བཤེར་འཚོལ།
ཅོ་བྱང་སྐར་གྱི་སྙན་ངག་བདམས་བཀོད།
ཅོ་བྱང་སྐར། ཀན་ལྷོ་བོད་རིགས་རང་སྐྱོང་ཁུལ་ཤར་ཅོ་ནེ་ས་ཆའི་ཆོས་དཔལ་གཉིས་ཀྱི་ཞིང་ས་སྟེ། ཉིན་པ་སྡེ་བ་ནས་ངུ་ངག་གི་དབྱངས་རྟ་ཐོག་མ་མི་ཡུལ་དུ་བསྒྲགས། ནུབ་བྱང་མི་རིགས་སློབ་ཆེན་ནས་སློབ་མཐར་ཕྱིན་རྗེས་སུ་མི་རྐྱང་རྟ་རྐྱང་གིས་ཁྲིན་ཏུའུ་སྤོས་ལྡན་གྲོང་ཁྱེར་དུ་འཁྱམས་ནས་མི་ཚེའི་གདམ་ག་ཐོག་མ་རང་གིས་བཙལ་ཞིང་། ད་ལྟ་གསར་འགོད་པའི་ལས་ཀ་གཉེར་བཞིན་ཡོད་ལ་ཞོར་ཏུ་བཤད་འདོད་པའི་སྐད་ཆ་དག་ཡི་གེར་ཕབ་བཞིན་ཡོད།། རང་གི་དགའ་ཕྱོགས་ཀྱི་མཐའ་འཁྱོངས་ཕྱིར་མི་ལོ་བཅུ་ཙམ་ལ་སྦྱངས་རྩོམ་གྱི་ལམ་དུ་ཞུགས་ཤིང་། སྔ་ཕྱིར《སྦྲང་ཆར》དང《་ཟླ་ཟེར》《བོད་ཀྱི་རྩོམ་རིག་སྒྱུ་རྩལ》《མཚོ་སྔོན་པོ་རྩོམ་རིག་སྒྱུ་རྩལ》 《གངས་དཀར་རི་བོ》《མི་རིགས》 《ཤྭ་སྐྱ》དུས་དེབ་གཙོ་བྱས་གཞུང་སྒེར་གང་རུང་གི་དུས་དེབ་དང་། ཚགས་པར། དྲ་ངོས་སོགས་སུ་རང་གིས་བཤད་འདོད་པའི་སྐད་ཆ་གང་མང་བཀོད་མྱོང་། །
ཚོར་བའི་རླབས་ཕྲེང་།
སྡོང་ལོ་སེར་པོ་ས་རུ་ལྷུང་བའི་དུས་ཚིགས་དེས།
སྐྱོ་ཤས་ཀྱི་ངང་ནས་འཁྱམ་ཉུལ་བྱས་པར་གྲ་སྒྲིག་བྱས་ཟིན།
ཧ་ཅང་ཐག་རིང་པའི་ཕ་ཁྱིམ་དེས་ང་ལ་སྐྱོ་སྣང་མོད་པོ་སྦྱིན།
ད་སོ་མ་དྲག་ཏུ་ལྡང་བའི་རླུང་བུ་དེས་བསམ་བློ་ཡི་ཁ་ཕྱོགས་རྩ་བ་ནས་བསྒྱུར་ཚར།
ད་ནི་ཅི་ཡིན་ཆ་འཚལ་བར་སྲང་ལམ་དོག་མོ་ཞིག་ནས།
ངས་མཚན་མོ་འདི་བསྐྱལ་དགོས་བྱུང་སོང་།
གྲོང་ཁྱེར་འདིའི་སྲང་ལམ་ལ་སྲ་མཁྲེགས་དང་གྲང་ངར་ལྡན།
ལྗིད་ཏིག་ཏིག་གི་གོས་འགྲོས་དེ་གཅིག་རེ་གཅིག་རེའི་ངང་ནས་ལྷོད་ལྷོད་དུ་སྤོས་རུང་།
ལྷུང་ཟིན་པའི་སྡོང་ལོ་ཡིས་གློག་འོད་དག་ཀྱང་སིལ་བུ་གཏོར་འདུག
ད་ནི་སྲང་ལམ་ན་ཉུལ་བཞིན་པའི་ཁྱི་ཕྲུག་ལྡོམ་པོ་དང་ངེད་གཉིས།
ཕན་ཚུན་ལ་རང་རང་གི་ལས་དབང་གླེང་།
དམར་མདོག་ལ་ཆག་གྲུམ་ཤོར་བའི་ལོ་མ་སེར་པོ་དེ།
ངས་བསམ་ན་རླུང་འབུད་གླིང་བུ་ཡིན་རྒྱུ་རེད།
དེ་ཡིས་མི་སེམས་སྒུལ་བའི་དྲན་གདུང་གཉོམ་པོ་རེ་རེ་ཕྱོགས་བཞིན་སྒྲོག་ཐུབ།
ལྗང་མདོག་གི་མདངས་འཛིན་པའི་མེ་ཏོག་ཆུང་ཆུང་དེ་སྐྱ་རེངས་ཀྱི་རྨི་ལམ་ཡིན་ན།
རྨི་ལམ་དང་བསྡོངས་པའི་ལོ་ཟླ་ཡིས་སྐྱི་སྡུག་གི་མིག་ཆུའི་ཕྲེང་ཐག་ཆད་དུ་འཇུག
ཁྲ་ཚོམ་གྱི་གློག་འོད་ཕྱོགས་བཞིར་འཕྲོ་བའི་མཐོ་བརྩེགས་གྱི་ཁང་མིག་ཞིག་ནས་རྒྱང་གཟིགས་བྱ་དུས།
ཐག་རིང་དུ་འཐེན་པའི་ལམ་ཕྲན་དེ་རྩྭ་ལྗང་གིས་ཡོངས་སུ་གཡོགས་ནས་མི་མཐོང་བར་སྣང་།
དཀའ་སྡུག་གི་ལོ་རྒྱུས་ཀྱིས་བལྟམས་པའི་ཚེ་སྲོག་གི་འབོད་པ་དེ།
ཁེར་རྐྱང་གི་རྔ་མོང་བཞིན་བྱེ་ཐང་ན་གང་དྲན་དུ་འདུར་མ་རྒྱུགས།
ཀི་སྒྲ་དབྱངས་སུ་བརྒྱུས་པའི་ཡོད་ཚད་ཀྱི་སེམས་ཁོང་གི་སྙན་ངག་པ་དེས་ཀྱང་།
སེར་ཆེན་མེ་ཏོག་ཡ།
ཁྱེད་ནི་བཞད་རྗེས་སུ།
འདབ་ལོ་ལྷུང་དགོས་པ་མ་ཡིན་ནམ།
ཆག་གྲུམ་ཤོར་བའི་རླུང་བུ་དེས་ཁྱེད་ཉིད་ཀྱི་ཆོས་ཉིད་བརྗེས་ནས།
ཐག་རིང་བའི་བྱེ་ཐང་དང་།
གཏིང་ཟབ་པའི་རྒྱ་མཚོ།
དཀར་ཆ་དབེན་པའི་མུན་ནག་ཞིག་ཏུ།
མུན་ནག་གི་གྲུ་ག་ཞིག་ནས།
རྗེ་བཙུན་སྒྲོལ་མ་དབྱངས་སུ་བཀུག་པའི་གདངས་དབྱངས་ཐན་ཐུན་ཅིག
དེ་ནི་ཚོར་བ་རླབས་རིས་སུ་འཕྲོ་བཞིན་པའི་ལོ་མ་སེར་པོ་དེའོ།།
རོལ་དབྱངས་སྐམ་པོ།
སྐྲ་ལོ་ལ་འཇུས་ནས་སྐྱབས་འཇུག་གི་མིག་ཟུང་སྟོང་བའི་དབྱིངས་སུ་འཐིམ་དུས།ཝུ་སིབ་ཁུ་ནག་གི་འཐུང་འཕྲོ་ཞིག་དང་མཚུངས་པའི་ངའི་རོལ་དབྱངས་སྐམ་པོ།
ཉི་ཟླ་རི་བོའི་དྲན་ཤེས་ཀློང་ནས་ཁྱེད་ལ་འཁྲེང་སེམས་འཁོར་ལ།
གསེར་དངུལ་གཞོང་པའི་གཏམ་རྒྱུད་ཁྲོད་ནས་ཁྱེད་ལ་ཕྱིར་མིག་འཕེན།
བོར་ཟིན་པའི་གཟུགས་ཕུང་གི་ཁ་དོག་ཁྲོད་ནས་ཁྱེད་ལ་ལོ་རྒྱུས་གླེང་དུས།
དགོད་སྒྲ་དང་ངུ་སྒྲའི་བར་ནས་རང་སེམས་ཀྱི་རོལ་དབྱངས་དེ་སྐམ་པོ་ཡིན་པ་རྟོགས་སོང་།
མདང་ནུབ་ཀྱི་མཆུ་སྒྲོས་འཇམ་པོ་དེའི་མངར་ཁ་ཞིམ་པོ་ལས།
བརྩེ་དུང་གི་ཐ་སྙད་མི་ཉུང་པ་ཞིག་ངའི་ཚོར་བ་ལས་འཐོར།
རྨི་ལམ་ལྷ་ཚོགས་དང་དང་འདྲེས་ནས་རོལ་དབྱངས་ཤིག་གི་ཞིང་ཁམས་འགྲིམས་དུས།
རྟ་དྲེལ་མང་པོའི་རྨིག་སྒྲ་ལས་ཟིན་པའི་ས་ཁི་སིའི་རོལ་དབྱངས་དེ་དག
མི་མངོན་པའི་བར་སྟོང་ཡངས་པོར་མུན་ནག་ནང་གི་མཛུབ་རིས་བཞིན།
སྙིང་ཉེ་གང་ཞིག་ལ་ཕོག་ཐུག་གི་མིག་ཆུ།
ཡོད་ཚད་བོར་ཟིན་པའི་འབྲོང་གཡག་གི་རྐང་རྗེས་བཞིན།
རྒོད་པོ་ཡི་རྣམ་ཤེས་དང་བསྡོངས་ནས་ལམ་ཏུ་ཆས།
རོལ་དབྱངས་སྐམ་པོ་དེ་དག་བདེན་རྫུན་གྱི་གཏམ་རྒྱུད་ཁྲོད་ནས་དམ་ཏུ་བཏགས་ལ།
ཚོར་ཤེས་དང་དྲན་ཤེས་མང་པོ་མེས་པོ་ཡི་ལོ་རྒྱུས་ཁྲོད་ནས་རྒྱང་ཏུ་གཡུགས།
ད་ནི་གསར་རྙིང་གི་སེམས་ཁམས་དེ་གཟུགས་མེད་ཀྱི་རོལ་དབྱངས་ཤིག་དང་འདྲ་བར།
མཚན་ཉིད་དང་ལུང་རིགས་དྲངས་ནས་སླེབས་བྱུང་།
ད་ནི་རོལ་དབྱངས་སྐམ་པོ་དེས་རྟོག་གེ་བའི་འཇིག་རྟེན་ཞིག་དང་འདྲ་བར།
སྟོང་བའི་དབྱིངས་སུ་ལག་གཡུག་བྱེད་བཞིན་སླེབས་བྱུང་།
སྲུང་ཕུར་ལས་ཤོར་བའི་རྨི་ལམ་གྱི་གྱི་ལང་རྟ་ཕོ།
ཕུགས་བསམ་ཞིག་དང་རེ་བཞག་ཅིག་གི་ཆེད་དུ་དྲན་ཤེས་ཀྱི་ཕ་མཐའ་འཚོལ་དུ་ཕྱིན།
སྤྲིན་པའི་གསེབ་ནས་དྲོད་ཁོལ་མ་ཡལ་བའི་རིས་མེད་ཀྱི་རྟ་བདུན་དབང་པོས།
འགྲུལ་བཞུད་གྱི་གོམ་འགྲོས་མྱུར་མོར་བསམ་གཞིགས་གི་ལམ་ཁ་གཡེང་བོར་ཕྱེས།
ད་ནི་རོལ་དབྱངས་གི་རམ་འདེགས་བྱས་པའི་རྨ་ཀླུང་རིང་མོའི་རླབས་སྒྲ།
རྐང་ཐང་བ་ངའི་སྟོབས་ཤིག་གི་རྩེ་རུ་སྤུར་ནས་ཁ་རོག་གེར་བུད་སོང་།
འཇའ་རིས་ལ་འགྲོགས་པའི་ཤུར་ཤུར་གྱི་རོལ་དབྱངས་དེ་དག
འགྱུར་སླ་བའི་སེམས་ཁམས་དང་འགྲོགས་ནས་ལན་རེ་སྐམ་ལན་རེ་རློན།
ཚང་ཚང་གི་གར་སྟེགས་སུ་འཇོ་བའི་བདེན་རྫུན་གྱི་རོལ་དབྱངས་དེ་དག
མེས་པོ་ཡི་ནང་སྙིང་ལས་འཁྲུངས་རུང་ལན་རེ་སྐམ་ལ་ལན་རེ་རློན།
རློན་ཟིན་པའི་རོལ་དབྱངས་དེ་དག་ཉི་ཟླ་རི་བོའི་རྒྱབ་ཕྱོགས་སུ་བཞུད་ཟིན་ལ།
ཁྲ་ཁྲ་རིལ་རིལ། ཨ་གསར་ཨུ་ཚུགས་ངང་ཡོད་པའི་རོལ་དབྱངས་སྐམ་པོ་དེ་དག
ངའི་རྨི་ལམ་གྱི་མཛའ་ན་མོ་བཞིན་ལན་རེ་འཇམ་ལ་ལན་རེ་རྩུབ།
བག་ཉལ་ཟིན་ཐོ།
རྒྱ་ལྕང་གི་ལོ་མ་ལྷེབ་ཆེན་གྱིས་གཉོམ་ཆུང་གི་པད་མའི་མཛེས་བ་བསྒྲུབས་ཟིན་ལ།
ངམ་ནག་གི་གྲང་ངར་རླུང་བུ་ཡིས་ལ་ཁའི་དར་ལྕོག་རྐྱེན་པོ་ཐལ་སོང་སྐད།
རྣམ་རྟོག་དང་ཐེ་ཚོམ། ང་རྒྱལ་དང་སྒྱིད་ལུག
རང་ཉིད་དང་རང་ཉིད་ཀྱི་ཡོད་ཚད།
གཏམ་རྒྱུད་ལས་རིང་བའི་དངོས་ཡོད་ཅིག་ཏུ་རྟོག་བཟོ་བྱས་བའི་མི་བུ་འགའ།
འཇག་སྐྱ་ཡིས་ཤུར་གླུ་ལེན་པའི་སྟོང་སང་སང་གི་མཁའ་དབུགས་ཁྲོད།
དལ་གྱིས་རྒྱུ།
གཡང་གཟར་གྱི་ལྷ་ཤིང་ཤུག་པའི་འདབ་ལོ་དབེན་རྐྱེན།
དུས་གསར་གྱི་ལྷ་བྱ་ཁུ་བྱུག་བག་ལ་ཉལ།
ལྷུན་ཆགས་ཀྱི་རྒྱབ་རི་སྨུག་པོ་སྐྱ་ཐིང་ཐིང་།
གཡང་དཀར་གྱི་ལུག་ཁྱུའི་ཚོགས་ཀྱང་བག་ལ་ཉལ།
ཆུ་བོ་བཞུར་སོང་། ལུག་ཁྱུ་ཐོར་སོང་།
ནམ་ཡང་ལྗིད་ཏིག་ཏིག་གི་གོམ་སྒྲས་ས་སྒང་འདིའི་སྒལ་ཚིགས་བགྲོད་བའི་ནོར་ནག་འགའ
སྐོམ་པ་ཡི་གདུང་བས་མ་བཟོད་བྲེད་ཤ་ཐོན།
བསམ་གཞིག་དང་ལས་འགན་ལྕི་བའི་རྩྭ་ཐང་ཡངས་བོར་ཡང་ཁེར་རྐྱང་གི་རྒས་ཉམས་ཤིག་མངོན།
པད་མ་སྐམ་སོང་། ལྕི་བ་རུལ་སོང་།
ཆགས་ལྡན་གྱི་བརྩེ་བ་ཡོད་ཚད་འོད་སྣང་ལ་བརྒྱུས་བའི་དུང་ཞེན་གྱི་ཟླ་བ་དཀར་པོ།
ཁྱེད་ཀྱི་བཞིན་རས་ལ་དགའ་མོས་ཀྱི་འཛུམ་མདངས་བྲལ་བ་པདྨ་ཡི་མཛེས་སྡུག་མ་མཐོང་བས།
ཡང་ན། ཐན་བྱ་འུག་པའི་ཨག་སྒྲ་གོ་བས་ལན།
ལྷད་མེད་ཀྱི་བརྩེ་བ་ཡོད་ཚད་ང་ཚོར་འབུལ་ཟིན་པའི་མཐོ་སྒང་གི་སྦྲ་ནག་ཁེར་རྐྱང་།
གནག་སྣུམ་གྱི་འོད་དང་བྲལ་ཏེ་སྐྱ་མདོག་གི་ཕྱི་ཚུལ་མངོན་པའི་ཨོང་བ་ཡི་དྲི་བསུང་མ་ཚོར་བས།
ཡང་ན། སྒྲ་སྡུད་ལས་འོད་ཀྱིས་མཆེད་པའི་དུས་གསར་གྱི་ཅོང་སྒྲ་ཐོས་བས་ལན།
གང་ལྟར།
ཕོ་ལོ་ཉི་ཤུ་བག་ལ་ཉལ་ཟིན།
ཕྱིར་མིག རྗེས་དྲན། སྐྱོ་གདུང་གི་མདའ་རྩེ་རྣོ་རུང་།
འདས་སོང་གི་ལྟག་སྒོ་བཙན་གྱིས་བརྒྱབ་སྟེ།
ཕོ་བྲང་པོ་ཏ་ལའི་རྒྱ་ཕིབས་ལ་གཟས་ཏེ།
སྨུག་ལོང་ཁྲོད་ནས་ལམ་ལ་ཆས།
ཕུགས་འདུན་འཚོལ་བའི་བྱེས་པ།
གངས་སེང་གི་གཡུ་རལ་ལ་ང་རྒྱལ་གྱི་རྣམ་ཤེས་སྦྲུམ་ས་དང་།
འབྲོང་རྒོད་ཀྱི་རྭ་རྩེ་ལ་འོད་སྣང་གི་ཚེ་སྲོག་འཁྱུད་ས།
ཁུ་བྱུག་གི་གསུངས་སྙན་ལ་ཚངས་སྲས་ཀྱི་རྒྱུད་མངས་མངའ་ས་དང་།
ནོར་ལུག་གི་ཁྱུ་ཚོགས་ཀྱིས་སྤང་ཐང་ལ་རྒྱ་མཚོ་འཁྱིལ་ས།
ཨོ་རེད་ཡ།
གནས་མཆོག་འདི་ལྟ་བུ་ཞིག་གི་མངའ་ཐང་ས་བླ་གསུམ་གྱི་གང་ན་རྒྱས་ཡོད་དམ།
རྨི་ལམ་གྱི་རེ་སྒུག་མངོན་སུམ་མཁའ་དབྱིངས་སུ་འཕུར་མཆོག་པའི་གནས་མཆོག
ཕུགས་བསམ་གྱི་ལྗོན་པར་དུས་བཞིར་འབྲས་བུའི་ཁུར་གྱིས་ལྕི་བའི་གནས་མཆོག
ཨོ་རེད་ཡ།
གནས་མཆོག་འདི་ལྟ་བུ་ཞིག་ཡོད་གྱུར་ན་ཆུ་དང་གཙང་པོ་འཕྲེད་ཀྱིས་གཅོད་ཆོག་ལ།
རི་དང་ཐང་ཆེན་རྡོག་པས་བསྣན་ནས་མདུན་དུ་བསྐྱོད་པར་ཀི་སྒྲ་ཆེ་བ་གདོན་མི་ཟ།
གནས་མཆོག་དེ་ན་གཡང་གཟར་གྲོག་རོང་གི་གཟི་ཁ་ཅི་འདྲ་རྒོད་རུང་།
གཞིས་མལ་དེ་ན་བྱང་རླུང་རྔམ་ནག་གི་ཤུར་སྒྲ་ཅི་འདྲ་བཙན་རུང་།
ལྡེམ་མྱུར་སྲ་བརྟན་གྱི་གཤོག་ཟུང་དང་འགྲོགས་ལ།
ཕུགས་འདུན་བརྟན་པོ་ཡི་ཡིད་ཆེས་ལ་འཐམས་ནས་རི་རྒྱུད་དེའི་རྩེ་རུ་བསྒྲེངས་བར་ཐེ་ཚོམ་མེད།
མགོ་རུས་སྐམ་པོ་ས་རུ་མ་འབྱར་བར་ཏུ་ང་ཚོས་ཕུགས་འདུན་དེའི་ལམ་ནས།
འཚོ་བ་སྟོབས་ཀྱིས་རོལ་ཆོག་ལ་བརྩེ་དུང་ཤུགས་ཀྱིས་བརྗོད་ཆོག
སུ་དང་གང་གི་མགོན་སྐྱབས་དབེན་རུང་འགྲོ་བཞིན་པའི་ལམ་ཕྲན་དེ་ལས།
ཡིད་ཆེས་ཀྱི་རྒྱབ་རི་བརྟན་དགོས་ལ་རེ་སྒུག་གི་སྨོན་ལམ་འགྲུབ་དགོས།
ཕུགས་འདུན་གྱི་འགྲུལ་བཞུད་དེ་ནམ་ཡིན་རུང་མི་ཚེ་གཅིག་གི་བརྗོད་སྙིང་རུ་བསྒོམ་ནས།
ཁ་ཟས་ཀྱི་ཆེད་དུ་སློང་མོ་བའི་རྟུལ་ཞུགས་འཛིན་དགོས་རུང་ང་ལ་རྣམ་དོགས་མེད།
སྔོན་བསགས་ལས་ཀྱི་སྐལ་བ་དམན་སོང་པ་འདྲ་རུང་འཚོ་བ་ལ་འཁང་ར་གཏན་ནས་མིན།
ནམ་ཡིན་རུང་ཕུགས་འདུན་འཚོལ་བའི་སྙིང་སྟོབས་དེ་ཁ་བཤད་ཝུ་བའི་དོ་ཟླར་ལངས་ཡོད།
མི་འགྱང་བའི་མ་འོངས་སུ་ལྷགས་ཡོད་པའི་དུས་ཚོད་སྐར་ཆ་རེ་ལ་ཡང་།
ལོ་ཟླའི་འཁོར་འགྲོས་མིག་གིས་འཚོས་ལ་ཉིན་མཚན་དུས་དྲུག་སེམས་ཀྱིས་སྐྱོང་ནས་འགྲོ་ངེས།
ངའི་རྣམ་ཤེས་རྡབ་རྡིབ་ཡིན་ན་འདྲ། ངའི་ལང་ཚོར་རྒས་འཁོགས་འདྲེས་ནའང་ཆོག
ངས་འཚོལ་སྙེགས་ཀྱི་ལམ་ཁ་ནས་ངལ་གསོ་དང་ཕྱིར་ནུར་མི་བྱེད་དམ་བཅའ་བརྟན།
འཆལ་དམོད་དང་ཟུར་ཟ་ཡོད་ཀྱང་སྲིད། ཁ་མཚར་དང་ཀུ་རེ་ཡིན་ཀྱང་སྲིད།
ལང་ཚོ་ལ་ཀུ་རེ་མེད་ལ་ཕུགས་འདུན་ལ་ཕྱིར་ནུར་མེད་པར་མདུན་དུ་སྐྱོད་ངེས།
མངར་སྐྱུར་གྱི་འཚོ་བ་དེ་ལ་དབྱར་དགུན་གྱི་གྲང་དྲོད་དབེན་ན།
སུ་ཞིག་གིས་འཚོ་བ་ཞེས་པའི་དོན་སྙིང་རྟོགས་ཐུབ།
དེ་བས་ལས་དབང་ཟེར་བའི་རྟུམ་དྲགས་ཅན་དེས་ཀྱང་ང་ཚོ་ལ་འགོ་བོ་སྒུར་ཏུ་འཇུག་མི་ཐུབ་པར་ཡིད་ཆེས་བརྟན།
ཡོད་ཚད་ཀྱི་ཡོད་ཚད་སློང་མོལ་བ་ཞིག་གི་ཟླ་རུ་གྱུར་མོད་ཕུགས་འདུན་དེའི་ཆེད་ང་ཚོ་མུ་མཐུད་དུ།
བྱེས་པ་ཞིག་གི་ང་རྒྱལ་དང་རེ་སྒུག་དེ་འཁྱེར་ནས་སང་ཉིན་གྱི་འཚོ་བར་འོད་སྣང་འཕྲོ་དགོས།
ཤི་མ་གསོན་གྱིས་འཚོ་སྡོད་བྱས་པ་ལས་རྦ་རླབས་ལྟ་བུའི་བརྩེ་བ་རེ་གླེང་ན་དགའ།
ངའི་ཕུགས་འདུན་གྱི་ལྗོན་པ་དེ་ནམ་ཞིག་གཡུ་མདོག་གི་ལྗོངས་ཁམས་དེ་ནས་འཁྲུངས་བར་ངེས།
མ་གཞི་ནས་སྐྲག་སྣང་དང་ཐེ་ཚོམ་གྱི་སོམ་རྙིད་རུ་ཚུད་པ་དེས་ཕུགས་འདུན་གླེང་བར་སྐལ་བ་དབེན།
དེ་ནི་རིག་པའི་དཔའ་བོ་དང་མདོ་མེད་ལག་རྡུམ་གྱི་གཏམ་རྒྱུད་རེད།
འོད་སྣང་གི་འོད་ཟེར་མཁའ་དབྱིངས་ནས་འཚེར་བ་དང་ས་གཞི་ཡི་སྒང་ལ་ལང་ཚོ་བསྐྱལ་བའི་དུས་ཐོག་མ་དེར་རོལ་མྱོང་བྱ་ཆེད།
ངས་ནམ་ཡིན་རུང་རང་ལ་དབང་པའི་ལག་ཟུང་གི་ཁུ་ཚུར་དམ་དུ་བསྡམས་ནས།
ས་མ་རུབ་སྔོན་དང་སྐྱ་རེངས་མ་ལངས་སྔོན་དུ།
ལང་ཚོ་ཡོད་ཚད་སྟོབས་སུ་བསྡུས་ནས་གྲ་སྒྲིག་བྱས་ཡོད།
མ་གཞི་ནས་ཕུགས་འདུན་ལང་ཚོར་བརྗེས་ཟིན་པའི་བྱེས་པ་ངས།
ཚེ་སྲོག་ཞེས་པའི་འོད་སྣང་དེ་ལ་རྡོ་རྗེ་བྲག་རིའི་དམ་བཅའ་བརྐོས་ནས་ཡོད།
ནམ་ཞིག་གི་སང་ཉིན་ལ་ངས་ལང་ཚོ་དེ་ཕུགས་འདུན་གྱི་ཆེད་དུ།
རྩོམ་སྒྲིག་པ། ལྷ་སྐྱིད།
རྩོམ་ཁུངས། ངེད་དྲ་བ།