བོད་ཀྱི་གཞོན་ནུ།
མཐོ་མཐོ་འཛམ་གླིང་ཡང་རྩེར་འགྱིང་བ་ཡི།།
སྐྱིད་སྐྱིད་ཕ་ཡུལ་ལྗོན་པའི་ཞིང་ཁམས་དངོས།།
རིང་རིང་ལོ་རྒྱུས་ལྡན་པའི་གནས་ཀྱི་མཆོག།
མཛེས་མཛེས་གངས་ཅན་སྙན་པ་རིང་ནས་འཕུར།།
ཡང་ཡང་ཡུལ་གྲུ་འདི་ན་བསྟི་བ་ཡི།།
Kkགཞོན་གཞོན་ཕོ་མོ་དཔྱིད་ཀྱི་སྨྱུག་གསར་ནི།།
མང་མང་མཁའ་ཡི་སྐར་ཚོགས་ལས་མང་ཞིང༌།།
གསལ་གསལ་བློ་གྲོས་ཉི་ཟླའི་དཔལ་དང་མཉམ།།
གང་གང་ཤེས་བྱའི་གནས་ལ་ཆེས་བརྩོན་ཞིང༌།།
འཇམ་འཇམ་གཤིས་ཀ་ལུ་གུའི་བལ་གྱི་སྤུན།།
མཐུན་མཐུན་མཛའ་བའི་འཆིང་ཞགས་མི་ལྷོད་པའི།།
བཟང་བཟང་བོད་ཀྱི་གཞོན་ནུར་མི་སྨོན་སུ།།
རང་གི་སྐད་ཡིག་གཙོར་བཟུང་བྱེད་དང་ལྷན།།
ལྷན་ཅིག་གཞན་གྱི་ཡིག་རིགས་སྦྱངས་བརྩོན་གྱིས།།
ཤེས་བྱའི་མཐོང་རྒྱ་ཆེ་རུ་གཏོང་ཕོད་པའི།།
བོད་ཀྱི་གཞོན་ནུ་སྐད་གཉིས་ལོ་ཙཱར་མཁས།།
བཞི་བརྒྱ་རྩ་བཞིའི་ནད་རིགས་འབུ་ཕྲ་ཀུན།།
རྣམ་དཔྱོད་ཕྲ་མཐོང་ཤེལ་གྱིས་ལེགས་མཐོང་ཞིང༌།།
གཟའ་སྐར་ཉི་ཟླའི་བགྲོད་པ་རྟོགས་ནུས་པའི།།
བོད་ཀྱི་གཞོན་ནུ་སྨན་དང་རྩིས་ལ་མཁས།།
དབྱངས་ཅན་རྒྱུད་མངས་ཁེངས་པ་འཕྲོག་བྱེད་ཅིང༌།།
ཕྲ་ལྡེམ་སྐེད་ཟུར་སྨྱུག་མའི་གཟུགས་འཛིན་པ།།
རྐང་སྟབས་དྲུག་ཅུ་རྩ་བཞི་སྒྱུར་མཁས་པའི།།
བོད་ཀྱི་གཞོན་ནུ་གླུ་དང་གར་ལ་མཁས།།
འཚོ་བའི་བརྗོད་བྱ་ཡིད་འོང་མཛའ་ན་མོར།།
ཚིག་སྦྱོར་ནོར་བུའི་དོ་ཤལ་བརྒྱན་མ་ཐག།
དནྜེའི་ཡིད་དབང་ཅིག་ཅར་འཕྲོག་ནུས་པའི།།
བོད་ཀྱི་གཞོན་ནུ་སྡེབ་ལེགས་རྩོམ་ལ་མཁས།།
དེང་རབས་ལག་རྩལ་སྦྱངས་པ་མཐར་སོན་ཞིང༌།།
སྣ་ཚོགས་འཕྲུལ་གྱི་འཁོར་ལོར་དབང་སྒྱུར་བ།།
གསར་གཏོད་མདུན་མཆོངས་ཕོད་པའི་གདོང་མཆོངས་པ།།
བོད་ཀྱི་གཞོན་ནུ་བཟོ་ཡི་རིག་པར་མཁས།།
འཁོར་གསུམ་ཐོགས་མེད་བསྐོར་བ་ལྟ་ཅི་སྨོས།།
དེང་འཕྲུལ་མཚོན་ཆ་གར་འཕང་དེར་ཕོག་ཅིང༌།།
བདེ་རྩལ་སྲུང་རྒོལ་གཉིས་ཀ་བྱང་ཆུབ་པའི།།
བོད་ཀྱི་གཞོན་ནུ་དྲག་པོའི་རྩལ་ལ་མཁས།།
གསར་ཉ་དངོས་ལྟར་འཁྱུག་པའི་ལུས་པོ་ཡིས།།
མཆོངས་རྒྱུག་འཕེན་ལ་གཞན་དྲིང་མི་འཇོག་ཅིང༌།།
སྣ་ཚོགས་སྤོ་ལོ་སོགས་ལ་ཆེས་དགའ་བའི།།
བོད་ཀྱི་གཞོན་ནུ་ལུས་ཀྱི་རྩལ་ལ་མཁས།།
གསལ་པོའི་རིག་པས་གནམ་གཤིས་བརྟག་དཔྱད་དང༌།།
གཉེན་པོའི་སེར་མོས་ཕྲེང་རྡོག་གློག་ལྟར་སྐུལ།།
ཡིག་ཟམ་དཔྱིད་བསུའི་བྱ་མ་རྟ་ལ་སོགས།།
བོད་ཀྱི་གཞོན་ནུ་གང་དང་གང་ལའ་མཁས།།
གཡང་དཀར་ལུ་གུར་བུ་བཞིན་བྱམས་པ་དང༌།།
འབྲི་གཡག་རྟ་དྲེལ་གྲོགས་ལྟར་འབྲལ་མེད་ཀྱིས།།
ཤ་མར་བལ་ཕྱུར་རི་ལྟར་སྤུང་ནུས་པའི།།
བོད་ཀྱི་གཞོན་ནུ་འབྲོག་པའི་ལས་ལ་མཁས།།
གཤིན་པོའི་ཞིང་ལ་བཟང་པོའི་ས་བོན་དང༌།།
སྔོ་ཆུ་ཡུར་མ་ལུད་དང་ཐན་འགོག་དང༌།།
སད་སེར་སྔོན་འགོག་ཚན་རིག་ལ་བརྟེན་པའི།།
བོད་ཀྱི་གཞོན་ནུ་སོ་ནམ་ལས་ལ་མཁས།།
བལ་གྱི་རྒྱུ་སྤུན་དར་སྐུད་ལས་མཛེས་ཤིང༌།།
ངོ་མཚར་ཤིང་གི་ཁྲི་ལ་ལེགས་བཞོན་ཏེ།།
མྱུར་པོས་མིག་ཟུར་མགྲོན་བུའི་མཉམ་གཡུགས་ཀྱིས།།
བོད་ཀྱི་གཞོན་ནུ་སྣ་མང་ཞོར་ལས་མཁས།།
མར་གྱིས་བཅོས་འདྲའི་བརྐོས་རིས་རབ་འཇམ་ཞིང༌།།
ཐུན་མིན་རི་མོའི་ཚོན་མདངས་རྣམ་པར་བཀྲ།།
ཕ་བོང་ཚངས་པའི་ཐིག་ལྟར་རྩིག་ནུས་པའི།།
བོད་ཀྱི་གཞོན་ནུ་ཨར་ལས་ལག་རྩལ་མཁས།།
གླུ་གར་གཞས་ཀྱི་སྒོར་མོ་སྒོར་གཞས་དང༌།།
ལྷ་མོའི་མེས་པོ་འཕྱོངས་རྒྱས་སྤུན་མཆེད་བདུན།།
སྒྲུང་གཏམ་གཏམ་དཔེ་གཞས་མ་གཏམ་ལ་སོགས།།
བོད་ཀྱི་གཞོན་ནུ་དམངས་ཁྲོད་རྩོམ་རིག་མཁས།།
བོད་ཀྱི་གཞོན་ནུའི་སེམས་ཤུགས་སྟག་ལས་ངར།།
བོད་ཀྱི་གཞོན་ནུའི་ལས་འགན་རི་ལས་ལྗི།།
བོད་ཀྱི་གཞོན་ནུའི་ཕུགས་བསམ་མཁའ་ལས་ཡངས།།
བོད་ཀྱི་གཞོན་ནུ་ཕ་ཡུལ་བསྐྲུན་པར་མཁས།།
དེ་སྐད་གོ་དཀའི་བརྡ་རྙིང་དང་བྲལ་བའི།།
གོ་བདེའི་ཚིག་ཕྲེང་བསྟོད་ཚིག་དར་དཀར་འདི།།
བོད་ཀྱི་གཞོན་ནུའི་མགུལ་དུ་ཕུལ་ལགས་ན།།
དེ་བས་སྙིང་སྟོབས་བསྐྱེད་ཅིག་གཞོན་ནུའི་ཚོགས།།
རྩོམ་ཁུངས། ཡར་ཀླུང་གླུ་གསར།
