གཏམ་བཤད་པ།
      
      ཁ་བརྡ།
      
      འགྲན་ཞུགས་པ་དང་ལྟད་མོ་བ།
      
      དགེ་སློབ་གྱི་མཉམ་པར།
   ཉེ་སྔོན་ང་ཚོའི་སློབ་གླིང་གིས༼ཀྲུང་དབྱང་མི་རིགས་སློབ་ཆེན་གྱི་བོད་རིག་པ་སློབ་གླིང༽ཡུལ་སྐད་འགྲན་བསྡུར་སྐབས་གསུམ་པ་སྤེལ་གྲབས་ཡོད་པ་ཐོས་ཤིང་།དེ་ནི་སྔོན་ཆད་ང་རང་ཁྲིན་ཏུའུ་ན་ཡོད་དུས་ཐོག་དང་པོར་སྤེལ་མྱོང་བ་དང་དེ་དུས་དྲ་བ་དང་བོད་ཀྱི་ཤེས་ཡོན་པའི་སྡེ་རུ་གླེང་བྱ་ཆེ་ཤོས་ཤིག་ཏུ་གྱུར་མྱོང་བ་དྲན་གྱིན་འདུག་པས།རང་ཡང་དེ་ལ་ཞུགས་འདོད་ཆེན་པོ་བྱུང་ལ།མིང་ཐོ་འགོད་སའི་ལས་ཀ་བ་བཙལ་དུས་མ་གཞི་དེ་ནི་དངོས་གཞིའི་སློབ་མར་བཀོད་སྒྲིག་བྱས་པ་ཡིན་པས་ཞིབ་འཇུག་སློབ་མ་ཞུགས་ཆོག་གིན་མི་འདུག འདི་ནི་ང་ལ་མཚོན་ན་ཕངས་སེམས་ཤིག་རེད་ལ་རང་གིས་མཚན་མོ་ཞིག་གི་རིང་ལ་བསྒྲིགས་པའི༼ཨ་མདོའི་སྤྲང་གོག་དང་ཉི་མ་ལྷ་ས༽ཞེས་པའི་གླེང་གཞི་དེ་གླེང་མ་ཐུབ་ནི་བློ་ཕམ་པ་ཞིག་ཀྱང་རེད།འོན་ཀྱང་སློབ་གླིང་འདིར་ཡོང་བ་ནས་བཟུང་རང་གིས་ཆེས་དོ་སྣང་བྱས་པའི་བྱ་འགུལ་འདིར་བལྟ་འདོད་པའི་འདུན་པ་ལ་ནི་ཅུང་ཟད་ཀྱང་མ་གནོད་པར་མདང་དགོང་དུས་ལྟར་བལྟ་བར་ཕྱིན་པ་ཡིན།
    ཚོགས་ར་སྔོན་ཆད་རྒན་མཁར་རྨེའུ་བསམ་གཏན་ལགས་ཀྱི་འཆད་ཁྲིད་སྤེལ་སའི་ཚོགས་ཁང་དེ་ཡིན་པས་ཆ་མེད་པའི་ཚོར་བ་བྱུང་མ་སོང་ལ།ཞུགས་མཁན་ཚོ་ནི་ངོ་གདོང་ཅུང་སྨུག་ལ་མང་ཆེ་བས་བོད་ལྭ་གྲ་དག་པོ་གོན་པའི་རིགས་གཅིག་པའི་སྤུན་ཟླ་ཚོ་ཡིན་པས་དེ་བས་ཀྱང་ཆ་མེད་པའི་ཚོར་བ་བྱུང་མ་སོང་།དེའི་ཕྱིར་ང་རང་ཚོགས་ར་འདིར་འཛུལ་བ་ནས་བཟུང་དེ་རིང་གི་དགོང་མོ་འདི་དོན་མེད་པར་ཚར་མི་སྲིད་པའི་ཡིད་ཆེས་ཞིག་ཀྱང་སྐྱེས་བྱུང་།
    འགྲན་བསྡུར་ཞུགས་མཁན་མང་ཆེ་བ་ནི་ལོ་རིམ་དང་པོ་དང་གཉིས་པའི་སློབ་གྲོགས་ཚོ་རེད་ལ།ཁོ་ཚོ་སྔོན་ཆད་རང་རང་གི་ཕ་ཡུལ་ན་ཡོད་དུས་ཡུལ་སྐད་ཀྱི་གནད་དོན་དང་ལྷག་པར་དུ་ང་ཚོ་མི་རིགས་གཅིག་གི་ནང་ཁུལ་དུ་འདི་འདྲ་བའི་དབྱེ་བ་ཆེན་པོ་དང་གོ་བརྡ་འཕྲོད་དཀའ་བ་ཞིག་ཡོད་པ་ཕལ་ཆེར་ངོས་ཟིན་ཡོད་རྒྱུ་མ་རེད།འོན་ཀྱང་ཁོ་ཚོ་འདི་རུ་འཛོམས་ཤིང་ཆོལ་ཁ་གསུམ་གྱི་སྤུན་ཟླ་དག་དང་མཉམ་པོར་འཚོ་བ་རོལ་དུས་ཡུལ་སྐད་གྱི་ཁྱད་པར་གྱིས་ང་ཚོ་ཅུང་ཟད་རིང་དུ་བཀྱེད་ཡོད་པ་མཐོང་བ་རེད་ལ།དེ་ནས་ཁོ་ཚོས་ཕན་ཚུན་ལ་སློབ་སྦྱོང་དང་ཆ་འཕྲིན་བརྗེ་རེས་ཀྱི་དོན་བཟང་གི་དབུ་བསླངས་པ་རེད།དོ་ནུབ་ཡང་?ོ་ཚོས་རང་རང་གི་ལུང་བའི་སྐད་ཉི་ཚེ་བ་དག་ཅུང་ཟད་ལོགས་སུ་བསྐྱུར་ཞིང་རང་ལ་མ་གོམས་པ་དང་ད་སོ་མ་གོམས་བཞིན་པའི་ལུང་བ་གཞན་ཞིག་གི་ཡུལ་སྐད་སྤྱད་ནས་ཀུན་གྱི་མིག་ལམ་དུ་རང་གི་འཚོ་བ་དང་བསམ་བའི་ཟུར་ཞིག་བསྟན་སོང་བ་འདི་ནི་ངོ་མ་སྔར་མཐོང་མ་མྱོང་བའི་ལོངས་སྤྱོད་རྒྱ་ཞིང་རྒྱས་པ་ཞིག་རེད།
     དེ་དག་ལས་རེ་འགའ་ཟུར་དུ་སྨྲས་ན་དཔེར་ན་ཕ་ཡུལ་ཁྲི་ཀ་ནས་ཡིན་པའི་སློབ་གྲོགས་ཚེ་དབང་རྣམ་རྒྱལ་གྱིས་གལ་སྲིད་བོད་ལ་སྤྱི་སྐད་ཅིག་ཡོད་ན་ང་ལ་ཕན་པ་ག་རེ་འདུག་ཅེས་པ་ནི་བག་ཆགས་ཅུང་ཟབ་པའི་གཏམ་བཤད་ཅིག་རེད།ཁོང་གིས་བོད་རིགས་བུ་མོ་མང་པོ་ཞིག་དགའ་རོགས་སུ་འཚོལ་ཐུབ་པ་དང་སློབ་མའི་ཚོགས་པའི་ནང་ནས་གོ་ས་མཐོ་སེ་ཞིག་རག་ཐུབ་པ་ལ་སོགས་པའི་གནས་ལུགས་ནི་ཕར་བལྟས་ཚོད་ལ་མི་མང་པོ་ཞིག་ལ་བསམ་པ་དེ་ཡོད་ཀྱང་ཚོགས་པའི་དབུས་སུ་སྨྲ་བར་མི་འོས་པ་དང་དོན་དག་ཆོ་མེད་པར་ངོས་འཛིན་ངེས་མོད།འོན་ཀྱང་ང་ཚོས་དོན་ངོ་མར་འདི་འདྲ་བའི་དོན་ཞིབ་ས་ནས་བསམ་བློ་བཏང་ན་འདི་ཡང་གནས་ལུག?་ཆེན་པོ་འདུག་པ་མ་ཟད།མཐར་དེད་ན་ཕལ་ཆེར་འདི་ལས་མ་འདས་པས།འདི་ནི་དོན་དག་ཆུང་ངུ་རུ་ཡོན་ཏན་རྒྱ་ཆེན་པོ་སྟོན་པའི་གཏམ་བཤད་དཔེ་མེད་པ་ཞིག་རེད་ལ་དེར་འོས་པའི་དགའ་བསུ་ཡང་མི་དམན་པ་ཞིག་ཐོབ་སོང་།ཡང་ཕ་ཡུལ་སྡེ་རོང་ནས་ཡིན་པའི་སློབ་གྲོགས་ཚེ་གྲུབ་ལྷ་མོ་ཟེར་བ་དེ་ནི་བདག་གིས་ད་བར་དུ་མཐོང་བའི་ཆེས་བག་ལྷོད་པའི་བོད་རིགས་བུ་མོ་དེ་ཡིན་ཟེར་ཆོག སྤྱིར་ང་ཚོའི་བོད་རིགས་བུ་མོ་ཀུན་གཤིས་ཀ་འཇམ་ལ་བག་ལྷོད་མོད་ཚོགས་པའི་དབུས་སུ་གཏམ་སྨྲ་བའི་དུས་ལ་སླེབས་ཚེ་སུ་ཡིན་ཡང་འཚབ་ནས་གཏམ་མི་འཁྲོལ་བ་སོགས་ཀྱི་གནས་ཚུལ་ཐོན་སྲིད་མོད།ཁོ་མོ་ནི་དེ་ལས་འདས་སྟེ།གཏམ་བཤད་ཀྱི་འགོ་མཇུག་ཀུན་ཏུ་དལ་ཞིང་ལྷོད་ལ་སྒྲ་མཐོ་དམའ་རན་པའི་སྐད་ཅིག་གིས་རང་གི་བསམ་ཚུལ་ལྷུག་པོར་བརྗོད་ལ་མཐར་དྲི་བ་དྲིས་ལན་གྱི་དུས་སུའང་རང་དང་ཕ་ཡུལ་གྱི་སློབ་གསོའི་གནས་བབས་ཟུང་དུ་སྦྲེལ་ནས་བརྩོན་འགྲུས་སྐོར་གྱི་ལན་ཡག་པོ་ཞིག་བཏབས་པ་ནི་ཡིད་དུ་འོང་བ་ཞིག་རེད།དེ་མིན་ཕ་ཡུལ་ནག་ཆུ་སོག་རྫོང་ནས་ཡིན་པའི་སློབ་གྲོགས་བུ་མོ་དེས།ཡུལ་སྐད་གསུམ་ལས་རང་ཉིད་ཀྱི་ཞན་ཤོས་ནི་ཨམ་སྐད་ཡིན་ཟེར་ཞིང་།ཡང་ཆུ་ལྟར་བཞུར་བའི་ཨམ་སྐད་ལ་ས་གནས་ཀྱི་ཁྱད་ཆོས་ལྡན་པའི་དབུས་སྐད་དང་ཁམས་སྐད་བསྲེས་ནས་གཏམ་བཤད་གསོན་ཉམས་ལྡན་པ་ཞིག་སྤེལ་བ་དེས་ཚོགས་རར་ཡོད་པའི་དབུས་ཕྱོགས་ཀྱི་སློབ་གྲོགས་མང་པོས་ཁུ་སིམ་མེར་ཉན་ནས་འདུག་པའི་སྣང་ཚུལ་གཏོར་ནས་གད་མོ་ཐག་གེར་བཏང་སོང་ལ་ཁོ་མོར་ཡང་གསོལ་རས་སུ་ཨང་དང་པོའི་གཟིགས་བཟོས་ཕུལ་བ་ནི་དོན་ལ་གནས་པ་ཞིག་རེད།ད་དུང་ཕ་ཡུལ་ཨ་མདོ་ཅོ་ནེ་ནས་ཡིན་པའི་སློབ་གྲོགས་མགོན་པོ་དབང་ལྡན་གྱིས་དབུས་སྐད་གསལ་ཞིང་དག་པ་ཞིག་བཤད་པར་རྒན་ཚེ་དབང་ལྷ་མོ་ལགས་ཡིད་མ་ཆེས་པར་ཁྱོད་ཀྱིས་ཨམ་སྐད་ཅིག་གསུང་རོགས་ཞེས་པའི་དྲི་བ་ཤོར་སོང་ལ།ད་དུང་དེ་མིན་པའི་སློབ་གྲོགས་མང་པོ་ཞིག་གི་གཏམ་བཤད་ནི་གསོན་ཉམས་དོད་ཅིང་ཡང་རྗོད་བྱེད་ཡུལ་སྐད་དེར་མ་བྱང་བའི་ཆོབ་ཚ་བོ་ཡང་མང་དུ་ཐོན་ནས་ཚོགས་ར་གང་བོ་གད་མོ་ཐག་གེར་གཏོང་བས་དུས་ཚོད་གཉིས་ལྷག་གི་དུས་ཡུན་ནི་རྒྱུན་ལྡན་གྱི་ཅུང་འགྲོ་དཀའ་བའི་སློབ་ཁྲིད་དང་འཆད་ཁྲིད་ལྟ་བུར་བསྡུར་ན་དལ་ཅིག་གི་རིང་ལ་བུད་སོང་།
      ད་དུང་བྱ་འགུལ་གཞན་པ་དང་འདྲ་བར་མི་གཅིག་གིས་རང་གི་འཆད་བྱ་བཤད་པས་འཐུས་པར་མ་བྱས་པར་དགེ་རྒན་གྱི་དྲི་བ་དང་གོ་རིམ་གཉིས་པ་རུ་ཚོགས་ཞུགས་པ་གཉིས་གཉིས་སུ་བགོས་ནས་ཕན་ཚུན་བར་ཁ་བརྡ་དུས་ཡུན་ཐུང་ངུ་རེར་ཀློད་དུ་བཅུག་པ་དང་།འགྲན་ཞུགས་པར་ལྷག་པའི་དུས་ཚོད་གསལ་བོར་བརྙན་ངོས་ལ་བཀོད་ནས་དུས་ཚོད་དམ་འཛིན་གྱི་བརྡ་གསལ་བོར་གཏོང་བ་སོགས་ནི་བྱ་འགུལ་ཐེངས་འདིའི་མི་འདྲ་ས་དང་ཁྱད་ཆོས་ཀྱང་རེད།
      མདོར་ན་རྒན་ཚེ་རིང་ཐར་གྱིས་ཚོགས་ཐོག་དུ་གསུང་བ་ལྟར་ང་ཚོས་ང་ཨ་མདོ་བ་དང་ཁྱོད་ཁམས་པ།ཁོ་དབུས་པ།ཡང་ན་ངས་ཁྱོའི་སྐད་ལབ་གི་མིན་དང་ངས་ཁྱོའི་སྐད་སྦྱང་གི་མིན་ལྟ་བུའི་གུ་དོག་པའི་བསམ་བློའི་བཀག་རྒྱ་ལས་གྲོལ་ཞིང་ཚོགས་ར་གཅིག་དུ་འཛོམས་ཐུབ་པ་ནི་རྒྱལ་ཁ་ཞིག་རེད་ལ་རྒན་བཀྲ་བྷ་ལགས་ཀྱིས་གསུང་བ་ལྟར་འདི་ལྟ་བུའི་ཁོར་ཡུག་ལེགས་པོ་ཞིག་ཆགས་བཞིན་པའི་དུས་སུ་སློབ་གྲོགས་ཚོས་སྦྱང་མཁན་དང་སྦྱང་ཡུལ་ཕན་ཚུན་བར་འབྲེལ་བ་དང་མཐུལ་སྒྲིལ་བྱས་ནས་མཐར་ཕན་ཚུན་བར་སྐད་ཆའི་བཀག་རྒྱ་མེད་པ་དང་ས་ཁོང་གི་བཀག་རྒྱ་མེད་པའི་ཕྱོགས་ཤིག་ལ་འགྲོ་ཐུབ་ན་ཅི་འདྲ་ལེགས་ཨང་།
 

རྩོམ་ཁུངས། ངེད་དྲ་བ།