ཀ་ཁའི་སྦྱངས་མཚམས་ནི་བཞག་ནས།།
ཁ་བརྡའི་གླེང་གཞི་ཡང་བསྐྱུར་ནས།།
ག་ལེར་གཞན་སྐད་ཅིག་བསླབས་པའི།།
ང་འདིའི་རང་ཚུགས་དེ་མཚར་བ།།
 
ཅ་ཅོ་འདུ་འཛི་ལ་ཆགས་ནས།།
ཆ་མེད་མི་ལ་རང་འགྲོགས་ནས།།
ཇ་ཆང་བག་མེད་དུ་སྤྱད་པའི།།
ཉ་ཉོག་ང་འདི་ཅིག་རྫོབ་པ།།
 
ཏ་སྒུར་རང་གཤིས་དེ་འཁྱོག་པོ།།
ཐ་ན་ཀུན་ལའང་མ་བསྟུན།།
ད་དུང་རང་ཤེད་རང་ཚ་བའི།།
ན་གཞོན་ང་འདི་ཅིག་ལད་པ།།
 
པ་ལགས་སེམས་གཏམ་དེ་བརྗེད་ནས།།
ཕ་མའི་མིག་བརྫད་ཅིང་བླ་སྒུལ།།
བ་གླང་དུད་འགྲོ་དང་འདྲ་བའི།།
མ་རབས་ང་འདི་ཅིག་བཙོག་པ།།
 
ཙ་ན་སློབ་ལ་ནི་མི་བརྩོན།།
ཚ་གྲང་དཀའ་སྡུག་ཡང་མི་བཟོད།།
ཛ་ལང་སྤྱོད་པ་དེར་གོམས་པའི།།
ཝ་ཕྲུག་ང་འདི་ཅིག་སྡུག་པ།།
 
ཞ་བོའི་རིགས་ལ་ནི་མཚང་དྲུས།།
ཟ་ཉལ་མི་ལ་ནི་ངན་སྨྲས།།
འ་ཆད་ལས་ཀ་དེར་བརྩོན་པའི།།
ཡ་མཚན་ང་འདི་ཅིག་གླེན་པ།།
 
ར་མ་ཕག་ལུག་གི་སྤྱོད་པས།།
ལ་ལའི་ཡིད་སེམས་དེ་བསྲེགས་ཤིང་།།
ཤ་ཚ་སྙིང་རྗེ་ཡང་མེད་པའི།།
ས་མཐའི་ང་འདི་ཅིག་ངན་པ།།
 
ཧ་ཅང་ཀུ་རེ་ནི་མིན་ལ།།
ཨ་བུའི་རང་གཤིས་དེ་མཁྲེག་པོ།།
ཧ་རེ་ཧུ་རེར་ཅིག་བལྟས་ན།།
ཨ་ཨ་ང་རང་ལ་ཅི་བྱུང་།།
                     ༢༠༡༢ལོའི་ཟླ༡༠པའི་ཚེས་༢༠ལ་འཇར་པན་གྱི་རྒྱལ་ས་ཐོའོ་ཁཱོ་རུ་ཤར་མར་བྲིས།

རྩོམ་ཁུངས། ངེད་དྲ་བ།