ཐང་གའི་རས་གཞི་རྩེག་མ་ཞིག་དང་འདྲ་བའི་ཁང་མིག་འདིའི་དབུས་སུ
ང་རང་དཀྱིལ་མོ་ཀྲུང་དུ་བསྡད་ནས 
མེ་ཏོག་དང་མངོན་བརྗོད་ཟོལ་གྱིས་བསྡད་ནས
དབེན་སིམ་པའི་མཚན་མོ་གྲངས་མེད་ཅིག      འདི་ལྟར་ཁེར་རྐྱང་གིས་སྐྱེལ་འདོད

རྔུབ་ཅིང་འོངས་པའི་ཉི་རྡུལ་ཕྲ་མོ་དག་གི་བར་ནས
དབྱུང་ཞིང་ཤོར་བའི་སེམས་དོན་སྐད་ཅིག་དག་གི་ཀློང་ནས
འཇིག་རྟེན་ནི་སྒལ་ཚིགས་ཡོ་ཞིང་འཁྱོག་པའི་བྱིས་པ་ཞིག་སྟེ
ངུ་ཞིང་ངུ་བཞིན་དུ      ལུས་ཀྱི་ཤ་ཁྲག་དག་ཕྱི་ཕྱིར་གཏོར་ཞིང་གཏོར་བཞིན་ངུ

 སྐབས་དེ་དག་ལ      རླུང་རེ་གཉིས་ནམ་མཁའ་ཕ་རོལ་དུ་ལྡངས་ཀྱིན་ཡོད་དམ
སྨྲ་བ་མེད་པའི་ལུ་གུ་རེ་གཉིས་ཤིང་ཕྲན་གྱི་ཡལ་གར་འཁྱུད་ཀྱིན་ཡོད་དམ
རྒྱུས་མེད་པའི་ངོ་གདོང་ཁ་ཤས 
མཐའ་སྐྱོར་མེད་པའི་ལྕགས་ཟམ་དེ་ལས་བརྒལ་མཚམས
རྟོག་བཏགས་ཀྱི་ཞིང་ཁམས་འདི་ཡང་སྨུག་སྒྱུ་ཞིག་དང་འདྲའོ་ཟེར་ན 
དེ་ན       ང་ཡི་དྲན་དབུས་ནས་ཤར་གྱིས་ཡལ་ཞིང
སླར་ཡང་ག་ལེར་འཆར་འོངས་པའི་ངོ་གདོང་དེ་སུ་ཡིན་ནམ

ཐལ་མོ་སྦྱར་བའི་ལག་ཟུང་དེ་ཡུན་གྱིས་ཕྱེས་ཤིག་དང
མཚེའུ་ཞིག་གི་མཇིངས་སུ་ལྡེམ་པའི་མེ་ཏོག་དཀར་བོ་དེར་ནན་གྱིས་ལྟོས་ཤིག་དང
འདབ་མ་དམར་པོ་དེའི་གྲོལ་སྟངས་གང་འདྲ་ཡིན་ནམ་ཞེས་འདྲི་ན
སྦྲང་མ་སེར་བོ་དེའི་འབབ་ཡུལ་གང་ཞིག་ཡིན་ནམ་ཞེས་འདྲི་ན

ལན་གྱིས་དབུལ་བའི་མཆུ་སྒྲོས་དག་གི་གས་སྲུབས་དང 
བརྗེད་ངེས་ཀྱི་རས་ལྡེབས་ནར་མོའི་ངོས་རྣམས་སུ
སྟོང་གསུམ་གྱི་འཇིག་རྟེན་ཧྲིལ་བོ་འདིའང
ཁྱེད་ཀྱི་མིག་གིས་མ་གཟིགས་ཤིང      ང་ཡི་མིག་གིས་མ་མཐོང་བའི
སྙན་ངག་བཅོས་མ་ཞིག་གི་དཔེ་མཚོན་ཁོ་ནའོ་ཞེས
སྤོབས་པ་དང་བཅས་སྨྲ་བར་བྱ་སྟེ

དོ་དགོང     ཐ་སྙད་འདི་དག་ཀྱང་སྒོ་དང་སྒེའུ་ཁུང་ཅི་ཡང་མེད་པའི
སྨྱུག་བསླས་ཀྱི་གཟེབ་ཅིག་ཏུ་ཚུད་ཡོད་པ       གཏན་དུ་དྲན་པར་བྱའོ

                                                                       ༢༠༠༩ལོའི་ཟླ༦པར།

རྩོམ་ཁུངས། ངེད་དྲ་བ།