ཞོགས་པ༼ ༡ ༽

ང་ཧ་ཅང་དགའ་སྟེ
ངས་ཞོགས་པའི་བར་སྣང་དུ་ལུས་རྩལ་སྦྱོང་བའི་མི་ཞིག་མཐོང་སོང
བྱེའུ་ཧ་ཅང་དགའ་སྟེ
ར་ཅོ་གུག་པའི་ལུ་གུ་ཧ་ཅང་དགའ་སྟེ
ཞོགས་པའི་རྩྭ་མགོ་རུ་ཆགས་པའི་བ་མོ་ཧ་ཅང་དགའ་སྟེ
ཞོགས་པ་འདི་ནས་བཟུང་དཔྱིད་ཀྱི་མགོ་ཚུགས་སོ་ཟེར
ངས་ཤེད་ཤུགས་ཡོད་ཚད་ཀྱིས
མདང་གི་རྨི་ལམ་སྤར་མོ་གང་བོ་བར་སྣང་དུ་གཡུགས་རྗེས
ང་ཧ་ཅང་དགའ་སྟེ
ངས་ཞོགས་པའི་ཉི་རྩེ་དུམ་བུ་གཉིས་སུ་བཅགས་སྟེ
ཕྱེད་ཀ་ཁྱེད་དང    ཕྱེད་ཀ་ང་རང་ལ་ཁྱེར་ཡོད

              ཞོགས་པ༼ ༢ ༽

ཆུ་འདི་དག   ང་དང་འདྲ་བར
རྩྭ་འདབས་ན་ཉལ་ཡོད
རྩྭ་འདི་དག   ང་དང་འདྲ་བར
ལམ་འགྲམ་ན་ཉལ་ཡོད

བྱེའུ་ལྔ་དྲུག་ཅིག་ཁང་ཀླད་ལས་འཕུར་ཏེ
ཅིར་ཅིར་གྱི་འབོད་སྐད་སྔ་རྗེས་སུ་གྲགས་འོང
བཀྲ་ཤིས་པར་ཤོག   བཀྲ་ཤིས་པར་ཤོག་ཅེས
གསོལ་འདེབས་མ་ཚར་གོང་ལ
བསེར་བུ་འཁྱམ་པོ་ཞིག་གོམ་པ་སྔ་གཞུག་གིས་ཐོན་ཏེ
ང་དང་ཆུ་ཐིགས་ལྷན་དུ
ང་དང་རྩྭ་ལོ་ལྷན་དུ
ཞོགས་པ་འདིའི་ཉི་འོད་ཀློང་དུ་དེད་བྱུང

             ཞོགས་པ༼ ༣ ༽

ཞོགས་པ་འདིར
ང་རང་ཉི་འོད་ཀྱི་ཆ་ཤས་ཤིག་ཏུ་གྱུར
ངའི་མིག་ཟུང་ནི་ང་རང་གི་ཆ་ཤས་ཡིན་པ་བཞིན་དུ

ཞོགས་པ་འདིར
ང་རང་རྫ་རི་འདིའི་ཆ་ཤས་ཤིག་ཏུ་གྱུར
ང་ཡི་ཟུངས་ཁྲག་ནི་རྫ་ཆུ་འདིའི་ཆ་ཤས་ཡིན་པ་བཞིན་དུ

ངའི་ལག་པ་དང་རྐང་བའང
ཞོགས་པ་འདིའི་ཆ་ཤས་གང་རུང་ཞིག་ཡིན་ཏེ
སྡོང་བོའམ   རྩི་ཏོག་གམ
ལོ་མ་གང་རུང་ཞིག་གི་ཆ་ཤས་དང་འབྲེལ་བ་ཡོད་པ་བཞིན་དུ

ཡིན་ནའང   ངའི་བསམ་གཞིག་ཁོ་ན་མིན་ཏེ
དེ་ནི་རྫ་ཆུའི་སྟེང་འཚེར་བའི་ཉི་འོད་མིན་ལ
དེ་ནི་ལོ་མའི་སྟེང་འཁྱིལ་བའི་ཟིལ་བའང་མིན་ཏེ

དེ་ནི་གྲོག་རོང་ན་ཤུར་ཤུར་ལྡང་བའི་བསེར་བུ་དེ་ཡིན
དེ་ནི་ཐོ་རེངས་སྔོན་རི་རྒྱབ་ཏུ་འཁྲིགས་པའི་མུན་པ་དེ་ཡིན
དེ་ནི་ཞོགས་པ་འདིའི་སྔ་རོལ་དུ་སད་པའི་ཟླ་འོད་དེ་ཡིན

             ཞོགས་པ༼ ༤ ༽

ཉི་འོད་ཀྱིས
ཆུ་ཟིལ་ལྟ་བུའི་ཞོགས་པ་འདི་ལའང
དབུགས་ཀྱི་འབྱིན་རྔུབ་གནང་བྱུང

ང་ཚོ་ཁང་མིག་གཅིག་ནས་ཁང་མིག་གཞན་ཞིག་ལ་ཆས་དུས
ང་ཚོས་ལམ་བར་གྱི་སྡོང་བོ་རེ་གཉིས་དང
སྐྱ་ཀ་དང
རླུང་དང
ལས་སྒྲུབ་ལ་འགྲོ་བའི་མི་རེ་གཉིས་མཐོང་སོང

ཞོགས་པའི་ཉི་འོད་ནི་མེ་ལོང་ཞིག་སྟེ
དེ་ཡི་ཁྲོད་ནས
ང་ཚོས་རང་ཉིད་ཀྱི་གྲིབ་མ་དང
བཀྲུས་ནས་མ་དག་པའི་བླ་སྲོག་རེ་རེ་བཞིན་མཐོང་སོང

            ཞོགས་པ༼ ༥ ༽

ཞོགས་པར
ངས་སྒེའུ་ཁུང་གི་ཤེལ་ཡོལ་ངོས་སུ་རླུང་བུ་ཞིག་བྲིས
རླུང་བུ་ལྡང་ཐེངས་གཅིག་གིས
སྒོ་འགྲམ་གྱི་རྒྱ་ལྕང་ལོ་མ་ག་ས་ག་རུ་གཏོར་སོང
ལོ་མའི་རྩེ་རུ་ཆགས་པའི་ཤིང་བལ་གྱིས
ངའི་སྐྲ་ལོ་དང་ཕྲག་གོང་ཡོངས་སུ་དཀར་པོར་བསྒྱུར་དུས
ངས་རྒྱ་ལྕང་གི་ཡལ་གའི་སྟེང་དུ་ཁུག་རྟ་ཞིག་བྲིས
ཁེ་གྲི་ཞིག་དང་འདྲ་བའི་ཁུག་རྟས
ཡལ་གའི་རྩེ་ཡི་ཤིང་ཕྲན་དག་ཁམ་དུ་བཟུང་སྟེ
ངའི་སྒེའུ་ཁུང་གི་ལོགས་སུ
དཀྱིལ་འཁོར་དབྱིབས་ཀྱི་ཚང་མལ་ཞིག་བཟོས

ངས་ད་དུང་མུ་མཐུད་དུ་ཅི་ཞིག་འབྲི་འདོད་དུས
སྒེའུ་ཁུང་གི་ཐེམ་པར་བཞག་པའི་མེ་ཏོག་དེ
རླུང་གིས་བཞད་དེ
ཞིམ་ཞིམ་གྱི་དྲི་མ     ག་ས་ག་རུ་གཏོར་སོང
སྐྱུར་སྐྱུར་གྱི་དྲན་པ    ག་ས་ག་རུ་གཏོར་སོང་།

(མཆོད་མེའི་པར་དབང་གཞན་གྱིས་དགོལ་མི་རུང) 

རྩོམ་ཁུངས། ངེད་དྲ་བ།