མཚོ་གཏིང་དུ་བྱིངས་པའི་མེ་ལོང་ཕྱག་ཟུང་གིས་ཡར་བསྒྲུགས་ནས
རང་གི་སྒེག་ཆས་སྤྲས་སའི་སྟེགས་བུའི་སྟེང་དུ་བཞག
དེ་ནས་བཟུང
ང་ཡི་མི་ཚེ་འདི་ལ
མཛེས་པ་མི་ཚོར་བའི་སྡུག་བསྔལ་ཡོད་དོགས་མ་སྐྱེས
2019/8/6
རྡོ་བར་གྱུར་བའི་གོ་རིམ།
དབུགས་འབྱིན་རྔུབ་བཞིན
སྨྲ་སྒོར་འཇགས་པའི་ཕ་སྐད
དབུགས་འབྱིན་རྔུབ་བཞིན
རྩ་ལམ་ན་རྒྱུ་བའི་མ་ཡིག
མཉེན་ཞིང་གཡོ་བ
བྱེའུའི་གཤོག་འགྱུ་དང་འདྲ་བ
སྲ་ཞིང་འཐས་པ
ཕ་བོང་གི་གཟུགས་སུ་གྱུར་དུས
དབུགས་ཐོགས་ལྷེམ་ལྷེམ་མེ་བ་དེ་ཚོ
ཉི་མ་ནུབ་ཀྱི་ཕྱོགས་སུ་ཆས་ཟིན་པའི་སྔ་ལྟས་རེད
ཨ་ཁ་ཁ
ཁོ་ཚོས་རང་གི་དབུགས་རྒྱུན་དྲོན་མོ་ཡང
རང་དགར་ཕྱི་རུ་གཏོང་ཐུབ་ཀྱིན་མི་འདུག
འབུ་མེ་ལྕེབས།
སྲིན་འབུ་མེ་ཁྱེར་སྒྲོན་མེར་ལྕེབས་པའི་སྐད་ཅིག་མརསྡུག་བསྔལ་མུན་པ་གང
མེ་སྟག་གཅིག་གི་ཚམ་ཚོམ་བརྒལ་རྗེས
སྐད་ཅིག་འོད་དུ་བསྒྲོན
བདེ་བ་གློག་ཞགས་གཅིག
གཞོབ་དྲི་མཆེད་པའི་སྐད་ཅིག་འབར་གས་བརྒྱུད་རྗེས
མུན་པའི་མཐའ་རུ་ཐོན
ཤིན་ཏུ་འཁྱགས་པའི་གླུ
ཤ་ཁྲག་གི་ཕུང་བོ་རྟེན་སའི་རུས་སྒྲོམ་འཁྱགས
རུས་སྒྲོམ་གྱི་བཅུད་ན་སྨིན་པའི་རྐང་མར་འཁྱགས
གློ་སྙིང་འཁྱགས་པ
དབུགས་རྒྱུན་འཁྱགས་པ
ཆབ་རོམ་དང་ནི་རྡོ་བ་བཞིན
མགྲིན་ལམ་ན་ཡང་ཡང་འཁྱགས
དཔེ།
མཚོ་མཐའ་འཁྱགས་པས་ཟིན་དུས་ཀྱི་ང་རང་གྲང་ཅང་ཅང
དྲོད་པ་མེ་དང་འཕྲད་དུས་ཀྱི་ཁྱོད་རང་ཚ་ལམ་ལམ
ཆར་བ་ཆུ་དང་བསྡེབས་རྗེས་ཀྱི་ང་རང་བརླན་ཤིག་ཤིག
ཤིང་བལ་རླུང་གིས་སྐྱོད་དུས་ཀྱི་ཁྱོད་རང་འདར་ལྕུག་ལྕུག
མིག་ཟུར་གདོང་ལ་ལྷུང་དུས་ཀྱི་ང་རང་འཛུམ་དམུལ་དམུལ
འདོད་པ་ཚྭ་དང་བསྲེས་རྗེས་ཀྱི་ཁྱོད་རང་སྐོམ་ཀྲོག་ཀྲོག
གཏི་མུག་མུན་དང་འགྲོགས་རྗེས་ཀྱི་ང་རང་ནག་ཐིབ་ཐིབ
ཞེ་སྡང་སྟག་དང་གཤིབ་དུས་ཀྱི་ཁྱོད་རང་འཁྲུག་ཟིང་ཟིང
རྨི་ལམ་སྙེག་པའི་རྟ་ཕོ།
རྟ་ཕོ
ང་ཡི་རྟ་ཕོ
འཚེར་སྐད་ལྷང་ལྷང་སྒྲོགས་དང
རྣ་གཤོག་ཀྲོག་ཀྲོག་སྒྲེངས་དང
སྣ་དབུགས་ཧད་ཧད་རྔུབས་དང
ཁ་རྔོག་རླུང་ལ་སྐྱོན་དང
རྨིག་གོར་སྤང་ལ་རྡོབས་དང
ད་ཆ་རྨི་ལམ་མ་གཏོགས
ངས་ཁྱོད་གཏིང་བརྗེད་དུ་གྱུར་ལ་ཉེ
ད་ལོའི་དབྱར་འཁྱགས་གི
དེ་རིང་གི་ཉིན་ཐོ་འདི་འབྲི་དུས
ངས་གནམ་ངོ་དྭངས་མིན་ལ་མ་བལྟས
ཟླ་ཚེས་འབྲི་ཉེས་ཤོར་མིན་ལའང་མ་བལྟས
ཐ་ན
ཡིག་ནོར་དང་བརྡ་ལོག་དོན་ལོག་ཤོར་མིན་ལའང་མ་བལྟས་པར
དབྱར་ཁ་འཁྱགས་ཚུལ་ཁོ་ན་ཐོ་རུ་བཀོད
2019/5/31
སྒྱུ་མའི་སྤྲིན་ཕུང་།
ནམ་མཁར་སྤྲིན་ཕུང་འཕྱོ་གཡེང་གིས་འཁྲིགས་ཏེ
གྲང་བསིལ་གྱི་སྤྲིན་ཕུང་དག་ཕན་ཚུན་ལ་འཕྲད་དེ
ཆར་ཆུའི་ངོ་བོར་འགྱུར་ངེས་པ་ནི་རྣམ་འགྱུར་ཞིག་ཡིན་ལ
ཆར་པའང་སྤྲིན་པའི་ངོ་བོ་འགྱུར་བའི་རྣམ་འགྱུར་གཞན་ཞིག
གལ་ཏེ་སྤྲིན་པ་དེ་དག་གིས་ཀྱང
རང་ཉིད་ཀྱི་ངོ་བོ་ཆུ་ཡིན་པ་ཚོར་བར་གྱུར་ན
རྦ་རླབས་བྱེ་བ་འབུམ་ཕྲག་ཡར་འཕྱོ་མར་འབབ་བྱེད་སའི
རྒྱ་མཚོར་འབབ་ངེས་ཀྱང
རྒྱ་མཚོར་མཐོ་དམན་གྱི་འཕེལ་འགྲིབ་ཅི་ཡང་མེད་པ་བཞིན
སྤྲིན་པ་ཆར་དུ་གྱུར་བའང
དོན་ལ་སྤྲིན་པ་གཏན་ནས་འཇིག་པ་མ་ཡིན་པར
སྐྱེ་འཆིའི་ཕ་རོལ་ཏུ་སོན་སྟངས་ཤིག་ཡིན་པ་ཧ་གོ་ཐུབ
2020/6/18
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།