འདི་ནི་མགོ་ཐོག་གི་ནམ་མཁའ་སྦགས་ཆུ་རྫོད་པོ་ལྟར་ཧ་ཅང་མི་དྭངས་པའི་ཉིན་མོ་ཞིག་ཏེ།      ཨེ་འབབ་སྙམ་པའི་ཁ་བ་ས་རྡུལ་གྱི་གཉེན་པོར་ལྷུང་དུ་མེད་ལ།       ཨེ་དྲོ་སྙམ་པའི་ཉི་མ་ས་སྨུག་གི་རས་ཐུམ་ནང་ནས་བཟི་སྣང་གིས་འཁོར་ཏེ་ཤི་མ་གསོན་གྱིས་འགུལ་གྱིན་འདུག
  ང་རང་ངོ་ཤེས་ཤིག་གི་འཇེབ་འཁོར་ཏུ་བསྡད་དེ་ཡུལ་ལ་ལོག་པའི་དུས་དེ་ཉིད་ལ། འགྲོ་གྲོགས་ནི་ས་འོག་ནས་གནའ་རྫས་སློག་པ་ལྟར་ངོ་ཡེ་ནས་མ་ཐུག་པ་ཞིག་མིན་ཏེ་ང་ཚོའི་དགོན་པའི་གྲྭ་བ་གཉིས་རེད།
  ལབ་གླེང་ཟེར་བ་འདི་ནི་མགོ་ན་སྲབ་མེད་པ་དང་རྐང་ན་སྒྲོག་མེད་པའི་རྟ་བོ་བཏགས་ཤོར་མ་ཞིག་དང་འདྲ་བར་ཅི་བཤད་ལ་སྙིང་བོ་མེད་ཅིང་ཅི་དྲན་ལ་འཆར་བཀོད་ཀྱང་མེད་པས། ང་ཚོའི་ཁ་བརྡ་ཡང་སྐབས་རེར་མཐོ་དྲགས་ཏེ་སྤྲིན་པའི་འཛིང་ཁུག་ན་རྩེན་ཅིང་ཡང་ལན་རེར་དམའ་དྲགས་ཏེ་སྤྲང་བོའི་ལྷམ་ཆུང་ནང་ན་འཁོར་གྱིན་འདུག ཡང་མཚམས་མཚམས་སུ་ཡག་སྣང་བཙོག་སྣང་མེད་པར་སྐྱག་པ་གཏོང་སྲོལ་གྱི་དྲི་ངན་ཁ་དང་། མཇེ་ངན་ལངས་སྲོལ་གྱི་ཆགས་པའི་གསེབ། སྟུ་ཁུང་འཇམ་སྲོལ་གྱི་གཡའ་ཆུའི་ནང་སོགས་ན་རླུང་བུ་ལྡོམ་པོ་ཞིག་ལྟར་རྒྱུ་བཞིན་འདུག
  སྐབས་དེ་ཤེད་ཅིག་ལ་གླེང་ཕྱོགས་ཀྱི་སྤྲིན་པ་སྣེ་རུལ་མ་དེ་གཡས་སུ་མ་གཅུས་གཡོན་དུ་མ་གཟུར་བར་བཤད་རྒྱུའི་མདོ་རྩ་སིལ་ཏོག་གི་ནང་སྙིང་འདྲ་མོ་མཁས་པ་དང་བླ་མའི་བཟང་ངན་ལ་བཅར་བྱུང་། དེ་ལ་གྲྭ་བ་གཅིག་ན་རེ། “ཨོ།  ད་འཇིག་རྟེན་འཁོར་
བ་སྡུག་གི་འོབས་དོང་འདིར་སྐྱེས་ཕྱིན་ཆད།     བརྩོན་པ་ཤིང་གྲི་འདྲ་མོ་འདིས་གཅིལ་ཏེ་ཆོད་རུང་མ་ཆོད་རུང་།       རིག་པ་རྩོ་ཐག་
འདྲ་མོ་འདིས་འཐེན་ཏེ་ཁྲིད་ཐུབ་རུང་མ་ཐུབ་རུང་།  ཡོན་ཏན་ཞིག་སྦྱངས་ན་དེ་ལས་ལྷག་པ་ཞིག་གསེར་གྱི་རི་ཞིག་རྙེད་རུང་དགའ་རྒྱུ་དང་སྤྲོ་རྒྱུ་མེད་ཀ”ཟེར་བར། གཞན་དེས་མགོ་རིལ་རིལ་ལྕགས་རྡོ་འདྲ་མོ་ལྟག་ལོགས་སུ་འགྲིལ་ལོས་འགྲོ་འདོད་བྱེད་ཅིག་ཕྱིར་ལ་དགྱེས་ནས།  མགྲིན་པ་སྦུ་གུའི་མིག་ལོང་འདྲ་མོ་སལ་ཙམ་བྱས་ནས།  སྨྲ་བ་ལྕེ་ཡི་དབང་བོ་འགུལ་ཙམ་བྱས་ནས། མི་དགའ་བའི་མིག་ལོག་ཅིག་གཡོན་ལ་འཁྱུག་ཙམ་དང་གཡས་ལ་འཁྱུག་ཙམ་བྱས་ནས་“དུས་ངན་སྐལ་བའི་མཐའ་མ་འདི་ལ་འདང་རྒྱག་བྱ་སྟུག་ཙམ་ཡང་མེད་པར་ལབ་རྐྱང་མ་རེད་ཡ།  ད་དགེ་བཤེས་ཤིག་ཡིན་རུང་བླ་མ་དམ་པ་ཚོའི་སྟེང་ལ་ཁྱི་ཟུག་ཟུག་བྱེད་འཇོག་གི    འཁོར་བའི་ས་རྡོའི་ནང་ལ་བོང་བུ་འདུར་འདུར་བྱས་འཇོག་གི དེ་འདྲ་ཞིག་ཡིན་དུས།  ཀ་ཁའི་མགོ་རྐང་ཞིག་སྒྲིག་ཐུབ་རུང་བརྒྱ་སྡེའི་གྲལ་ནས་འབུད་སྤྱད་ཅིག་དང་དགྲ་སྡེའི་ནང་ལ་འགྲོ་སྤྱད་ཅིག་རེད་ལ། དེ་འདྲ་ཞིག་ཡིན་དུས་དགོས་པ་ཤིག་གི་སྐྲ་ལོ་ཙམ་དང་མཁོ་བ་སྲོ་མང་གི་ལྐོག་ཤུན་ཙམ་ཡང་མེད་ཀ”ཟེར་གྱིན་མ་དགའ་བའི་མིག་གཉིས་ཀ་ཟུམ་གྱིན།  མ་འཐད་པའི་མཆུ་སྒྲོས་འབུར་གྱིན་བསྡད་ཙ་ན།  གཞན་དེས་ཀྱང་འདོད་པ་མ་རྙེད་པར་སྡང་བ་ཤུགས་ཀྱིས་རྙེད་བྱུང་བས་“ད་བཤད་དཀའ་མོ་ཡིན་ནི་རེད་ཡ།  བླ་མ་ཡིན་རུང་བློ་ཁ་ལོག་སོང་ན།  བློ་ངོ་སྟོང་ནས་དྲན་པ་འཕྲུལ་འདུག་དུས།  ད་གཞན་ལ་ཐོད་པ་གཏུགས་རྒྱུ་ལས་རང་གིས་ཀླད་པ་འགུལ་ན་བཟང་ཀ”ཞེས་ཕྲེང་བ་ལག་མགོར་དཀྲིས་ནས། གཟན་ཤབ་སྐེད་པར་དཀྲིས་ནས་ཧོར་འདུག་ཅིག་བྱས་པ་ན། གཞན་པ་དེས་ཀྱང་མིག་རིལ་རིལ་གཉིས་ཀ་འཇུར་སེར་སོང་ནས།  རྣ་ཅོར་ཅོར་གཉིས་ཀ་གཟེང་སེར་སོང་ནས་“སྐྱག་པ་ཐག་སྣེར་འབྱར་ཡོང་། བསྟན་དགྲ་ནང་ནས་སྐྱེས་འོང་ཟེར་བ་ཅིས་མ་བདེན།  ད་བདེན་ནས་མི་ཚད་མདུན་ན་ཚད་མར་གྲུབ་པ་འདི་རེད། བླ་མར་དད་པའང་མེད་པར་ཡོན་ཏན་སྐམ་པོ་ཞིག་གིས་གཏོར་མ་བཅའ་རྒྱུ་མིན་ནམ།”ཟེར་བར།
  གཞན་དེས་ཀྱང་སྐྲ་རིང་བོ་མེད་རུང་སེན་མོའི་སྲབ་མཐུག་འདྲ་བོ་ཚེར་མ་བཞིན་ཡར་བརྩིང་ནས། ཤ་སྐྱི་མོ་སྲབ་རུང་འདུས་གཉེར་མདུད་པ་བཞིན་རྒྱག་གིན་“བློ་དང་དྲན་པ་གཉིས་ཀ་རླིག་པ་བཞིན་བཏུམས་འདུག་དུས། དོན་ལྔ་སྣོད་དྲུག་པོ་དབྱིན་ཡིག་གི་གསལ་བྱེད་ལྟར་འདོན་ཡང་མི་ཤེས་དུས།   ད་རུང་ཁོག་པའི་མུན་ནག་ནང་ན་ཅི་ཞིག་སྐར་མ་ལྟར་འཚེར་འདུག་ཟེར་ན།  དེ་ནི་གླེན་བཤད་རེད།  དེ་ནི་ཨུ་ཚུགས་རེད།  དེ་ནི་དེ་ནི་སྣང་བ་འཁྲུལ་སོང་བ་རེད།  དྲན་པ་ཉོག་སོང་བ་རེད།”ཟེར་ནས་
གཉིས་ཀ་སྟག་འཛིང་འཛིང་ཞིག་ལོས་བྱེད་འདོད་པའི་སྐབས་དེར།  ངའི་ངོ་ཤེས་ཁ་ལོ་བས་བར་འདུམ་བྱས་ཤིང་།  གཉིས་ཀའི་དེ་བདེན་རབས་བདེན་སྲོལ་མཁར་བརྩིགས་བརྩིགས་བྱས་ཀྱིན་མཐེ་རྒན་ཡང་ཡང་བསྟན་པས་ལག་འཛིམ་ནི་མ་བྱུང་མོད།  འོན་
ཀྱང་།  ཆོས་གྲོགས་གཉིས་ཀ་ནི་ཆ་མེད་རྒྱུས་མེད་ཀྱི་མི་གཉིས་ཐེངས་དང་བོར་འཕྲད་པ་ལྟར་རང་རང་ས་ན་ལྕགས་ཀྱི་ཅ་ལག་ལྕི་མོ་ལྟར་ནག་རོག་གེར་འདུག་པ་འདིས།
  ཆེས་ཐག་རིང་གི་ཆུང་ངུ་ཆུང་ངུ་དག་ཡིན་རུང་འདར་ཏུ་བཅུགས་བྱུང་།   ཐག་ཉེའི་སྦོམ་པོ་བཀན་མོ་དག་ཡིན་རུང་གཡོ་རུ་བཅུགས་བྱུང་། ཡང་ན། གཏིང་ཟབ་སའི་རྒྱ་ཆེ་སའི་མང་བོ་མང་བོ་ཞིག་ཀྱང་སྒྲ་མེད་པར་འུར་ལོང་སེར་བཏང་བྱུང་།
  ང་ཡིས་ལམ་འགྲམ་གྱི་སྐྱ་ཐིང་ངེར་འདུག་པའི་ཡུལ་ལྗོངས་ཀྱི་སྐྱོ་ངལ་དག་ལ་ཅེར་བཞིན།  ལམ་གཞུང་གི་ནག་ཤིག་གེར་འདུག་པའི་ཐིག་རིས་འཁྱོག་པོ་ལྟ་བུ་དག་ལ་ལྟ་བཞིན། ང་ལ་བར་དོའི་འཕྲང་སྒོ་ལྟ་བུ་ཞིག་འགྲིམ་གྱིན་པའི་སྣང་བ་སྐྱུར་བོ་ཞིག་ཁད་ཀྱིས་སྐྱེས་བྱུང་།
  དེ་ནི་ཅི་ཞིག་ཡིན་ནམ།       དེ་ནི་ཅི་ཞིག་ཡིན་ནམ།

           (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།