དུག་གསུམ་རྩལ་འབྱིན་དུག་གི་ཉིང་ཁུ་ལ།།

དུག་ཏུ་མི་སེམས་དུག་སླད་འཁྲུལ་ཤེས་ཀྱིས།།

དུག་ལ་སྤྱོད་ཅིང་དུག་གིས་བརླགས་མཐོང་ནས།།

དུག་སྐྱོན་བགྲངས་ཏེ་དུག་ངན་དགག་ལ་སྤྲོ།།

དུག་ཆེན་སྐབས་འགར་ནད་ལ་ཕན་སྲིད་ཀྱང་།།

དུག་གི་རང་བཞིན་ཤེས་ནས་བསྟེན་ཤེས་དགོས།།

དུག་ངན་རང་དགར་སྤྱོད་པའི་ནད་པ་དེ།།

དུག་གིས་མྱོས་པ་མིན་ཡང་སྨྱོན་པ་རེད།།

དུག་སྡོང་གྲིབ་བསིལ་ཚད་ཆེན་སྐྱོབ་པ་བཞིན།།

དུག་གི་ནུས་པས་དགའ་བདེ་འཁྲུལ་སྣང་འཆར།།

དུག་གི་ཞལ་སྐྱེམས་སྐབས་འགར་མཁོ་ན་ཡང་།།

དུག་ཁུ་བདུད་རྩིར་འཛིན་པ་གླེན་པའི་ཕུལ།།

དུག་ཆང་གནོད་ཚབས་ཆེ་བའི་མྱོང་འགྱུར་ལ།།

དུག་ཟས་བསྟེན་རྣམས་ཅི་སྟེ་འདང་མི་རྒྱག།

དུག་འདིས་ཆོས་པ་རྣམས་ཀྱི་སྡོམ་པ་ཉམས།།

དུག་འདིས་སྲིད་དོན་སྒྲུབ་རྣམས་སྲིད་ཁྲིམས་འགལ།།

དུག་འདིས་དབང་ཐང་ཅན་གྱི་དབང་ཆ་འཆོར།།

དུག་འདིས་སྙན་གྲགས་ཅན་གྱི་སྙན་པ་འགོག།

དུག་འདིས་བློ་གསལ་སྐྱེས་བུའི་ཤེས་རིག་འགྲིབ།།

དུག་འདིས་ཞི་དུལ་བག་ཡོད་གཤིས་བཟང་ལད།།

དུག་འདིས་དཔའ་བོའི་མཚོན་ཆ་ས་ལ་འབྲུལ།།

དུག་འདིས་འཆལ་གཏམ་བརྡོལ་བས་དོན་རྣམས་བརླགས།།

དུག་འདིས་ཚིག་རྩུབ་མཚོན་སྤྲོས་གཞན་སེམས་གནོད།།

དུག་འདིས་རྙིང་སྐྱུག་རུལ་དྲིས་གཞན་སྐྱུག་ལྡོག།

དུག་འདིས་ལུས་ཟུངས་ཟད་དེ་འདྲེ་ལྟར་འགྱུར།།

དུག་འདིས་ནད་བརྒྱ་བསྐྱེད་ཅིང་ཚེ་སྲོག་གཅོད།།

དུག་འདིས་གཉེན་བཤེས་རྩ་ལག་འཁོན་ཞིང་འགྲས།།

དུག་འདིས་བཟའ་ཁྱིམ་བཟང་པོ་འཁྲུགས་ཤིང་འཐོར།།

དུག་འདིས་དཔོན་དང་ཡུལ་མིས་ཁྲེལ་ཞིང་སྡང་།།

དུག་འདིས་སྤྱོད་ངན་ལ་ཞུགས་ཁྲིམས་ཆད་འཕོག།

དུག་འདིས་ཁྲེལ་དང་ངོ་ཚའི་རྒྱན་དང་འབྲལ།།

དུག་འདིས་མགྲོན་གྲལ་བཞག་པ་ཁྱི་གྲལ་འཕེན།།

དུག་འདིས་ཉེས་སྐྱོན་མང་བས་བརྗོད་མི་ལང་།།

དུག་འདི་བག་མེད་སྤྱོད་པར་ག་ལ་རུང་།།

དུག་ལ་དགའ་བའི་ཡིད་དབང་སྐྱོན་ཅན་རྣམས།།

དུག་ཁུར་སྐྱོན་བརྗོད་གཏམ་འདིར་མི་དགའ་ཡང་།།

དུག་མིན་སྒྲུབ་བྱེད་ཡང་དག་ཡོད་རེ་རྐན།།

དུག་ངན་བག་མེད་སྤྱོད་པའི་སྙིང་མེད་རྣམས།།

དུག་ཆུས་བརླགས་ལ་སྙིང་གིས་མ་བཟོད་ནས།།

དུག་སྡོང་གཅོད་པའི་སྟ་རེ་རྣོ་ངར་ཅན།།

དུག་རྩད་འདོན་ཕྱིར་འཕྱར་མཁན་དོར་ཞིའོ།།

རྩོམ་ཁུངས། དོར་ཞིའི་གསུང་རྩོམ་ཐོར་བུ།