ལོ་ཟླ་མང་པོར། མཚམས་སྤྲིན་དམར་པོས་མཁའ་མཐའ་ལེགས་པར་སྤུད་པ་བགྲང་ལས་འདས་མོད། དེ་ནི་རྟག་བརྟན་གྱི་མཛེས་པ་ཞིག་མིན་པས་མེ་ཏོག་ལྷ་མཛེས་ཀྱིས་རྟག་པར་སྣང་ཚུལ་དེ་སྣང་མེད་དུ་བསྐྱུར་ཡོད།དེ་རིང་ཡང་ཉི་མ་བཞུད་ཤུལ་དུ།ནུབ་ཕྱོགས་ཀྱི་གནམ་སའི་མཚམས་སུ་མཚམས་སྤྲིན་དམར་པོས་བརྗོད་བྱ་མི་གསལ་བའི་སྣུམ་ཚོན་རི་མོ་ཞིག་གང་བྱུང་དུ་བྲིས་འདུག མེ་ཏོག་ལྷ་མཛེས་ཀྱིས་ཡུན་རིང་ཞིག་ལ་རི་མོ་དེར་དབྱེ་ཞིབ་དང་རོལ་མྱོང་བྱེད་པར་ཧུར་བརྩོན་བྱས་ཀྱང་འབྲས་བུ་གཅིག་ཀྱང་མ་ཐོབ་པས་ཁོ་མོས་ལག་གི་ཁ་པར་དཀར་པོ་དེར་རེག་རེག་འགའ་བྱས་རྗེས་བཅོ་ལྔའི་དུང་ཟླ་བཞིན་མཛེས་པའི་གདོང་ལ་རེ་སྒུག་གི་སྐྱོ་སྣང་ཞིག་ཤར་ནས་རི་སྒང་ལས་མར་བབས།
  དེ་རིང་ནི་གཟའ་སྤེན་པ་ཡིན་པས་མེ་ཏོག་ལྷ་མཛེས་ཀྱིས་ཁོ་མོའི་ཁྱོ་ག་ཆེ་བ་དབང་འདུལ་ཡོང་བར་རེ་སྒུག་བྱས་ཡོད། འོན་ཀྱང་དབང་འདུལ་གྱིས་ད་དུང་ཁ་པར་བཏང་མ་བྱུང་བས་ལམ་བར་དུ་རླངས་འཁོར་ལ་ཆག་སྐྱོན་ཤོར་བ་ཡིན་ནམ། ཡང་ན་དབང་འདུལ་གྱི་སེམས་པ་བུད་མེད་གཞན་ལ་ཤོར་བ་ཡིན། ཡང་ན་ཅི་ཞིག་བྱུང་བ་ཡིན་ནམ། གང་ལྟར། དེ་རིང་དྲོས་ཇ་གཟུར་མ་ཐག མེ་ཏོག་ལྷ་མཛེས་རང་ཁྱིམ་གྱི་རྒྱབ་རིའི་མགོར་བུད་དེ་དབང་འདུལ་ལ་རེ་སྒུག་དང་སེམས་ཁྲལ་བྱས་པ་རེད། ད་ནི་ས་སྲོད་ཀྱི་ཡོལ་བས་ཡུལ་འདིའི་བར་སྣང་བསྒྲིབས་ལ་ཉེ་བས་ཁོ་མོ་ཡང་མགོ་བོ་སྒུར་སྒུར་གྱིས་ཐབ་ཚང་དུ་མི་འགྲོ་ཐབས་མེད་དུ་གྱུར།
  ཁྱིམ་སྒོར་ཐོན་མ་ཐག ཁ་པར་དཀར་པོ་གྲགས་བྱུང་། མེ་ཏོག་ལྷ་མཛེས་དགའ་ཐག་ཆོད་དེ་ཁ་པར་ལ་ཉན།
  “མེ་ཏོག་ལྷ་མཛེས། ང་ཁྱིམ་ལ་ཐོན་རན་ཡོད། ཤ་བཙོས་ཏེ་ང་ལ་བསྒུགས་ནས་སྡོད། སྒོ་ཁར་ང་བསུ་རུ་ཡོང་རྒྱུ་མ་བརྗེད”ཟེར།
  ཡང་གྲགས་པའི་སྐད་ངན་དེ་རེད།
  གྲགས་པ་ནི་མེ་ཏོག་ལྷ་མཛེས་ཀྱི་ཁྱོ་ག་ཆུང་བ་ཡིན། དེ་ནི་ཚོང་ཙ་གེ་ཙིག་གེ་རྒྱག་ཤེས་པ་ཙམ་ལས། ཧོལ་རྒྱུག་ཆེ་བ་དང་དྲན་རྒྱུ་མང་བ་ཞིག་ཡིན་པར་མ་ཟད། མེ་ཏོག་ལྷ་མཛེས་ཀྱིས་བཟོད་བསྲན་བྱེད་དཀའ་བ་ཞིག་ལ་ཁོས་ནམ་རྒྱུན་དུ་ཉལ་ཁང་ནས་མཉམ་དུ་ཉལ་དུས་ནམ་ཡང“ང་དང་མཉམ་དུ་སྤྲོའམ་དབང་འདུལ་དང་མཉམ་དུ་སྤྲོ། ཁྱོད་རང་དོན་ངོ་མས་སུ་ལ་དགའ། སུ་ལ་ནུས་པ་ཆེའམ”སོགས་ལན་འདེབས་དཀའ་བའི་དྲི་བ་མང་པོ་འདོན་པར་མ་ཟད། ལུས་འབྲེལ་བྱེད་དུས་ཀྱང་སྨྱོན་པ་ཞིག་དང་འདྲ་བར་འདི་ལྟར་བྱོས་དང་གན་ལྟར་བྱ་ཞེས་མེ་ཏོག་ལྷ་མཛེས་ལ་མནར་གཅོད་ཚད་མེད་གཏོང་སྲིད།
   དབང་འདུལ་ནི་སློབ་ཆེན་ནས་མཐར་ཕྱིན་པའི་རྫོང་གི་སློབ་གྲྭ་ཞིག་གི་དགེ་རྒན་ཡིན་པ་དང་སྤྱིར་ཁོ་བོ་ནི་ཤུག་གཅིག་ཁྱོ་གཉིས་ཀྱི་གཉེན་དོན་འདིར་གཏན་ནས་མི་འཐད་མོད། འོན་ཀྱང་། ཕ་མ་རྒན་འཁོགས་གཉིས་ཀྱིས་འཆི་རྒྱུ་དང་འཁྱམ་རྒྱུ་སོགས་ཀྱི་མནའ་བསྐྱལ་བ་དང་སྐྲག་སྣང་ཕུད་པ་སོགས་ཐབས་བརྒྱ་ཇུས་སྟོང་བཀོལ་བས་ཁོ་མོས་ཀྱང་རང་དབང་བློས་བཏང་སྟེ་ནུ་བོ་གྲགས་པ་དང་མཉམ་དུ་ཆུང་མ་རུ་མེ་ཏོག་ལྷ་མཛེས་བླངས་པ་རེད།
  དབང་འདུལ་ནི་གྲགས་པའི་ཕུ་བོ་ཡིན་ཕྱིན་མེ་ཏོག་ལྷ་མཛེས་དང་མཉམ་དུ་ཉལ་ཁང་གཅིག་ལས་ཉལ་རྒྱུའི་གོ་སྐབས་དེ་སྲོལ་རྒྱུན་ལྟར་ཐོག་མར་དབང་འདུལ་ལ་དབངཡོད། མེ་ཏོག་ལྷ་མཛེས་ཀྱིས་སྤྱོད་བཞིན་པའི་ཁ་པར་དཀར་པོ་དེ་ནི་དབང་འདུལ་གྱིས་ཁོ་མོ་དང་ཆེས་ཐོག་མར་མཉམ་སྡོད་བྱེད་དུས་བྱིན་པའི་ལེགས་སྐྱེས་རེད། དབང་འདུལ་ལ་སྙིང་གཏམ་མང་པོ་བརྗོད་རྒྱུ་མེད་མོད། འོན་ཀྱང་། ཁོང་ནི་གཙང་སྦྲ་ལ་དགའ་བ་དང་དགོས་མེད་ཀྱི་སྐད་ཆ་མི་གླེང་བར་མ་ཟད། ཁྱིམ་ལ་ཡོང་ཐེངས་རེར་མེ་ཏོག་ལྷ་མཛེས་སོགས་བཟའ་མི་གང་བོར་ལེགས་སྐྱེས་ཆེ་ཆུང་སྣ་ཚོགས་ཁྱེར་ཡོང་བ་ལས“ང་ལ་འདི་དགོས་དང་གན་དགོས”སོགས་ཀྱི་རེ་བ་ཐེངས་གཅིག་ལའང་བཏོན་མ་མྱོང་བས། མེ་ཏོག་ལྷ་མཛེས་ནི་ཁ་ཞེ་གཉིས་མེད་ཀྱིས་དབང་འདུལ་ལ་ཧ་ཅང་དགའ་ཡོད། གཉེན་སྒྲིག་བྱས་པ་ནས་བཟུང་སློབ་གྲྭ་ནས་དམིགས་བསལ་གྱི་དོན་དག་གལ་ཆེན་མེད་ཚེ་ནམ་ཡང་གཟའ་འཁོར་རེ་རེའི་གཟའ་སྤེན་པའི་ཉིན་ནམ་དབྱར་དགུན་གནང་གི་སྐབས་སུ་རང་ཁྱིམ་ལ་ལོག་པར་མ་ཟད་དུས་རྒྱུན་པར་ཡང་མེ་ཏོག་ལྷ་མཛེས་ལ་ཁམས་བདེ་འཚམས་འདྲིའི་ཁ་པར་གཏོང་ངེས་ཡིན། འོན་ཀྱང་། ཟླ་ཕྱེད་ཀྱི་རིང་ལ་དབང་འདུལ་ཕྱིར་རང་ཁྱིམ་དུ་མ་ལོག་པར་མ་ཟད་མེ་ཏོག་ལྷ་མཛེས་ལ་ཁ་པར་ཞིག་ཀྱང་མ་བཏང་བས་མེ་ཏོག་ལྷ་མཛེས་ནི་དྲན་གདུང་དང་སུན་སྣང་གི་གཡང་དུ་ལྷུང་སྟེ་མཐའ་འཁོར་གྱི་མི་དག་གི་ངོ་གདོང་ཙམ་ལ་ཡང་ལྟ་མི་འདོད་པར་གྱུར་པ་དང་། ཉིན་མང་པོར་ཁོ་མོའི་མགོ་བོ་ཡང་ཡར་དགྱེས་མ་མྱོང་། ལྷག་པར་དེ་རིང་ཁྱོ་ག་ཆུང་བ་གྲགས་པའི་སྐད་ངན་དེ་གོ་འཕྲལ་ཁོ་མོའི་སེམས་ལ་རྡོ་ཕ་བོང་ཞིག་གིས་མནན་པ་ལྟར་གོམ་པ་ཡང་སྤོ་མི་ཐུབ་པར་གྱུར།
  ཨ་རག་གི་དྲི་མ་སྣར་གཟན་པ་ཞིག་དང་མཉམ་དུ་གྲགས་པ་རང་ཁྱིམ་དུ་འཛུལ། ཁོ་བོའི་མིག་རྩ་དམར་པོར་གྱུར་པ་དང་ཁ་ལས་མཆིལ་མ་འདག་འདག་གང་བྱུང་དུ་འཕེན་བཞིན“མེ་ཏོག་ལྷ་མཛེས། ང་བསུ་རུ་མི་ཡོང་དོན་ཅི་ཡིན། ཨ། དབང་འདུལ……དབང་འདུལ་ལ་རེ་བ་བྱས་ཀྱང་སྡུག་གྱོང་རེད། རྒྱལ་ཁབ་ཀྱི་ལས་བྱེད་པ་ཞིག་ཡིན་ཚེ……ཕའེ……”ཞེས་ཁ་ནས་མགོ་རྔ་མེད་པའི་སྐད་ཆ་ལྡབ་ལྡིབ་བཤད་བཞིན་ཐད་ཀར་མེ་ཏོག་ལྷ་མཛེས་ཀྱི་ཉལ་ཁང་ནང་དུ་ཕྱིན།
  ཕ་མ་གཉིས་ཀྱིས་སྔ་མོ་ནས་ངལ་གསོས་ཟིན་པས་མེ་ཏོག་ལྷ་མཛེས་ཀྱིས་ཐབ་ཚང་ནས་གྲགས་པར་ཤ་བཙོ་བཞིན་དབང་འདུལ་གྱི་ཁ་པར་ཡོང་བར་ཡིད་ཆེས་བྱས་ཡོད།
   “མེ་ཏོག་ལྷ་མཛེས……ཁྱོད་རང་ངའི་ལོགས་ལ་མི་ཡོང་དོན་ཅི་རེད། མེ་ཏོག་ལྷ་མཛེས……”གྲགས་པས་ལྡ་བེ་ལྡིབ་བེའི་ངང་ཁོའི་ཆུང་མ་འབོད་ཀྱིན་འདུག
  ད་ཅི་གྲགས་པས་ཁ་པར་གཏོང་དུས་ཁོ་བོ་ཨ་རག་གིས་བཟི་མེད་མོད་ཏག་ཏག་དུས་ཚོད་ཕྱེད་ཙམ་གྱི་རིང་ལ་ཡང་སུ་ཞིག་དང་མཉམ་དུ་གང་ཞིག་ནས་ཨ་རག་སྨྱོ་འཐུང་བྱས་པ་ཡིན་ནམ། མེ་ཏོག་ལྷ་མཛེས་ཀྱི་གདོང་ལ་དངངས་སྐྲག་དང་འུ་ཐུག་པའི་ཉམས་ཤིག་ཤར་ཏེ་ལག་གི་ཁ་པར་ལ་ཡང་ནས་བསྐྱར་དུ་རེག་རེག་བྱས་ཀྱང་ཁ་པར་ཁ་གྲག་མ་བྱུང་། ཁོ་མོས་ཁ་པར་ལ་རེག་བཞིན་རང་གི་སྙིང་ནས་བརྩེ་བའི་ཁྱོ་ག་དབང་འདུལ་གྱི་རེག་བྱ་འཇམ་པོ་དེ་ཡིད་ལ་དྲན་བྱུང་།
    གློ་བུར་དུ་མེ་ཏོག་ལྷ་མཛེས་སླར་ཡང་རང་ཁྱིམ་རྒྱབ་ཀྱི་སྒང་རིའི་རྩེར་འགོས་ཏེ་རྒྱང་རིང་ལ་བལྟས། རྒྱང་རིང་རྫོང་མཁར་གྱི་ཕྱོགས་སུ་འཐེན་པའི་གཞུང་ལམ་སྟེང་འགྲོ་འོང་གི་རླངས་འཁོར་གཅིག་ཀྱང་མཐོང་རྒྱུ་མེད་པས་ས་སྲོད་ཀྱི་མི་ཡུལ་ནི་ཁུ་སིམ་མེ། དལ་ཅག་གེ ཡོད་ཚད་གསལ་ལ་མི་གསལ་བར་རབ་རིབ་ཏུ་གྱུར་འདུག མེ་ཏོག་ལྷ་མཛེས་ཀྱིས་ཁ་པར་དཀར་པོར་རེག་རེག་འགའ་བྱས་ཀྱང་ཁྱོ་ག་དབང་འདུལ་ལ་ཁ་པར་གཏོང་བའི་སྤོབས་པ་ཞིག་གཏན་ནས་མ་རྙེད། དབང་འདུལ་ལ་ཕལ་ཆེར་སེམས་གཏམ་བཤད་སའི་སྙིང་གྲོགས་ཤིག་ཡོད་ངེས་རེད། ལོ་འདི་དག་གི་རིང་ལ་ཁོས་མེ་ཏོག་ལྷ་མཛེས་ལ་ཁ་ཞེ་གཉིས་མེད་ཀྱིས་སྙིང་གཏམ་ངོ་མ་ཞིག་བརྗོད་མ་མྱོང་ལ་ཁ་རྩོད་ཚིག་རྩོད་ཅིག་ཀྱང་བྱས་མ་མྱོང་བས་དོན་ངོ་མའི་བཟའ་ཚང་ནི་དེ་འདྲ་ཞིག་གཏན་ནས་ཡིན་མི་སྲིད། འདི་དག་ཚང་མ་ཡང་མེ་ཏོག་ལྷ་མཛེས་ཀྱིས་ཧ་གོ་ཡོད། འོན་ཀྱང་ཁོ་མོར་མཚོན་ན་ཁོ་མོ་ཁྱིམ་འདི་རུ་འདུག་དོན་ནི་ཁྱོ་ག་དབང་འདུལ་གྱི་གཤིས་རྒྱུད་བཟང་པོ་དང་སྐད་ཆ་འཇམ་པོ། རེག་བྱ་འཇམ་པོ་བཅས་ལ་ཞེན་ཆགས་པ་ལས་གཞན་ཅིའི་ཕྱིར་དུའང་མིན། སྔོན་ཆད། ཁྱོ་ག་དབང་འདུལ་གྱི་ཁ་པར་རེ་རེས་ཁོ་མོར་རེ་བ་ཚད་མེད་སྦྱིན་ལ་དབང་འདུལ་གྱི་རེག་བྱ་རེ་རེ་ཡིས་ཁོ་མོ་དམྱལ་བ་ལས་ལྷ་ཡུལ་དུ་དྲངས་མྱོང་།
    ས་རུབ་ནས་མུན་པ་འཐིབས་ཀྱང་ཁ་པར་དཀར་པོ་ད་རུང་ཁ་མ་གྲགས་པས། མེ་ཏོག་ལྷ་མཛེས་ཀྱིས “ངོ་མ། མི་ཡུལ་གྱི་བདེ་སྐྱིད་ནི་དགུང་གི་མཚམས་སྤྲིན་དམར་པོ་ཇི་བཞིན་ཡིད་རྟོན་མི་རུང་བ་ཞིག་རེད་ཨང”ཞེས་ཁ་སང་གི་ཁེར་གཏམ་དེ་བསྐྱར་ཟློས་བྱེད་ཞོར་སླར་ཡང་ལྗིད་ཏིག་ཏིག་གི་རྐང་པ་དྲུད་དེ་རི་སྒང་ལས་མར་བབས།
    གཡུལ་ལས་ཕམ་པའི་དམག་མི་རྨས་མ་ཞིག་དང་འདྲ་བར་ཉལ་ཁང་གི་སྒོ་ཁར་ཐོན་ལ་ཉེ་དུས་མེ་ཏོག་ལྷ་མཛེས་ཀྱིས་ཕམ་ཁའི་ལག་པ་འདར་བཞིན་ཁ་པར་དཀར་པོའི་ཁ་བརྒྱབ། སྤོབས་པ་དང་ཡིད་ཆེས་ཡོངས་སུ་ཤོར་བའི་མེ་ཏོག་ལྷ་མཛེས་ཀྱི་སེམས་ཁོང་མཆི་མས་བརླན་ཡང་སྔར་བཞིན་གྲགས་པའི་རུམ་དུ་འཛུལ།
    “མེ་ཏོག་ལྷ་མཛེས། ཁྱོད་རང་གང་དུ་ཤི་སོང་བ་ཡིན། ཡང་དབང་འདུལ་ལ་བསྒུག་ཏུ་སོང་བ་ཨེ་ཡིན” གྲགས་པས་མེ་ཏོག་ལྷ་མཛེས་ཀྱི་སྐྲ་ནས་བཟུང་སྟེ་སྤྲུག་སྤྲུག་འགའ་བྱས་པ་དང་གློ་བུར་དུ་འདོད་སྲེད་ཀྱིས་མྱོས་པར་གྱུར་པས་སེར་སྣ་མེད་པར་མེ་ཏོག་ལྷ་མཛེས་ལོངས་སུ་སྤྱོད་མགོ་བརྩམས།
    མཁའ་དབྱིངས་སུ་ཟླ་འོད་མི་མཐོང་ལ་སྐར་ཚོམ་བཀྲ་བ་ཡང་མི་མངོན་པས་ཡོད་ཚད་སྐྱི་གཡའ་བའི་གཤིན་རྗེའི་འགག་འཕྲང་དང་ཨ་ན་མ་ན་རེད།

                          (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།