ཉོན་མོངས།༼བཅད་མ༽
ལུས་པོ་ཅི་ཙམ་བཀྲུས་ཀྱང་།།
སེམས་ལ་ས་རྡུལ་བབབ་པས།།
རྨི་ལམ་འཁྲུག་པར་དོགས་ནས།།
གཉིད་སྨན་ཡང་ཡང་བཏུང་སོང་།།
ལག་ཕྱིས་དཀར་པོ་ཞིག་ལས།།
རྙོག་ཆུ་ནག་པོ་བཙིར་ཏེ།།
མེ་ལོང་ཁྲ་ཁྲ་ཕྱིས་ནས།།
ཕྱི་དྲོ་མང་པོ་འདས་སོང་།།
གླེགས་བམ་མཐུག་པོ་ཞིག་ལ།།
རྩིས་ཁྲ་སྣ་ཚོགས་བཀོད་ཅིང་།།
ཡན་ལག་ཉིང་ལག་སྡོམ་པའི།།
ཐ་གུར་མདུད་པ་བརྒྱབ་བཞག།
ན་ནིང་བཙུགས་པའི་ཟམ་པ།།
ད་ལོ་བརྒལ་དགོས་མི་འདུག།
ཆུ་མོ་ཟམ་པ་བསྐྱུར་ནས།།
གོ་ལ་གཞན་དུ་བཞུར་སོང་།།
གཉིད་ལས་སད་འདུག་སྙམ་ནས།།
ལག་པ་ཕར་ལ་བསྲིངས་ཀྱང་།།
མཛུབ་སྣེ་ཐོགས་སའི་རྡོ་བ།།
ངོ་བོ་གཞན་དུ་འགྱུར་སོང་།།
རི་མོའི་ངོས་ཀྱི་མཛེས་མར།།
ཤི་གསོན་མེད་པར་འདུག་ཀྱང་།།
འདྲིས་པའི་སྙིང་གི་བྱམས་པ།།
རྒས་ནས་གོ་བ་ལོག་སོང་།།
ཁྱི་དེ་སྐར་མར་ཟུག་ནས།།
ནམ་གུང་ཕར་ལ་འདས་སོང་།།
སྨག་རུམ་ཁྲོད་ཀྱི་གླུ་བ།།
བསྒུགས་ཀྱང་བསླེབ་རྒྱུ་མ་བྱུང་།།
སྲེད་པས་བརྩིགས་པའི་མཁར་གྱང་།།
རང་གི་རྩིབས་མར་གྱུར་སོང་།།
རང་གིས་རང་ལ་བཟོས་པའི།།
ལུས་ཀྱི་བཙོན་ཁང་འགྲུབ་སོང་།།
མ་ཅིག་ལབ་ཀྱི་སྒྲོན་མས།།
རྐང་གླིང་ཅི་ཙམ་བུས་ཀྱང་།།
དུར་དུ་སྦས་པའི་མགོ་བོ།།
ནམ་ཡང་སད་ཐབས་མ་བྱུང་།།
ངོས་གཅིག་ཁྱོད་རང་ཡིན་ཞིང་།།
གཞན་དེ་ང་རང་ཡིན་པའི།།
གསེར་གྱི་དོང་ཙེ་དེ་ཉིད།།
ཕུག་པ་ནག་པོར་ལྷུང་བས།།
བར་ཐག་ཅི་ཙམ་ཉེ་ཡང་།།
ཕན་ཚུན་མཐོང་ཐབས་བྲལ་བ།།
མི་གསལ་འཁོར་བའི་མིག་འདིས།།
འུ་གཉིས་སྡུག་ལ་སྦྱར་སོང་།།
༢༠༡༢ལོའི་ཟླ་༣པའི་ཚེས་༣༠ཉིན་སྦྱར་བའོ།།
རྩོམ་ཁུངས། ངེད་དྲ་བ།