རང་སེམས་དར་གྱི་སྐུད་པ་ཕྲ་དྲགས་རུང་།།
རང་བློ་རྒྱ་ཁབ་འདྲ་མོ་གང་བཞག་པའི།།
ལྷ་འདྲེ་གཉིས་ཀྱི་ལྷམ་ཆད་མ་ཉན་པའི།།
དེང་རབས་རྩོམ་དགའི་ཡ་ཁོག་ཡུག་གོ་རེད།།

ཇ་ནེ་ཁ་ཆག་ལྷམ་ཚང་རུལ་བོ་ནས།།
སྔས་འབོལ་ཐེད་པོ་ལྕགས་གོང་གཡའ་མ་སོགས།།
ཅིག་ཅིག་ཆེ་ཚད་ཅིག་ལ་བརྩི་འཇོག་པའི།།
དེང་རབས་རྩོམ་དགའ་ཁྱིམ་ལུད་གསོག་ས་རེད།།

སྡོམ་པ་ཟེར་དུས་འདོམས་ན་ཞེ་སྡང་ཆེ།།
གྲྭ་ལོག་སྟོང་གི་ལྷག་འཕྲོ་ཁྱོད་ཚོ་རེད།།
འདུལ་བ་གླེང་ན་གདོན་འདྲེའི་ངར་ཅན་པོ།།
རྒྱལ་འགོང་འདུས་པའི་ཆོ་འཕྲུལ་ཁྱོད་ཚོ་རེད།།

དེང་རབས་ཟེར་དུས་སྟོན་པ་བརྡུང་སྙིང་ཆེ།།
དམྱལ་བའི་ལྕགས་ཟངས་ནང་ལ་འཕྲོད་ལེ་བོ།།
འཚོ་བ་སྤྲང་ཁུག་འདྲ་མོ་མ་ཁེངས་པར།།
ཧམ་སེམས་མེ་ལྕེས་ཧ་ལམ་འཚིག་བཞག་ཟིག།

དཔྱོད་པ་དགོས་ཞེས་བློ་རིག་ཞར་བཞག་ཟིག།
དོགས་པ་དགོས་ཞེས་དྲན་པ་དོག་འདུག་མོད།།
ཁ་ཤོབ་འཐེན་ན་རི་ཤུབ་བཀོག་སྙམ་སྟེར།།
རུ་ཤུལ་ཐབ་རྡོ་འདི་དག་སྙིང་རེ་རྗེ།།

ཉི་ཚེ་མིག་སྟོང་ཅན་པོས་དཔྱད་ནས་བྲིས།།
ཅིག་ཅིག་མཛའ་མོ་ཅན་ཞིག་བྲིས་ནས་འདུག།
མིག་རྫོད་ཞོགས་དུང་བོང་བུས་བརྐུས་ནས་བྲིས།།
ཨ་ཙི་ཨ་ཙི་གླེན་པའི་ཆོས་དཔོན་འདི།།

ཧྥེང་ལོང་ཁ་ལྕེ་ཅན་པོས་བསྒྲིགས་ནས་བྲིས།།
ཅིག་ཅིག་ཚོན་རིས་མ་ཞིག་ཉན་ནས་འདུག།
མིང་རྫོད་མེ་ལྕེ་རྟོལ་ལུས་བཤུས་ནས་བྲིས།།
ཨོ་ཧོ་ཨོ་ཧོ་བླུན་པོའི་ཁྲིམས་དཔོན་འདི།།

ཡུས་ཅེ་མའོ་ལོ་གཉིས་ཀྱིས་ཉན་ནས་བྲིས།།
ཁུང་ཙི་མུན་ཙི་སོགས་ལ་སྡང་བ་ཆུང་།།
སྒོ་ཤེར་ཚ་མདའ་གཉིས་ཀ་རྨོངས་ནས་བྲིས།།
རང་རེའི་མཁས་ཆེན་སྙིང་ལ་བརྣག་བཞག་ཟིག།

དབྱི་ཐ་ལི་དང་དབྱིན་ཇི་ཧྥ་གོ་ཡི།།
དུས་ཀྱི་ཇག་པའི་རི་ལམ་གཟར་མོ་ནས།།
འདྲ་མཉམ་རང་དབང་རྩད་ནས་དབུལ་ཕྱུག་སྙོམས།།
དྲང་བདེན་གསེར་སྐུད་མ་ཞིག་བརྒྱུས་ནས་འདུག།
སྡེ་བའི་བདེན་པ་ཅུང་ཞིག་བསྟོད་ཆོག་མོད།།

འོ་ཅག་ཤིག་རྒན་མཆན་ནས་ཉལ་དྲགས་ཏེ།།
མཚན་གུང་ཚ་བ་མུན་པ་རྒྱས་དྲགས་ནས།།
ཉལ་ས་དྲོན་པོ་དམྱལ་བའི་སྣང་བ་ཤར།།
ཐར་ལམ་ཟེར་ནས་ཐང་ལ་ལྡིང་བཞག་ཟིག།
མུ་གེའི་བྱེ་ཐང་ཉུལ་བར་ཞེ་རེ་ཁྲེལ།།

ལ་རྒྱ་ཟེར་ནས་ལམ་ནོར་ཐེབས་དྲགས་པའི།།
བླུན་པོའི་རིག་པ་ཀོ་ཁུག་གྱོང་བོ་འདིར།།
ལམ་རིམ་འོད་ཟེར་ཅན་པོས་མཇལ་ཁ་འཇོག།
ཕྱི་མ་ལམ་སྣ་ཟིན་པའི་སྨོན་ལམ་འདེབས།།
ཟོག་ཅིག་ཉན་རུང་ཚོགས་བསགས་ཡོད་པར་སྨོན།།

རྩོམ་ཁུངས། ངེད་དྲ་བ།