གླུ་མ་འཕྱོངས་ཞོལ་སྒྲོལ་མའི་གཞས་ལེན་དགུང་ཚོགས་དེ་ཟླ༥བའི་ཚེས༢༧ཉིན་གྱི་དགོང་མོའི་ཆུ་ཚོད་བརྒྱད་ཀྱི་སྟེང་མོ་རང་གི་མ་ཡུམ་སློབ་གྲྭ་སྟེ་ནུབ་བྱང་མི་རིགས་སློབ་ཆེན་གྱི་རིག་རྩལ་ཚོགས་ཁང་ཆེན་མོ་རུ་གཟབ་རྒྱས་ངང་བསྡུས། རེབ་འདིའི་གཞས་ལེན་དགོང་ཚོགས་འདི་ནི་འཕྱོངས་ཞོལ་སྒྲོལ་མས༢༠༡༠ལོར་མ་ཡུམ་སློབ་གྲྭའི་ལོ་འཁོར་དྲུག་ཅུའི་འཁྲུངས་སྐར་མཛད་སྒོའི་སྟེང་ཞུགས་རྗེས་སུ་མ་ཡུམ་སློབ་གྲྭ་ནས་ཡང་བསྐྱར་སྤེལ་བའི་མི་སྒེར་གྱི་གཞས་ལེན་དགོང་ཚོགས་ཆེན་མོ་ཤིག་ཡིན། གཞས་ལེན་དགོང་ཚོགས་འདི་ནི་ནུབ་བྱང་མི་རིགས་སློབ་གྲྭ་ཆེན་མོའི་ཏང་ཨུ་དྲིལ་སྒྲོག་པུའུ་དང་གུང་གཞོན་ཚོགས་པ། གླུ་དབྱངས་དང་ཞབས་བྲོ་སྡེ་ཁག་བཅས་འབྲེལ་ཡོད་རྩ་འཛུགས་སྡེ་ཁག་དྲུག་ལྷག་གིས་གཙོ་སྒྲུབ་གནང་བ་རེད། ཚེས་༢༧ཉིན་གྱི་ཕྱི་དྲོའི་ཆུ་ཚོད་གསུམ་གྱི་སྟེང་ནས་བཟུང་རིག་རྩལ་ཚོམས་ཁང་ཆེན་མོའི་སྒོ་ཁ་རུ་གླུ་མ་འཕྱོངས་ཞོལ་སྒྲོལ་མའི་གླུ་གཞས་ལ་ཉན་དུ་ཡོང་བའི་རྒྱ་བོད་སོག་གསུམ་གྱི་དགེ་སློབ་གཙོ་བྱས་ལྟད་མོ་མང་པོ་འཚང་ཁ་རྒྱག་གི་ཡོད་ལ་བདེ་སྲུང་མི་སྣ་དང་ལས་བྱེད་མི་སྣའི་བཀོད་སྒྲིག་ལྟར་དགོང་ཚོགས་དངོས་སུ་བདེ་ལེགས་ངང་ཚོགས།  ༼རི་བོ་ཧི་མ་ལ་ཡ་ནས་ཐོན་པའི་བུ་ཕྲུག༽༼ཨ་མའི་སྤྱན་ཟུང༽ ༼ལྷ་སའི་མཚན་མོའི་ཡུལ་ལྗོངས་མཛེས༽༼གྲ་ནང་སྣམ་བུ༽ ༼རང་ཁྱིམ༽སོགས་གླུ་གཞས་བཅུ་དྲུག་ལྷག་བསྟུད་མར་ཉན་མཁན་རྣམ་པའི་སྙན་ལམ་དུ་སྦྱར་བ་ལ་ཀུན་གྱིས་དགའ་བསུ་བྱས་པ་དང་ཐེངས་འདིའི་དགོང་ཚོགས་ལ་སྔར་མེད་ཀྱི་གསོན་ཤུགས་དང་ཡིད་འོང་ག་ཁ་དོག་གསར་བ་ཤིག་བསྐྲུན་བྱུང་ངོ་།།
དགོང་ཚོགས་དེ་མི་འགྱངས་པར་བོད་མིའི་རིག་གནས་དྲ་བའི་ལྟ་ཉན་ལེ་ཚན་བརྒྱུད་ནས་གཏོང་རྒྱུ་ཡིན་ཞིང་། སྐབས་དེར་ཚང་མས་གཟིགས་ཆོག
 

རྩོམ་ཁུངས། ངེད་དྲ་བ།