གནའ་སྔ་མོ་སྔ་མོ་ཞིག་ལ།
ངས་སྲོག་ཆགས་ཀྱི་ཁྱུ་ལ་འདི་ལྟར་ཁས་བླངས་མྱོང་།
ང་སོང་རྗེས་ཕྱིར་ལོག་ངེས་ཡིན།
དེ་དུས། ང་ད་དུང་འཇིག་རྟེན་དུ་སྐྱེས་མེད།
ལུས་སྦྱིན་ཕ་མ་ཞེས་པ་ཅི་ཡིན
ཆ་འཚལ་གྱི་མི་འདུག

གནའ་སྔ་མོ་སྔ་མོ་ཞིག་ལ།
ངས་རི་བོ་ཞིག་ལའང་འདི་ལྟར་ཁས་བླངས་མྱོང་།
གལ་ཏེ་བདག་གི་ཕ་ཡུལ་དུ་གྱུར་ན།
ནམ་ཞིག་ཁོ་མོར་ཆུ་དཀོན་ཚེ།
ང་རང་ཆུ་རུ་སྐྱེ་ཞིང་། ཁོ་མོར་རྩི་ཤིང་དང་མེ་ཏོག་དཀོན་ཚེ།
ང་རང་རྩི་ཤིང་དང་མེ་ཏོག་དག་ཏུ་སྐྱེ་རྒྱུ་ཡིན།

ཕྱིས་སུ་ང་ནི་མི་ཞིག་ཏུ་སྐྱེས།
དེ་ནི་ངའི་ཨ་མ་དང་ཨ་ཕ་རྣམ་གཉིས་
སྔར་ནས་མི་རུ་སྐྱེས་པའི་རྐྱེན་གྱིས་ཡིན།
དེ་དང་མཉམ་དུ་ད་དུང་རི་བོ་ཞིག་
བདག་གི་ཕ་ཡུལ་དུ་གྱུར་ཅིང་།
ང་རང་ཁོ་མོའི་རྩིབ་ནས་ནར་སོན།
ཁ་བྲལ་རག་བར་དུ།
ནམ་ཡང་ཆུ་དཀོན་ཞིང་།
རྩི་ཤིང་དང་མེ་ཏོག་ཀྱང་དཀོན།

   འབྲུག་བྱམས་རྒྱལ་གྱིས་རྒྱ་ཡིག་ནས་བསྒྱུར།

       (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།