2023-10-04 འཇོ་མདའ་པདྨ། ཀློག་གྲངས། མཆན ཡོད།

ནགས་ལྗོན་པའི་སྟེང་དུ་བྱ་ཚོགས་འབབ།།
སྐད་ཀྱུར་ཀྱུར་སྨྲ་བཞིན་རྩེད་འཇོར་རོལ།།
ཆུ་གཙང་བོའི་འགྲམ་དུ་མེ་ཏོག་བཞད།།
འཛུམ་ལྷུག་ལྷུག་གྲོལ་བཞིན་མགོ་ལྕོག་ལྡེམ།།

སྤང་གཡུ་ཡི་གཞུང་ལ་ནོར་ཁྱུ་བཀྲ།།
རྩྭ་བཟང་དྲུག་སྨན་གྱི་བཅུད་ཆེན་འཛོམས།།
སྨན་བགོ་བགོའི་བཞོ་དབྱངས་རྣ་བར་སྙན།།
སྟོད་ཡར་འབྲོག་འཚོ་བར་སྣུམ་ཞག་འཁྱིལ།།

རི་མཐོན་པོའི་ཟོམ་དང་སྐེད་པ་རུ།།
སྨུག་ལང་ལོང་ཉིན་མཚན་བསྟུད་མར་འཐིབ།།
སྒར་དགོན་པའི་གསེང་དང་གྲོང་འདབས་སུ།།
རླུང་སིལ་སིལ་ལྡང་བ་ཡི་གར་འོང་།།

དགུང་ཉི་མའི་འོད་ལ་དམར་མདངས་རྒྱས།།
དགོང་ས་སྲོད་ཆར་པའི་ཁ་དོག་མཛེས།།
མཐོ་ནམ་མཁའི་སྐར་ཚོགས་འདར་ཞིང་གཡོ།།
དམའ་ས་གཞིའི་ལང་ཚོ་སྒེག་པས་ཕྱུག།།

སྟོད་རི་རྩེའི་སྤྲིན་པ་དལ་གྱིས་རྒྱུ།།
སྨད་ན་གཞུང་རྩི་ཤིང་ལྷོད་ཀྱིས་ལྡེམ།།
གཞིས་འཁོར་བའི་ཀློང་གི་མི་ཚོགས་ཀྱི།།
ནང་སེམས་པའི་དཀྱིལ་དུ་དགའ་བ་འཁྲུངས།།

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

རུས་མིང་།

གསང་ཨང་། མིང་མི་འགོད་པར་སྤེལ།

ར་སྤྲོད་ཨང་།

དཔྱད་མཆན།